Soʻnggi yillarda respublikada oʻrmon bilan qoplangan maydonlarni kengaytirish, qishloq xoʻjaligiga moʻljallangan yerlarning shamol eroziyasiga va suv xoʻjaligi obyektlarini qum bosishiga qarshi kurashish, shuningdek, shamol eroziyasining qishloq xoʻjaligi ekinlariga salbiy taʼsirini kamaytirish maqsadida ihota daraxtzorlarini barpo etish borasida izchil chora-tadbirlar amalga oshirilmoqda.

Shu bilan birga, sugʻoriladigan yerlar va suv xoʻjaligi obyektlarini himoya qilishda ihota daraxtzorlarini barpo etish, ekilgan daraxtlarni parvarish qilish uchun ajratilgan mablagʻlarini toʻlab berish, shuningdek, buyurtmachi hamda pudrat tashkilotlari oʻrtasida tuzilgan shartnoma majburiyatlari toʻliq bajarilishini taʼminlash muhim vazifa boʻlib qolmoqda.

Oʻzbekiston Respublikasi Prezidentining “Oʻzbekiston Respublikasida oʻrmon xoʻjaligi tizimini 2030-yilgacha rivojlantirish konsepsiyasini tasdiqlash toʻgʻrisida” 2020-yil 6-oktabrdagi PQ-4850-son qarori ijrosini taʼminlash, shuningdek, sugʻoriladigan yerlarning shamol eroziyasiga hamda suv xoʻjaligi obyektlarini qum bosishiga qarshi ihota daraxtzorlarini barpo etish va rekonstruksiya qilishni moliyalashtirish boʻyicha ajratilgan Oʻzbekiston Respublikasi davlat budjeti mablagʻlaridan samarali foydalanishni taʼminlash maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Prezidentining “Oʻzbekiston Respublikasida oʻrmon xoʻjaligi tizimini 2030-yilgacha rivojlantirish konsepsiyasini tasdiqlash toʻgʻrisida” 2020-yil 6-oktabrdagi PQ-4850-son qarorida 2022-yilda Qoraqalpogʻiston Respublikasi va viloyatlarda sugʻoriladigan yerlarning shamol eroziyasiga va suv xoʻjaligi obyektlarini qum bosishiga qarshi 2500 gektar maydonda ihota daraxtzorlari barpo etilishi belgilanganligi;

2022-yil bahor mavsumida Qoraqalpogʻiston Respublikasi va viloyatlarda sugʻoriladigan yerlarning shamol eroziyasiga va suv xoʻjaligi obyektlarining qum bosishiga qarshi 2130 gektar maydonda (85 foiz) ihota daraxtzorlari barpo etilganligi hamda 370 gektar maydon (15 foiz) kuz mavsumida daraxt ekish rejalashtirilganligi maʼlumot uchun qabul qilinsin.

2. Vazirlar Mahkamasining 2018-yil 5-iyundagi 422-son qarori bilan tasdiqlangan Sugʻoriladigan yerlarning shamol eroziyasiga hamda suv xoʻjaligi obyektlarini qum bosishiga qarshi ihota daraxtzorlarini barpo etish va rekonstruksiya qilish tartibi toʻgʻrisida nizom 28-bandining uchinchi xatboshisi quyidagi mazmundagi uchinchi va toʻrtinchi xatboshilar bilan almashtirilsin:

“har oyda joriy moliyalashtirish bajarilgan ishlar hajmining 95 foizi miqdorida, berilgan avansga proporsional ravishda chegirib qolgan holda;

loyiha qiymatining qolgan 5 foizini toʻlash shartnomada koʻrsatilgan kafolat muddati tugagandan soʻng amalga oshiriladi”.

3. Mazkur qarorning bajarilishini nazorat qilish Oʻzbekiston Respublikasining Bosh vazirining agrar va oziq-ovqat sohalarini rivojlantirish masalalari boʻyicha oʻrinbosari Sh.M. Gʻaniyev zimmasiga yuklansin.