toggle_night_mode
Hujjat 04.12.2025 sanasi holatiga
Amaldagi versiyaga o‘tish
Oʻzbekiston Respublikasi Prezidentining
Farmoni
Xotin-qizlarni qoʻllab-quvvatlashga oid qoʻshimcha chora-tadbirlar toʻgʻrisida
Xotin-qizlarning iqtisodiy faolligini oshirish, ularning daromad topish va kasb-hunar oʻrganish imkoniyatlarini kengaytirish maqsadida qaror qilaman:
I. Asosiy maqsadlar:
1. Quyidagilar ushbu Farmonning asosiy maqsadlari etib belgilansin:
(a) mahallalarda xotin-qizlarning bandligini taʼminlash va salomatligini mustahkamlash markazlari faoliyatini kengaytirish;
(b) 2026-2027-yillarda “HAMROH” xotin-qizlar tadbirkorligini qoʻllab-quvvatlash kompaniyasi” MCHJ (keyingi oʻrinlarda — Kompaniya) tomonidan:
(i) 6 ming nafar xotin-qizlarning tadbirkorlik loyihalarini moliyaviy qoʻllab-quvvatlash uchun 2 trillion soʻm yoʻnaltirish;
(ii) 2,8 ming nafar xotin-qizlarni tadbirkorlikka oʻqitish;
(iii) 2 ming nafar xotin-qizlarning tadbirkorlik faoliyatiga hamrohlik qilish asosida koʻmaklashish.
II. Xotin-qizlarning tadbirkorlik loyihalarini moliyaviy qoʻllab-quvvatlashni kengaytirish
2. Mahallalarda xotin-qizlarning bandligini taʼminlash va salomatligini mustahkamlash markazlari (keyingi oʻrinlarda — Markazlar) faoliyatini kengaytirish maqsadida:
(a) hokimliklar zaxirasidagi sugʻorilmaydigan boʻsh yer maydoni mavjud mahallalarda 300 metr kvadratgacha boʻlgan yer uchastkalari doimiy foydalanish huquqi asosida;
(b) boʻsh turgan davlat mulki obyektlari yoki uning bir qismi operativ boshqaruv huquqi asosida Qoraqalpogʻiston Respublikasi oila va xotin-qizlar qoʻmitasi, viloyatlar va Toshkent shahri oila va xotin-qizlar boshqarmalariga ajratilsin.
3. Belgilansinki, Markazlar quyidagi tartibda tashkil etiladi:
(a) tuman (shahar) hokimliklari tomonidan qonunchilik hujjatlarida taqiqlanmagan manbalar hisobidan;
(b) tuman (shahar) oila va xotin-qizlar boʻlimlarining tavsiyalari asosida:
(i) davlat-xususiy sheriklik shartlarida;
(ii) kasb-hunar oʻrgatish faoliyati bilan belgilangan tartibda shugʻullanuvchi tashabbuskor tadbirkorlarning binolarida.
4. Belgilansinki, tuman (shahar) hokimliklari tomonidan tashkil etilgan Markazlar tegishincha Qoraqalpogʻiston Respublikasi Oila va xotin-qizlar qoʻmitasi, viloyatlar va Toshkent shahri oila va xotin-qizlar boshqarmalari tomonidan tikuvchilik, qandolatchilik, fitnes, sheyping, xotin-qizlarni kasbga oʻqitish kabi faoliyatlarni tashkil etish uchun ijaraga beriladi.
5. Oila va xotin-qizlar qoʻmitasi Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari bilan birgalikda bir oy muddatda Markazlarni ishga tushirish boʻyicha manzilli chora-tadbirlar dasturini ishlab chiqsin va tasdiqlash uchun Vazirlar Mahkamasiga kiritsin.
6. 2026-yil 1-yanvardan boshlab “HAMROH” tadbirkor ayollarni qoʻllab-quvvatlash dasturi (keyingi oʻrinlarda — Dastur) doirasida xotin-qizlarning tadbirkorlik loyihalarini moliyaviy qoʻllab-quvvatlashga qaratilgan quyidagi qoʻshimcha instrumentlar joriy etilsin:
(a) tijorat banklari tomonidan taʼsischilari tarkibida ayollar ulushi 50 foiz va undan yuqorini tashkil qilgan va (yoki) rahbari ayol kishi boʻlgan kichik va oʻrta tadbirkorlik subyektlarining kamida 10 ta ish oʻrni yaratishni nazarda tutuvchi loyihalariga Markaziy bankning asosiy stavkasidan 10 foiz punkt yuqori stavkagacha bazaviy hisoblash miqdorining 25 ming baravarigacha miqdorda kredit ajratish;
(b) “Biznesni kafolatlash milliy kompaniyasi” AJ tomonidan tijorat banklari kreditlarining 70 foizigacha boʻlgan qismiga kafolat (kafillik) taqdim etish.
III. Moliyaviy resurslar
7. Kompaniya 2026-2027-yillarda Dastur doirasidagi loyihalarni moliyalashtirish uchun oʻz daromadlari hisobidan 50 milliard soʻmdan 100 milliard soʻmgacha miqdordagi mablagʻlarni yoʻnaltirsin.
8. Belgilansinki, Oʻzbekiston Respublikasi Prezidentining 2024-yil 8-noyabrdagi PQ-385-son qaroriga muvofiq Oila va xotin-qizlarni qoʻllab-quvvatlash davlat maqsadli jamgʻarmasidan Kompaniyaga ajratilgan 118 milliard soʻm mablagʻ Iqtisodiyot va moliya vazirligining “Tadbirkorlikni rivojlantirish kompaniyasi” AJdagi ulushini oshirish hisobiga Kompaniyaning ustav fondiga yoʻnaltiriladi.
9. Iqtisodiyot va moliya vazirligi, Markaziy bank va “Tadbirkorlikni rivojlantirish kompaniyasi” AJning 2026-yil 1-yanvarga qadar Dasturni moliyaviy manbalar bilan taʼminlash uchun Tiklanish va taraqqiyot jamgʻarmasidan quyidagi mablagʻlarni ajratish toʻgʻrisidagi takliflari maʼqullansin:
(a) Oʻzbekiston Respublikasi Prezidentining 2020-yil 16-iyundagi PQ-4752-son qaroriga asosan tijorat banklariga yoʻnaltirilgan mablagʻlardan qaytadigan 220 milliard soʻm;
(b) Oʻzbekiston Respublikasi Prezidentining 2021-yil 11-maydagi PQ-5113-son qaroriga asosan tijorat banklariga yoʻnaltirilgan mablagʻlardan qaytadigan 440 milliard soʻm;
(v) Oʻzbekiston Respublikasi Prezidentining 2023-yil 12-iyundagi PF-93-son Farmoniga asosan tijorat banklariga yoʻnaltirilgan mablagʻlardan qaytadigan 180 milliard soʻm;
(g) Oʻzbekiston Respublikasi Prezidentining 2022-yil 19-apreldagi PQ-212-son qaroriga asosan tijorat banklariga yoʻnaltirilgan mablagʻlardan qaytadigan 380 milliard soʻm.
10. Ushbu Farmonning 9-bandidagi mablagʻlar tijorat banklari tomonidan 1-ilovadagi taqsimotga muvofiq 2025-yil yakuniga qadar Tiklanish va taraqqiyot jamgʻarmasiga qaytarilishi nazarda tutilsin.
11. Belgilansinki, Dastur doirasida:
(a) Tiklanish va taraqqiyot jamgʻarmasi mazkur Farmonning 9-bandida nazarda tutilgan mablagʻlarni Kompaniyaga yoʻnaltirish uchun “Tadbirkorlikni rivojlantirish kompaniyasi” AJga Markaziy bankning asosiy stavkasida uch yillik imtiyozli davr bilan 7 yil muddatga ajratadi;
(b) Kompaniya kreditlarni moliyalashtirish uchun mablagʻlarni tijorat banklariga Markaziy bankning asosiy stavkasidan 4 foiz punkt yuqori stavkagacha uch yillik imtiyozli davr bilan 7 yildan oshmagan muddatga joylashtiradi.
IV. Farmon ijrosini tashkil etish, taʼminlash va nazorat
12. Kompaniyaning kuzatuv kengashiga Kompaniya tomonidan tadbirkor ayollarga taqdim etilayotgan moliyaviy yordamlarning miqdorlari, parametr va qoidalariga oʻzgartirish kiritish vakolati berilsin.
13. Oʻzbekiston Respublikasi Prezidentining ayrim hujjatlariga 2-ilovaga muvofiq oʻzgartirish va qoʻshimchalar kiritilsin.
14. Iqtisodiyot va moliya vazirligi manfaatdor vazirlik va idoralar bilan birgalikda ikki oy muddatda qonunchilik hujjatlariga mazkur Farmondan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.
15. Farmon ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Bosh vazir oʻrinbosari J.A. Qoʻchqorov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2025-yil 3-dekabr,
PF-240-son
Oʻzbekiston Respublikasi Prezidentining 2025-yil 3-dekabrdagi PF-240-son Farmoniga
1-ILOVA
Tiklanish va taraqqiyot jamgʻarmasiga tijorat banklari tomonidan muddatidan oldin qaytariladigan mablagʻlar
TAQSIMOTI

(mlrd. soʻm)

T/r

Tijorat banki nomi

PF-93-son Farmon boʻyicha

PQ-4752-son qaror boʻyicha

PQ-5113-son qaror boʻyicha

PQ-212-son qaror boʻyicha

1.

Milliy bank

17,4

73,9

43,5

23,5

2.

Oʻzsanoatqurilish-bank

48,0

52,8

185,3

53,3

3.

Agrobank

30,8

4.

Mikrokreditbank

11,0

3,0

39,4

5.

Xalq banki

15,4

47,4

6.

Asakabank

12,4

34,2

52,5

13,6

7.

Biznesni rivojlantirish banki

33,0

7,5

29,2

61,7

8.

Turonbank

8,0

11,5

9.

Aloqabank

6,9

33,6

39,5

2,8

10.

Hamkorbank

5,9

39,0

11.

Ipoteka-bank

22,0

15,0

90,0

57,0

JAMI:

180,0

220,0

440,0

380,0

Oʻzbekiston Respublikasi Prezidentining 2025-yil 3-dekabrdagi PF-240-son Farmoniga
2-ILOVA
Oʻzbekiston Respublikasi Prezidentining ayrim hujjatlariga kiritilayotgan oʻzgartirish va qoʻshimchalar
1. Oʻzbekiston Respublikasi Prezidentining 2022-yil 7-martdagi “Oila va xotin-qizlarni tizimli qoʻllab-quvvatlashga doir ishlarni yanada jadallashtirish chora-tadbirlari toʻgʻrisida”gi PF-87-son Farmonining 15-bandida:
ikkinchi — toʻrtinchi xatboshilar quyidagi tahrirda bayon etilsin:
“2026-yil 1-yanvardan boshlab Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari markazlarni tashkil etish uchun hokimlik zaxirasidagi boʻsh yer maydoni mavjud mahallalarda 300 metr kvadratgacha boʻlgan yer uchastkasini doimiy foydalanish huquqi asosida yoki boʻsh turgan davlat mulki obyektini operativ boshqaruv huquqi asosida tegishlicha Qoraqalpogʻiston Respublikasi Oila va xotin-qizlar qoʻmitasi, viloyatlar va Toshkent shahri oila va xotin-qizlar boshqarmalariga ajratsin;
markazlar tuman (shahar) hokimliklari tomonidan qonunchilik hujjatlarida taqiqlanmagan manbalar hisobidan hamda davlat-xususiy sheriklik shartlarida yoki xotin-qizlarni kasb-hunarga oʻqitish vakolati boʻlgan tashabbuskor tadbirkorlarning boʻsh turgan binolarida tuman (shahar) oila va xotin-qizlar boʻlimlarining tavsiyasi asosida tashkil etilsin;
tuman (shahar) hokimliklari mablagʻlari hisobidan barpo etilgan markazlar tikuvchilik, qandolatchilik, fitnes, sheyping, xotin-qizlarni kasb-hunarga oʻqitish faoliyatini tashkil etish uchun Qoraqalpogʻiston Respublikasi Oila va xotin-qizlar qoʻmitasi, viloyatlar va Toshkent shahri oila va xotin-qizlar boshqarmalari tomonidan tadbirkorlik subyektlariga belgilangan tartibda ijaraga berilsin”;
quyidagi mazmundagi beshinchi xatboshi bilan toʻldirilsin:
“Markazlarda faoliyat olib borish istagini bildirgan tadbirkorlarga mazkur markazlarda tuman (shahar) oila va xotin-qizlar boʻlimlari tavsiyasi asosida xotin-qizlarni kasb-hunarga oʻqitishga ruxsat beriladi, shuningdek, ularga Bandlikka koʻmaklashish davlat jamgʻarmasi hisobidan grantlar ajratish imkoniyati yaratiladi”.
2. Oʻzbekiston Respublikasi Prezidentining 2023-yil 10-noyabrdagi “Kichik va oʻrta biznesni moliyaviy qoʻllab-quvvatlash tizimini takomillashtirish chora-tadbirlari toʻgʻrisida”gi PF-193-son Farmonida:
a) 4-bandning uchinchi xatboshisidagi “2024-2025-yillarda” soʻzlari “2024 — 2027-yillarda” soʻzlari bilan almashtirilsin;
b) 2-ilovaning 10-pozitsiyasi “Ijro muddati” ustunidagi “2024-2025-yillar” soʻzlari “2024 — 2027-yillar” soʻzlari bilan almashtirilsin.
3. Oʻzbekiston Respublikasi Prezidentining 2022-yil 21-sentabrdagi “Xotin-qizlar bandligini oshirish va salomatligini mustahkamlashga oid qoʻshimcha chora-tadbirlar toʻgʻrisida”gi PQ-376-son qarorida:
a) 1-bandda:
ikkinchi va uchinchi xatboshilar chiqarib tashlansin;
toʻrtinchi — yettinchi xatboshilar tegishlicha ikkinchi — beshinchi xatboshilar deb hisoblansin;
ikkinchi xatboshidagi “xotin-qizlar tadbirkorlik markazlarida Oila va xotin-qizlarni qoʻllab-quvvatlash davlat maqsadli jamgʻarmasi” soʻzlari “markazlarda belgilangan tartibda Bandlikka koʻmaklashish davlat jamgʻarmasi” soʻzlari bilan almashtirilsin;
b) 4-bandda:
ikkinchi xatboshi quyidagi tahrirda bayon etilsin:
“mahallalarda xotin-qizlarning bandligini taʼminlash va salomatligini mustahkamlash markazlari (keyingi oʻrinlarda — markazlar) tuman (shahar) hokimliklari tomonidan qonunchilik hujjatlarida taqiqlanmagan mablagʻlar hisobidan hamda davlat-xususiy sheriklik shartlarida yoki xotin-qizlarni kasb-hunarga oʻqitish vakolati boʻlgan tashabbuskor tadbirkorlarning boʻsh turgan binolarida tuman (shahar) oila va xotin-qizlar boʻlimlari tavsiyasi asosida tashkil etiladi”;
uchinchi xatboshidagi “mahalla fuqarolari yigʻini” va “5 yil muddatga” soʻzlari tegishlicha “tuman (shahar) oila va xotin-qizlar boʻlimlari” va “belgilangan tartibda” soʻzlari bilan almashtirilsin;
beshinchi va oltinchi xatboshilar chiqarib tashlansin;
yettinchi xatboshi beshinchi xatboshi deb hisoblansin.
4. Oʻzbekiston Respublikasi Prezidentining 2023-yil 21-dekabrdagi “Oilalarni mustahkamlash va xotin-qizlarning faolligini oshirish boʻyicha qoʻshimcha chora-tadbirlar toʻgʻrisida”gi PQ-401-son qarorida:
a) 2-bandning uchinchi xatboshisi quyidagi tahrirda bayon etilsin:
“xotin-qizlarni kasanachilik va hunarmandchilik yoʻnalishlarida kasb-hunarga oʻqitish bilan bogʻliq xarajatlar Bandlikka koʻmaklashish davlat jamgʻarmasi mablagʻlari hisobidan tasdiqlangan xarajatlar smetasi doirasida moliyalashtiriladi”;
b) 4-bandda:
ikkinchi xatboshi chiqarib tashlansin;
uchinchi va toʻrtinchi xatboshilar tegishlicha ikkinchi va uchinchi xatboshilar deb hisoblansin;
v) 8-bandda:
ikkinchi xatboshi chiqarib tashlansin;
uchinchi va toʻrtinchi xatboshilar tegishlicha ikkinchi va uchinchi xatboshilar deb hisoblansin;
g) 1-ilova oʻz kuchini yoʻqotgan deb hisoblansin;
d) 2-ilovaning 14-pozitsiyasi “Maʼlumot va hujjatlar nomi” ustuni quyidagi tahrirda bayon etilsin:
“Mavsumiy ishlarda band boʻlgan shaxslar toʻgʻrisidagi maʼlumotlar”.
5. Oʻzbekiston Respublikasi Prezidentining 2023-yil 15-noyabrdagi “Aholini kichik va oʻrta biznesga keng jalb qilishning qoʻshimcha chora-tadbirlari toʻgʻrisida”gi PQ-366-son qarori 2-bandining “b” kichik bandi beshinchi xatboshisi chiqarib tashlansin.
6. Oʻzbekiston Respublikasi Prezidentining 2024-yil 7-sentabrdagi “Kichik biznesni uzluksiz qoʻllab-quvvatlash” kompleks dasturini takomillashtirish chora-tadbirlari toʻgʻrisida”gi PQ-312-son qarorida:
a) 3-bandning “g” kichik bandi oʻz kuchini yoʻqotgan deb hisoblansin;
b) 11-bandining beshinchi xatboshisi quyidagi tahrirda bayon etilsin:
“kredit (lizing) mablagʻlaridan kredit (lizing) shartnomasida va/yoki buyurtmada koʻrsatilgan maqsadlarda foydalanilmaganda, ushbu kredit (lizing) boʻyicha toʻlangan kompensatsiya mablagʻlari tijorat banki tomonidan Kompaniyaga qaytariladi. Bunda ushbu qoida Tadbirkorlik faoliyatini qoʻllab-quvvatlash davlat jamgʻarmasi bilan avval tuzilgan shartnomalardan kelib chiqadigan munosabatlarga ham tatbiq etiladi”.
7. Oʻzbekiston Respublikasi Prezidentining 2025-yil 1-apreldagi “Respublika hududlarini jadal kompleks rivojlantirish uchun tanlab olingan tuman (shahar)larda amaliy chora-tadbirlarni amalga oshirish toʻgʻrisida”gi PQ-132-son qaroriga 2.16-ilovada:
a) 1 va 2-pozitsiyalar quyidagi tahrirda bayon etilsin:

“

T/r

Chora-tadbirlar nomi

Amalga oshirish mexanizmi

Moliyalashtirish manbasi

Muddati

Masʼullar

I. Sanoatni rivojlantirish kichik dasturi

1.

Hazorasp tumani Bogʻdor mahallasida 1,4 gektar yer maydonida joylashgan sobiq “Istiqlol” oʻyingohi negizida kamida 5 qavatli zamonaviy savdo va xizmat koʻrsatish majmuasini barpo etish.

1. Zamonaviy savdo va xizmat koʻrsatish majmuasini barpo etishga koʻmaklashish maqsadida, “Tadbirkorlikni rivojlantirish kompaniyasi” AJ taʼsischiligida masʼuliyati cheklangan jamiyat (keyingi oʻrinlarda — Jamiyat) tashkil etish.

Bunda Jamiyat zarur hollarda:

loyihani moliyalashtirishda ishtirok etadi;

qurib bitkazilgan bino va inshootlarni realizatsiya qilishda moliyaviy instrumentlar orqali koʻmaklashadi.

Hisob-kitoblar asosida

(bank krediti va tashabbuskorlar hamda Jamiyat mablagʻlari)

2025-yil may

Xorazm viloyati hokimligi,

Iqtisodiyot va moliya vazirligi,

tashabbuskorlar,

“Tadbirkorlikni rivojlantirish kompaniyasi” AJ

2. 1-bosqichda Bogʻdor mahallasidagi 1,4 gektar yer maydonidagi “Istiqlol” oʻyingohi negizida zamonaviy savdo va xizmat koʻrsatish majmuasini qurish boʻyicha loyiha-smeta hujjatlarini ishlab chiqish va tasdiqlash.

2026-yil aprel

3. Zarurat yuzaga kelganda, oʻyingoh atrofidagi tadbirkorlik subyektlariga tegishli boʻlgan savdo nuqtalari va noturar bino hamda inshootlarning buzilishi natijasida keltirilgan zararlarni qoplash uchun respublika budjeti hisobidan budjet ssudasi ajratilishi uchun buyurtma kiritish.

2026-yil mart

4. Qurilish-montaj ishlarini amalga oshirish.

2026-2027-yillar

5. Loyihani foydalanishga topshirish va tadbirkorlarga realizatsiya qilish.

2027-yil dekabr

2.

“Sanoat” MFY hududida joylashgan 19 gektar yer maydonda Hazorasp savdo va sanoat zonasini tashkil etish.

Bunda tadbirkorlik obyektlari talabdan kelib chiqib, bosqichma-bosqich qurilishi inobatga olinadi.

1. 2-bosqichda tashabbuskorlar tomonidan “Hazorasp savdo va sanoat zonasi”ning bosh rejasini ishlab chiqish va tasdiqlash.

Hisob-kitoblar asosida

(bank krediti va tashabbuskorlar hamda Jamiyat mablagʻlari)

2026-yil aprel

Xorazm viloyati hokimligi,

Iqtisodiyot va moliya vazirligi,

tashabbuskorlar,

“Tadbirkorlikni rivojlantirish kompaniyasi” AJ

2. Bosh reja asosida tadbirkorlar uchun bino va inshootlarni yoki mulkiy majmualarning qurilish-montaj ishlarini amalga oshirish.

2026-2027-yillar

3. Loyihalarni foydalanishga topshirish va tadbirkorlarga realizatsiya qilish.

4. Jamiyat zarur hollarda:

loyihani moliyalashtirishda ishtirok etadi;

qurib bitkazilgan bino va inshootlarni realizatsiya qilishda moliyaviy instrumentlar orqali koʻmaklashadi.

2027-yil dekabr

”.

8. Oʻzbekiston Respublikasi Prezidentining 2025-yil 31-oktabrdagi “Aholini oziq-ovqat mahsulotlari bilan barqaror taʼminlashga doir qoʻshimcha chora-tadbirlar toʻgʻrisida”gi PQ-322-son qarorida:
a) 2-bandning “b” kichik bandi quyidagi tahrirda bayon etilsin:
“(b) 2025-yil 10-dekabrdan 2030-yil 31-dekabrga qadar “Tadbirkorlikni rivojlantirish kompaniyasi” aksiyadorlik jamiyati (keyingi oʻrinlarda — Kompaniya) tomonidan Kredit foiz xarajatlarini kompensatsiya qilish jamgʻarmasi hisobidan mazkur qarorning 1-ilovasida keltirilgan yoʻnalishlar va shartlar boʻyicha tadbirkorlik subyektlariga barqarorlik reytingidan qatʼi nazar”;
b) 1-ilovada:
“1. Aylanma mablagʻlar uchun ajratiladigan kreditlar boʻyicha” boʻlimidagi “Kompensatsiya taqdim etiladigan kredit qismi” pozitsiyasidan keyin quyidagi mazmundagi pozitsiya bilan toʻldirilsin:

“

Foydalanuvchi tadbirkorlik subyekti

Barcha toifadagi tadbirkorlik subyektlari

”;

“2. Loyihalarni amalga oshirish va faoliyatni kengaytirish uchun ajratiladigan kreditlar boʻyicha” boʻlimida:
“Kompensatsiya taqdim etiladigan kredit qismi” pozitsiyasidan keyin quyidagi mazmundagi pozitsiya bilan toʻldirilsin:

“

Foydalanuvchi tadbirkorlik subyekti

Barcha toifadagi tadbirkorlik subyektlari

”;

“Kompensatsiya toʻlovi tartibi” pozitsiyasi quyidagi tahrirda bayon etilsin:

“

Kompensatsiya toʻlovi tartibi

“2+3” tamoyili asosida avval kreditning dastlabki ikki yiliga taqdim etiladi, keyingi uch yil davomida mahsulot (xizmat)larni realizatsiya qilishdan tushgan yillik tushum avvalgi yilning mos davriga nisbatan 15 foiz va undan ortiq miqdorda oshgan taqdirda, keyingi yillar davomida har oyda toʻlab boriladi.

”.

(Qonunchilik maʼlumotlari milliy bazasi, 04.12.2025-y., 06/25/240/1122-son)