PQ-144-сон 01.03.2022. Qishloq xoʻjaligida suvni tejaydigan texnologiyalarni joriy etishni yanada takomillashtirish chora-tadbirlari toʻgʻrisida

Hujjat 02.03.2022 sanasi holatiga
Amaldagi versiyaga o‘tish

Oʻzbekiston Respublikasi Prezidentining

Qarori

Qishloq xoʻjaligida suvni tejaydigan texnologiyalarni joriy etishni yanada takomillashtirish chora-tadbirlari toʻgʻrisida

Soʻnggi yillarda mamlakatimizda qishloq xoʻjaligi yerlarining samaradorligini, jumladan suvni tejaydigan texnologiyalarni qoʻllagan holda, oshirishga alohida eʼtibor qaratilmoqda.

Davlat tomonidan qoʻllab-quvvatlash mexanizmlari zamon talablariga moslab borilayotganligi sababli suvni tejaydigan texnologiyalar 2021-yilning oʻzida 433 ming gektar maydonda joriy etildi va ularning umumiy koʻrsatkichi sugʻoriladigan maydonlarning 17 foizini tashkil qildi.

Biroq, suvni tejaydigan sugʻorish tizimlarini ishlab chiqarish, yetkazib berish, xarid qilish, joylarda loyihalashtirish va oʻrnatishdagi kamchiliklar hamda ayrim qishloq xoʻjaligi mahsulotlari ishlab chiqaruvchilarning bu boradagi koʻnikmalari yetarli emasligi mazkur texnologiyalarning oʻz vaqtidan kechikib joriy qilinishiga sabab boʻlmoqda.

Suvni tejaydigan texnologiyalarni joriy qilishdagi mavjud kamchilik va muammolarni bartaraf etish, mintaqada kuzatilayotgan suv tanqisligining salbiy taʼsirini yumshatish, shuningdek, qishloq xoʻjaligi ekinlarini yetishtirishda suv resurslaridan yanada samarali foydalanish maqsadida:

1. Suv xoʻjaligi vazirligi, Qishloq xoʻjaligi vazirligi, Qoraqalpogʻiston Respublikasi Vazirlar Kengashi va viloyatlar hokimliklarining 2022-yilda 478 ming gektar maydonda suvni tejaydigan texnologiyalarni joriy qilish orqali suvdan foydalanish samaradorligini oshirish toʻgʻrisidagi taklifi maʼqullansin.

2. 2022-yilda suvni tejaydigan texnologiyalarni joriy qilish boʻyicha prognoz koʻrsatkichlar 1-ilovaga muvofiq tasdiqlansin.

Bosh vazir oʻrinbosari Sh.M. Gʻaniyev:

a) Qoraqalpogʻiston Respublikasi Vazirlar Kengashi Raisi hamda viloyatlar hokimlari bilan birgalikda mazkur qarorga 1-ilova bilan tasdiqlangan prognoz koʻrsatkichlarga muvofiq 2022-yil yakuniga qadar respublika boʻyicha kamida:

230 ming gektar, shu jumladan 160 ming gektar paxta xom ashyosi yetishtiriladigan maydonlarda tomchilatib sugʻorish;

28 ming gektar, shu jumladan 25 ming gektar boshoqli don yetishtiriladigan maydonlarda yomgʻirlatib sugʻorish;

2 ming gektar qishloq xoʻjaligi ekin maydonlarida diskretli sugʻorish tizimlari joriy qilinishini;

218 ming gektar ekin maydonlarining lazerli uskuna yordamida tekislanishini tashkil etsin;

b) Suv xoʻjaligi vazirligi (Sh.R. Xamrayev), Qishloq xoʻjaligi vazirligi (J.A. Xodjayev), Bosh prokuratura (Sh.J. Raximov), Ichki ishlar vazirligi (S.A. Nishanbayev), Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda tasdiqlangan prognoz koʻrsatkichlar ijrosi yuzasidan tizimli monitoring oʻrnatsin hamda natijalarini tanqidiy muhokama qilib borsin.

3. Qoraqalpogʻiston Respublikasi Vazirlar Kengashi Raisi va viloyatlar hokimlari Suv xoʻjaligi vazirligi (Sh.R. Xamrayev), Qishloq xoʻjaligi vazirligi (J.A. Xodjayev), “Hududiy elektr tarmoqlari” AJ (U.M. Mustafoyev), Geologiya va mineral resurslar davlat qoʻmitasi (B.F. Islamov) bilan birgalikda bir hafta muddatda 2022-yilda suvni tejaydigan texnologiyalarni joriy qilish boʻyicha manzilli roʻyxatni tasdiqlasin, bunda:

suvni tejaydigan tizimlar, birinchi navbatda, yirik suv uzatish va suv chiqarish tarmoqlarining bosh qismida joriy etilishi lozimligini inobatga olgan holda “bir kanal — bir tizim” tamoyili asosida joylashtirilishiga;

ekin maydonlarining mavjud infratuzilmasidan kelib chiqqan holda doimiy ravishda uzluksiz elektr energiyasi va suv bilan taʼminlash imkoni mavjudligiga eʼtibor qaratilsin.

4. 2022-yildan boshlab qishloq xoʻjaligi mahsulotlarini yetishtirishda suvni tejaydigan texnologiyalarni joriy etishni davlat tomonidan qoʻllab-quvvatlashning quyidagi tartibi belgilansin:

qishloq xoʻjaligi mahsulotlari ishlab chiqaruvchilarga suvni tejaydigan sugʻorish texnologiyalarini joriy etish boʻyicha xarajatlarning bir qismini qoplash uchun subsidiyalar 2-ilovaga muvofiq;

suvni tejaydigan sugʻorish tizimlarini xarid qilish va qurishga ajratiladigan bank kreditlari boʻyicha foiz xarajatlarining bir qismini qoplash uchun subsidiyalar 3-ilovaga muvofiq taqdim etiladi.

Keyingi tahrirga qarang.

Subsidiya mablagʻlari mazkur qarorga 2-ilovaga muvofiq hisob-kitob qilingandan soʻng, hisob-kitob qilingan summaning:

50 foizi tizim joriy qilingan yili ajratiladi;

50 foizi kelgusi yili hosildorlik oshishi va uskunalarning ishlatilishiga qarab ajratiladi;

qoʻshimcha 20 foizi uchinchi yilda joriy qilingan tizimni ishlatgan holda yuqori hosildorlikni saqlab qolgan paxta, gʻalla va meva-sabzavot klasterlariga toʻlab beriladi.

Keyingi tahrirga qarang.

5. Belgilansinki:

mazkur qarorning 4-bandida nazarda tutilgan subsidiya mablagʻlari joriy qilingan suvni tejaydigan sugʻorish tizimlari kamida besh yil ishlatilishi sharti bilan ajratiladi;

Keyingi tahrirga qarang.

suvni tejaydigan texnologiyalar joriy qilingan yer maydonlari kamida 5 yil mobaynida maqbullashtirilmaydi, yer uchastkasi yoki uning bir qismi davlat va jamoat ehtiyojlari uchun olib qoʻyilishiga yerdan foydalanuvchi roziligi asosida sarf etilgan mablagʻlarning oʻrni toʻliq qoplanganidan soʻnggina ruxsat etiladi;

Keyingi tahrirga qarang.

2021-yilda suvni tejaydigan sugʻorish texnologiyalarini joriy qilganligi uchun Davlat budjetidan subsidiya mablagʻlarini olgan, biroq joriy etilgan suvni tejaydigan sugʻorish tizimlarini sugʻorish mavsumida ishlatishga ulgurmagan qishloq xoʻjaligi mahsulotlari ishlab chiqaruvchilar mazkur tizimni 2022-yil sugʻorish mavsumiga qadar ishga tushirmagan taqdirda olingan subsidiya mablagʻlarini belgilangan tartibda Davlat budjetiga qaytaradi.

LexUZ sharhi

Qarang: Oʻzbekiston Respublikasi Moliya vazirligi, Davlat soliq qoʻmitasi va Davlat bojxona qoʻmitasining 2016-yil 24-martdagi 20, 2016-14, 01-02/8-10-sonli qarori bilan tasdiqlangan Budjet tizimi budjetlari daromadlarining kassa ijrosi toʻgʻrisidagi yoʻriqnoma.

Bosh prokuratura (Sh.J. Raximov), Agrosanoat majmui ustidan nazorat qilish inspeksiyasi (A.D. Vaxabov) va Suv xoʻjaligi vazirligi (Sh.R. Xamrayev va R.J. Qarshiyev) mazkur bandda belgilangan talablarning ijrosini qatʼiy nazoratga olsin.

Keyingi tahrirga qarang.

6. Bosh vazir oʻrinbosari J.A. Qoʻchqorov, Moliya vazirligi (T.A. Ishmetov) 2022-yilda suvni tejaydigan texnologiyalarni joriy etishni qoʻllab-quvvatlash uchun respublika budjetidan 1 182,4 mlrd soʻm mablagʻlarning oʻz vaqtida ajratilishini taʼminlasin.

7. Suvni tejaydigan sugʻorish texnologiyalari joriy qilingan ekin maydonlari uzluksiz:

suv bilan taʼminlanishiga — suv xoʻjaligi vaziri Sh.R. Xamrayev;

elektr energiyasi bilan taʼminlanishiga — “Hududiy elektr tarmoqlari” AJ boshqaruvi raisi U.M. Mustafoyev shaxsan masʼul ekanligi belgilab qoʻyilsin.

8. Suv xoʻjaligi vazirligi tizimidagi respublika budjetidan moliyalashtiriladigan tashkilotlarda mavjud shtat birliklarini qisqartirish hisobiga:

irrigatsiya tizimlari havza boshqarmalari tarkibida 1 shtat birligidan iborat ichki audit guruhlari (keyingi oʻrinlarda — ITHB ichki audit guruhlari) tashkil etilsin;

Keyingi tahrirga qarang.

Suv xoʻjaligi vazirligining ichki audit xizmatiga qoʻshimcha 1 ta shtat birligi ajratilsin.

Belgilansinki:

a) ITHB ichki audit guruhlari bevosita Suv xoʻjaligi vazirligining ichki audit xizmatiga boʻysunadi;

Keyingi tahrirga qarang.

b) ITHB ichki audit guruhlarining asosiy vazifalari quyidagilar hisoblanadi:

Keyingi tahrirga qarang.

suvni tejaydigan texnologiyalarni joriy etish boʻyicha xarajatlarning bir qismini qoplash uchun mazkur qarorning 2-ilovasiga muvofiq ajratiladigan subsidiyalarning toʻgʻri hisoblanganligini hamda belgilangan tartibda rasmiylashtirilganligini oʻrganish;

joriy qilingan suvni tejaydigan tizimlarning haqqoniyligini joyiga chiqqan holda oʻrganish;

Suv xoʻjaligi vazirligiga suvni tejaydigan texnologiyalarni joriy etish boʻyicha xarajatlarning bir qismini qoplash uchun subsidiya ajratish yoki ajratmaslik yuzasidan xulosa kiritish;

suvni tejaydigan texnologiyalarni joriy etishga sarflangan xarajatlar boʻyicha hujjatlarni hamda bu borada amalga oshirilgan buxgalteriya operatsiyalarini doimiy monitoring qilib borish;

suvni tejaydigan texnologiyalarni joriy qilishda vujudga kelishi mumkin boʻlgan qonun buzilishi holatlarining barvaqt oldini olishga qaratilgan choralar yuzasidan takliflar ishlab chiqish;

Qoraqalpogʻiston Respublikasi Suv xoʻjaligi vazirligi hamda irrigatsiya tizimlari havza boshqarmalarining suvni tejaydigan va raqamli texnologiyalarni rivojlantirish boʻlimi tomonidan yuritiladigan suvni tejaydigan tizimlarning joriy qilingan maydonlari boʻyicha hisobotlarning haqqoniyligini nazorat qilish.

9. Bosh vazir oʻrinbosari Sh.M. Gʻaniyev Suv xoʻjaligi vazirligi (Sh.R. Xamrayev), Qishloq xoʻjaligi vazirligi (J.A. Xodjayev) hamda Monopoliyaga qarshi kurashish qoʻmitasi (Sh.Sh. Sharaxmetov) bilan birgalikda bir oy muddatda oʻtgan yillarda suvni tejaydigan texnologiyalarni joriy etish ishlarini sifatli amalga oshirgan hamda bozor iqtisodiyotida erkin raqobat talablariga toʻliq javob bera oladigan “Tomchi-reestr” pudrat korxonalarining yagona elektron reyestrini (keyingi oʻrinlarda — “Tomchi-reestr” YAER) ishlab chiqsin.

“Tomchi-reestr” YAERni ishlab chiqishda, jumladan quyidagilarga eʼtibor qaratilsin:

korxonaning ishlab chiqarish bazasiga ega boʻlishiga;

korxona tomonidan mahalliy sharoitda ishlab chiqarishning yoʻlga qoʻyilganligi yoki xorijiy va mahalliy ishlab chiqaruvchilarning rasmiy dilerlik maqomiga ega boʻlishiga;

amaldagi qonunchilik hujjatlariga asosan soliq xavfi darajasiga;

loyihani amalga oshirish uchun zarur texnika, malakali mutaxassis, jumladan loyihachi, injener va agronomlar bilan taʼminlanganlik darajasiga;

amalga oshirilgan loyihalar doirasida fermer xoʻjaliklariga servis xizmati koʻrsatilishi yoʻlga qoʻyilganligiga.

Belgilab qoʻyilsinki, “Tomchi-reestr” YAERga kiritilmagan pudrat korxonalari tomonidan amalga oshirilgan loyihalarga subsidiya mablagʻlari ajratilmaydi.

Keyingi tahrirga qarang.

10. “Tomchi-reestr” YAERga kiritiladigan subyektlarni aniqlash uchun Suv xoʻjaligi vazirligiga:

Davlat soliq qoʻmitasi, Davlat statistika qoʻmitasi hamda Bandlik va mehnat munosabatlari vazirligi tomonidan xodimlar soni, asosiy vositalar hajmi, olingan daromadlar, toʻlangan soliqlar va ish haqi fondi toʻgʻrisidagi maʼlumotlar;

Keyingi tahrirga qarang.

boshqa mutasaddi vazirliklar va idoralar tomonidan zarur idoraviy maʼlumotlar oʻrnatilgan tartibda taqdim etilishi belgilab qoʻyilsin.

11. Qishloq xoʻjaligi vazirligi (K.A. Yuldashev) Suv xoʻjaligi vazirligi (R.J. Qarshiyev), Axborot texnologiyalari va kommunikatsiyalarini rivojlantirish vazirligi (O.A. Pekos) hamda Moliya vazirligi (A.Ya. Xaydarov) bilan birgalikda 2022-yil 10-martga qadar suvni tejaydigan texnologiyalarni joriy qilgan qishloq xoʻjaligi mahsulotlari ishlab chiqaruvchilarga subsidiyalar berish yuzasidan tegishli materiallarni toʻplash, koʻrib chiqish hamda vakolatli organ va tashkilotlar bilan kelishishning “Agro-subsidiya” yagona axborot tizimi (keyingi oʻrinlarda — “Agro-subsidiya” YAAT) joriy qilinishini taʼminlasin.

12. “Agro-subsidiya” YAAT hamda “Tomchi-reestr” YAERdan foydalanish xarajatlari Davlat budjetidan ajratiladigan mablagʻlar doirasida amalga oshirilishi belgilansin.

13. Oʻzbekiston Respublikasi Prezidentining 2019-yil 25-oktabrdagi “Qishloq xoʻjaligida suv tejovchi texnologiyalarni joriy etishni ragʻbatlantirish mexanizmlarini kengaytirish chora-tadbirlari toʻgʻrisida”gi PQ-4499-son qaroriga muvofiq 2022-yil 1-yanvardan:

paxta xom ashyosi va boshoqli don yetishtirish uchun nasos agregatlari va sugʻorish quduqlari isteʼmol qilgan elektr energiyasi qiymatini Davlat budjetidan subsidiyalar hisobiga qoplash tartibi faqat suvni tejaydigan texnologiyalarni joriy etgan qishloq xoʻjaligi mahsulotlari ishlab chiqaruvchilariga tatbiq etilishi;

qishloq xoʻjaligi mahsulotlari ishlab chiqaruvchilari tomonidan suv xoʻjaligi tashkilotlarining sugʻorish quduqlari va vertikal drenaj quduqlaridan qishloq xoʻjaligi ekinlarini sugʻorish uchun foydalanishga suvni tejaydigan texnologiyalarni qoʻllash sharti bilan ruxsat etilishi maʼlumot uchun qabul qilinsin.

Bosh prokuratura (Sh.J. Raximov), Moliya vazirligi (A.Ya. Xaydarov) Ichki ishlar vazirligi (S.A. Nishanbayev) va Suv xoʻjaligi vazirligi (Sh.R. Xamrayev va R.J. Qarshiyev) mazkur bandda belgilangan talablarning ijrosini qatʼiy nazoratga olsin.

14. Iqtisodiy taraqqiyot va kambagʻallikni qisqartirish vazirligi (I.I. Norqulov) Moliya vazirligi (A.Ya. Xaydarov) va Suv xoʻjaligi vazirligi (R.J. Qarshiyev) bilan birgalikda ikki oy muddatda 10 gektardan kam boʻlmagan paxta va boshoqli don maydonlari uchun qayta tiklanuvchi energiya manbalari hamda koʻchma generatorlar kabi uskunalarni sotib olish xarajatlarining 50 foizigacha, biroq 100 million soʻmdan ortiq boʻlmagan miqdorda qoplash tartibini ishlab chiqsin va Vazirlar Mahkamasiga kiritsin.

15. Suv xoʻjaligi vazirligi (R.J. Qarshiyev) Qishloq xoʻjaligi vazirligi (A.M. Toʻrayev), Innovatsion rivojlanish vazirligi (Sh.U. Turdiqulova) hamda Oliy va oʻrta maxsus taʼlim vazirligi (R.R. Xakimov) bilan birgalikda tomchilatib sugʻorish texnologiyasi joriy qilingan gʻoʻza maydonlarida sugʻorish meʼyorlari, gʻoʻzaning rivojini taʼminlashga qaratilgan innovatsion agrotexnologiyani ishlab chiqish boʻyicha ilmiy loyiha tayyorlasin va ekspertiza natijalariga muvofiq ilmiy faoliyatga oid Davlat dasturlari doirasida amalga oshirish choralarini koʻrsin.

16. Quyidagilarga:

Bosh vazir oʻrinbosari Sh.M. Gʻaniyev zimmasiga — xolislik va shaffoflik tamoyillariga asoslangan holda suvni tejaydigan texnologiyalarni joriy etish boʻyicha olib borilayotgan ishlarning samaradorligini taʼminlash;

suv xoʻjaligi vaziri Sh.R. Xamrayev zimmasiga — hududlarning oʻziga xosligini hisobga olgan holda tomchilatib sugʻorish tizimini qurish boʻyicha namunaviy loyihalarni ishlab chiqish, shuningdek, tomchilatib sugʻorish tizimini montaj qilish va servis xizmati koʻrsatish guruhlari tashkil etilishini taʼminlash;

qishloq xoʻjaligi vaziri J.A. Xodjayev zimmasiga — hududlarning tuproq-iqlim sharoitidan kelib chiqqan holda, suvni tejaydigan texnologiyalar orqali paxta xom ashyosi va boshoqli don yetishtirish boʻyicha agrotexnologik xaritalarni ishlab chiqish va tasdiqlash;

Alkogol va tamaki bozorini tartibga solish hamda vinochilikni rivojlantirish agentligi direktori R.R. Boboyev zimmasiga — barcha yangi tashkil etilayotgan sanoatbop uzum plantatsiyalariga tomchilatib sugʻorish tizimlari oʻrnatilishini taʼminlash yuzasidan javobgarlik yuklansin.

17. Suv xoʻjaligi vazirligi (A.A. Mirzayev) Qishloq xoʻjaligi vazirligi (Sh.Sh. Mirzayev) va Moliya vazirligi (A.Ya. Xaydarov) bilan birgalikda ikki hafta muddatda mazkur qarorga muvofiq Vazirlar Mahkamasining 2021-yil 23-fevraldagi 95-son qaroriga tegishli oʻzgartirish va qoʻshimchalar kiritishni nazarda tutadigan Hukumat qarori loyihasini Vazirlar Mahkamasiga kiritsin.

18. Oʻzbekiston Respublikasi Prezidentining ayrim qarorlariga 4-ilovaga muvofiq oʻzgartirish va qoʻshimchalar kiritilsin.

19. Mazkur qaror ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Bosh vazir oʻrinbosari Sh.M. Gʻaniyev zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2022-yil 1-mart,

PQ-144-son

Oʻzbekiston Respublikasi Prezidentining 2022-yil 1-martdagi PQ-144-son qaroriga
1-ILOVA

2022-yilda suvni tejaydigan texnologiyalarni joriy qilish boʻyicha

PROGNOZ KOʻRSATKICHLAR

Hududlar nomi	Jami reja boʻyicha, ga	Shu jumladan:										yerlarni lazerli tekislash, ga
		tomchilatib sugʻorish, ga	shundan				yomgʻirlatib sugʻorish, ga	shundan			diskretli sugʻorish, ga
		tomchilatib sugʻorish, ga	paxta, ga	bogʻ, ga	tok, ga	boshqalar, ga	yomgʻirlatib sugʻorish, ga	gʻalla, ga	sabzavot-poliz, ga	ozuqabop ekinlar, ga	diskretli sugʻorish, ga
Qoraqalpogʻiston Respublikasi	17 422	15 418	12 200	1 500	1 300	418	1 904	1 904			100	29 500
Andijon viloyati	19 010	16 824	13 000	2 000	1 300	524	1 986	1 986			200	11 000
Buxoro viloyati	21 839	19 227	13 250	3 100	2 400	477	2 612	2 612				14 900
Jizzax viloyati	21 447	18 981	13 850	3 400	1 500	231	2 266	1 706	260	300	200	10 000
Qashqadaryo viloyati	23 681	20 958	12 800	4 100	3 500	558	2 723	2 400	60	263		12 400
Navoiy viloyati	16 403	14 517	10 700	2 000	1 200	617	1 886	1 730	30	126		11 800
Namangan viloyati	20 544	18 181	11 500	3 700	2 500	481	2 000	2 000			363	10 600
Samarqand viloyati	21 328	18 875	11 800	3 900	2 900	275	2 453	2 453				15 200
Surxondaryo viloyati	19 187	16 980	12 300	2 500	1 800	380	2 207	2 207				15 800
Sirdaryo viloyati	17 736	15 696	12 100	1 900	1 400	296	1 360	1 360			680	19 500
Toshkent viloyati	20 788	18 397	12 200	3 800	2 200	197	2 191	1 200	680	311	200	19 000
Fargʻona viloyati	21 377	18 919	11 100	4 100	3 500	219	2 280	1 442	838		178	17 800
Xorazm viloyati	19 238	17 026	13 200	2 000	1 500	326	2 132	2 000	132		80	30 500
JAMI	260 000	230 000	160 000	38 000	27 000	5 000	28 000	25 000	2 000	1 000	2 000	218 000

Izoh: mazkur prognoz koʻrsatkichlarga koʻzda tutilgan mablagʻlar doirasida qoʻshimcha va oʻzgartirishlar kiritilishi mumkin.

Oʻzbekiston Respublikasi Prezidentining 2022-yil 1-martdagi PQ-144-son qaroriga
2-ILOVA

Qishloq xoʻjaligi mahsulotlari ishlab chiqaruvchilariga suvni tejaydigan sugʻorish texnologiyalarini joriy etish boʻyicha xarajatlarning bir qismini qoplash uchun

SUBSIDIYALAR

I. Joriy etilganda sarflangan xarajatlarning bir qismini qoplash uchun subsidiyalar ajratiladigan suvni tejaydigan sugʻorish texnologiyalari:

a) tomchilatib sugʻorish — qishloq xoʻjaligi ekinlarini parvarishlashda oʻsimlikning ildizi yonidagi zonaga uning ehtiyojiga mos miqdordagi suvni yetkazib beradigan sugʻorish usuli;

b) yomgʻirlatib sugʻorish — qishloq xoʻjaligi ekinlarini sugʻorishning tuproq va oʻsimliklar sathi ustiga imkon boricha tabiiy yomgʻirlatishni imitatsiya qiluvchi sepish tarzida suv yetkazib beradigan usuli, xususan:

keng qamrovli yomgʻirlatib sugʻorish tizimi (keyingi oʻrinlarda — keng qamrovli sugʻorish tizimi) — aylanma yoki frontal harakatlanuvchi agregatlar yordamida suv yetkazib beradigan yomgʻirlatib sugʻorish tizimi;

“sprinkler” tizimi — statsionar kalta purkovchi uskunalar yordamida suv yetkazib beradigan yomgʻirlatib sugʻorish tizimi;

mobil yomgʻirlatib sugʻorish tizimi (keyingi oʻrinlarda — mobil sugʻorish tizimi) — koʻchma tirkama va baraban tipidagi agregat yordamida ekinlarni yomgʻirlatib sugʻorish tizimi;

v) yerni lazerli uskuna bilan jihozlangan tekislagichlar yordamida tekislagan tarzda diskret sugʻorish usuli (keyingi oʻrinlarda — diskretli sugʻorish) — lazerli uskuna bilan jihozlangan tekislagichlar yordamida tekislangan maydonlarda ekinlarni egiluvchan quvurlar yordamida suvni tanaffuslar bilan bergan holda sugʻorish usuli.

II. Suvni tejaydigan sugʻorish tizimlari tarkibiy qismlarining taʼriflari:

Hovuz-tindirgich — oqar suv tarkibidagi loyqa-oqiziqlarni ushlab qolish (suvni tindirish) hamda sugʻorish uchun zarur boʻladigan suv zaxirasini saqlash uchun moʻljallangan inshoot.

Nasos stansiyasi — suvni manbadan ekinlarni sugʻorish uchun zarur miqdor va kerakli bosimda yetkazib berishga moʻljallangan, elektr energiyasi, suyuq yonilgʻi yoki boshqa muqobil energiya yordamida ishlaydigan qurilma.

Filtrlash stansiyasi — sugʻorishda foydalaniladigan suvning tarkibidagi yirik va mayda zarralarni suvni tejaydigan sugʻorish texnologiyasi talabi darajasida tozalashga moʻljallangan qurilma.

Bosh (magistral) quvur — kerakli miqdordagi suvni tizim nasos qurilmasidan olib tarqatuvchi quvurlarga yetkazib berish uchun moʻljallangan yer osti yoki ustida yotqiziladigan quvurlar.

Tarqatuvchi quvur — suvni bosh quvurdan olib tomizgʻichli sugʻorish shlanglariga yetkazib va taqsimlab berish uchun yoki qator orasiga suvni tarqatishga xizmat qiluvchi yer osti yoki ustida yotqiziladigan quvurlar.

Tomizgʻichli sugʻorish shlanglari — ekinlar qatorlari oralariga yotqiziladigan va belgilangan meʼyordagi suvni oʻsimlik ildiz tizimiga yetkazib berish uchun moʻljallangan tomizgichli shlanglar.

Tizimning avtomatlashtirilgan boshqaruvi — suvni tejaydigan sugʻorish tizimlarini ishlatishda inson omilini kamaytirish orqali oʻsimliklarga suv va mineral oʻgʻitni eng samarali miqdorlarda avtomatlashtirilgan usulda yetkazishga moʻljallangan uskuna va dasturiy taʼminot majmuasi.

Tomizgʻichli shlang tarqatuvchi va yigʻishtiruvchi uskuna — bir mavsumli ekin qatorlari oralariga yotqiziladigan tomchilatib sugʻorish tizimi shlang (lenta)larini tarqatishda va mavsum oxirida yigʻishtirib olishda foydalaniladigan qurilma majmuasi.

Suv hisoblagich — sugʻorishda foydalaniladigan suvning avtomatik tarzda hisobini yurituvchi qurilma.

III. Subsidiyalar miqdorlari:

1. Suvni tejaydigan sugʻorish texnologiyalarni joriy etish xarajatlarining bir qismini qoplash uchun ajratiladigan subsidiyaning miqdori uning bazaviy hisoblash miqdorini sifatlilik darajasi asosida belgilanadigan koeffitsiyentga koʻpaytirish orqali aniqlanadi.

2. Subsidiyalarning bazaviy hisoblash miqdorlari tizim joriy etilgan ekin maydonining har bir gektari uchun quyidagicha belgilanadi:

							ming soʻm
Suvni tejaydigan sugʻorish tizimi turi	Paxta	Donli ekinlar	Sabzavot ekinlari va kartoshka	Poliz ekinlari	Ozuqabop, moyli, dukkakli ekinlar va dorivor oʻsimliklar	Mevali ekinlar	Uzum
Tomchilatib sugʻorish	8 000*	x	1 500	1 300	2 500	6 000	8 000
Keng qamrovli va mobil sugʻorish tizimi	x	6 000**	1 200	x	2 500	x	x
“Sprinkler” tizimi	x	8 000**	1 000	x	2 000	x	x
Diskretli sugʻorish	2 000	x	x	x	x	x	x

* Qoraqalpogʻiston Respublikasi va Xorazm viloyatidagi paxta maydonlarida joriy etilgan tomchilatib sugʻorish tizimlari uchun 12 000 ming soʻm etib belgilanadi.

** Qoraqalpogʻiston Respublikasi va Xorazm viloyatidagi donli ekinlar yetishtirish maydonlarida joriy etilgan keng qamrovli hamda “sprinkler” tizimlari uchun 9 000 ming soʻm etib belgilanadi.

Keyingi tahrirga qarang.

3. Suvni tejaydigan sugʻorish tizimlarining sifatlilik darajasini belgilovchi koeffitsiyent 3.1 — 3.3 jadvallarning “JAMI” satridagi koʻrsatkich asosida belgilanadi:

3.1-jadval. Tomchilatib sugʻorish tizimlarining sifatlilik darajasini belgilovchi koeffitsiyentni hisoblash

T/r	Tizimning tarkibiy qismlari va sifat koʻrsatkichlari	Koʻrsatkich
1.	Hovuz-tindirgich	*
1.1.	beton yoki temir-beton qoplamali	0,08
1.2.	geomembrana qoplamali (qalinligi ≥1 mm)	0,05
1.3.	bir mavsumli plyonka bilan qoplangan	0,02
1.4.	tuproq oʻzanli (qoplamasiz)	0,01
2.	Nasos stansiyasi	0,1
3.	Filtrlash qurilmasi	*
3.1.	gidrotsiklonli, tozalanishi avtomatlashtirilgan qumli gidravlik avtomat filtr va oʻgʻit berish moslamasi	0,15
3.2.	gidrotsiklonli, qumli, diskli yoki setkali hamda tozalanishi avtomatlashtirilgan filtr va oʻgʻit berish moslamasi	0,1
3.3.	gidrotsiklonli, diskli yoki setkali filtr va oʻgʻit berish moslamasi	0,05
4.	Bosh (magistral) quvurlar	*
4.1.	qalin devorli (qalinligi >5,3 mm yoki bosimga chidamliligi >6,0 atmosfera)	0,25
4.2.	oʻrtacha qalin devorli (qalinligi 3,4 — 5,2 mm yoki bosimga chidamliligi 4,0 — 5,9 atmosfera)	0,2
4.3.	yupqa devorli (qalinligi 2,7 — 3,3 mm gacha yoki bosimga chidamliligi 2,5 — 3,9 atmosfera)	0,15
5.	Tarqatuvchi quvurlar (mevali ekinlar va uzumdan tashqari)	*
5.1.	qalin devorli (qalinligi >2,7 mm yoki bosimga chidamliligi >2,4 atmosfera)	0,25
5.2.	oʻrtacha qalin devorli (qalinligi 1,4 — 2,6 mm yoki bosimga chidamliligi 1,9 — 2,4 atmosfera)	0,2
5.3.	yupqa devorli (qalinligi 0,75 — 1,3 mm yoki bosimga chidamliligi 1,2 — 1,8 atmosfera)	0,15
6.	Tarqatuvchi quvurlar (mevali ekinlar va uzum uchun)	*
6.1.	qalin devorli (qalinligi ≥3,1 mm)	0,25
6.2.	oʻrtacha qalin devorli (qalinligi 2,8 — 3,1 mm)	0,2
6.3.	yupqa devorli (qalinligi 0,75 — 2,7 mm)	0,15
7.	Tomizgʻichli sugʻorish shlanglari (mevali ekinlar va uzumdan tashqari)	*
7.1.	qalin devorli (qalinligi ≥0,3 mm)	0,4
7.2.	oʻrtacha qalin devorli (qalinligi 0,15 — 0,29 mm)	0,35
7.3.	yupqa devorli (qalinligi ≤0,14 mm)	0,3
7.4.	tuproqosti sugʻorishga moʻljallangan shlanglar	0,5
8.	Tomizgichli sugʻorish shlanglari (mevali ekinlar va uzum uchun)	*
8.1.	qalin devorli (qalinligi >0,7 mm)	0,4
8.2.	oʻrta devorli (qalinligi 0,3 — 0,7 mm)	0,35
8.3.	yupqa devorli (qalinligi <0,3 mm)	0,3
9.	Tizimning avtomatlashtirilgan boshqaruvi	0,1
10.	Tomizgʻichli shlang tarqatuvchi va yigʻishtiruvchi uskuna	0,05
11.	Suv hisoblagich	0,1
JAMI		**

* mazkur qismdagi koʻrsatkichlarning bittasi tanlanadi;

** mevali ekinlar va uzumdan tashqari ekin turlari uchun: 1, 2, 3, 4, 5, 7, 9, 10, 11 satrlardagi koʻrsatkichlar qoʻshib aks ettiriladi;

mevali ekinlar va uzum uchun: 1, 2, 3, 4, 6, 8, 9, 11 satrlardagi koʻrsatkichlar qoʻshilib aks ettiriladi.

Keyingi tahrirga qarang.

3.2-jadval. Yomgʻirlatib sugʻorish tizimlarining sifatlilik darajasini belgilovchi koeffitsiyentni hisoblash

T/r	Tizimning tarkibiy qismlari va sifat koʻrsatkichlari	Koʻrsatkich
1.	Hovuz-tindirgich	*
1.1.	beton yoki temir-beton qoplamali	0,15
1.2.	geomembrana qoplamali (qalinligi ≥ 1 mm)	0,1
1.3.	bir mavsumli plyonka bilan qoplangan	0,05
1.4.	tuproq oʻzanli	0,02
2.	Nasos stansiyasi	0,1
3.	Filtrlash qurilmasi	*
3.1.	gidrotsiklonli, tozalanishi avtomatlashtirilgan qumli gidravlik avtomat filtr va oʻgʻit berish moslamasi	0,35
3.2.	gidrotsiklonli, qumli, diskli yoki setkali hamda tozalanishi avtomatlashtirilgan filtr va oʻgʻit berish moslamasi	0,25
3.3.	gidrotsiklonli, diskli yoki setkali filtr va oʻgʻit berish moslamasi	0,05
4.	Suv tarqatuvchi tizimlar	*
4.1.	keng qamrovli sugʻorish tizimi	0,6
4.2.	“sprinkler” tizimi	0,6
4.3.	mobil sugʻorish tizimi	0,4
5.	Tizimning avtomatlashtirilgan boshqaruvi	0,1
6.	Suv hisoblagich	0,1
JAMI		**

* mazkur qismdagi koʻrsatkichlarning bittasi tanlanadi;

** 1, 2, 3, 4, 5, 6 satrlardagi koʻrsatkichlar qoʻshib aks ettiriladi.

3.3-jadval. Diskretli sugʻorish tizimlarining sifatlilik darajasini belgilovchi koeffitsiyentni hisoblash

T/r	Tizimning tarkibiy qismlari va sifat koʻrsatkichlari	Koʻrsatkich
1.	Nasos stansiyasi	0,2
2.	Bosh (magistral) quvurlar	*
2.1.	qalin devorli (≥2 mm) bir qavatli	0,3
2.2.	qalin devorli (≥2 mm) ikki qavatli	0,45
2.3.	oʻrtacha qalin devorli (1-2 mm) bir qavatli	0,25
2.4.	oʻrtacha qalin devorli (1-2 mm) ikki qavatli	0,4
2.5.	yupqa devorli (≤1 mm) bir qavatli	0,2
2.6.	yupqa devorli (≤1 mm) ikki qavatli	0,35
3.	Tarqatuvchi quvurlar	*
3.1.	qalin devorli (≥0,3 mm)	0,45
3.2.	yupqa devorli (<0,3 mm)	0,4
4.	Tizimning avtomatlashtirilgan boshqaruvi	0,1
5.	Suv hisoblagich	0,1
JAMI		**

* mazkur qismdagi koʻrsatkichlarning bittasi tanlanadi;

** 1, 2, 3, 4, 5 satrlardagi koʻrsatkichlar qoʻshib aks ettiriladi.

Keyingi tahrirga qarang.

Oʻzbekiston Respublikasi Prezidentining 2022-yil 1-martdagi PQ-144-son qaroriga
3-ILOVA

Suvni tejaydigan sugʻorish tizimlarini xarid qilish va qurishga ajratiladigan bank kreditlari boʻyicha foiz xarajatlarining bir qismini qoplash uchun subsidiyalar

Qishloq xoʻjaligi mahsulotlari ishlab chiqaruvchilariga suvni tejaydigan sugʻorish tizimlarini xarid qilish va qurishga ajratiladigan bank kreditlari boʻyicha foiz xarajatlarining bir qismini qoplash quyidagi tartibda amalga oshiriladi:

Suvni tejaydigan sugʻorish tizimi turi	Tadbirkorlik faoliyatini qoʻllab-quvvatlash davlat jamgʻarmasi mablagʻlari hisobidan bank kreditlari boʻyicha foiz xarajatlarining bir qismini qoplash
Paxta*
Tomchilatib sugʻorish	1 gektar ekin maydoni uchun 25 million soʻmdan oshmaydigan qismi boʻyicha loyiha sonidan qatʼi nazar, milliy valyutada ajratiladigan tijorat kreditlari boʻyicha foiz stavkasining Oʻzbekiston Respublikasi Markaziy bankining asosiy stavkasidan oshadigan, lekin Markaziy bankning asosiy stavkasining 45 foizidan oshmagan miqdorigacha, xorijiy valyutada ajratiladigan tijorat kreditlari boʻyicha tijorat banklari tomonidan belgilangan foiz stavkasining 3 foizlik punktdan oshmagan miqdorda
Diskretli sugʻorish	Tadbirkorlik faoliyatini qoʻllab-quvvatlash davlat jamgʻarmasi toʻgʻrisidagi nizomda nazarda tutilgan shartlarda
Donli ekinlar*
Keng qamrovli va mobil sugʻorish	1 gektar ekin maydoni uchun 25 million soʻmdan oshmaydigan qismi boʻyicha loyiha sonidan qatʼi nazar, milliy valyutada ajratiladigan tijorat kreditlari boʻyicha foiz stavkasining Oʻzbekiston Respublikasi Markaziy bankining asosiy stavkasidan oshadigan, lekin Markaziy bankning asosiy stavkasining 45 foizidan oshmagan miqdorigacha, xorijiy valyutada ajratiladigan tijorat kreditlari boʻyicha tijorat banklari tomonidan belgilangan foiz stavkasining 3 foizlik punktdan oshmagan miqdorda
“Sprinkler” tizimi
Sabzavot ekinlari va kartoshka*
Tomchilatib sugʻorish	Tadbirkorlik faoliyatini qoʻllab-quvvatlash davlat jamgʻarmasi toʻgʻrisidagi nizomda nazarda tutilgan shartlarda
Keng qamrovli va mobil sugʻorish
“Sprinkler” tizimi
Poliz ekinlari*
Tomchilatib sugʻorish	Tadbirkorlik faoliyatini qoʻllab-quvvatlash davlat jamgʻarmasi toʻgʻrisidagi nizomda nazarda tutilgan shartlarda
Ozuqabop, moyli, dukkakli ekinlar va dorivor oʻsimliklar*
Tomchilatib sugʻorish	Tadbirkorlik faoliyatini qoʻllab-quvvatlash davlat jamgʻarmasi toʻgʻrisidagi nizomda nazarda tutilgan shartlarda
Keng qamrovli va mobil sugʻorish
“Sprinkler” tizimi
Mevali ekinlar**
Tomchilatib sugʻorish	Tadbirkorlik faoliyatini qoʻllab-quvvatlash davlat jamgʻarmasi toʻgʻrisidagi nizomda nazarda tutilgan shartlarda
Uzum***
Tomchilatib sugʻorish	Tadbirkorlik faoliyatini qoʻllab-quvvatlash davlat jamgʻarmasi toʻgʻrisidagi nizomda nazarda tutilgan shartlarda

* subsidiyalar Oʻzbekiston Respublikasi Davlat budjeti mablagʻlari hisobidan taqdim etiladi;

** subsidiyalar Oʻzbekiston Respublikasi Qishloq xoʻjaligi vazirligi huzuridagi Bogʻdorchilik va issiqxona xoʻjaligini rivojlantirish agentligi qoshidagi Bogʻdorchilik va issiqxona xoʻjaligini rivojlantirish jamgʻarmasi hamda Oʻzbekiston Respublikasi Davlat budjeti mablagʻlari hisobidan teng ulushlarda taqdim etiladi;

*** subsidiyalar xoʻraki va kishmishbop uzum plantatsiyalari uchun Oʻzbekiston Respublikasi Qishloq xoʻjaligi vazirligi huzuridagi Bogʻdorchilik va issiqxona xoʻjaligini rivojlantirish agentligining Bogʻdorchilik va issiqxona xoʻjaligini rivojlantirish jamgʻarmasi mablagʻlari hisobidan, texnik navli uzum plantatsiyalari uchun esa Alkogol va tamaki bozorini tartibga solish hamda vinochilikni rivojlantirish agentligining Vinochilikni rivojlantirish jamgʻarmasi mablagʻlari hisobidan taqdim etiladi.

Keyingi tahrirga qarang.

Oʻzbekiston Respublikasi Prezidentining 2022-yil 1-martdagi PQ-144-son qaroriga
4-ILOVA

Oʻzbekiston Respublikasi Prezidentining ayrim qarorlariga kiritilayotgan oʻzgartirish va qoʻshimchalar

1. Oʻzbekiston Respublikasi Prezidentining 2020-yil 11-dekabrdagi “Qishloq xoʻjaligida suvni tejaydigan texnologiyalarni joriy etishni yanada jadal tashkil etish chora-tadbirlari toʻgʻrisida”gi PQ-4919-son qaroriga 2 va 3-ilovalar oʻz kuchini yoʻqotgan deb hisoblansin.

2. Oʻzbekiston Respublikasi Prezidentining 2021-yil 24-fevraldagi “Oʻzbekiston Respublikasida suv resurslarini boshqarish va irrigatsiya sektorini rivojlantirishning 2021 — 2023-yillarga moʻljallangan strategiyasini tasdiqlash toʻgʻrisida”gi PQ-5005-son qarorining 6-bandidagi “2021” raqami “2022” raqami bilan almashtirilsin.

3. Oʻzbekiston Respublikasi Prezidentining 2021-yil 6-apreldagi “Oʻzbekiston Respublikasi Suv xoʻjaligi vazirligi faoliyatini yanada takomillashtirish chora-tadbirlari toʻgʻrisida”gi PQ-5055-son qarorida:

a) 2-ilovada:

“Ichki audit xizmati 2” blokidagi “2” raqami “3” raqami bilan almashtirilsin;

izohdagi “82” raqami “83” raqami bilan almashtirilsin;

b) 3-ilovada:

“Qurilish va taʼmirlash ishlarini tashkil qilish boʻlimi 2” blokidan keyin “Ichki audit guruhi 1” bloki bilan toʻldirilsin;

izohdagi “21” raqami “22” raqami bilan almashtirilsin;

v) 4-ilovada:

“Qurilish va taʼmirlash ishlarini tashkil qilish boʻlimi 2” blokidan keyin “Ichki audit guruhi 1” bloki bilan toʻldirilsin;

izohdagi “219”, “19” va “16” raqamlari tegishincha “231”, “20” va “17” raqamlari bilan almashtirilsin.

(Qonunchilik maʼlumotlari milliy bazasi, 02.03.2022-y., 07/22/144/0176-son, 08.08.2022-y., 06/22/183/0721-son; 03.04.2023-y., 07/23/107/0184-son; 21.06.2023-y., 06/23/101/0412-son; 11.11.2023-y., 06/23/193/0844-son; 08.01.2024-y., 07/24/5/0010-son; 16.02.2024-y., 06/24/36/0130-son; 16.08.2024-y., 07/24/290/0625-son; 01.03.2025-y., 06/25/27/0196-son; 06.02.2026-y., 07/26/47/0115-son)