Respublika iqtisodiyoti tarmoqlarida ekologik vaziyatni yaxshilash, muqobil energiya resurslaridan samarali foydalanishni taʼminlash va ragʻbatlantirish, shuningdek, “Ekologik transport” tizimini bosqichma-bosqich joriy etish maqsadida Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga quyidagilarni nazarda tutuvchi oʻzgartirish va qoʻshimchalar kiritilsin:

quyosh fotoelektr stansiyalarini binolarning tom va fasad qismiga oʻrnatish boʻyicha loyiha hujjatlarini davlat ekologik ekspertizasidan oʻtkazish talabini bekor qilish;

atrof-muhitga yuqori va oʻrta darajadagi taʼsir koʻrsatuvchi sanoat korxonalari va ularga tutash hududlarda “yashil belbogʻlar” barpo etish va koʻkalamzorlashtirish tadbirlarini amalga oshirishni belgilash;

“Ekologik transport” tizimini bosqichma-bosqich joriy etishning muddatlarini belgilash.

2. Mazkur qarorning bajarilishini nazorat qilish Oʻzbekiston Respublikasi ekologiya, atrof-muhitni muhofaza qilish va iqlim oʻzgarishi vaziri A.A. Abduxakimov zimmasiga yuklansin.

1. Vazirlar Mahkamasining “Atrof-muhitga taʼsirni baholash mexanizmini yanada takomillashtirish toʻgʻrisida” 2020-yil 7-sentabrdagi 541-son qarorida:

a) 1-ilovaning “Atrof-muhitga taʼsir koʻrsatishning III toifasiga kiradigan (past darajada xavfli) faoliyat turlari” boʻlimi 52-bandi quyidagi tahrirda bayon etilsin:

“52. Quvvati 100 MVtgacha boʻlgan issiqlik, shuningdek, foto, shamol elektr stansiyalari (binolarning tom va fasad qismida oʻrnatishga moʻljallangan quyosh fotoelektr stansiyalari bundan mustasno) va boshqa yondirish qurilmalari”;

b) 2-ilovaning 43-bandi quyidagi mazmundagi beshinchi xatboshi bilan toʻldirilsin:

“atrof-muhitga taʼsir koʻrsatishning I va II toifalariga mansub sanoat korxonalari loyiha hujjatlarida oʻz va tutash hududlarida “yashil belbogʻ”lar barpo etilishi va koʻkalamzorlashtirish tadbirlarining nazarda tutilganligi”;

beshinchi — oltinchi xatboshilar tegishlicha oltinchi — yettinchi xatboshilar deb hisoblansin.

2. Vazirlar Mahkamasining “Atmosfera havosiga transport vositalarining salbiy taʼsirini kamaytirish boʻyicha chora-tadbirlar toʻgʻrisida” 2024-yil 29-martdagi 166-son qarorida:

a) 1-bandda:

“a” kichik banddagi “2024-yil 1-iyundan” soʻzlari “2025-yil 1-martdan” soʻzlari bilan almashtirilsin;

“b” kichik bandning ikkinchi xatboshisidagi “2024” raqami “2025” raqami bilan almashtirilsin;

b) 2-bandning “a” kichik bandidagi “2024-yil 1-iyundan” soʻzlari “2025-yil 1-martdan” soʻzlari bilan almashtirilsin;

v) 5-bandda:

“a” kichik banddagi “2024-yil 1-iyunga” soʻzlari “2025-yil 1-aprelga” soʻzlari bilan almashtirilsin;

“v” kichik banddagi “ikki oy muddatda” soʻzlari “2025-yil 1-yanvarga qadar” soʻzlari bilan almashtirilsin.