“Alohida muhofaza etiladigan tabiiy hududlar toʻgʻrisida” Oʻzbekiston Respublikasi Qonuniga muvofiq, Oʻzbekiston Respublikasi davlat kadastrlari yagona tizimining amalda boʻlishini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasining muhofaza etiladigan tabiiy hududlari davlat kadastrini yuritish tartibi toʻgʻrisidagi ilova qilinayotgan Nizom tasdiqlansin.

2. Mazkur qarorning bajarilishini nazorat qilish Vazirlar Mahkamasining Agrosanoat kompleksi Kotibiyatiga yuklansin.

1. Muhofaza etiladigan hududlar davlat kadastri Oʻzbekiston Respublikasi Ekologiya va atrof muhitni muhofaza qilish davlat qoʻmitasi tomonidan Fanlar akademiyasi bilan birgalikda yuritiladi va tabiiy muhitning muhofaza etiladigan toifalariga kiritilgan obyektlari boʻyicha birxillashtirilgan maʼlumotlar toʻplamidan iborat boʻladi, u Oʻzbekiston Respublikasi Davlat kadastrlari yagona tizimining tarkibiy qismi hisoblanadi.

2. Muhofaza etiladigan tabiiy hududlar davlat kadastri ana shunday hududlar tarmoqlarini rejalashtirish, ularni muhofaza qilishni taʼminlash, ilmiy tadqiqotlar oʻtkazish, tegishli tartibga rioya qilinishi ustidan davlat nazorati darajasini oshirish, muhofaza qilinadigan tabiiy hududlarning asosiy tavsiflari bilan tezkorlik bilan tanishish, shuningdek ularning ishlab chiqaruvchi kuchlarni rivojlantirish va joylashtirishni rivojlantirishdagi rolini hisobga olish uchun moʻljallangan.

3. Quyidagilar muhofaza etiladigan tabiiy hududlar davlat kadastrini hisobga olish obyektlari hisoblanadi:

davlat qoʻriqxonalari, kompleks (landshaft) zakazniklar, tabiiy bogʻlar, davlat tabiat yodgorliklari, zakazniklari va tabiat pitomniklari, tabiiy kurort hududlari, dam olish hududlari, suvni muhofaza qilish zonalari va qirgʻoqboʻyi polosalari, yer usti va yer osti suvlari hosil boʻladigan hududlar (daryo vodiylari, surilma konuslari, togʻ etaklari) baliqchilik xoʻjaligi hududlari, alohida tabiiy resurslarni boshqarish uchun hududlar, davlat biosfera rezervatlari hamda qonun hujjatlari va xalqaro shartnomalar bilan muhofaza etiladigan toifaga kiritilgan boshqa tabiiy hududlar.

4. Muhofaza etiladigan tabiiy hududlar oʻzining faoliyat koʻrsatish maqsadi va rejimiga koʻra quyidagi toifalarga boʻlinadi:

davlat qoʻriqxonalari;

kompleks (landshaft) zakazniklar;

tabiiy bogʻlar;

davlat tabiat yodgorliklari;

alohida tabiiy obyektlar va komplekslarni saqlash, koʻpaytirish va tiklash uchun hududlar;

muhofaza etiladigan landshaftlar;

alohida tabiiy resurslarni boshqarish uchun hududlar.

5. Muhofaza etiladigan tabiiy hududlar boʻysunishi, muhimligi, shuningdek tabiiy obyektlarning noyobligiga koʻra mahalliy va umumdavlat ahamiyatiga ega boʻlishi mumkin.

6. Faqat qonunchilikda belgilangan tartibda tashkil etilgan obyektlargina roʻyxatdan oʻtkaziladi va muhofaza etiladigan tabiiy hududlar kadastriga kiritiladi.

Obyektlarni kadastrga kiritish uchun zarur boʻladigan hujjatlar roʻyxati Ekologiya va atrof muhitni muhofaza qilish davlat qoʻmitasi tomonidan belgilanadi.

7. Muhofaza etiladigan tabiiy hududlar davlat kadastri ushbu hududlarning huquqiy maqomi va tartibi, ularning jugʻrofiy holati, miqdori va sifatiga oid tavsiflari, ekologik, ilmiy, maʼrifiy, tarixiy va boshqa qimmatlari, idoraviy mansubligi, yer egalari va yerdan foydalanuvchilar, shuningdek hisobga olingan har bir obyekt boʻyicha ushbu hududlardagi tabiiy resurslardan foydalanish xarakteri toʻgʻrisidagi maʼlumotlardan iborat boʻladi.

Kadastr hujjatlari kartografiya, fotografiya, hisobot, hisobga olish materiallarini va boshqa materiallarni, muhofaza etiladigan tabiiy hududlarning holati toʻgʻrisidagi, kadastr shakllarini tuzishda hisobga olinadigan maʼlumotlarni oʻz ichiga oladi.

8. Muhofaza etiladigan tabiiy hududlar kadastri quyidagi asosiy shakllarni oʻz ichiga oladi:

1-shakl (yigʻma) — “Muhofaza etiladigan tabiiy hududlar roʻyxati”;

2-shakl — “Davlat qoʻriqxonalari, kompleks (landshaft) zakazniklar, tabiiy bogʻlar, davlat biosfera rezervatlarining yer-suv resurslari”;

3-shakl — “Davlat qoʻriqxonalari, kompleks (landshaft) zakazniklar, tabiiy bogʻlar, davlat biosfera rezervatlarining oʻsimlik dunyosi”;

4-shakl — “Davlat qoʻriqxonalari, kompleks (landshaft) zakazniklar, tabiiy bogʻlar, davlat biosfera rezervatlarining hayvonot dunyosi”;

5-shakl — “Davlat tabiat yodgorliklarining, alohida tabiiy obyektlar va komplekslarni saqlash, koʻpaytirish va tiklash uchun hududlarning umumiy tavsifi”;

6-shakl — “Muhofaza etiladigan landshaftlarning, alohida tabiiy resurslarni boshqarish uchun hududlarning umumiy tavsifi”;

7-shakl — “Muhofaza etiladigan tabiiy hududlar tabiatni muhofaza qilish faoliyatining asosiy natijalari”.

Shakllarning tuzilishi va mazmuni Davlat ekologiya qoʻmitasi tomonidan belgilanadi.

9. 7-shakldan tashqari, barcha shakllar boʻyicha maʼlumotlar tuman (“T” literli shakl), viloyat (“V” literli shakl) va respublika (litersiz shakl) darajasida ishlab chiqiladi. 7-shakl boʻyicha maʼlumotlar faqat tuman darajasidagina beriladi.

Barcha shakllarga (tuman, viloyat va respublika darajasida) muhofaza etiladigan tabiiy hududlarning hozirgi holati va uning oʻzgarishi darajasi tahlil qilingan holdagi qisqacha izohnoma beriladi.

10. Tuman darajasida — muhofaza etiladigan tabiiy hududlar kadastri tarkibiga “T” literi bilan barcha shakllar boʻyicha maʼlumotlar, muhofaza etiladigan tabiiy hududlar rahbarlarining hisobotlari, tadqiqotlar, izlanishlar materiallari, hisobga olish maʼlumotlari va boshqa birlamchi kadastr hujjatlari kiritiladi.

Viloyat darajasida — muhofaza etiladigan tabiiy hududlar kadastri tarkibiga “T” va “V” literlari bilan barcha shakllar boʻyicha maʼlumotlar kiritiladi.

Respublika darajasida — muhofaza etiladigan tabiiy hududlar kadastri tarkibiga “V” literi bilan va litersiz barcha shakllar boʻyicha maʼlumotlar kiritiladi.

11. Muhofaza etiladigan tabiiy hududlar kadastri Davlat ekologiya qoʻmitasining uch darajadagi organlari:

tuman (shahar) va viloyat (Qoraqalpogʻiston Respublikasi) darajasida — bioxilmaxillik va muhofaza etiladigan tabiiy hududlarni muhofaza qilish va ulardan foydalanishni nazorat qilish hududiy inspeksiyalari tomonidan (keyingi oʻrinlarda bioxilmaxillik boʻyicha hududiy inspeksiyalar deb ataladi);

respublika darajasida — Davlat ekologiya qoʻmitasi huzuridagi Bioxilmaxillik va muhofaza etiladigan tabiiy hududlarni muhofaza qilish va ulardan foydalanishni nazorat qilish inspeksiyasi tomonidan yuritiladi.

12. 3 va 4-shakllar boʻyicha maʼlumotlarni tayyorlashda Oʻzbekiston Respublikasi Fanlar akademiyasi ishtirok etadi.

13. Yer osti chuchuk suvlarining shakllanish hududlari boʻyicha kadastr maʼlumotlari Oʻzbekiston Respublikasi Davlat geologiya va mineral resurslar qoʻmitasi tomonidan tuziladi. Belgilangan shakldagi yakuniy maʼlumotlar umumiy kadastrga kiritish uchun ushbu Nizomda nazarda tutilgan muddatlarda Davlat ekologiya qoʻmitasi organlariga taqdim etiladi.

14. Kadastr tadrijiy ravishda yuritiladi, shakllar boʻyicha maʼlumotlar, hisobot yilidan keyingi yilning 1-yanvaridagi holat boʻyicha, har yili bir marta taqdim etiladi.

15. Tuman va viloyat darajalarida 2-t, 3-t, 4-t, 5-t, 7-t shakllar boʻyicha maʼlumotlar bioxilmaxillik boʻyicha hududiy inspeksiyalarga (obyekt joylashgan joydagi) muhofaza etiladigan tabiiy hududlar rahbarlari* tomonidan hisobot yilidan keyingi yilning 1-fevraligacha taqdim etiladi.

6-t va 7-t shakllar boʻyicha maʼlumotlar yerlarni hisobga olish hujjatlari asosida bioxilmaxillik boʻyicha hududiy inspeksiyalar tomonidan tayyorlanadi.

Bioxilmaxillik boʻyicha hududiy inspeksiyalar taqdim etilgan maʼlumotlar (hisobotlar)ning toʻgʻriligini aniqlaydilar, tuman (shahar) boʻyicha muhofaza etiladigan tabiiy hududlar roʻyxatini tuzadilar (1-t yigʻma shakl), barcha kadastr materiallarini 1-t, 2-t, 3-t, 4-t, 5-t, 6-t, 7-t shakllar boʻyicha 1-martgacha tuman hokimliklari bilan kelishadilar.

16. Viloyat darajasida olingan materiallar bioxilmaxillik boʻyicha hududiy inspeksiyalar tomonidan umumlashtiriladi va tahlil qilinadi, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari bilan kelishib olinadi hamda 1-aprelgacha 1-0, 2-0, 3-0, 4-0, 5-0, 6-0 shakllar boʻyicha Davlat ekologiya qoʻmitasi huzuridagi Bioxilmaxillik va muhofaza etiladigan tabiiy hududlarni muhofaza qilish va ulardan foydalanishni nazorat qilish inspeksiyasiga yuboriladi.

17. Respublika darajasida muhofaza etiladigan tabiiy hududlar davlat kadastri Davlat ekologiya qoʻmitasi huzuridagi Bioxilmaxillik va muhofaza etiladigan tabiiy hududlarni muhofaza qilish va ulardan foydalanishni nazorat qilish inspeksiyasi tomonidan yuritiladi.