toggle_night_mode
Hujjat 11.09.2023 sanasi holatiga
Amaldagi versiyaga o‘tish
Oʻzbekiston Respublikasi Vazirlar Mahkamasining
qarori
Shaharsozlik va uy-joy kommunal xoʻjaligi sohalari mutaxassislarini sertifikatlash tizimini joriy etish toʻgʻrisida
Shaharsozlik va uy-joy kommunal xoʻjaligi sohalari mutaxassislarini maqsadli tayyorlash, qayta tayyorlash, ularning malakasini oshirishda amaliyotga tatbiq etilgan yangicha yondashuvlarni oʻrgatish hamda ularni sertifikatlash tizimini joriy etish maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining:
a) “Oʻzbekiston Respublikasi aholisi va hududining seysmik xavfsizligini taʼminlash tizimini yanada takomillashtirishga oid qoʻshimcha chora-tadbirlar toʻgʻrisida” 2023-yil 16-maydagi PQ-158-son qarori bilan:
2023-yil 1-oktabrdan boshlab seysmik xavfsizligi II, III va IV toifadagi bino va inshootlarning loyiha hujjatlarini ishlab chiqish va ekspertizadan oʻtkazish, qurilish-montaj ishlarini bajarish va nazorat funksiyalarini amalga oshirish yoʻnalishlarida faoliyat yurituvchi mutaxassislarni sertifikatlash tartibi joriy etilganligi;
Qurilish va uy-joy kommunal xoʻjaligi vazirligi mutaxassislarni sertifikatlash doirasida oʻquv kurslarini sifatli tashkil etish, taʼlim tashkilotlarini akkreditatsiyadan oʻtkazish va buning uchun milliy trenerlar korpusini shakllantirishga masʼul davlat boshqaruvi organi etib belgilanganligi;
b) “Maʼmuriy islohotlar doirasida qurilish va uy-joy kommunal xoʻjaligi sohasida davlat boshqaruvini samarali tashkil qilish chora-tadbirlari toʻgʻrisida” 2023-yil 28-avgustdagi PF-151-son Farmoni bilan:
Qurilish va uy-joy kommunal xoʻjaligi vazirligi huzurida Arxitektura, qurilish, muhandislik va kommunal xoʻjalik sohalarida kadrlar tayyorlash (jumladan, maxsus maqsadli), qayta tayyorlash, malakasini oshirish va ularning malakasini baholash boʻyicha ixtisoslashgan davlat oliy taʼlim muassasasi shaklidagi Kompetensiyani rivojlantirish instituti (keyingi oʻrinlarda — institut), shuningdek, uning asosiy funksiyalarini amalga oshiruvchi tarkibiy boʻlinmalari — Arxitektorlar va muhandislar oliy maktabi, Qayta tayyorlash va malaka oshirish markazi, Malakani baholash markazi hamda ularning hududiy filiallari (yuridik shaxs maqomiga ega boʻlmagan) tashkil etilganligi;
 LexUZ sharhi
Qarang: Oʻzbekiston Respublikasi Prezidentining 2020-yil 27-noyabrdagi PF-6119-son Farmoni bilan tasdiqlangan Oʻzbekiston Respublikasi qurilish tarmogʻini modernizatsiya qilish, jadal va innovatsion rivojlantirishning 2021 — 2025-yillarga moʻljallangan strategiyasining 5-paragrafi.
2023-yil 1-oktabrdan boshlab shaharsozlik va uy-joy kommunal xoʻjaligi sohalaridagi mutaxassislarni (keyingi oʻrinlarda — mutaxassislar) ularning faoliyat yoʻnalishlari boʻyicha har uch yilda bir marta sertifikatlash tizimi joriy etilganligi;
mutaxassislarni sertifikatlash ishlarini tashkil etish boʻyicha ishchi organ funksiyasi institutga yuklanganligi maʼlumot va ijro uchun qabul qilinsin.
2. Shaharsozlik va uy-joy kommunal xoʻjaligi sohasida mutaxassislarni sertifikatlash tartibi toʻgʻrisidagi nizom ilovaga muvofiq tasdiqlansin.
Keyingi tahrirga qarang.
3. Belgilansinki, 2025-yil 1-yanvardan boshlab sertifikatga ega boʻlmagan:
Keyingi tahrirga qarang.
mutaxassislarga xavflilik darajasi II, III va IV toifali qurilish obyektlarining, shuningdek, budjet tizimi budjetlari hisobidan moliyalashtiriladigan I toifali qurilish obyektlarining arxitektura-shaharsozlik hujjatlarini ishlab chiqish, shaharsozlik hujjatlarini ekspertizadan oʻtkazish, texnik nazoratni amalga oshirish, qurilish-montaj ishlari sifatini nazorat qilish va nazorat oʻlchovini amalga oshirish;
jismoniy shaxslarga koʻp kvartirali uylarning boshqaruv organlariga rahbarlik qilish taqiqlanadi.
4. Mutaxassislarni davriy sertifikatlashni joriy etishda ustuvor yoʻnalishlar sifatida quyidagilar belgilansin:
shaharsozlik hujjatlari shaharsozlik toʻgʻrisidagi qonunchilik hujjatlari talablariga, shaharsozlik, zilzilabardoshlik, muhandislik izlanishlar, yongʻinga qarshi hamda ekologik normalar va qoidalarga, sanitariya qoidalari va normalariga, gigiyena normativlariga muvofiqligi yuzasidan ekspertizadan oʻtkazish;
qurilish-montaj ishlarida pudratchi, buyurtmachi, loyihachi va qurilish organlari tomonidan shaharsozlik toʻgʻrisidagi qonunchilik hujjatlari, tasdiqlangan loyiha hujjatlari talablari buzilishining oldini olish, shuningdek, qurilish-montaj ishlarining xavfga uchrashi mumkinligi yuqori boʻlgan bosqichlarida davlat qurilish nazoratini olib borish;
obyektda qurilish-montaj ishlarini amalga oshirish uchun zarur shart-sharoitlar yaratish, obyektni oʻz muddatida foydalanishga topshirish yuzasidan shartnoma majburiyatini bajarish, birlamchi ruxsat beruvchi, loyihaoldi va loyiha hujjatlarini sifatli tayyorlash boʻyicha texnik nazoratni olib borish;
qurilish obyektining murakkablik, xavflilik darajalari va obyektga borish muntazamligidan kelib chiqib, obyektning texnologik, meʼmoriy-qurilish va boshqa texnik yechimlari, texnik-iqtisodiy koʻrsatkichlari tasdiqlangan loyiha hujjatlarida koʻzda tutilgan yechimlar hamda koʻrsatkichlarga muvofiqligi yuzasidan mualliflik nazoratini amalga oshirish;
qurilish obyektida haqiqatda bajarilgan fizik ish hajmlarni loyiha hujjatlari, oferta va bajarilgan ishlar toʻgʻrisidagi hisob-faktura asosida oʻlchovdan oʻtkazish, loyihadan chetga chiqish holatlarini aniqlash, haqiqatda bajarilib, hisobotlarda aks ettirilgan asbob-uskunalar va kommunikatsiya tizimlarining sinovdan oʻtkazilganligini hamda hisobotlarda arifmetik xatolarning mavjudligi va boshqa hisob-kitoblarni nazorat oʻlchovini oʻtkazgan holda tekshirish;
mutaxassislarning belgilangan malaka talablariga mosligini taʼminlash orqali ular bajarayotgan ishlar sifatini oshirish, sohada shaffoflik va raqobatbardoshlikni taʼminlash, xalqaro standartlarga mos ish yuritish mexanizmlarini bosqichma-bosqich joriy etib borish hamda aholining hayoti, salomatligi va xavfsizligini taʼminlash, mulkdorlar huquqini himoya qilishda mutaxassislar masʼuliyatini oshirish.
5. Qurilish va uy-joy kommunal xoʻjaligi vazirligi Oliy taʼlim, fan va innovatsiyalar vazirligi bilan birgalikda shaharsozlik va uy-joy kommunal xoʻjaligi sohalarida rivojlangan davlatlarda qoʻllanadigan taʼlim standartlari asosida sertifikatlanadigan mutaxassislarning malakasini oshirish boʻyicha quyidagi yoʻnalishlardagi oʻquv dasturlarini (keyingi oʻrinlarda — dastur) ishlab chiqsin va tasdiqlasin:
a) 2023-yil 1-oktabrga qadar:
loyiha boshqaruvini va texnik nazoratni, shu jumladan yoʻnalishlar boʻyicha nazoratni olib boruvchi mutaxassislar;
loyiha tashkilotlarining mualliflik nazoratini olib boruvchi mutaxassislar, shuningdek, loyiha bosh muhandislari va bosh arxitektorlari;
pudrat tashkilotlarining ichki nazoratini amalga oshiruvchi mutaxassislar boʻyicha;
b) 2024-yil 1-yanvarga qadar:
nazorat oʻlchovini amalga oshiruvchi mutaxassislar;
ekspert tashkilotlari ekspertlari;
koʻp kvartirali uylarni boshqarish organlari rahbarlari boʻyicha;
Keyingi tahrirga qarang.
v) 2024-yil 1-aprelga qadar:
tuman (shahar) va viloyat arxitektorlari;
qurilish va uy-joy kommunal xoʻjaligi sohasida nazorat qilish hududiy inspeksiyalari inspektorlari boʻyicha.
6. Iqtisodiyot va moliya vazirligi Qurilish va uy-joy kommunal xoʻjaligi vazirligi tomonidan taqdim etilgan asoslangan hisob-kitoblarga muvofiq yuqori malakali xorijiy ekspertlarni jalb qilgan holda, ilgʻor xorijiy standartlar asosida dasturlarni ishlab chiqish uchun zarur miqdordagi mablagʻlarni respublika budjeti hisobidan ajratsin.
Keyingi tahrirga qarang.
7. Qurilish va uy-joy kommunal xoʻjaligi vazirligi Oliy taʼlim, fan va innovatsiyalar vazirligi bilan birgalikda institutda va uning hududiy filiallarida (keyingi oʻrinlarda — taʼlim muassasasi) qurilish sohasi mutaxassislarini oʻqitishni tashkil etsin.
8. Bilim va malakalarni baholash agentligi Oliy taʼlim, fan va innovatsiyalar vazirligi hamda Qurilish va uy-joy kommunal xoʻjaligi vazirligi bilan birgalikda 2023-yil 1-noyabrdan boshlab dastur asosida taʼlim olgan mutaxassislarning sohaviy bilimlarini test sinovidan oʻtkazib borish tizimini joriy etsin.
9. Raqamli texnologiyalar vazirligi Oliy taʼlim, fan va innovatsiyalar vazirligi, Qurilish va uy-joy kommunal xoʻjaligi vazirligi, Bilim va malakalarni baholash agentligi, boshqa mutasaddi vazirlik va idoralar bilan birgalikda bir oy muddatda:
Yagona interaktiv davlat xizmatlari portali orqali “Shaffof qurilish” milliy axborot tizimida taʼlim muassasasida oʻqib, test sinovlaridan oʻtgan mutaxassislarning sertifikat olishlarini;
test natijalari toʻgʻrisidagi axborotlarning “Shaffof qurilish” milliy axborot tizimida shakllantirilishini;
QR-kod qoʻyiladigan elektron tarzda shakllantiriladigan sertifikat testdan oʻtgan mutaxassislar tomonidan yuklab olinishini;
“Shaffof qurilish” milliy axborot tizimida avtomatik tarzda sertifikatlangan mutaxassislar reyestri shakllantirilishini nazarda tutuvchi idoralararo maʼlumotlar bazalarining oʻzaro integratsiya qilinishini taʼminlovchi dasturiy taʼminot ishlab chiqilishini hamda joriy etilishini taʼminlasin.
Keyingi tahrirga qarang.
 LexUZ sharhi
Qarang: Vazirlar Mahkamasining 2020-yil 19-noyabrdagi 732-son qarori bilan tasdiqlangan “Shaffof qurilish” milliy axborot tizimi toʻgʻrisidagi nizom.
10. Belgilab qoʻyilsinki:
Qurilish va uy-joy kommunal xoʻjaligi vazirligi, uning tizimidagi va soha tashkilotlarining buyurtmanomalari asosida Arxitektorlar va muhandislar oliy maktabida kadrlar toʻlov-kontrakt asosida maqsadli tayyorlanadi (turli shakllarda, qisqartirilgan muddatlarda) hamda uning bitiruvchilariga belgilangan tartibda davlat namunasidagi institut diplomi beriladi;
institutda mutaxassislik boʻyicha turdosh yoʻnalishlarda qayta tayyorlash kunduzgi taʼlim shakli boʻyicha oliy maʼlumotga hamda mutaxassisligi boʻyicha 3 yil va undan ortiq ish stajiga ega boʻlgan kadrlarni toʻlov-kontrakt asosida kamida olti oy muddat davomida oʻqitish va imtihon natijalari boʻyicha tegishli diplom bergan holda amalga oshiriladi;
institutda malaka oshirish jarayonlari Vazirlar Mahkamasining “Loyihalash va qurilish sohasidagi mutaxassislar malakasini oshirish tizimini yanada takomillashtirish toʻgʻrisida” 2019-yil 31-maydagi 451-son qarori asosida tashkil etiladi;
institut binosini uning faoliyatiga moslab rekonstruksiya qilish va jihozlash ishlari Oʻzbekiston Respublikasining 2023 — 2025-yillarga moʻljallangan ijtimoiy va ishlab chiqarish infratuzilmasini rivojlantirish dasturi doirasida markazlashgan kapital qoʻyilmalar hisobidan amalga oshiriladi.
11. Quyidagilar institutning asosiy vazifalari etib belgilansin:
shaharsozlik va uy-joy kommunal xoʻjaligi sohalariga (keyingi oʻrinlarda — sohalar) oid tegishli yoʻnalishlarda kadrlarni maqsadli maxsus tayyorlash, qayta tayyorlash va ularning malakasini oshirish;
kasbiy faoliyatni amalga oshirish uchun zarur boʻlgan kompetensiya tasdigʻini olishni xohlovchi jismoniy shaxslarning kasbiy bilim, koʻnikma va mahoratini baholash;
oʻqitishning zamonaviy shakllari, ilgʻor pedagogik va axborot texnologiyalari asosida nazariy tayyorgarlikning amaliyot bilan uzviy bogʻliqligini taʼminlashga qaratilgan oʻquv jarayonini tashkil etish;
talabalar va tinglovchilarning amaliyotini nufuzli mahalliy hamda xorijiy korxona va tashkilotlarda tashkil etish;
kafedralar va boʻlinmalarni tarmoq korxonalari, tashkilotlari va ilmiy-tadqiqot muassasalariga biriktirish hamda hamkorlikda professor-oʻqituvchilar, xodimlar, talabalar va tinglovchilarning amaliy koʻnikmalarini oshirish, tadqiqot natijalarini sinovdan oʻtkazish va ilmiy loyihalardagi ishtirokini yoʻlga qoʻyish;
talabalar va tinglovchilarga sohalardagi yangiliklarni, shaharsozlikka oid qonunchilik hamda texnik tartibga solishga oid normativ hujjatlarni mazmun-mohiyatini yetkazish;
sohalarda dolzarb masalalar boʻyicha fundamental, amaliy va innovatsion tadqiqotlar loyihalarini milliy, xorijiy va xalqaro grantlarni jalb qilgan holda amalga oshirish;
taʼlim va ilmiy jarayonga mahalliy va xorijiy mutaxassislarni keng jalb etish, ilgʻor pedagogik tajriba almashish borasida xalqaro hamkorlikni amalga oshirish;
tashkilot va korxonalar buyurtmalari asosida taʼlim xizmatlarini koʻrsatish hamda ilmiy-tadqiqotlar natijalarini tijoratlashtirish;
Qurilish va uy-joy kommunal xoʻjaligi vazirligi bilan kelishgan holda maxsus maqsadli tayyorlash, qayta tayyorlash va malaka oshirish dasturlari boʻyicha oʻqitish xarajatlari hamda mutaxassislar malakasini baholash boʻyicha toʻlovlar miqdorlarini belgilash.
12. Quyidagilar institut faoliyatini moliyalashtirish manbalari etib belgilansin:
toʻlov-shartnoma asosida oʻqitishdan tushadigan mablagʻlar;
talabgorlarning malakasini baholash xizmatlari uchun amalga oshiriladigan toʻlov mablagʻlari;
jismoniy va yuridik shaxslarning homiylik xayriyalari;
xalqaro moliya institutlari, xorijiy va donor tashkilotlarning grantlari;
taʼlim xizmatlari koʻrsatishdan, ilmiy-oʻquv, oʻquv-metodik, ilmiy va axborot-tahliliy mahsulotlarni ishlab chiqarishdan va boshqa faoliyat turlaridan olingan daromadlar;
Qurilish va uy-joy kommunal xoʻjaligi vazirligi faoliyatini qoʻllab-quvvatlash jamgʻarmasi mablagʻlari;
qonunchilik hujjatlarida taqiqlanmagan boshqa manbalar.
13. Qurilish va uy-joy kommunal xoʻjaligi vazirligi:
bir oy muddatda institut taʼsis hujjatlarining tasdiqlanishi va belgilangan tartibda davlat roʻyxatidan oʻtkazilishini taʼminlasin;
institutni malakali kadrlar bilan taʼminlash va uning moddiy-texnika bazasini shakllantirish choralarini koʻrsin;
institutda oʻquv platformalarini zamonaviy axborot-kommunikatsiya texnologiyalari va xorijiy tajriba asosida tashkil etish choralarini koʻrsin;
oʻquv kurslari boʻyicha oʻquv kontentlarini yaratish uchun malakali mahalliy va xorijiy mutaxassislarni jalb qilsin hamda ularni videodarslar, interfaol dasturlar, tahliliy materiallar va infografikalar bilan boyitish choralarini koʻrsin;
Keyingi tahrirga qarang.
institut va uning hududiy filiallarida mutaxassislarni oʻqitishni tashkil etsin;
oʻquv jarayonlari uchun milliy trenerlar tayyorlash maqsadida ilgʻor xorijiy mamlakatlardan sohalar boʻyicha yuqori malakali mutaxassislarni jalb etsin;
“Shaffof qurilish” milliy axborot tizimi orqali mutaxassislarga sertifikatlar berilishini taʼminlasin.
14. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.J. Ramatov hamda qurilish va uy-joy kommunal xoʻjaligi vaziri B.I. Zakirov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2023-yil 11-sentabr,
460-son
Vazirlar Mahkamasining 2023-yil 11-sentabrdagi 460-son qaroriga
ILOVA
Shaharsozlik va uy-joy kommunal xoʻjaligi sohalarida mutaxassislarni sertifikatlash tartibi toʻgʻrisida
nizom
1-bob. Umumiy qoidalar
1. Ushbu Nizom Oʻzbekiston Respublikasi hududida shaharsozlik va uy-joy kommunal xoʻjaligi sohalari mutaxassislarini sertifikatlash tartibini belgilaydi.
 LexUZ sharhi
Qarang: Oʻzbekiston Respublikasi Prezidentining 2023-yil 28-avgustdagi PF-151-son “Maʼmuriy islohotlar doirasida qurilish va uy-joy kommunal xoʻjaligi sohasida davlat boshqaruvini samarali tashkil qilish chora-tadbirlari toʻgʻrisida”gi Farmoni.
2. Ushbu Nizomda quyidagi asosiy tushunchalardan foydalaniladi:
sertifikat — oliy taʼlim muassasalari huzuridagi ixtisoslashtirilgan markazlarda oʻquv dasturini tamomlagan va test sinovini muvaffaqiyatli topshirgan mutaxassisga beriladigan, shaharsozlik hujjatlarini ishlab chiqish, shaharsozlik hujjatlarini ekspertizadan oʻtkazish, qurilayotgan obyektlarda ichki, mualliflik, texnik va davlat nazoratini olib borish hamda foydalanishga topshirilgan obyektlarda nazorat oʻlchovini amalga oshirish huquqini tasdiqlovchi davlat namunasidagi hujjat;
Keyingi tahrirga qarang.
sertifikatlangan mutaxassis — shaharsozlik va uy-joy kommunal xoʻjaligi sohalari boʻyicha zarur bilim, koʻnikma, amaliy ish tajribasi va oliy maʼlumotga ega boʻlgan hamda oliy taʼlim muassasalari huzuridagi ixtisoslashtirilgan markazlarda oʻquv dasturini tamomlagan va belgilangan tartibdagi test sinovlaridan muvaffaqiyatli oʻtgan jismoniy shaxs;
Keyingi tahrirga qarang.
talabgor — sertifikat olish uchun murojaat qiluvchi, shaharsozlik faoliyati sohasi boʻyicha oliy maʼlumotli mutaxassis diplomiga va tegishli soha boʻyicha kamida 3 yil mehnat stajiga ega boʻlgan jismoniy shaxs;
Keyingi tahrirga qarang.
test sinovi — talabgorning sertifikat olish uchun qoʻyilgan talablarga mos kelishini aniqlashga yoʻnaltirilgan, Bilim va malakalarni baholash agentligi (keyingi oʻrinlarda — agentlik) tomonidan oʻtkaziladigan imtihon.
3. Sertifikatlanadigan mutaxassislar Qurilish va uy-joy kommunal xoʻjaligi vazirligi tomonidan Oliy taʼlim, fan va innovatsiyalar vazirligi bilan birgalikda ishlab chiqiladigan, qurilish sohasi yuqori darajada rivojlangan davlatlarda qoʻllaniladigan taʼlim standartlariga muvofiq keluvchi oʻquv dasturi (keyingi oʻrinlarda — dastur) asosida oʻqitiladi.
Dasturda mutaxassislarni tahsil olayotgan yoʻnalishi boʻyicha soha idoralari va korxonalarida amaliy mashgʻulotlarni tashkil etish nazarda tutiladi.
4. Sertifikat Kompetensiyani rivojlantirish instituti va uning hududiy filiallarida (keyingi oʻrinlarda — taʼlim muassasasi) dasturlar boʻyicha oʻquv kursini tugatib, belgilangan tartibda oʻtkazilgan test sinovlarini muvaffaqiyatli yakunlagan mutaxassislarga beriladi.
5. Talabgor sertifikat talab etiladigan lavozimga tayinlangan sanadan boshlab bir yil muddat davomida dastur asosida oʻqishi va sertifikatga ega boʻlishi talab etiladi. Agarda, talabgor bir yil muddat davomida belgilangan tartibda tegishli sertifikatga ega boʻlmasa, u bilan mehnat shartnomasi belgilangan tartibda bekor qilinadi.
6. Sertifikat 3 yil muddatga beriladi.
2-bob. Mutaxassislarga sertifikat berish tartibi
7. Shaharsozlik va uy-joy kommunal xoʻjaligi sohalari mutaxassislariga sertifikat berish ushbu Nizomga 1-ilovada keltirilgan sxemaga muvofiq amalga oshiriladi.
8. Talabgor dasturga muvofiq oʻqish hamda sertifikatga ega boʻlish uchun ushbu Nizomga 2-ilovada keltirilgan soʻrovnomani axborot tizimi orqali taʼlim muassasasiga yuboradi.
Soʻrovnomada talabgor toʻgʻrisidagi maʼlumotlar toʻgʻri va toʻliq koʻrsatilishi shart.
Soʻrovnoma tegishli maʼlumotlar bilan toʻliq toʻldirilmagan taqdirda axborot tizimi qabul qilmaydi.
9. Soʻrovnoma axborot tizimi orqali avtomatik tarzda taʼlim muassasasiga yoʻnaltiriladi.
10. Taʼlim muassasasi bir ish kuni mobaynida talabgorga oʻz takliflarini axborot tizimi orqali yuboradi.
11. Talabgor bir ish kuni mobaynida taʼlim muassasasidan kelib tushgan takliflarni oʻrganib chiqib, maqbul taʼlim muassasasini tanlaydi hamda oʻqish uchun toʻlovni oʻz hisobidan amalga oshirish uchun oʻzi tanlagan taʼlim muassasasiga soʻrov yuboradi.
Keyingi tahrirga qarang.
12. Test sinovidan oʻtish hamda sertifikat olish uchun bazaviy hisoblash miqdorining ikki baravari miqdorida yigʻim undiriladi.
Yigʻim summasi quyidagi tartibda taqsimlanadi:
30 foizi — agentlikning hisobvaragʻiga;
30 foizi — Qurilish va uy-joy kommunal xoʻjaligi vazirligi huzuridagi Qurilish sohasida axborot-kommunikatsiya texnologiyalarini rivojlantirish markazining shaxsiy hisobvaragʻiga;
Keyingi tahrirga qarang.
40 foizi — Kompetensiyani rivojlantirish institutining hisobvaragʻiga oʻtkaziladi.
Keyingi tahrirga qarang.
13. Taʼlim muassasasi oʻquv mashgʻulotlari va dasturi yakunlanganidan soʻng oʻtkaziladigan test sinovi uchun talabgorga toʻlov shartnomasini yuboradi. Dastur asosida oʻqitish uchun toʻlov miqdori taʼlim muassasasi tomonidan mustaqil belgilanadi.
Talabgor shartnomada belgilangan toʻlovni oʻz hisobidan amalga oshiradi va toʻlov toʻgʻrisidagi hujjatni axborot tizimi orqali taʼlim muassasasiga yuboradi.
14. Taʼlim muassasasi oʻquv mashgʻuloti boshlanishi haqida talabgorga kamida bir hafta oldin elektron xabarnoma yuboradi (elektron pochta manzili yoki mobil ilova orqali).
Keyingi tahrirga qarang.
Taʼlim muassasasi talabgor tomonidan toʻlov amalga oshirilgan sanadan boshlab bir oydan kechikmagan holda oʻquv mashgʻulotlarini tashkil etishi shart.
Talabgorga oʻz ish joyidan ajralmagan holda oʻquv mashgʻulotlarida ishtirok etishga (oʻqishiga) ruxsat etiladi.
Keyingi tahrirga qarang.
15. Taʼlim muassasasi dastur asosidagi oʻqish yakunlangan kunning oʻzida talabgorlarning oʻzlashtirgan bilimini test sinovidan oʻtkazish uchun agentlikka soʻrovnoma yuboradi.
Agentlik soʻrovnoma kelib tushgan kundan boshlab 3 ish kuni ichida test sinovi oʻtkazilishini hamda shu kunning oʻzida test natijalari axborot tizimi orqali eʼlon qilinishini taʼminlaydi.
16. Test sinovidan muvaffaqiyatli oʻtgan har bir talabgor mazkur Nizomga 3a, 3b, 3v, 3g, 3d, 3e, 3j, 3z, 3i va 3l-ilovalarida belgilangan shaklga muvofiq tegishli QR-kodli (matrik shtrixli kod) sertifikatni axborot tizimidan yuklab oladi.
17. Talabgor QR-kod (matrik shtrixli kod) qoʻyilgan sertifikat olgan kundan boshlab sertifikatda qayd etilgan huquqqa ega hisoblanadi.
3-bob. Test sinovi jarayonini oʻtkazish tartibi
18. Test savollari Qurilish va uy-joy kommunal xoʻjaligi vazirligi, Oliy taʼlim, fan va innovatsiyalar vazirligi hamda agentlik tomonidan belgilangan tartibda maxfiyligi taʼminlangan holda ishlab chiqiladi hamda tizimli ravishda yangilab boriladi.
Test savollarini ishlab chiqishda dastur hamda amaldagi shaharsozlik faoliyati sohasidagi qonunchilik hujjatlaridan foydalaniladi.
19. Talabgor test sinovi oʻtkaziladigan hudud (bino)ga shaxsini tasdiqlovchi hujjatlarining (biometrik pasporti, xorijga chiqish pasporti, identifikatsiya ID-kartasi, yangi namunadagi haydovchilik guvohnomasi kabi hujjatlardan birini) aslini koʻrsatgan holda tekshirib kiritiladi.
Test sinoviga kelmagan yoki kechikkan talabgor navbatdagi test sinovidagi talabgorlar roʻyxatiga kiritiladi va bu haqda pochta xizmati orqali yoki elektron tarzda agentlik tomonidan bir hafta oldin xabardor qilinadi.
20. Test sinovi belgilangan tartibda:
qogʻoz shaklidagi savolnomalardan foydalanilgan holda, agentlik tomonidan tasdiqlangan komissiyasi aʼzolari va kuzatuvchilar ishtirokida oʻtkaziladi;
shaffoflik va xolislikni taʼminlash maqsadida test jarayoni uzluksiz ravishda ovozli videoyozuvga tushiriladi.
21. Test sinovi oʻtkaziladigan xonaga uyali telefon, shuningdek, telekommunikatsiya vositalari va shpargalkalar olib kirish, boshqa talabgorlar bilan muloqot qilish taqiqlanadi.
Ushbu talablarni buzgan talabgorlar test sinovidan chetlashtiriladi va test sinovidan oʻtmagan deb hisoblanadi. Test sinovidan chetlashtirilgan talabgorlar boʻyicha dalolatnoma tuziladi.
Test sinovi videoyozuvlari Qurilish va uy-joy kommunal xoʻjaligi vazirligiga taqdim etiladi va vazirlikda uch yil davomida saqlanadi.
22. Test sinovidagi savollar talabgorning soʻrovnomasida qayd etilgan yoʻnalish va obyektlar xavf-xatar toifalariga muvofiq boʻlishi shart.
Test sinovi 50 ta savoldan iborat boʻladi.
Talabgorga test sinovini topshirish uchun ikki soat vaqt beriladi.
Keyingi tahrirga qarang.
Test savollarining 45 tasiga toʻgʻri javob bergan talabgor test sinovidan oʻtgan hisoblanadi.
Keyingi tahrirga qarang.
23. Test sinovidan oʻta olmagan talabgorga bazaviy hisoblash miqdorining ikki baravari miqdorida yigʻim toʻlab, bir oy muddatda qaytadan test topshirish uchun imkoniyat beriladi.
Keyingi tahrirga qarang.
Keyingi tahrirga qarang.
Talabgor test sinovidan takroriy test natijasida ham oʻta olmagan taqdirda, unga sertifikat berilmaydi.
Takroriy test topshirganda ham test sinovidan ijobiy natija bilan oʻta olmagan talabgor umumiy tartibda taʼlim muassasasida qayta oʻqiganidan soʻng test sinoviga kirishi mumkin.
4-bob. Sertifikat berilgan mutaxassislar reyestri va uni yuritish tartibi
24. Qurilish va uy-joy kommunal xoʻjaligi vazirligi tomonidan shaharsozlik va uy-joy kommunal xoʻjaligi sohalari sertifikatlangan mutaxassislarining elektron reyestri yuritiladi.
Reyestrda quyidagi maʼlumotlar qayd etiladi:
a) sertifikatlangan mutaxassisning familiyasi, ismi, otasining ismi, pochta manzili, elektron pochta manzili (mavjud boʻlsa), telefon raqami;
b) jismoniy shaxs uchun shaxsiy identifikatsiya raqami (JSHSHIR);
v) sertifikat raqami, berilgan sanasi va uning amal qilish muddati;
g) sertifikatlangan mutaxassislar:
hududlar (viloyat va tumanlar) kesimida;
sohalar (arxitektura, muhandislik, qurilish va uy-joy kommunal);
yoʻnalishlar (loyiha-qidiruv, pudrat, texnik nazorat va arxitektura, ekspertiza, inspeksiya, nazorat oʻlchovi).
Reyestrda sertifikatning amal qilish muddati tugab, reyestrdan chiqarilganligi toʻgʻrisidagi maʼlumotlar ham kiritib boriladi.
25. Reyestrni yuritish tartibi Qurilish va uy-joy kommunal xoʻjaligi vazirligi tomonidan belgilanadi.
5-bob. Sertifikatning amal qilishini toʻxtatish tartibi
26. Quyidagilar sertifikatni amal qilishini toʻxtatib qoʻyish uchun asos hisoblanadi:
mutaxassis tomonidan sertifikatga ega boʻlish uchun mazkur Nizomga 2-ilovaga muvofiq savolnoma maʼlumotlarini qasddan notoʻgʻri toʻldirilganligi aniqlanganda;
sertifikat egasini belgilangan tartibda muomalaga layoqatsiz yoki muomalaga layoqati cheklangan deb eʼtirof etish toʻgʻrisidagi sud qarori yoxud ozodlikdan mahrum qilish toʻgʻrisidagi sud hukmi qonuniy kuchga kirganda;
sertifikat egasiga nisbatan mansab vakolatini suiisteʼmol qilish bilan bogʻliq jinoyat ishi qoʻzgʻatilib, mazkur ish boʻyicha sudning qarori qonuniy kuchga kirganda;
sertifikat egasining vafot etganligi munosabati bilan.
27. Sertifikatning amal qilishini toʻxtatish toʻgʻrisidagi buyruq qabul qilingan sanadan boshlab tugatiladi va sertifikatlangan mutaxassisning shaharsozlik faoliyati bilan shugʻullanish huquqi toʻxtatiladi.
28. Mutaxassis tomonidan Qurilish va uy-joy kommunal xoʻjaligi vazirligining sertifikat amal qilishini toʻxtatish toʻgʻrisidagi buyrugʻi ustidan qonunchilik hujjatlarida belgilangan tartibda sudga shikoyat qilishi mumkin.
6-bob. Yakunlovchi qoidalar
29. Qurilish va uy-joy kommunal xoʻjaligi vazirligi oʻz vakolatlari va funksiyalari doirasida sertifikatlangan mutaxassislar tomonidan shaharsozlik sohasidagi qonunchilik hujjatlari, shu jumladan, maʼmuriy reglamentlar va ushbu Nizom talablariga rioya etilishi ustidan belgilangan tartibda nazorat qiladi hamda axborot tizimi orqali monitoring olib boradi.
30. Qurilish va uy-joy kommunal xoʻjaligi vazirligi oʻz faoliyatini amalga oshirishi natijasida mutaxassislar toʻgʻrisida olingan maʼlumotlarning sir saqlanishini taʼminlaydi.
31. Mazkur Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladi.
Shaharsozlik va uy-joy kommunal xoʻjaligi sohalarida mutaxassislarni sertifikatlash tartibi toʻgʻrisidagi nizomga
1-ILOVA
Shaharsozlik va uy-joy kommunal xoʻjaligi sohalari mutaxassislariga sertifikat berish
SXEMASI

Bosqichlar

Masʼullar

Amalga oshiriladigan tadbirlar

Muddatlar

1-bosqich

Talabgor

“Shaffof qurilish” MAT orqali mutaxassislarni sertifikatlash oʻquv dasturiga muvofiq oʻqish hamda sertifikatga ega boʻlish uchun taʼlim muassasasiga murojaatni yuboradi.

Belgilangan tartibda oʻz xohishiga koʻra

2-bosqich

“Shaffof qurilish” MAT operatori

Murojaatni avtomatik tarzda barcha taʼlim muassasasiga yuboradi.

Avtomatik tarzda

3-bosqich

Taʼlim muassasasi

Murojaat asosida talabgorga oʻz takliflarini “Shaffof qurilish” MAT orqali yuboradi.

Bir ish kuni mobaynida

4-bosqich

Talabgor

Taʼlim muassasasidan kelib tushgan takliflarni oʻrganib chiqib, maqbul taʼlim muassasasini tanlaydi hamda oʻqish uchun oʻz hisobidan toʻlovni amalga oshirish uchun oʻzi tanlagan taʼlim muassasasiga soʻrov yuboradi.

Bir ish kuni mobaynida

5-bosqich

Taʼlim muassasasi

Oʻquv mashgʻulotlari va dasturi yakunlangandan soʻng oʻtkaziladigan test sinovi uchun talabgorga toʻlov shartnomasini yuboradi.

Bir ish kuni mobaynida

6-bosqich

Talabgor

Shartnomada belgilangan toʻlovni oʻz hisobidan amalga oshiradi va toʻlov toʻgʻrisidagi hujjatni tizim orqali taʼlim muassasasiga yuboradi.

Uch ish kuni mobaynida

7-bosqich

Taʼlim muassasasi

Oʻquv mashgʻuloti boshlanishi haqida talabgorga elektron xabarnoma yuboradi (elektron pochta manzili yoki mobil ilova orqali).

Bir hafta oldin

8-bosqich

Taʼlim muassasasi

Oʻquv dasturi asosida mutaxassislar oʻqitiladi.

Belgilangan muddatda

9-bosqich

Taʼlim muassasasi

Oʻquv dasturi yakunlangach mutaxassislarning oʻzlashtirgan bilimini test sinovidan oʻtkazish uchun agentlikka test sinovini oʻtkazish toʻgʻrisida soʻrov yuboradi.

Oʻquv mashgʻuloti tugagan kunning oʻzida

10-bosqich

Agentlik

1. Test sinovi belgilangan tartibda oʻtkazilishini taʼminlaydi.

Uch ish kuni mobaynida

2. Test sinoviga kelmagan yoki kechikkan mutaxassis navbatdagi test sinoviga kiritiladi. Bu haqda elektron pochta manzili yoki mobil ilova orqali mutaxassisni xabardor qiladi.

Ikki ish kuni mobaynida

11-bosqich

Agentlik

1. Test sinovi natijalarini oʻz veb-saytiga joylashtiradi.

2. Bir vaqtning oʻzida “Shaffof qurilish” MATda QR-kodli (matrik shtrixli kod) sertifikat avtomatik tarzda shakllanadi.

Test sinovi yakunlangan kunning oʻzida

12-bosqich

Talabgor

1. Test sinovidan muvaffaqiyatli oʻtgandan soʻng “Shaffof qurilish” MATda QR-kod (matrik shtrixli kod) qoʻyilgan tegishli sertifikatni yuklab oladi.

2. Test sinovidan oʻtmagan taqdirda mazkur qaror bilan tasdiqlangan Nizom talablari asosida qaytadan test sinovidan oʻtkaziladi.

Belgilangan tartibda

13-bosqich

Qurilish va uy-joy kommunal xoʻjaligi vazirligi

“Shaffof qurilish” MATda sertifikatlangan mutaxassislarning yoʻnalishlar boʻyicha reyestrini shakllantiradi.

Belgilangan tartibda

Shaharsozlik va uy-joy kommunal xoʻjaligi sohalarida mutaxassislarni sertifikatlash tartibi toʻgʻrisidagi nizomga
2-ILOVA
Shaharsozlik va uy-joy kommunal xoʻjaligi sohalari mutaxassislari tomonidan yoʻnalish turi boʻyicha taʼlim muassasasiga yuboriladigan
SOʻROVNOMA

Shaharsozlik va uy-joy kommunal xoʻjaligi sohalari mutaxassislari tomonidan yoʻnalish turi boʻyicha taʼlim

muassasasiga yuboriladigan

SOʻROVNOMA

____________________

____________________

(sanasi)

(raqami)

Mutaxassis haqida maʼlumot:


1. Familiyasi

2. Ismi

3. Otasining ismi

4. Jinsi

5. Pasport maʼlumotlari

(seriyasi va raqami, jismoniy shaxsning shaxsiy identifikatsiya raqami (JSHSHIR))

6. Mutaxassislik yoʻnalishi turi*

(ekspertiza, davlat qurilish nazorati, loyiha ishlari, arxitektura, ichki va texnik nazorat)

7. Qurilish obyektlarining xavf-xatar toifasi

8. Yashash joyi

9. Telefon raqami

10. Elektron pochta manzili (e-mail)

Izoh.
* Talabgor soʻrovnomaning 6-bandidagi yoʻnalishlardan birini tanlashi shart.
Shaharsozlik va uy-joy kommunal xoʻjaligi sohalarida mutaxassislarni sertifikatlash tartibi toʻgʻrisidagi nizomga
3a-ILOVA


Oʻzbekiston Respublikasi Qurilish va uy-joy kommunal xoʻjaligi vazirligi

MUTAXASSIS SERTIFIKATI № L 00000-son

Shaharsozlik hujjatlarini ishlab chiqish va mualliflik nazoratini olib borish huquqi berildi

(yoʻnalishi)

Xavf-xatarligi II, III, IV toifa obyektlar boʻyicha*

(toifasi)

_________________________________________________________________________ ga

(sertifikat olgan shaxsning F.I.O.)

Hujjatni imzolagan shaxs ______________________ (F.I.O.)

Sertifikat 20____ yil “_____”____________ berildi

Amal qilish muddati 3 yil.


Hujjatning

haqiqiyligini

tasdiqlovchi

QR-kod

* Talabgorning arizasiga va obyektning xavf-xatar toifasi boʻyicha test sinovidan oʻtganligiga qarab sertifikat beriladi.
Shaharsozlik va uy-joy kommunal xoʻjaligi sohalarida mutaxassislarni sertifikatlash tartibi toʻgʻrisidagi nizomga
3b-ILOVA


Oʻzbekiston Respublikasi Qurilish va uy-joy kommunal xoʻjaligi vazirligi

MUTAXASSIS SERTIFIKATI № TN 00000-son

Qurilish obyektlarida texnik nazoratni

olib borish huquqi berildi

(yoʻnalishi)

Xavf-xatarligi II, III, IV toifa obyektlar boʻyicha*

(toifasi)

___________________________________________________________________________ ga

(sertifikat olgan shaxsning F.I.O.)

Hujjatni imzolagan shaxs ______________________ (F.I.O.)

Sertifikat 20____ yil “_____”____________ berildi.

Amal qilish muddati 3 yil.


Hujjatning

haqiqiyligini

tasdiqlovchi

QR-kod

* Talabgorning arizasiga va obyektning xavf-xatar toifasi boʻyicha test sinovidan oʻtganligiga qarab sertifikat beriladi.
Shaharsozlik va uy-joy kommunal xoʻjaligi sohalarida mutaxassislarni sertifikatlash tartibi toʻgʻrisidagi nizomga
3v-ILOVA


Oʻzbekiston Respublikasi Qurilish va uy-joy kommunal xoʻjaligi vazirligi

MUTAXASSIS SERTIFIKATI № E 00000-son

Shaharsozlik hujjatlarini ekspertiza qilish huquqi berildi*

(yoʻnalishi)

Xavf-xatarligi II, III, IV toifa obyektlar boʻyicha**

(toifasi)

___________________________________________________________________________ ga

(sertifikat olgan shaxsning F.I.O.)

Hujjatni imzolagan shaxs ______________________ (F.I.O.)

Sertifikat 20____ yil “_____”____________ berildi.

Amal qilish muddati 3 yil.


Hujjatning

haqiqiyligini

tasdiqlovchi

QR-kod

*Ekspertlarga beriladigan sertifikatlar qatʼiy ularning mutaxassisligi, ekspertiza yoʻnalishlari boʻyicha taqdim etilishi shart.
**Talabgorning arizasiga va obyektning xavf-xatar toifasi boʻyicha test sinovidan oʻtganligiga qarab yoʻnalish boʻyicha sertifikat beriladi.
Shaharsozlik va uy-joy kommunal xoʻjaligi sohalarida mutaxassislarni sertifikatlash tartibi toʻgʻrisidagi nizomga
3g-ILOVA


Oʻzbekiston Respublikasi Qurilish va uy-joy kommunal xoʻjaligi vazirligi

MUTAXASSIS SERTIFIKATI № DN 00000-son

Qurilish obyektlarida davlat nazoratini olib

borish  huquqi berildi

(yoʻnalishi)

Xavf-xatarligi II, III, IV toifa obyektlar boʻyicha

(toifasi)

___________________________________________________________________________ ga

(sertifikat olgan shaxsning F.I.O.)

Hujjatni imzolagan shaxs ______________________ (F.I.O.)

Sertifikat 20____ yil “_____”____________ berildi.

Amal qilish muddati 3 yil.


Hujjatning

haqiqiyligini

tasdiqlovchi

QR-kod
 

Shaharsozlik va uy-joy kommunal xoʻjaligi sohalarida mutaxassislarni sertifikatlash tartibi toʻgʻrisidagi nizomga
3d-ILOVA


Oʻzbekiston Respublikasi Qurilish va uy-joy kommunal xoʻjaligi vazirligi

MUTAXASSIS SERTIFIKATI № NOʻ 00000-son

Foydalanishga topshirilgan obyektlarda nazorat oʻlchovini

amalga oshirish huquqi berildi

(yoʻnalishi)

Xavf-xatarligi II, III, IV toifa obyektlar boʻyicha*

(toifasi)

___________________________________________________________________________ ga

(sertifikat olgan shaxsning F.I.O.)

Hujjatni imzolagan shaxs ______________________ (F.I.O.)

Sertifikat 20____ yil “_____”_____________ berildi.

Amal qilish muddati 3 yil.


Hujjatning

haqiqiyligini

tasdiqlovchi

QR-kod

* Talabgorning arizasiga va obyektning xavf-xatar toifasi boʻyicha test sinovidan oʻtganligiga qarab sertifikat beriladi.
Shaharsozlik va uy-joy kommunal xoʻjaligi sohalarida mutaxassislarni sertifikatlash tartibi toʻgʻrisidagi nizomga
3e-ILOVA


Oʻzbekiston Respublikasi Qurilish va uy-joy kommunal xoʻjaligi vazirligi

MUTAXASSIS SERTIFIKATI № LM 00000-son

Loyiha tashkilotlarida loyiha bosh muhandisi sifatida faoliyatni

amalga oshirish huquqi berildi

(yoʻnalishi)

Xavf-xatarligi II, III, IV toifa obyektlar boʻyicha*

(toifasi)

___________________________________________________________________________ ga

(sertifikat olgan shaxsning F.I.O.)

Hujjatni imzolagan shaxs ______________________ (F.I.O.)

Sertifikat 20____ yil “_____”_____________ berildi.

Amal qilish muddati 3 yil.


Hujjatning

haqiqiyligini

tasdiqlovchi

QR-kod

* Talabgorning arizasiga va obyektning xavf-xatar toifasi boʻyicha test sinovidan oʻtganligiga qarab sertifikat beriladi.
Shaharsozlik va uy-joy kommunal xoʻjaligi sohalarida mutaxassislarni sertifikatlash tartibi toʻgʻrisidagi nizomga
3j-ILOVA


Oʻzbekiston Respublikasi Qurilish va uy-joy kommunal xoʻjaligi vazirligi

MUTAXASSIS SERTIFIKATI № LA 00000-son

Loyiha tashkilotlarida loyiha bosh arxitektori sifatida faoliyatni

amalga oshirish huquqi berildi

(yoʻnalishi)

Xavf-xatarligi II, III, IV toifa obyektlar boʻyicha*

(toifasi)

___________________________________________________________________________ ga

(sertifikat olgan shaxsning F.I.O.)

Hujjatni imzolagan shaxs ______________________ (F.I.O.)

Sertifikat 20____ yil “_____”_____________ berildi.

Amal qilish muddati 3 yil.


Hujjatning

haqiqiyligini

tasdiqlovchi

QR-kod

* Talabgorning arizasiga va obyektning xavf-xatar toifasi boʻyicha test sinovidan oʻtganligiga qarab sertifikat beriladi.
Shaharsozlik va uy-joy kommunal xoʻjaligi sohalarida mutaxassislarni sertifikatlash tartibi toʻgʻrisidagi nizomga
3z-ILOVA


Oʻzbekiston Respublikasi Qurilish va uy-joy kommunal xoʻjaligi vazirligi

MUTAXASSIS SERTIFIKATI № IN 00000-son

Qurilish obyektlarida qurilish-pudrat tashkilotining ichki nazoratini

amalga oshirish huquqi berildi

(yoʻnalishi)

Xavf-xatarligi II, III, IV toifa obyektlar boʻyicha*

(toifasi)

___________________________________________________________________________ ga

(sertifikat olgan shaxsning F.I.O.)

Hujjatni imzolagan shaxs ______________________ (F.I.O.)

Sertifikat 20____ yil “_____”_____________ berildi.

Amal qilish muddati 3 yil.


Hujjatning

haqiqiyligini

tasdiqlovchi

QR-kod

* Talabgorning arizasiga va obyektning xavf-xatar toifasi boʻyicha test sinovidan oʻtganligiga qarab sertifikat beriladi.
Shaharsozlik va uy-joy kommunal xoʻjaligi sohalarida mutaxassislarni sertifikatlash tartibi toʻgʻrisidagi nizomga
3i-ILOVA



Oʻzbekiston Respublikasi Qurilish va uy-joy kommunal xoʻjaligi vazirligi

MUTAXASSIS SERTIFIKATI № A 00000-son

Arxitektor lavozimida faoliyat yuritish huquqi berildi

(yoʻnalishi)

Qoraqalpogʻiston Respublikasi Qurilish va uy-joy kommunal xoʻjaligi vazirligi, viloyatlar qurilish va uy-joy kommunal xoʻjaligi bosh boshqarmalari, Toshkent shahar qurilish bosh boshqarmasi, Toshkent shahar uy-joy kommunal xoʻjaligi bosh boshqarmasi hamda tuman va shahar qurilish va uy-joy kommunal xoʻjaligi boʻlimlari, Toshkent shahri tuman qurilish boʻlimlari va uy-joy kommunal xoʻjaligi boʻlimlarida*

(toifasi)

___________________________________________________________________________ ga

(sertifikat olgan shaxsning F.I.O.)

Hujjatni imzolagan shaxs ______________________ (F.I.O.)

Sertifikat 20____ yil “_____”_____________ berildi.

Amal qilish muddati 3 yil.


Hujjatning

haqiqiyligini

tasdiqlovchi

QR-kod

* Talabgorning arizasida va tuman yoki viloyat arxitektorligiga nomzodi koʻrsatiladi va shunga muvofiq test sinovidan oʻtganligiga qarab sertifikat beriladi.
Shaharsozlik va uy-joy kommunal xoʻjaligi sohalarida mutaxassislarni sertifikatlash tartibi toʻgʻrisidagi nizomga
3y-ILOVA


Oʻzbekiston Respublikasi Qurilish va uy-joy kommunal xoʻjaligi vazirligi

MUTAXASSIS SERTIFIKATI № B-00000-son

Koʻp kvartirali uylarni boshqaruvini amalga oshirish huquqi berildi

(yoʻnalishi)

___________________________________________________________________________ ga

(sertifikat olgan shaxsning F.I.O.)

Hujjatni imzolagan shaxs ______________________ (F.I.O.)

Sertifikat 20____ yil “_____”_____________ berildi.

Amal qilish muddati 3 yil.



Hujjatning

haqiqiyligini

tasdiqlovchi

QR-kod

Izoh. Sertifikatga ega boʻlgan jismoniy shaxsga koʻp kvartirali uylarni boshqarish huquqi aholi tomonidan saylanganidan soʻng vujudga keladi. Agarda, aholi tomonidan sertifikatga ega boʻlmagan jismoniy shaxs saylangan boʻlsa, saylangan jismoniy shaxs bir oy muddat ichida tegishli sertifikatni olishi shart.
Keyingi tahrirga qarang.
Shaharsozlik va uy-joy kommunal xoʻjaligi sohalarida mutaxassislarni sertifikatlash tartibi toʻgʻrisidagi nizomga
3l-ILOVA

Oʻzbekiston Respublikasi Qurilish va uy-joy kommunal xoʻjaligi vazirligi

MUTAXASSIS SERTIFIKATI № 00000-son

_____________________________________________________ huquqi berildi

(yoʻnalishi)

Xavf-xatarligi ___________________ toifa obyektlar boʻyicha*

(toifasi)

__________________________________________________________________________ ga

(sertifikat olgan shaxsning F.I.O.)

Hujjatni imzolagan shaxs ______________________ (F.I.O.)

Sertifikat 20____ yil “_____”_____________ berildi.

Amal qilish muddati 3 yil.


Hujjatning

haqiqiyligini

tasdiqlovchi

QR-kod

* Talabgorning arizasiga va obyektning xavf-xatar toifasi boʻyicha test sinovidan oʻtganligiga qarab sertifikat beriladi.
Keyingi tahrirga qarang.
(Qonunchilik maʼlumotlari milliy bazasi, 11.09.2023-y., 09/23/460/0691-son; 26.02.2024-y., 09/24/100/0152-son; 23.10.2025-y., 09/25/666/0965-son; 18.02.2026-y., 09/26/60/0152-son)