Sud amaliyotida yuzaga kelayotgan ayrim masalalarni inobatga olgan holda “Sudlar toʻgʻrisida”gi Qonunning 17-moddasiga muvofiq, Oʻzbekiston Respublikasi Oliy sudi Plenumi qaror qiladi:

Oʻzbekiston Respublikasi Oliy sudi Plenumining 2006-yil 22-dekabrdagi “Sudlar tomonidan amnistiya aktlarini qoʻllashning ayrim masalalari toʻgʻrisida”gi 16-sonli qaroriga quyidagi oʻzgartirish va qoʻshimchalar kiritilsin:

1. 8-bandi birinchi xatboshisidagi “Agar amnistiya aktida” soʻzlaridan keyin “yoki uni qoʻllash tartibi toʻgʻrisidagi Nizomda” degan soʻzlar qoʻshilsin.

2. 10, 11, 13, 14-bandlari chiqarilsin.

3. 21-bandi ikkinchi xatboshisidagi “Agar amnistiya aktida” soʻzlaridan keyin “yoki uni qoʻllash tartibi toʻgʻrisidagi Nizomda” degan soʻzlar qoʻshilsin.

4. 23-bandi birinchi xatboshisi hamda birinchi va ikkinchi kichik xatboshilari quyidagi tahrirda bayon etilsin:

“Birinchi, apellatsiya, kassatsiya yoki nazorat instansiyasi sudi tomonidan amnistiya aktining jazo muddatini qisqartirishni nazarda tutuvchi bandini qoʻllash chogʻida jazoning amnistiya akti chiqqan kunga qadar amalda oʻtalgan muddati chegirib tashlangandan soʻng qolgan qismi qisqartiriladi”.

5. 29-bandining ikkinchi xatboshisi chiqarilsin.