Oʻzbekiston Respublikasi Vazirlar Mahkamasining

qarori

Vazirlar Mahkamasining “Yoʻl harakati xavfsizligini taʼminlash sohasiga zamonaviy axborot texnologiyalarini keng joriy etish boʻyicha qoʻshimcha chora-tadbirlar toʻgʻrisida” 2022-yil 8-iyuldagi 377-son qaroriga yoʻl harakati qatnashchilariga qoʻshimcha qulayliklar yaratish va yoʻl harakatini avtomatlashtirilgan tartibga solish tizimini takomillashtirishga qaratilgan oʻzgartirishlar kiritish haqida

Mamlakatimizda soʻnggi yillarda yoʻl harakatini tashkil etish sohasiga zamonaviy axborot-kommunikatsiya texnologiyalarini keng joriy etish, shuningdek, yoʻl harakati qatnashchilarining xavfsiz harakatlanishi uchun zarur shart-sharoitlar yaratishga qaratilgan manzilli chora-tadbirlar amalga oshirilmoqda.

Shu bilan birga, yoʻllarda harakat xavfsizligini taʼminlash, transport oqimini boshqarish imkonini beradigan yoʻl harakatini avtomatlashtirilgan tartibga solish tizimlarini bosqichma-bosqich takomillashtirib borish talab etilmoqda.

Yoʻl harakati qatnashchilarining yoʻl-patrul xizmati statsionar postlari orqali harakatlanishida qoʻshimcha qulayliklar yaratish, shuningdek, “Yashil” va “Qizil” yoʻlak tizimining samaradorligini oshirish maqsadida Vazirlar Mahkamasi qaror qiladi:

1. Vazirlar Mahkamasining “Yoʻl harakati xavfsizligini taʼminlash sohasiga zamonaviy axborot texnologiyalarini keng joriy etish boʻyicha qoʻshimcha chora-tadbirlar toʻgʻrisida” 2022-yil 8-iyuldagi 377-son qaroriga ilovaga muvofiq quyidagilarni nazarda tutuvchi oʻzgartirishlar kiritilsin:

“Yashil” va “Qizil” yoʻlak tizimi joriy etilgan yoʻl-patrul xizmati statsionar postlaridan harakatlanadigan, sugʻurta polisining muddati oʻtgan va belgilangan muddatda texnik koʻrikdan oʻtmagan transport vositalarining maxsus toʻxtash joylariga joylashtirilmasdan “Yashil” yoʻlak boʻylab toʻsiqsiz harakatlanishiga ruxsat berish;

yoʻl-patrul xizmati statsionar postlarini rekonstruksiya qilish hamda yoʻl infratuzilmasini moslashtirishning aniq muddatlarini belgilagan holda “Yashil” va “Qizil” yoʻlak tizimini bosqichma-bosqich joriy etish.

2. Oʻzbekiston Respublikasi Raqamli texnologiyalar vazirligi “Yashil” va “Qizil” yoʻlak tizimining uzluksiz ishlashini taʼminlash maqsadida Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmati uchun yuqori tezlikdagi maʼlumotlar uzatish kanallarini (VPN) belgilangan tartibda ajratish choralarini koʻrsin.

3. Oʻzbekiston Respublikasi Ichki ishlar vazirligi ushbu qarorning mazmun va ahamiyatini ommaviy axborot vositalari, ijtimoiy tarmoqlar va rasmiy veb-sayti orqali keng yoritilishi hamda aholiga yetkazilishini taʼminlasin.

4. Mazkur qarorning bajarilishini nazorat qilish Oʻzbekiston Respublikasi ichki ishlar vaziri P.R. Bobojonov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2023-yil 11-avgust,

354-son

Vazirlar Mahkamasining 2023-yil 11-avgustdagi 354-son qaroriga
ILOVA

1. 1-bandning toʻrtinchi xatboshisidagi “sugʻurta polisining muddati oʻtgan, belgilangan muddatda texnik koʻrikdan oʻtmagan,” soʻzlari chiqarib tashlansin.

2. 3-band quyidagi tahrirda bayon etilsin:

“3. Belgilansinki, 2023-yil 1-dekabrdan boshlab “Yashil” va “Qizil” yoʻlak tamoyili mazkur qarorga 2-ilovadagi jadvalga muvofiq bosqichma-bosqich respublikaning yoʻl-patrul xizmati statsionar postlarida joriy etiladi”.

3. 4-bandning ikkinchi xatboshisida:

“Axborot texnologiyalari va kommunikatsiyalarini rivojlantirish vazirligi” soʻzlari “Raqamli texnologiyalar vazirligi” soʻzlari bilan almashtirilsin;

“2022” raqami “2023” raqami bilan almashtirilsin.

4. 1-ilovada:

a) 2-bandning uchinchi xatboshisi quyidagi tahrirda bayon etilsin:

“Qizil” yoʻlak — qidiruvda boʻlgan, vazn va hajm parametrlarini buzib harakatlangan yoki yoʻl harakati qoidalarini buzganlik uchun oʻz vaqtida toʻlanmagan jarimasi mavjud transport vositalari harakatlanishi shart boʻlgan harakatlanish boʻlagi”;

b) 6-bandning uchinchi xatboshisi quyidagi tahrirda bayon etilsin:

“Vazn va hajm parametrlarini buzib harakatlanadigan transport vositalari boʻyicha vazn va hajm parametrlari tegishli normaga moslashtirilgan taqdirda, ularning harakatini davom ettirishga ruxsat beriladi”.

5. 2-ilovaning matni quyidagi tahrirda bayon etilsin:

“Yoʻl patrul xizmati statsionar postlarining yoʻl infratuzilmasini tayyorlash hamda “Yashil” va “Qizil” yoʻlaklar tizimini bosqichma-bosqich joriy etish

JADVALI

T/r	YPX statsionar posti nomi	Hudud nomi	YPX statsionar posti joylashgan manzil	Tizimning hujjatlarini tayyorlash muddati	Tizimni joriy qilish muddati
I bosqich
1.	“Chinor” YPX statsionar posti	Toshkent viloyati	A373 “M39 avtoyoʻli-Guliston-Boʻka-Angren-Qoʻqon va Andijon orqali-Oʻsh” avtomobil yoʻlining 199-kilometri, Ohangaron tumani	tayyor	2024-yil yanvar
2.	“Namangan” YPX statsionar posti	Namangan viloyati	A373 “M39 avtoyoʻli-Guliston-Boʻka-Angren-Qoʻqon va Andijon orqali-Oʻsh” avtomobil yoʻlining 273-kilometri, Pop tumani	2024-yil fevral	2024-yil dekabr
II bosqich
3.	“45-YPX” YPX statsionar posti	Andijon viloyati	A373 “M-39 avtoyoʻli-Guliston-Boʻka-Angren-Qoʻqon va Andijon orqali-Oʻsh” avtomobil yoʻlining 469-kilometri, Xoʻjaobod tumani	2024-yil mart	2025-yil mart
4.	“A. Turbonov” YPX statsionar posti	Toshkent shahri	M34 “Toshkent-Dushanbe” avtomobil yoʻlining 15-kilometri, Sergeli tumani	2024-yil aprel	2025-yil aprel
5.	“Erkin” YPX statsionar posti		M39 “Almati-Bishkek-Toshkent-Shahrisabz-Termiz” avtomobil yoʻlining 817-kilometri, Chilonzor tumani	2024-yil may	2025-yil may
6.	“Sharq” YPX statsionar posti		A373 avtomobil yoʻlining “a” “Toshkent shahriga” shoxobchasining 45-kilometri, Bektemir tumani	2024-yil iyun	2025-yil iyun
7.	“Uch qahramon” YPX statsionar posti		M39 “Almati-Bishkek-Toshkent-Shahrisabz-Termiz” avtomobil yoʻlining 817-kilometri, Yunusobod tumani	2024-yil iyul	2025-yil iyul
8.	“Oybek” YPX statsionar posti	Toshkent viloyati	4R20 “Qorasuv-Boʻka-Bekobod” avtomobil yoʻlining 63-kilometri, Bekobod tumani	2024-yil avgust	2025-yil avgust
III bosqich
9.	“Sirdaryo” YPX statsionar posti	Sirdaryo viloyati	M39 “Almati-Bishkek-Toshkent-Shahrisabz-Termiz” avtomobil yoʻlining 871-kilometri, Sirdaryo tumani	2024-yil sentyabr	2025-yil sentyabr
10.	“Norin” YPX statsionar posti	Namangan viloyati	4R112 “Fargʻona halqa yoʻli” avtomobil yoʻlining 101-kilometri, Norin tumani	2024-yil oktyabr	2025-yil oktyabr
11.	“Manas-14” YPX statsionar posti	Jizzax viloyati	M39 “Almati-Bishkek-Toshkent-Shahrisabz-Termiz” avtomobil yoʻlining 939-kilometri, Doʻstlik tumani	2024-yil noyabr	2025-yil noyabr
12.	“Yakkabogʻ-15” YPX statsionar posti	Jizzax viloyati	A376 “Qoʻqon-Jizzax” avtomobil yoʻlining 242-kilometri, Zomin tumani	2024-yil dekabr	2025-yil dekabr
13.	“Yuqori nuqta” YPX statsionar posti	Samarqand viloyati	M39 “Almati-Bishkek-Toshkent-Shahrisabz-Termiz” avtomobil yoʻlining 1039-kilometri, Bulungʻur tumani	2025-yil yanvar	2026-yil yanvar
14.	“Omonqoʻton” YPX statsionar posti	Samarqand viloyati	M39 “Almati-Bishkek-Toshkent-Shahrisabz-Termiz” avtomobil yoʻlining 1120-kilometri, Urgut tumani	2025-yil fevral	2026-yil fevral
IV bosqich
15.	“Mingchinor” YPX statsionar posti	Qashqadaryo viloyati	M39 “Almati-Bishkek-Toshkent-Shahrisabz-Termiz” avtomobil yoʻlining 1139-kilometri, Kitob tumani	2025-yil mart	2026-yil mart
16.	“Umakay” YPX statsionar posti		A378 “Samarqand-Gʻuzor” avtomobil yoʻlining 57-kilometri, Chiroqchi tumani	2025-yil aprel	2026-yil aprel
17.	“Shirinbuloq” YPX statsionar posti		A380 “Gʻuzor-Buxoro-Nukus-Beynov” avtomobil yoʻlining 147-kilometri, Muborak tumani	2025-yil may	2026-yil may
18.	“Darband” YPX statsionar posti	Surxondaryo viloyati	M39 “Almati-Bishkek-Toshkent-Shahrisabz-Termiz” avtomobil yoʻlining 1335-kilometri, Boysun tumani	2025-yil iyun	2026-yil iyun
19.	“Manguzar” YPX statsionar posti	Surxondaryo viloyati	M41 “Bishkek-Dushanbe-Termiz” avtomobil yoʻlining 1618-kilometri, Termiz tumani	2025-yil iyul	2026-yil iyul
V bosqich
20.	“Sarmijon” YPX statsionar posti	Buxoro viloyati	M37 “Samarqand-Buxoro-Turkmanboshi” avtomobil yoʻlining 212-kilometri, Gʻijduvon tumani	2025-yil avgust	2026-yil avgust
21.	“Karakata” YPX statsionar posti	Navoiy viloyati	A379 “Navoiy-Uchquduq” avtomobil yoʻlining 125-kilometri, Konimex tumani	2025-yil sentyabr	2026-yil sentyabr
22.	“Zarafshon” YPX statsionar posti		A379 “Navoiy-Uchquduq” avtomobil yoʻlining 202-kilometri, Zarafshon shahri	2025-yil oktyabr	2026-yil oktyabr
23.	“Samarqand” YPX statsionar posti		M37 “Samarqand-Buxoro-Turkmanboshi” avtomobil yoʻlining 147-kilometri, Karmana tumani	2025-yil oktyabr	2026-yil oktyabr
VI bosqich
24.	“Momokoʻpir” YPX statsionar posti	Xorazm viloyati	4R160 “Urganch-Gurlan-Mangʻit-Turkmaniston Respublikasi chegarasi” avtomobil yoʻlining 65-kilometri, Gurlan tumani	2025-yil noyabr	2026-yil noyabr
25.	“Broyler” YPX statsionar posti	Qoraqalpogʻiston Respublikasi	A380 “Gʻuzor-Buxoro-Nukus-Beynov” avtomobil yoʻlining 754-kilometri, Nukus shahri	2025-yil noyabr	2026-yil noyabr
26.	“Miskin” YPX statsionar posti		A380 “Gʻuzor-Buxoro-Nukus-Beynov” avtomobil yoʻlining 561-kilometri, Toʻrtkoʻl tumani	2025-yil noyabr	2026-yil noyabr
27.	“Dovut ota” YPX statsionar posti		A380 “Gʻuzor-Buxoro-Nukus-Beynov” avtomobil yoʻlining 1184-kilometri, Qoʻngʻirot tumani	2026-yil yanvar	2026-yil dekabr
28.	“Bektemir” YPX statsionar posti	Toshkent shahri	4R2 “Toshkent-Toʻytepa-A373 avtoyoʻli (55 km)” avtomobil yoʻlinin� 11-kilometri, Bektemir tumani	2026-yil yanvar	2026-yil dekabr
29.	“Keles” YPX statsionar posti*	Toshkent viloyati	4R4 “Toshkent-Keles-Qozoqkentsoy-M39 avtoyoʻli (820 km)” avtomobil yoʻlining 16-kilometri, Toshkent tumani	2026-yil*	2026-yil*

Izoh: Yoʻl infratuzilmasining tayyor boʻlishidan kelib chiqqan holda, “yashil” va “qizil” yoʻlaklar tizimi joriy qilish jadvalda belgilangan muddatlardan oldin amalga oshirilishi mumkin.

* “Keles” YPX statsionar posti qurib bitkazilgandan keyin “yashil” va “qizil” yoʻlaklar tizimi joriy qilinadi”.

(Qonunchilik maʼlumotlari milliy bazasi, 15.08.2023-y., 09/23/354/0615-son)