Xotin-qizlarni tadbirkorlik faoliyatiga jalb etish va ularning loyihalarini moliyalashtirishni kengaytirish maqsadida qaror qilaman:

1. Xotin-qizlarning loyihalarini qoʻllab-quvvatlash uchun quyidagilar hisobidan 2025-yilda qoʻshimcha 200 million AQSH dollari yoʻnaltirilsin, bunda:

(a) Tiklanish va taraqqiyot jamgʻarmasi ikki hafta muddatda yetti yil muddatga yillik Markaziy bankning asosiy stavkasida jami 100 million AQSH dollari ekvivalentida, shundan AT “Xalq banki”ga 35 million AQSH dollari, “Biznesni rivojlantirish banki” ATBga 35 million AQSH dollari va “Mikrokreditbank” ATBga 30 million AQSH dollari miqdorida kredit resurslari ajratsin;

(b) tijorat banklari “Mahalla loyihasi” dasturi doirasida loyihalarni moliyalashtirish uchun tashqi moliya bozorlaridan 100 million AQSH dollari jalb qilsin.

2. Belgilansinki, xotin-qizlarning loyihalarini moliyalashtirishga:

(a) “Biznesni rivojlantirish banki” ATBga ajratilgan mablagʻlar hisobidan “HAMROH” tadbirkor ayollarni qoʻllab-quvvatlash dasturi doirasida belgilangan tartib va mexanizmlar asosida;

(b) AT “Xalq banki” va “Mikrokreditbank” ATBga ajratilgan mablagʻlar hisobidan oilaviy tadbirkorlikni rivojlantirish dasturi doirasida belgilangan tartib va mexanizmlar asosida kreditlar ajratiladi.

3. Qaror ijrosini har oyda muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.