Vatan ozodligi va yurt ravnaqi yoʻlida xizmat qiladigan barkamol yosh avlodni tarbiyalash, ularni harbiy kasblarga yoʻnaltirish ishlarini takomillashtirish maqsadida Vazirlar Mahkamasi qaror qiladi:

1. Xorazm viloyati hokimligi va Oʻzbekiston Respublikasi Xalq taʼlimi vazirligining Urganch shahridagi Xorazm viloyati xalq taʼlimi boshqarmasi tasarrufidagi harbiy kasblarga ixtisoslashtirilgan maktab-internatni bevosita Oʻzbekiston Respublikasi Xalq taʼlimi vazirligi tasarrufiga oʻtkazish toʻgʻrisidagi taklifiga rozilik berilsin.

2. Oʻzbekiston Respublikasi Xalq taʼlimi vazirligi (T. Joʻrayev) Urganch shahridagi harbiy kasblarga ixtisoslashtirilgan maktab-internatni belgilangan tartibda oʻz tasarrufiga qabul qilib olsin va uni Qoraqalpogʻiston Respublikasi hamda Xorazm viloyati hududidagi harbiy kasblarga yoʻnaltirilgan tayanch muassasaga aylantirish va uning nufuzini oshirish chora-tadbirlarini koʻrsin.

3. Oʻzbekiston Respublikasi Moliya vazirligi (S. Rahimov) mazkur taʼlim muassasasining xarajatlarini qoplash uchun 2005-yilgi respublika budjeti va Xorazm viloyati mahalliy budjeti parametrlariga tegishli oʻzgartirishlar kiritilishini taʼminlasin.

4. Vazirlar Mahkamasining “Oʻzbekiston Respublikasi Xalq taʼlimi vazirligi huzuridagi bolalar sportini rivojlantirish jamgʻarmasi faoliyatini tashkil etish toʻgʻrisida” 2004-yil 29-avgustdagi 410-son qaroriga (Oʻzbekiston Respublikasi QT, 2004-y., 8-son, 88-modda) 2-ilovaning “Mutasaddilik qilinadigan tashkilotlar” ustunidagi “Toshkent, Fargʻona va Samarqanddagi” soʻzlari “Toshkent, Fargʻona, Samarqand va Urganchdagi” soʻzlari bilan almashtirilsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Qosimov zimmasiga yuklansin.