Alkogolli mahsulotlar ishlab chiqarishga davlat monopoliyasini, ichki bozorni, isteʼmolchilar huquqlarini va aholi sogʻligini himoya qilishni taʼminlash, Oʻzbekiston Respublikasi bojxona hududiga etil spirtining gʻayriqonuniy olib kelinishining oldini olish maqsadida Vazirlar Mahkamasi qaror qiladi:

1. Oʻzbekiston Respublikasi bojxona hududiga etil spirtini transportning barcha turlari bilan olib kelish taqiqlansin.

Etil spirtining Oʻzbekiston Respublikasi bojxona hududi orqali tranziti faqat Vazirlar Mahkamasining ruxsati bilan amalga oshiriladi, ushbu bandning uchinchi xatboshida nazarda tutilgan hollar bundan mustasno.

Etil spirtining Oʻzbekiston Respublikasi bojxona hududi orqali uchinchi mamlakatlar hududidan Yevro-Osiyo iqtisodiy hamjamiyati aʼzosi boʻlgan davlatlar hududiga yoxud Yevro-Osiyo iqtisodiy hamjamiyati aʼzosi boʻlgan davlatlar hududidan uchinchi mamlakatlar hududiga tranziti faqat temir yoʻl transportida amalga oshiriladi.

2. Oʻzbekiston Respublikasi Davlat bojxona qoʻmitasi, Davlat soliq qoʻmitasi Oʻzbekiston Respublikasi bojxona hududiga etil spirti gʻayriqonuniy olib kelinganda va tranzit orqali oʻtkazilganda hamda shunday hollar korxonalarda va savdoda aniqlanganda spirtni qonun hujjatlarida belgilangan tartibda davlat daromadiga oʻtkazish boʻyicha tegishli chora-tadbirlar koʻrsinlar.

3. Vazirlar Mahkamasining “Oʻzbekiston Respublikasi boj hududiga oziq-ovqat etil spirti olib keltirishni tartibga solish toʻgʻrisida” 1998-yil 27-fevraldagi 85-son qarorining 2 va 3-bandlari oʻz kuchini yoʻqotgan deb hisoblansin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I. H. Joʻrabekov zimmasiga yuklansin.