1.02.00.00.00 Davlat boshqaruvi asoslari / 02.08.00.00 Iqtisodiyot, ijtimoiy-madaniy qurilish sohasidagi davlat boshqaruvining umumiy masalalari / 02.08.12.00 Hududlarni rivojlantirish]
[TSZ:
1.Iqtisodiyot / Qishloq xoʻjaligi]
Oʻzbekiston Respublikasi Vazirlar Mahkamasining
qarori
Sirdaryo viloyatida qishloq xoʻjaligi infratuzilmasini rivojlantirish jamgʻarmasi toʻgʻrisidagi nizomni tasdiqlash haqida
Oʻzbekiston Respublikasi Prezidentining “Sirdaryo viloyatida aholi bandligini taʼminlash va daromadini koʻpaytirish, shuningdek, qishloq xoʻjaligiga moʻljallangan yerlardan samarali foydalanishga doir chora-tadbirlar toʻgʻrisida” 2022-yil 28-noyabrdagi PQ-431-son qarori ijrosini taʼminlash, shuningdek, Sirdaryo viloyatida qishloq va suv xoʻjaligi sohalarini yanada rivojlantirish maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “Sirdaryo viloyatida aholi bandligini taʼminlash va daromadini koʻpaytirish, shuningdek, qishloq xoʻjaligiga moʻljallangan yerlardan samarali foydalanishga doir chora-tadbirlar toʻgʻrisida” 2022-yil 28-noyabrdagi PQ-431-son qarorining 6-bandi “e” kichik bandiga muvofiq Sirdaryo viloyatida qishloq xoʻjaligi infratuzilmasini rivojlantirish jamgʻarmasi tashkil etilganligi hamda jamgʻarma mablagʻlaridan yerlarni qayta foydalanishga kiritish uchun artezian quduqlarni qazish, lotoklar oʻtkazish, zovur qazish va drenajlar qurish, transformator oʻrnatish, elektr energiyasi tarmoqlarini tortish, tashkil etilgan infratuzilmalarni saqlash, yomgʻirlatib sugʻorish tizimini joriy etish, oʻsimliklarni himoya qilish maqsadlarida foydalanilishi belgilanganligi maʼlumot uchun qabul qilinsin.
2. Quyidagilarni nazarda tutuvchi Sirdaryo viloyatida qishloq xoʻjaligi infratuzilmasini rivojlantirish jamgʻarmasi toʻgʻrisidagi nizom ilovaga muvofiq tasdiqlansin:
jamgʻarma mablagʻlarini shakllantirish va ulardan foydalanish hamda jamgʻarma mablagʻlarini boshqarish tartibi;
jamgʻarma daromadlari va xarajatlari prognozini hamda uning mablagʻlari hisobidan moliyalashtiriladigan infratuzilma loyihalarining manzilli roʻyxatini shakllantirish va tasdiqlash, shuningdek, jamgʻarma mablagʻlarini sarflash tartibi;
jamgʻarmadan ajratilgan mablagʻlardan foydalanishni hisobga olish, hisobotini yuritish va nazorat qilish.
3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Qoʻchqorov va Sirdaryo viloyati hokimi A.A. Maxmudaliyev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2023-yil 29-aprel,
173-son
Vazirlar Mahkamasining 2023-yil 29-apreldagi 173-son qaroriga ILOVA
Sirdaryo viloyatida qishloq xoʻjaligi infratuzilmasini rivojlantirish jamgʻarmasi toʻgʻrisida
NIZOM
1-bob. Umumiy qoidalar
1. Mazkur Nizom Sirdaryo viloyatida qishloq xoʻjaligi infratuzilmasini rivojlantirish jamgʻarmasi (keyingi oʻrinlarda — Jamgʻarma) mablagʻlarini shakllantirish va ulardan foydalanish tartibini belgilaydi.
2. Jamgʻarma yuridik shaxs maqomiga ega boʻlmaydi va Sirdaryo viloyati hokimligi huzurida tashkil etiladi.
3. Ushbu Nizomda quyidagi asosiy tushunchalardan foydalaniladi:
buyurtmachi — mahalliy ijro etuvchi hokimiyat organlari, ustav fondida (ustav kapitalida) davlat ulushi 50 foiz va undan ortiq boʻlgan xoʻjalik jamiyatlari hamda davlat unitar korxonalari;
qishloq xoʻjaligi infratuzilmasini rivojlantirish loyihalari — qishloq xoʻjaligi yerlarini tashqi muhandislik-kommunikatsiya tarmoqlari bilan taʼminlashga (qurish, rekonstruksiya qilish va taʼmirlash) doir tadbirlar;
tashqi muhandislik-kommunikatsiya tarmoqlari — qishloq xoʻjaligi infratuzilmasini rivojlantirish loyihalarini amalga oshirish doirasida eng yaqin markazlashtirilgan tarmoqlardan ishlab chiqarish maydonlarining chegarasigacha oqar suv (beton lotoklar) va elektr tarmoqlarini tortish hamda zovurlar qazish ishlari.
4. Jamgʻarma mablagʻlari Oʻzbekiston Respublikasi Iqtisodiyot va moliya vazirligining axborot tizimida belgilangan tartibda mahalliy darajada ochilgan shaxsiy gʻazna hisobvaragʻida jamlanadi va ushbu Nizomda belgilangan maqsadlarga sarflanadi.
5. Sirdaryo viloyatida qishloq xoʻjaligi infratuzilmasini rivojlantirish loyihalari Jamgʻarma mablagʻlari hisobidan mazkur Nizomga ilovada keltirilgan sxema asosida moliyalashtiriladi.
2-bob. Jamgʻarma mablagʻlarini shakllantirish va ulardan foydalanish
6. Quyidagilar Jamgʻarma mablagʻlarini shakllantirish manbalari hisoblanadi:
Oʻzbekiston Respublikasi respublika budjetidan ajratilgan mablagʻlar;
jismoniy va yuridik shaxslarning homiylik xayriyalari;
qonunchilik hujjatlarida taqiqlanmagan boshqa manbalar.
7. Jamgʻarma mablagʻlari Sirdaryo viloyatida yerlarni qayta foydalanishga kiritish uchun artezian quduqlarni qazish, lotoklar oʻtkazish, zovur qazish va drenajlar qurish, transformator oʻrnatish va elektr energiyasi tarmoqlarini tortish, tashkil etilgan infratuzilmalarni saqlash, yomgʻirlatib sugʻorish tizimini joriy etish, oʻsimliklarni himoya qilish ishlari bilan bogʻliq xarajatlarga yoʻnaltiriladi.
3-bob. Jamgʻarma mablagʻlarini boshqarish
8. Jamgʻarma mablagʻlari Sirdaryo viloyati hokimining qishloq va suv xoʻjaligi masalalari boʻyicha oʻrinbosari tomonidan boshqariladi.
9. Jamgʻarma mablagʻlarini boshqarishda Sirdaryo viloyati hokimining qishloq va suv xoʻjaligi masalalari boʻyicha oʻrinbosarining asosiy vazifalari quyidagilardan iborat:
Jamgʻarma mablagʻlari hisobidan moliyalashtiriladigan qishloq xoʻjaligi infratuzilmasini rivojlantirish loyihalari boʻyicha buyurtmachi tashkilotlar (keyingi oʻrinlarda — buyurtmachi) tomonidan kiritilgan manzilli roʻyxatlarni koʻrib chiqish va ularning belgilangan tartibda kelishilishini taʼminlash;
Jamgʻarma mablagʻlari hisobidan moliyalashtiriladigan qishloq xoʻjaligi infratuzilmasini rivojlantirish loyihalarining tasdiqlangan manzilli roʻyxatiga asosan Davlat moliyasini boshqarish axborot tizimida hisobvaraqlar ochish va xarajatlar smetasini shakllantirish yuzasidan soʻrovnomalar taqdim etib borish;
Jamgʻarma daromadlari va xarajatlari ijrosi toʻgʻrisidagi hisobotlarni (oy, chorak, yil) tayyorlash hamda Sirdaryo viloyati iqtisodiyot va moliya bosh boshqarmasiga choraklik hisobotlarni hisobot choragi yakuni boʻyicha keyingi oyning 15-sanasiga qadar, yillik hisobotlarni hisobot yili yakuni boʻyicha keyingi yilning 25-yanvariga qadar taqdim etilishini taʼminlash;
Jamgʻarma daromadlari va xarajatlari ijrosi toʻgʻrisidagi hisobotlarni belgilangan tartibda tasdiqlash uchun Sirdaryo viloyati hokimiga taqdim etish;
buyurtmachi tomonidan bajarilgan ishlar yuzasidan taqdim etilgan hisobotlarga koʻra qishloq xoʻjaligi infratuzilmasini rivojlantirish loyihalarini moliyalashtirish ishlarining monitoringini yuritish.
Bunda buyurtmachi Jamgʻarma mablagʻlarining sarflanishi yuzasidan tegishli hisobotlarni taqdim etmagan taqdirda, buyurtmachi rahbariyatini yozma xabardor qilgan holda Jamgʻarma mablagʻlari hisobidan amalga oshiriladigan tadbirlar xarajatlarini moliyalashtirishni (toʻlashni) hisobotlar taqdim etilguniga qadar vaqtincha cheklab qoʻyishga haqli.
4-bob. Jamgʻarma mablagʻlari hisobidan moliyalashtiriladigan loyihalarning manzilli roʻyxatini shakllantirish va tasdiqlash
10. Oʻzbekiston Respublikasi Iqtisodiyot va moliya vazirligi huzuridagi Kadastr agentligi tizimidagi Respublika aerogeodeziya markazining tuman (shahar) boʻlimi keyingi yil uchun joriy yil yakuniga qadar tuman (shahar)dagi yer maydonlarini xatlovdan oʻtkazib, buyurtmachi bilan birgalikda qishloq xoʻjaligi infratuzilmasini rivojlantirish loyihalari boʻyicha takliflarni shakllantiradi hamda ushbu takliflarni tuman (shahar) qishloq xoʻjaligi boʻlimi bilan kelishgan holda tuman (shahar) hokimligiga kiritadi.
11. Tuman (shahar) hokimligi Oʻzbekiston Respublikasi Iqtisodiyot va moliya vazirligi huzuridagi Kadastr agentligi tizimidagi Respublika aerogeodeziya markazining tuman (shahar) boʻlimi tomonidan qishloq xoʻjaligi infratuzilmasini rivojlantirish loyihalari boʻyicha taqdim etilgan takliflarni qabul qilganidan soʻng 10 ish kunida, biroq har yili 10-yanvardan kechiktirmagan holda koʻrib chiqadi va istiqbolli loyihalarni Sirdaryo viloyati iqtisodiyot va moliya bosh boshqarmasiga yuborilishini taʼminlaydi.
12. Sirdaryo viloyati iqtisodiyot va moliya bosh boshqarmasining asosiy vazifalari quyidagilardan iborat:
qishloq xoʻjaligi infratuzilmasini rivojlantirish loyihalari boʻyicha taqdim etilgan takliflarni umumlashtirish va loyihalarning dastlabki manzilli roʻyxatini shakllantirish;
tuman (shahar) hokimlari tomonidan kiritilgan va Jamgʻarma mablagʻlari hisobidan amalga oshiriladigan qishloq xoʻjaligi infratuzilmasini rivojlantirish loyihalari boʻyicha takliflarni tegishli xulosalar asosida koʻrib chiqish;
tuman (shahar) hokimlari va sektor rahbarlari bilan birgalikda manzilli roʻyxatga kiritish taklif etilayotgan qishloq xoʻjaligi infratuzilmasini rivojlantirish loyihalarini amalga oshirish zaruratini hamda ularning joylashuvi boʻyicha keng jamoatchilik fikrini oʻrganish;
loyihalarni Jamgʻarma mablagʻlari hisobidan moliyalashtirish va buyurtmachini tanlash masalasini koʻrib chiqish uchun birlamchi hisob-kitoblar asosida shakllantirilgan qishloq xoʻjaligi infratuzilmasini rivojlantirish loyihalarining manzilli roʻyxatini Sirdaryo viloyati hokimligiga hamda xalq deputatlari Sirdaryo viloyati Kengashiga kiritish;
Jamgʻarma mablagʻlari hisobidan moliyalashtiriladigan qishloq xoʻjaligi infratuzilmasini rivojlantirish loyihalari boʻyicha buyurtmachilar tomonidan kiritilgan takliflarni koʻrib chiqish va belgilangan tartibda kelishish;
tasdiqlangan manzilli roʻyxatda nazarda tutilgan obyektlar boʻyicha buyurtmachi tomonidan kiritilgan maʼlumotlarga asosan qishloq xoʻjaligi infratuzilmasini rivojlantirish loyihalarining amalga oshirilishi boʻyicha tizimli monitoring yuritish.
13. Sirdaryo viloyati iqtisodiyot va moliya bosh boshqarmasi buyurtmachi bilan birgalikda bir oy muddatda, biroq har yili 1-fevraldan kechiktirmagan holda:
qishloq xoʻjaligi infratuzilmasini rivojlantirish loyihalari boʻyicha takliflarni oʻrganib chiqadi va loyihalarning manzilli roʻyxatini shakllantiradi hamda Sirdaryo viloyati qishloq xoʻjaligi boshqarmasi bilan kelishadi;
loyihalarni Jamgʻarma mablagʻlari hisobidan moliyalashtirish va buyurtmachini tanlash masalasini koʻrib chiqish uchun birlamchi hisob-kitoblar asosida shakllantirilgan qishloq xoʻjaligi infratuzilmasini rivojlantirish loyihalarining manzilli roʻyxatini Sirdaryo viloyati hokimligiga hamda xalq deputatlari Sirdaryo viloyati Kengashiga kiritadi.
14. Buyurtmachi qishloq xoʻjaligi infratuzilmasini rivojlantirish loyihalari boʻyicha takliflar xalq deputatlari viloyat Kengashining qarori bilan tasdiqlanganidan soʻng 20 ish kunida, biroq har yili 20-fevraldan kechiktirmagan holda Jamgʻarma mablagʻlari doirasida loyiha-smeta hujjatlarini ishlab chiqadi va ularni ekspertizadan oʻtkazadi, shuningdek, tender (tanlov)larni tashkil etadi hamda bosh pudrat tashkilotini aniqlaydi.
15. Buyurtmachi tender (tanlov)lardan soʻng 5 ish kunida, biroq har yili 25-fevraldan kechiktirmagan holda qishloq xoʻjaligi infratuzilmasini rivojlantirish loyihalarini moliyalashtirish uchun tegishli hujjatlarni Sirdaryo viloyati iqtisodiyot va moliya bosh boshqarmasiga taqdim qiladi.
16. Sirdaryo viloyati iqtisodiyot va moliya bosh boshqarmasi qishloq xoʻjaligi infratuzilmasini rivojlantirish loyihalarining belgilangan tartibda kelishilgan va tasdiqlangan manzilli roʻyxatiga asosan 3 ish kunida, biroq har yili 1-martdan kechiktirmagan holda Jamgʻarma mablagʻlari hisobidan loyihalarni xarajatlar smetasida nazarda tutilgan mablagʻlar doirasida moliyalashtirib boradi.
5-bob. Jamgʻarma mablagʻlarini sarflash, mablagʻlardan foydalanishni hisobga olish, hisobotini yuritish va nazorat qilish
17. Jamgʻarmaning foydalanilmagan hamda buyurtmachining majburiyatlari boʻyicha qurish, rekonstruksiya qilish va taʼmirlash ishlari yuzasidan toʻliq moliyalashtirilmagan mablagʻlar Oʻzbekiston Respublikasi Davlat budjetiga olib qoʻyilmaydi va kelgusi yilga oʻtkaziladi hamda maqsadli ravishda sarflanadi.
18. Sirdaryo viloyati hokimining qishloq va suv xoʻjaligi masalalari boʻyicha oʻrinbosari Jamgʻarma daromadlari va xarajatlari ijrosi toʻgʻrisidagi hisob-kitoblarni va hisobotlarni qonunchilik hujjatlarida belgilangan tartibda yuritadi.
19. Buyurtmachi Jamgʻarmadan ajratilgan mablagʻlarning oʻzlashtirilishi boʻyicha hisobotlarni (elektron tarzda, agar elektron aloqa vositalari bilan uzatish dasturi joriy etilgan boʻlsa) Sirdaryo viloyati iqtisodiyot va moliya bosh boshqarmasiga har oy yakuni boʻyicha keyingi oyning 5-sanasiga qadar taqdim etadi.
20. Sirdaryo viloyati hokimining qishloq va suv xoʻjaligi masalalari boʻyicha oʻrinbosari taqdim etilgan tegishli hisobot va maʼlumotlar asosida Jamgʻarmadan ajratilgan mablagʻlarning oʻzlashtirilishi yuzasidan monitoring olib boradi hamda har chorak yakuni boʻyicha keyingi oyning oʻn beshinchi sanasiga qadar xalq deputatlari viloyat Kengashiga axborot kiritib boradi.
6-bob. Yakunlovchi qoidalar
21. Jamgʻarma mablagʻlarining maqsadli ishlatilishi ustidan nazorat Sirdaryo viloyati davlat moliyaviy nazorati boshqarmasi tomonidan amalga oshiriladi.
22. Jamgʻarma qonunchilik hujjatlarida belgilangan tartibda qayta tashkil etiladi va tugatiladi.
23. Mazkur Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.
Sirdaryo viloyatida qishloq xoʻjaligi infratuzilmasini rivojlantirish jamgʻarmasi toʻgʻrisidagi nizomga ILOVA
Sirdaryo viloyatida qishloq xoʻjaligi infratuzilmasini rivojlantirish loyihalarini moliyalashtirish
SXEMASI
Bosqichlar
Subyektlar
Chora-tadbirlar
Muddatlar
1-bosqich
Iqtisodiyot va moliya vazirligi huzuridagi Kadastr agentligi tizimidagi Respublika aerogeodeziya markazining tuman (shahar) boʻlimi
Tuman (shahar)dagi yer maydonlarini xatlovdan oʻtkazib, buyurtmachi bilan birgalikda qishloq xoʻjaligi infratuzilmasini rivojlantirish loyihalari boʻyicha takliflarni shakllantiradi va ushbu takliflarni tuman (shahar) qishloq xoʻjaligi boʻlimi bilan kelishgan holda tuman (shahar) hokimligiga kiritadi.
Keyingi yil uchun joriy yil yakuniga qadar
2-bosqich
Tuman (shahar) hokimligi
Iqtisodiyot va moliya vazirligi huzuridagi Kadastr agentligi tizimidagi Respublika aerogeodeziya markazining tuman (shahar) boʻlimi tomonidan qishloq xoʻjaligi infratuzilmasini rivojlantirish loyihalari boʻyicha taqdim etilgan takliflarni koʻrib chiqadi va istiqbolli loyihalarni Sirdaryo viloyati iqtisodiyot va moliya bosh boshqarmasiga yuborilishini taʼminlaydi.
10 ish kunida, biroq har yili 10-yanvardan kechiktirmagan holda
3-bosqich
Sirdaryo viloyati iqtisodiyot va moliya bosh boshqarmasi
Buyurtmachi bilan birgalikda qishloq xoʻjaligi infratuzilmasini rivojlantirish loyihalari boʻyicha takliflarni oʻrganib chiqadi va loyihalarning manzilli roʻyxatini shakllantiradi hamda Sirdaryo viloyati qishloq xoʻjaligi boshqarmasi bilan kelishadi.
Jamgʻarma mablagʻlari hisobidan loyihalarni moliyalashtirish va buyurtmachini tanlash masalasini koʻrib chiqish uchun birlamchi hisob-kitoblar asosida shakllantirilgan qishloq xoʻjaligi infratuzilmasini rivojlantirish loyihalarining manzilli roʻyxatini Sirdaryo viloyati hokimligiga hamda xalq deputatlari Sirdaryo viloyati Kengashiga kiritadi.
Bir oy muddatda, biroq har yili 1-fevraldan kechiktirmagan holda
4-bosqich
Buyurtmachi
Qishloq xoʻjaligi infratuzilmasini rivojlantirish loyihalarining manzilli roʻyxati xalq deputatlari Sirdaryo viloyati Kengashining qarori bilan tasdiqlanganidan soʻng Jamgʻarma mablagʻlari doirasida loyiha-smeta hujjatlarini ishlab chiqadi va ularni ekspertizadan oʻtkazadi, shuningdek, tender (tanlov)larni tashkil etadi hamda bosh pudrat tashkilotini aniqlaydi.
20 ish kunida, biroq har yili 20-fevraldan kechiktirmagan holda
5-bosqich
Buyurtmachi
Tender (tanlov)lardan soʻng qishloq xoʻjaligi infratuzilmasini rivojlantirish loyihalarini moliyalashtirish uchun tegishli hujjatlarni Sirdaryo viloyati iqtisodiyot va moliya bosh boshqarmasiga taqdim qiladi.
5 ish kunida, biroq har yili 25-fevraldan kechiktirmagan holda
6-bosqich
Sirdaryo viloyati iqtisodiyot va moliya bosh boshqarmasi
Qishloq xoʻjaligi infratuzilmasini rivojlantirish loyihalarining belgilangan tartibda kelishilgan va tasdiqlangan manzilli roʻyxatiga asosan Jamgʻarma mablagʻlari hisobidan loyihalarni xarajatlar smetasida nazarda tutilgan mablagʻlar doirasida moliyalashtirib boradi.
3 ish kunida, biroq har yili 1-martdan kechiktirmagan holda
(Qonunchilik maʼlumotlari milliy bazasi, 01.05.2023-y., 09/23/173/0235-son; 10.11.2025-y., 09/25/709/1027-son))
