|
Hujjat kuchini yo‘qotgan 22.02.2021
|
Hujjat 28.10.1994 sanasi holatiga
Amaldagi versiyaga o‘tish |
Oʻzbekiston Respublikasi Vazirlar Mahkamasining
qarori
NAQD PUL MUOMALASINI TEZLAShTIRISh ChORA-TADBIRLARI TOʻGʻRISIDA
LexUZ sharhiMazkur qaror Oʻzbekistan Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.
Naqd pul emissiyasini qisqartirish va uning muomalada boʻlishini tezlashtirish asosida pul muomalasini mustahkamlash maqsadida Vazirlar Mahkamasi qaror qiladi:
1. Naqd pul muomalasini tezlashtirishga oid dasturiy chora-tadbirlar 1 — 8-ilovalarga* muvofiq tasdiqlansin.
* Ilovalar berilmaydi.
2. Oʻzbekiston Respublikasi Markaziy bankiga Respublika hududida naqd pul emissiyasi (qaytarib olinishi) darajasining belgilangan cheklangan miqdorlariga qanday rioya qilinayotganligi ustidan doimiy nazorat oʻrnatish va har oyda hukumatga axborot berib turish tavsiya etilsin.
3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Oʻzbekiston Respublikasi Markaziy bankining joylardagi organlari bilan birgalikda bir hafta muddatda mazkur qarorning 1-bandiga muvofiq shaharlar va tumanlarda naqd pul emissiyasini qisqartirishga oid mintaqaviy dasturlarni ishlab chiqishni nihoyasiga yetkazsinlar va tasdiqlasinlar. Ularning amalga oshirilishini qatʼiy nazorat qilishni taʼminlasinlar.
4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B. S. Hamidov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
1994-yil 28-oktabr,
526-son
