toggle_night_mode
Hujjat kuchini yo‘qotgan 22.02.2021
Oʻzbekiston Respublikasi Vazirlar Mahkamasining
qarori
PUL MUOMALASINI TARTIBGA SOLIShNING AYRIM
ChORA-TADBIRLARI TOʻGʻRISIDA
 LexUZ sharhi
Mazkur qaror Oʻzbekiston Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.
Pul muomalasini yanada tartibga solish va “Soʻm-Kupon” kursini mustahkamlash maqsadida Vazirlar Mahkamasi qaror qiladi:
1. Belgilab qoʻyilsinki, 1993-yil 16-dekabrdan boshlab non, un, goʻsht, sut, guruch, qand-shakar, choy, oʻsimlik moyi, shuningdek, boshqa barcha oziq-ovqat tovarlari faqat “Soʻm-Kuponlar”ga sotiladi.
2. Rossiya Bankining 1993-yil namunasidagi barcha qiymatdagi pullari 1993-yil 16-dekabrdan boshlab oziq-ovqat tovarlarini sotishda Oʻzbekiston Respublikasi hududida qabul qilinmaydi. Ayni paytda mazkur pullardan toʻlovlarning qolgan barcha turlari uchun, shu jumladan, nooziq-ovqat tovarlari va xizmatlar uchun haq toʻlashda “Soʻm-Kuponlar” bilan bir qatorda toʻlov vositasi sifatida cheklashlarsiz foydalanish saqlab qolinadi.
1994-yilning 1-yanvarigacha nooziq-ovqat tovarlarni sotishda va xizmatlar koʻrsatishda aholidan, “Soʻm-Kuponlar” bilan bir qatorda, SSSR Davlat bankining 1961—1992-yillar namunasidagi qiymati 1,3,5,10 va 25 rubl boʻlgan pullari qabul qilinaveradi.
3 Bank muassalari va ular huzuridagi komissiyalar kundalik doimiy inkassatsiyalash chogʻida savdo tashkilotlari tomonidan oziq-ovqat tovarlarini sotishning belgilangan tartibiga rioya qilishini qattiq nazorat qilsinlar.
4. Oʻzbekiston Respublikasi Markaziy banki 1993-yil namunasidagi Rossiya rubllarini “Soʻm-Kuponlar”ga 1:1 nisbatida, shuningdek, almashtirish fondi (ularni xarid qilish hajmi) doirasida “Soʻm-Kuponlar”ni Rossiya rubllariga almashtiradigan maxsus punktlar tarmogʻini kengaytirsin.
Vazirlar Mahkamasining Raisi I. KARIMOV
Toshkent sh.,
1993-yil 11-dekabr,
596-son