Temir yoʻl transportida Oʻzbekiston Respublikasi bojxona chegaralaridan oʻtuvchi yoʻlovchilarning qoʻl yukini, bagajini, valyutasini va valyuta boyliklarini bojxona nazoratidan oʻtkazishni tartibga solish, shuningdek Oʻzbekiston Respublikasi bojxona chegaralaridan oʻtish punktlarida ularni bojxona rasmiylashtiruvi uchun zarur shart-sharoitlar yaratish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi bojxona chegarasini kesib oʻtish chogʻida yoʻlovchilarning qoʻl yukini, bagajini, valyutasini va valyuta boyliklarini bojxona nazoratidan oʻtkazish maqsadida yoʻlovchi tashuvchi temir yoʻl transporti vositalarini toʻxtatish uchun moʻljallangan chegara temir yoʻl stansiyalari roʻyxati 1-ilovaga muvofiq;

hududida “Oʻzbekiston temir yoʻllari” kompaniyasi bojxona organlariga xizmat xonalari beradigan chegara temir yoʻl stansiyalari roʻyxati 2-ilovaga muvofiq tasdiqlansin.

2. “Oʻzbekiston temir yoʻllari” kompaniyasi 1999-yilda Buxoro viloyatidagi Xoʻjadavlat stansiyasida, kelgusida aloqa vositalari bilan taʼminlangan mahalliy tarmoqlar tashkil qilinishini hisobga olgan holda, inshootlar va muhandislik kommunikatsiyalariga ega boʻlgan bojxona posti qursin.

Oʻzbekiston Respublikasi Davlat bojxona qoʻmitasi qurilish tugallangandan keyin postni zarur inventar, asbob-uskunalar va aloqa vositalari bilan jihozlasin.

3. Oʻzbekiston pochta va telekommunikatsiyalar agentligi mazkur punktlarni Davlat bojxona qoʻmitasi buyurtmanomasiga binoan aloqa xizmatlari va vositalari bilan belgilangan tartibda taʼminlasin hamda kelgusida ularning uzluksiz ishlashini taʼminlasin.

4. Oʻzbekiston Respublikasi Davlat bojxona qoʻmitasi Moliya vazirligi, Markaziy bank va “Oʻzbekiston temir yoʻllari” davlat-aksiyadorlik kompaniyasi bilan birgalikda Temir yoʻl transporti yoʻlovchilarining qoʻl yukini, bagajini, valyutasini va valyuta boyliklarini bojxona nazoratidan oʻtkazish va rasmiylashtirish tartibini ishlab chiqsin hamda ikki oy muddatda tasdiqlasin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari L. A. Axmetov zimmasiga yuklansin.

“Naymankoʻl” temir yoʻl stansiyasi

“Karakalpakiya” temir yoʻl stansiyasi

“Andijon” temir yoʻl stansiyasi

“Xoʻjadavlat” temir yoʻl stansiyasi

“Qarshi” temir yoʻl stansiyasi

“Boldir” temir yoʻl stansiyasi boʻyicha

“Sariosiyo” temir yoʻl stansiyasi

“Amu-Zang” temir yoʻl stansiyasi

“Bekobod” temir yoʻl stansiyasi

“Qoʻqon” temir yoʻl stansiyasi

“Urganch” temir yoʻl stansiyasi

Toshkent markaziy yoʻlovchi stansiyasi

“Karakalpakiya” stansiyasidan “Naymankoʻl” temir yoʻl stansiyasigacha va “Naymankoʻl” temir yoʻl stansiyasidan “Karakalpakiya” stansiyasigacha qatnov yoʻlida bojxona rasmiylashtiruvini amalga oshirish.

“Xovos” stansiyasidan “Bekobod” stansiyasigacha qatnov yoʻlida bojxona rasmiylashtiruvini amalga oshirish.

“Boldir” stansiyasidan “Termiz” stansiyasigacha va “Termiz” stansiyasidan “Boldir” stansiyasigacha qatnov yoʻlida bojxona rasmiylashtiruvini amalga oshirish.

“Bekobod” stansiyasidan “Xovos” stansiyasigacha qatnov yoʻlida bojxona rasmiylashtiruvini amalga oshirish.

Bojxona rasmiylashtiruvi “Urganch” stansiyasida amalga oshirilishi munosabati bilan “Shovot” va “Pitnak” temir yoʻl stansiyalari orqali yoʻlovchi tashuvchi poyezdlar toʻxtamasdan oʻtadi.

Toshkent markaziy yoʻlovchi temir yoʻl stansiyasi.