Oʻzbekiston Respublikasi Prezidentining “Xizmatlar sohasi barqaror rivojlanishi uchun qulay shart-sharoitlar yaratishga oid qoʻshimcha chora-tadbirlar toʻgʻrisida” 2025-yil 27-fevraldagi PQ-78-son qarori ijrosini taʼminlash hamda akkreditatsiyadan oʻtkazish talablarini soddalashtirish maqsadida Vazirlar Mahkamasi qaror qiladi:

1. Vazirlar Mahkamasining 2019-yil 24-apreldagi 349-son qarori bilan tasdiqlangan Muvofiqlikni baholash organlarini akkreditatsiyadan oʻtkazish tartibi toʻgʻrisidagi nizomga ilovaga muvofiq quyidagilarni nazarda tutuvchi oʻzgartirishlar kiritilsin:

akkreditatsiya obyekti tomonidan akkreditatsiyadan oʻtishda kamchiliklarni bartaraf etish muddatini toʻrt oygacha etib belgilash;

sinov, kalibrlash va tibbiy laboratoriya (markaz) yoki metrologiya xizmatining joylashgan joyi oʻzgargan taqdirda, takroriy akkreditatsiyadan oʻtkazish oʻrniga soddalashtirilgan tartibni joriy etish.

2. Ushbu qarorning bajarilishini nazorat qilish Vazirlar Mahkamasi huzuridagi Oʻzbekiston texnik jihatdan tartibga solish agentligi direktori A.R. Jumanazarov zimmasiga yuklansin.

1. 3-bandning beshinchi xatboshisidagi “belgilangan tartibda malaka oshirgan va attestatsiyadan oʻtgan” soʻzlari “malakali” soʻzi bilan almashtirilsin.

2. 21-bandda:

birinchi xatboshidagi “ikki oydan” soʻzlari “toʻrt oydan” soʻzlari bilan almashtirilsin;

ikkinchi xatboshi chiqarib tashlansin.

3. 48-bandning birinchi xatboshisidagi “uch oydan” soʻzlari “toʻrt oydan” soʻzlari bilan almashtirilsin.

4. 67-band quyidagi tahrirda bayon etilsin:

“67. Akkreditatsiya qilingan sinov, kalibrlash va tibbiy laboratoriya (markaz) yoki metrologiya xizmati joylashgan joyi oʻzgarsa, xabarnoma kelib tushgandan keyin Markazning buyrugʻi bilan tayinlangan masʼul guruh tomonidan ushbu akkreditatsiya qilingan subyektlarni baholash maqsadida bir ish kunida oʻtkazilgan ogohlantirishsiz tashrifning ijobiy natijasiga asosan, akkreditatsiya toʻgʻrisidagi guvohnoma amaldagi akkreditatsiya muddatiga qayta rasmiylashtiriladi”.

5. 1-ilovaning 3-bosqich “Bajarish muddatlari” ustunining 1-bandidagi “Ikki oy mobaynida” soʻzlari “Toʻrt oy mobaynida” soʻzlari bilan almashtirilsin.