“Garov toʻgʻrisidagi” Oʻzbekiston Respublikasi Qonuniga oʻzgartirishlar va qoʻshimchalar kiritish haqida”gi Oʻzbekiston Respublikasi Qonunini bajarish yuzasidan Vazirlar Mahkamasi qaror qiladi:

Oʻzbekiston Respublikasi Vazirlar Mahkamasining quyidagi qarorlariga oʻzgartirishlar va qoʻshimchalar kiritilsin:

1) Vazirlar Mahkamasining 1994-yil 3-maydagi 233-son qarorining birinchi bandi quyidagi tahrirda bayon qilinsin:

“Garovga qoʻyilgan mulkni majburiy sugʻurta qilish boʻyicha eng kam sugʻurta tarifi yiliga mulk qiymatining 0,5 foizi miqdorida belgilansin;

qishloq tovar ishlab chiqaruvchilari uchun garovga qoʻyilgan mulkni majburiy sugʻurta qilish boʻyicha eng kam sugʻurta tarifi yiliga mulk qiymatining 0,25 foizi miqdorida belgilansin”;

ikkinchi band oʻz kuchini yoʻqotgan deb hisoblansin;

2) Vazirlar Mahkamasining “Oʻzbekinvest Interneshnl”, “Oʻz AIG” qoʻshma sugʻurta kompaniyalarini va “AIG-Oʻzbekinvest” agentligini tashkil etish toʻgʻrisida” 1994-yil 23-noyabrdagi 565-son qarori 2-bandining toʻrtinchi xatboshi “sugʻurta xizmatlari koʻrsatish” soʻzlaridan keyin “garovga qoʻyilgan mulkni majburiy sugʻurtalash ham” soʻzlari bilan toʻldirilsin va soʻngra matn boʻyicha;

3) Vazirlar Mahkamasining “Kreditlar qaytarilishi va dehqonchilik mahsulotlarini yetishtirish boʻyicha ishlarni oʻtkazish uchun avans tariqasida beriladigan mablagʻlar qaytarilishi hamda fyuchers kontraktlar boʻyicha qishloq xoʻjaligi korxonalarining javobgarligini majburiy sugʻurta qilish boʻyicha sugʻurta toʻlovlari miqdorlarini tasdiqlash toʻgʻrisida” 1997-yil 9-apreldagi 179-son qarorining 2-bandi oʻz kuchini yoʻqotgan deb hisoblansin.