377-сон 08.07.2022. Yoʻl harakati xavfsizligini taʼminlash sohasiga zamonaviy axborot texnologiyalarini keng joriy etish boʻyicha qoʻshimcha chora-tadbirlar toʻgʻrisida

Hujjat 08.07.2022 sanasi holatiga
Amaldagi versiyaga o‘tish

Oʻzbekiston Respublikasi Vazirlar Mahkamasining

qarori

Yoʻl harakati xavfsizligini taʼminlash sohasiga zamonaviy axborot texnologiyalarini keng joriy etish boʻyicha qoʻshimcha chora-tadbirlar toʻgʻrisida

Oʻzbekiston Respublikasida yoʻl harakati xavfsizligini taʼminlash, yoʻl-transport hodisalarining oldini olish, huquqbuzarliklarni oʻz vaqtida aniqlash va ularga barham berishni taʼminlaydigan yoʻl harakatini avtomatlashtirilgan tartibga solish tizimini kengaytirish boʻyicha ichki ishlar organlari faoliyatining sifat jihatidan yangi tartibi belgilandi.

Mazkur yoʻnalishdagi ishlarni yanada jadallashtirish, yoʻl harakatini tashkil etish sohasiga zamonaviy axborot texnologiyalarini keng joriy etish, shuningdek, yoʻl harakati barcha ishtirokchilarining xavfsiz harakatlanishi uchun zarur shart-sharoitlar yaratish maqsadida Vazirlar Mahkamasi qaror qiladi:

1. Oʻzbekiston Respublikasi Ichki ishlar vazirligining Vazirlar Mahkamasining “Oʻzbekiston Respublikasi yoʻl xavfsizligini taʼminlash tizimini yanada takomillashtirish chora-tadbirlari toʻgʻrisida” 2018-yil 19-maydagi 377-son qaroriga muvofiq faoliyat koʻrsatayotgan yoʻl-patrul xizmati statsionar postlarida zamonaviy axborot-kommunikatsiya texnologiyalarini joriy qilish orqali ushbu maskanlarda inson omilini cheklagan holda transport vositalarining toʻsiqsiz harakatlanishini taʼminlash boʻyicha “Yashil” va “Qizil” yoʻlak tizimini (keyingi oʻrinlarda — “Yashil” va “Qizil” yoʻlak tamoyili) bosqichma-bosqich joriy etish toʻgʻrisidagi taklifi maʼqullansin.

Bunda, yoʻl-patrul xizmati statsionar postlarida tashkil etiladigan:

“Yashil” yoʻlakdan — belgilangan qoidalarga rioya etadigan va huquqbuzarlik sodir etmagan transport vositalari haydovchilari hech qanday toʻsiqsiz va cheklovlarsiz harakatlanadi;

“Qizil” yoʻlakdan — qidiruvda boʻlgan, sugʻurta polisining muddati oʻtgan, belgilangan muddatda texnik koʻrikdan oʻtmagan, vazn va hajm parametrlarini buzib harakatlanayotgan yoki yoʻl harakati qoidalarini buzganlik uchun oʻz vaqtida toʻlanmagan jarimasi mavjud boʻlgan transport vositalari harakatlanadi.

Keyingi tahrirga qarang.

2. Quyidagilarni nazarda tutuvchi Yoʻl-patrul xizmati statsionar postlarida “Yashil” va “Qizil” yoʻlak tamoyili asosida harakatlanish tartibini joriy etish toʻgʻrisidagi nizom 1-ilovaga muvofiq tasdiqlansin:

“Yashil” va “Qizil” yoʻlak tamoyili asosida yoʻl-patrul xizmati statsionar postlarining faoliyatini tashkil etish tartibi;

avtotransport vositalarining yoʻl-patrul xizmati statsionar postlarida “Yashil” va “Qizil” tamoyili asosida tashkil etiladigan yoʻlaklar orqali harakatlanish tartibi;

postlarga xizmatni oʻtash uchun jalb etiladigan yoʻl-patrul xizmati xodimlarining asosiy huquq va majburiyatlari;

postlarga transport vositasida harakatlanib kelgan haydovchining huquq va majburiyatlari;

postlar faoliyati ustidan nazorat qilish tartibi.

3. Belgilansinki, 2022-yil 1-dekabrdan boshlab “Yashil” va “Qizil” yoʻlak tamoyili Toshkent viloyati Ohangaron tumanida joylashgan “Chinor” va Namangan viloyati Pop tumanida joylashgan “Namangan” yoʻl-patrul xizmati statsionar postlarida hamda 2-ilovadagi jadvalga muvofiq bosqichma-bosqich respublikaning qolgan yoʻl-patrul xizmati statsionar postlarida joriy etiladi.

Keyingi tahrirga qarang.

4. Oʻzbekiston Respublikasi Ichki ishlar vazirligi:

Axborot texnologiyalari va kommunikatsiyalarini rivojlantirish vazirligi bilan birgalikda ikki oy muddatda “Yashil” va “Qizil” yoʻlaklar tizimini joriy etish boʻyicha texnik hujjatlarni ishlab chiqib, belgilangan tartibda tasdiqlasin hamda 2022-yil 1-noyabrga qadar tizimning ishga tushirilishini taʼminlasin;

Keyingi tahrirga qarang.

Transport vazirligi, Moliya vazirligi, Axborot texnologiyalari va kommunikatsiyalarini rivojlantirish vazirligi hamda boshqa manfaatdor tashkilotlar bilan birgalikda 2022-yil yakuniga qadar transport oqimini hisoblash, tirbandliklarning oldini olish, qidiruvda boʻlgan va olib qochilgan transport vositalarining harakatlanish yoʻnalishini aniqlash hamda transport vositalari toʻgʻrisidagi maʼlumotlarni masofadan uzatish imkoniyatini oʻz ichiga olgan radiochastotalardan foydalangan holda kontaktsiz maʼlumotlar almashinuvi texnologiyasining jahon tajribasini oʻrganib chiqsin va belgilangan tartibda Vazirlar Mahkamasiga takliflar kiritsin.

5. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari mazkur qarorga 2-ilovada koʻrsatilgan yoʻl-patrul xizmati statsionar postlariga tutash hamda ular atrofidagi boʻsh turgan va zaxiraga olingan qishloq xoʻjaligida foydalanilmaydigan yer uchastkalarini ushbu postlarda zarur inshootlarni barpo etish va jihozlash maqsadida tegishli ichki ishlar organlari murojaatiga asosan ularga doimiy foydalanish huquqi bilan ajratilishini taʼminlasin.

6. Belgilab qoʻyilsinki, yoʻl-patrul xizmati statsionar postlarida “Yashil” va “Qizil” yoʻlak tizimini joriy etish bilan bogʻliq xarajatlar Oʻzbekiston Respublikasi Ichki ishlar vazirligining budjetdan tashqari mablagʻlari, xalqaro moliya institutlari, xorijiy tashkilotlar hamda donor mamlakatlar kreditlari va grantlari, shuningdek, qonunchilik hujjatlarida taqiqlanmagan boshqa manbalar hisobidan amalga oshiriladi.

7. Vazirlar Mahkamasining “Yoʻl harakati xavfsizligi sohasidagi huquqbuzarliklarga qarshi kurashish samaradorligini oshirishga doir qoʻshimcha chora-tadbirlar toʻgʻrisida” 2018-yil 20-sentabrdagi 747-son qaroriga 3-ilovaga muvofiq qoʻshimchalar kiritilsin.

8. Ushbu qarorning bajarilishini nazorat qilish Oʻzbekiston Respublikasi ichki ishlar vaziri P.R. Bobojonov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2022-yil 8-iyul,

377-son

Vazirlar Mahkamasining 2022-yil 8-iyuldagi 377-son qaroriga
1-ILOVA

Yoʻl-patrul xizmati statsionar postlarida “Yashil” va “Qizil” yoʻlak tamoyili asosida harakatlanish tartibini joriy etish toʻgʻrisida

NIZOM

1-bob. Umumiy qoidalar

1.Ushbu Nizom avtotransport vositalarining yoʻl-patrul xizmati statsionar postlari (keyingi oʻrinlarda — postlar)da tashkil etilgan “Yashil” va “Qizil” yoʻlak tamoyili asosida harakatlanishi tartibini belgilaydi.

2. Ushbu Nizomda quyidagi asosiy tushunchalardan foydalaniladi:

yorugʻlik diodli ekran — LED displey, vizual maʼlumotlarni koʻrsatish va uzatish uchun qurilma (displey, monitor, televizor, elektron tablo);

“Qizil” yoʻlak — qidiruvda boʻlgan, texnik koʻrikdan oʻtmagan, sugʻurta polisi muddati oʻtgan, vazn va hajm parametrlarini buzib harakatlangan yoki yoʻl harakati qoidalarini buzganlik uchun jarima solish haqida qaror chiqarilgan kundan eʼtiboran oltmish kun ichida toʻlanmagan jarimasi mavjud transport vositalari harakatlanishi shart boʻlgan harakatlanish boʻlagi;

Keyingi tahrirga qarang.

qarzdorlik — yoʻl harakati qoidalarini buzganlik uchun jarima solish haqida qaror chiqarilgan kundan eʼtiboran oltmish kun ichida toʻlanmagan jarima;

post — yoʻl-patrul xizmati xodimlarining xizmat koʻrsatish, tezkor-texnik va maxsus vositalar, muhandislik va boshqa tuzilmalar bilan jihozlangan joy;

harakatlanish boʻlagi — avtomobillarning bir qator boʻlib harakatlanishi uchun yetarlicha keng boʻlgan, yoʻl chiziqlari bilan belgilangan yoki belgilanmagan yoʻl qatnov qismining har qanday boʻylama boʻlagi;

foto va video qayd etish qurilmasi — yoʻl harakati qoidalari buzilishini maxsus avtomatlashtirilgan foto va video texnika vositalari yordamida qayd etuvchi qurilma;

“Yashil” yoʻlak — “Qizil” yoʻlak orqali harakatlanish shartligini koʻrsatuvchi alomatlari boʻlmagan transport vositalarining harakatlanishiga ruxsat beriladigan harakatlanish boʻlagi.

3. Postlarda oʻrnatilgan tartib xorijiy transport vositalariga ham tatbiq etiladi.

2-bob. “Yashil” va “Qizil” yoʻlak tamoyili asosida postlarning faoliyatini tashkil etish

4. Transport vositalarining harakati foto va video qayd etish qurilmalari orqali qayd qilinib, haydovchilarga yorugʻlik diodli ekran orqali ishora berish yoʻli bilan tartibga solinadi.

5. Yorugʻlik diodli ekranda aks ettirilmagan yoki “Yashil” yoʻlak boʻylab harakatlanish haqida ishora berilgan transport vositalari “Yashil” yoʻlak boʻylab toʻsiqsiz harakatlanadi.

6. “Qizil” yoʻlakdan harakatlanishi buyurilgan transport vositalari boʻyicha harakat qatnashchilarining hujjatlari elektron maʼlumotlar bazasidan foydalangan holda tekshiriladi, aniqlangan qarzdorliklar boʻyicha postlarda tashkil etilgan bank terminallari orqali qarzdorlik boʻyicha toʻlov amalga oshirilganidan soʻng, ularning harakatini davom ettirishga ruxsat berish choralari koʻriladi.

Qarzdorlik toʻlanmagan hollarda transport vositalari Oʻzbekiston Respublikasining Maʼmuriy javobgarlik toʻgʻrisidagi kodeksi 291-moddasi hamda Vazirlar Mahkamasining 2011-yil 25-maydagi 149-son qarori bilan tasdiqlangan Qonunchilik hujjatlari buzilganligi uchun ushlangan transport vositalarini maxsus toʻxtash joylariga olib kelish, joylashtirish va saqlash tartibi toʻgʻrisidagi nizomga muvofiq maxsus toʻxtash joylariga joylashtiriladi.

Texnik koʻrikdan oʻtmagan, sugʻurta polisi muddati oʻtgan transport vositalari yuzasidan maʼmuriy bayonnoma tuzilgandan soʻng, vazn va hajm parametrlarini buzib harakatlangan transport vositalari boʻyicha esa vazn va hajm parametrlari tegishli normaga moslashtirilgan taqdirda ularning harakatini davom ettirishga ruxsat beriladi.

Keyingi tahrirga qarang.

Vazn va hajm parametrlarini buzib harakatlangan transport vositalari boʻyicha vazn va hajm parametrlarini tegishli normaga moslashtirilmagan yoki obyektiv sabablarga koʻra buning imkoni boʻlmagan taqdirda qonun hujjatlarida belgilangan tartibda ushlab turish choralari koʻriladi.

Qidiruvda boʻlgan transport vositalari aniqlanganda, ushbu transport vositalari darhol maxsus toʻxtash joylariga joylashtiriladi.

7. Qarzdorlik aniqlangan transport vositalariga quyidagi hollarda harakatni davom ettirishga ruxsat etiladi:

transport vositasi toʻxtatilgan vaqtdan eʼtiboran koʻpi bilan 30 daqiqa ichida qarzdorlikka oid batafsil maʼlumot olish imkoniyati boʻlmasa yoxud postlarda tashkil etilgan bank terminallari ishlamayotgan yoki aniqlangan qarzdorliklar boʻyicha toʻlovni qonun hujjatlarida belgilangan boshqacha tartibda amalga oshirish imkoniyati boʻlmagan hollarda;

aniqlangan qarzdorliklarga asos boʻlgan qoidabuzarliklar yuzasidan sudga murojaat qilingan yoki ish sudda koʻrilayotgan hollarda (bundan ish yuzasidan sudning qarori qonuniy kuchga kirgan hollar mustasno);

transport vositasida shoshilinch tibbiy yordamga muhtoj shaxs boʻlganda;

favqulodda vaziyatlar (tabiiy ofat, texnogen halokat, yongʻin)da yuk yoki odamlarni tashish hollarida;

transport vositasi marhumni tashish uchun foydalanilayotgan yoki dafn marosimida ishtirok etayotgan hollarda.

3-bob. Postlarga xizmatni oʻtash uchun jalb etiladigan yoʻl-patrul xizmati xodimlarining huquq va majburiyatlari

8. Postlarda xizmat oʻtayotgan yoʻl-patrul xizmati xodimlari quyidagi huquqlarga ega:

“Qizil” yoʻlak boʻylab harakatlanishi lozim boʻlgan transport vositalari yuzasidan qonun hujjatlarida belgilangan choralarni koʻrish;

“Qizil” yoʻlak boʻylab harakatlanishi lozim boʻlgan, biroq axborot ishora belgilariga rioya qilmagan transport vositalarini toʻxtatish choralarini koʻrish.

9. Yoʻl-patrul xizmati xodimlari quyidagilarga majbur:

hududiy ichki ishlar organlari navbatchilik qismi va markaziy axborot dispetcherlik xizmati — axborot dispetcherlik xizmati (keyingi oʻrinlarda — MADX-ADX) bilan doimiy aloqada boʻlish;

postlarda mavjud yorugʻlik diodli ekran yordamida, transport vositalarini qizil va yashil yoʻlaklar boʻylab toʻgʻri harakat qilib kelayotganligini nazorat qilish;

axborot ishora belgilari yoki yorugʻlik diodli ekranda namoyon boʻlgan maʼlumotlarga amal qilmasdan harakatlanishi kerak boʻlgan yoʻlakda harakatlanmagan transport vositasini oʻrnatilgan tartibda tegishli ishora berish yoʻli bilan toʻxtatish;

postlarda mavjud texnik jihozlarning soz holda ishlashini muntazam ravishda nazorat qilish;

texnik jihozlarda nosozliklar aniqlangan taqdirda, ularni zudlik bilan bartaraf etish choralarini koʻrish;

postlardan “Qizil” yoʻlak boʻylab oʻtgan transport vositalari boʻyicha kunlik hisobotni yuritish va qoʻllanilgan choralar boʻyicha maʼlumotni hududiy yoʻl harakati xavfsizligi xizmatlariga yuborish.

4-bob. Postlarga transport vositasida harakatlanib kelgan haydovchining huquq va majburiyatlari

10. Postlarga transport vositasida harakatlanib kelgan haydovchilar quyidagi huquqlarga ega:

yorugʻlik diodli ekran orqali qizil yoʻlakdan harakatlanish buyurilganligi asoslari toʻgʻrisida tushuntirish berilishini talab qilish;

aniqlangan kamchiliklar va qarzdorliklar bilan bogʻliq maʼlumotlar bilan tanishish;

yoʻl quyilgan kamchiliklar va qarzdorliklar yuzasidan tushuntirishlar berish;

mavjud qarzdorlik yoki transport vositasi qidiruvda ekanligi munosabati bilan maxsus toʻxtash joyiga joylashtirilganligi yuzasidan yuqori turuvchi organ (mansabdor shaxs)ga yoki sudga shikoyat qilish.

11. Postlarga transport vositasida harakatlanib kelgan haydovchi axborot ishora belgilari yoki yorugʻlik diodli ekranda namoyon etilgan maʼlumotlardagi ishoralarga soʻzsiz rioya qilishga majbur.

5-bob. Postlar faoliyati ustidan nazorat

12. Postlarning faoliyati ustidan nazorat bevosita Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmati tomonidan olib boriladi.

13. Postlarda xizmat olib borayotgan yoʻl-patrul xizmati xodimlari tomonidan taqdim etilgan kunlik maʼlumot hududiy yoʻl harakati xavfsizligi xizmatlari tomonidan umumlashtirilib, avtomatlashtirilgan maʼlumotlar bazasi bilan solishtiriladi va oylik hisobot yuritiladi.

Oylik hisobot bevosita Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmatiga taqdim etiladi.

6-bob. Yakunlovchi qoidalar

14. Haydovchilar postlarga xizmatni oʻtash uchun jalb etiladigan yoʻl-patrul xizmati xodimlarining xatti-harakatlari yuzasidan qonunchilik hujjatlarida belgilangan tartibda shikoyat qilishlari mumkin.

15. Mazkur Nizom talablarini buzgan shaxslar qonunchilik hujjatlarida belgilangan tartibda javob beradilar.

Vazirlar Mahkamasining 2022-yil 8-iyuldagi 377-son qaroriga
2-ILOVA

Yoʻl-patrul xizmati statsionar postlarida “Yashil” va “Qizil” yoʻlak tamoyilini bosqichma-bosqich joriy etish

JADVALI

T/r	YPX statsionar posti nomi	Hudud nomi	YPX statsionar posti joylashgan manzil	Rekonstruksiya qilish, qurish (bitkazish muddati)
I-bosqich
1.	“Chinor” YPX statsionar posti	Toshkent viloyati	A373 “M39 avtoyoʻli-Guliston-Boʻka-Angren-Qoʻqon va Andijon orqali-Oʻsh” avtomobil yoʻlining 199-kilometrida, Ohangaron tumani	dekabr 2022-yil
2.	“Namangan” YPX statsionar posti	Namangan viloyati	A373 “M39 avtoyoʻli-Guliston-Boʻka-Angren-Qoʻqon va Andijon orqali-Oʻsh” avtomobil yoʻlining 273-kilometrida, Pop tumani	dekabr 2022-yil
II-bosqich
3.	45-YPX statsionar posti	Andijon viloyati	A373 “M-39 avtoyoʻli-Guliston-Boʻka-Angren-Qoʻqon va Andijon orqali-Oʻsh” avtomobil yoʻlining 469-kilometrida, Xoʻjaobod tumani	fevral 2023-yil
4.	“A. Turbonov” YPX statsionar posti	Toshkent shahri	M34 “Toshkent-Dushanbe” avtomobil yoʻlining 15-kilometrida, Sergeli tumani
5.	“Erkin” YPX statsionar posti		M39 “Almati-Bishkek-Toshkent-Shahrisabz-Termiz” avtomobil yoʻlining 817-kilometrida, Chilonzor tumani
6.	“Bektemir” YPX statsionar posti		4R2 “Toshkent-Toʻytepa-A373 avtoyoʻli (55 km)” avtomobil yoʻlining 11-kilometrida, Bektemir tumani
7.	“Sharq” YPX statsionar posti		A373 avtomobil yoʻlining “a” “Toshkent shahriga” shoxobchasining 45-kilometrida, Bektemir tumani
8.	“Uch qahramon” YPX statsionar posti		M39 “Almati-Bishkek-Toshkent-Shahrisabz-Termiz” avtomobil yoʻlining 817-kilometrida, Yunusobod tumani	iyul 2023-yil
9.	“Keles” YPX statsionar posti		4R4 “Toshkent-Keles-Qozoqkentsoy-M39 avtoyoʻli (820 km)” avtomobil yoʻlining 16-kilometrida, Toshkent tumani
10.	“Oybek” YPX statsionar posti	Toshkent viloyati	4R20 “Qorasuv-Boʻka-Bekobod” avtomobil yoʻlining 63-kilometrida, Bekobod tumani
III-bosqich
11.	“Sirdaryo” YPX statsionar posti	Sirdaryo viloyati	M39 “Almati-Bishkek-Toshkent-Shaxrisabz-Termiz” avtomobil yoʻlining 871-kilometrida, Sirdaryo tumani	fevral 2024-yil
12.	“Norin” YPX statsionar posti	Namangan viloyati	4R112 “Fargʻona halqa yoʻli” avtomobil yoʻlining 101-kilometrida, Norin tumani
13.	“Manas-14” YPX statsionar posti	Jizzax viloyati	M39 “Almati-Bishkek-Toshkent-Shahrisabz-Termiz” avtomobil yoʻlining 939-kilometrida, Doʻstlik tumani
14.	“Yakkabogʻ-15” YPX statsionar posti	Jizzax viloyati	A376 “Qoʻqon-Jizzax” avtomobil yoʻlining 242-kilometrida, Zomin tumani
15.	“Yuqori nuqta” YPX statsionar posti	Samarqand viloyati	M39 “Almati-Bishkek-Toshkent-Shahrisabz-Termiz” avtomobil yoʻlining 1039-kilometrida, Bulungʻur tumani
16.	“Omonqoʻton” YPX statsionar posti	Samarqand viloyati	M39 “Almati-Bishkek-Toshkent-Shahrisabz-Termiz” avtomobil yoʻlining 1120-kilometrida, Urgut tumani
IV-bosqich
17.	“Mingchinor” YPX statsionar posti	Qashqadaryo viloyati	M39 “Almati-Bishkek-Toshkent-Shahrisabz-Termiz” avtomobil yoʻlining 1139-kilometrida, Kitob tumani	iyul 2024-yil
18.	“Umakay” YPX statsionar posti		A378 “Samarqand-Gʻuzor” avtomobil yoʻlining 57-kilometrida, Chiroqchi tumani
19.	“Shirinbuloq” YPX statsionar posti		A380 “Gʻuzor-Buxoro-Nukus-Beynov” avtomobil yoʻlining 147-kilometrida, Muborak tumani
20.	“Darband” YPX statsionar posti	Surxondaryo viloyati	M39 “Almati-Bishkek-Toshkent-Shahrisabz-Termiz” avtomobil yoʻlining 1335-kilometrida, Boysun tumani
21.	“Manguzar” YPX statsionar posti	Surxondaryo viloyati	M41 “Bishkek-Dushanbe-Termiz” avtomobil yoʻlining 1618-kilometrida, Termiz tumani
V-bosqich
22.	“Sarmijon” YPX statsionar posti	Buxoro viloyati	M37 “Samarqand-Buxoro-Turkmanboshi” avtomobil yoʻlining 212-kilometrida, Gʻijduvon tumani	fevral 2025-yil
23.	“Karakata” YPX statsionar posti	Navoiy viloyati	A379 “Navoiy-Uchquduq” avtomobil yoʻlining 125-kilometrida, Konimex tumani
24.	“Zarafshon” YPX statsionar posti		A379 “Navoiy-Uchquduq” avtomobil yoʻlining 202-kilometrida, Zarafshon shahri
25.	“Samarqand” YPX statsionar posti		M37 “Samarqand-Buxoro-Turkmanboshi” avtomobil yoʻlining 147-kilometrida, Karmana tumani
VI-bosqich
26.	“Momokoʻpir” YPX statsionar posti	Xorazm viloyati	4R160 “Urganch-Gurlan-Mangʻit-Turkmaniston Respublikasi chegarasi” avtomobil yoʻlining 65-kilometrida, Gurlan tumani	iyul 2025-yil
27.	“Broyler” YPX statsionar posti	Qoraqalpogʻiston Respublikasi	A380 “Gʻuzor-Buxoro-Nukus-Beynov” avtomobil yoʻlining 754-kilometrida, Nukus shahri
28.	“Miskin” YPX statsionar posti		A380 “Gʻuzor-Buxoro-Nukus-Beynov” avtomobil yoʻlining 561-kilometrida, Toʻrtkoʻl tumani
29.	“Dovut ota” YPX statsionar posti		A380 “Gʻuzor-Buxoro-Nukus-Beynov” avtomobil yoʻlining 1184-kilometrida, Qoʻngʻirot tumani

Keyingi tahrirga qarang.

Vazirlar Mahkamasining 2022-yil 8-iyuldagi 377-son qaroriga
3-ILOVA

Vazirlar Mahkamasining “Yoʻl harakati xavfsizligi sohasidagi huquqbuzarliklarga qarshi kurashish samaradorligini oshirishga doir qoʻshimcha chora-tadbirlar toʻgʻrisida” 2018-yil 20-sentabrdagi 747-son qaroriga kiritilayotgan qoʻshimchalar

1. 4-bandning “a” kichik bandi toʻrtinchi xatboshisi “ragʻbatlantiriladi” soʻzidan keyin “Oʻzbekiston Respublikasi Ichki ishlar vazirligi, Favqulodda vaziyatlar vazirligi hamda Milliy gvardiyasining xizmat avtotransport vositalariga oʻrnatilgan videoregistratorlar orqali qayd etilgan huquqbuzarliklar bundan mustasno” soʻzlari bilan toʻldirilsin.

2. Ilovaning 11-bandi birinchi xatboshisi “ragʻbatlantiriladi” soʻzidan keyin “Oʻzbekiston Respublikasi Ichki ishlar vazirligi, Favqulodda vaziyatlar vazirligi hamda Milliy gvardiyasining xizmat avtotransport vositalariga oʻrnatilgan videoregistratorlar orqali qayd etilgan huquqbuzarliklar bundan mustasno” soʻzlari bilan toʻldirilsin.

(Qonunchilik maʼlumotlari milliy bazasi, 08.07.2022-y., 09/22/377/0622-son; 15.08.2023-y., 09/23/354/0615-son)