1.06.00.00.00 Ijtimoiy taʼminot va ijtimoiy sugʻurta toʻgʻrisidagi qonunchilik. Ijtimoiy himoya / 06.07.00.00 Nafaqalar. Kompensatsiya toʻlovlari / 06.07.03.00 Kam taʼminlanganlar, “Ayollar daftari”, “Yoshlar daftari”, “Temir daftar” va boshqa toifalardagi fuqarolarga moddiy yordam koʻrsatish]
[TSZ:
1.Ijtimoiy-madaniy masalalar / Ijtimoiy sugʻurta, ijtimoiy taʼminot va ijtimoiy himoya]
Oʻzbekiston Respublikasi Vazirlar Mahkamasining
qarori
Ota-onasi yoki ularning biridan ayrilgan muhtoj qizlar va boquvchisi yoʻq yolgʻiz ayollar oliy taʼlim olishini moddiy jihatdan qoʻllab-quvvatlash chora-tadbirlari toʻgʻrisida
Oʻzbekiston Respublikasi Prezidentining “Xotin-qizlarni qoʻllab-quvvatlash, ularning jamiyat hayotidagi faol ishtirokini taʼminlash tizimini yanada takomillashtirish chora-tadbirlari toʻgʻrisida” 2021-yil 5-martdagi PQ-5020-son qarori ijrosini taʼminlash, shuningdek, ehtiyojmand xotin-qizlarning taʼlim olishga boʻlgan qiziqishlarini ragʻbatlantirish va moddiy jihatdan qoʻllab-quvvatlash, bilim olishlari uchun imkoniyatlar yaratish maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “Xotin-qizlarni qoʻllab-quvvatlash, ularning jamiyat hayotidagi faol ishtirokini taʼminlash tizimini yanada takomillashtirish chora-tadbirlari toʻgʻrisida” 2021-yil 5-martdagi PQ-5020-son qaroriga muvofiq:
a) 2021/2022 oʻquv yilidan boshlab bazaviy toʻlov-kontrakt asosida davlat oliy taʼlim muassasasiga qabul qilingan, ota-onasi yoki ularning biridan ayrilgan muhtoj qizlar, boquvchisi yoʻq yolgʻiz ayollarni (keyingi oʻrinlarda — talabgorlar) Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari hamda davlat oliy taʼlim muassasalari hisobidan oʻqitish tartibi joriy etilganligi;
b) bunda, oʻqish uchun toʻlov pullari:
Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan har yili 100 nafardan xotin-qizlar uchun mahalliy budjetning qoʻshimcha manbalari hisobidan;
moliyaviy barqaror davlat oliy taʼlim muassasalari tomonidan ularning kengashlari qaroriga asosan 50 nafargacha xotin-qizlar uchun davlat oliy taʼlim muassasalarining budjetdan tashqari mablagʻlari hisobidan qoplab berilishi belgilanganligi maʼlumot uchun qabul qilinsin.
2. Quyidagilarni nazarda tutuvchi Ota-onasi yoki ularning biridan ayrilgan muhtoj qizlar, boquvchisi yoʻq yolgʻiz ayollar oliy taʼlim olishlarini moddiy jihatdan qoʻllab-quvvatlash tartibi toʻgʻrisidagi nizom ilovaga muvofiq tasdiqlansin:
Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari hamda davlat oliy taʼlim muassasalari tomonidan bazaviy toʻlov-kontrakt miqdorini toʻlab berish maqsadida talabgorlarni tanlab olish mezonlari;
talabgorlarni tanlab olish shartlari va shu maqsadda mahalliy hokimliklar huzurida tashkil etilayotgan komissiyalar faoliyati;
mahalliy hokimliklar tomonidan oliy taʼlim muassasalariga tanlangan 100 nafar talabgorlarga toʻlov-kontrakt miqdorini toʻlab berish tartibi.
3. Oʻzbekiston Respublikasi Oliy va oʻrta maxsus taʼlim vazirligi, Mahalla va oilani qoʻllab-quvvatlash vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari talabgorlarni tanlab olish natijalarini belgilangan muddatlarda “Aziz-ayol.uz” Yagona interaktiv milliy platformasi orqali eʼlon qilinishini taʼminlasin.
4. Oʻzbekiston Respublikasi Oliy va oʻrta maxsus taʼlim vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
5. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev, Oʻzbekiston Respublikasi oliy va oʻrta maxsus taʼlim vaziri A.X. Toshqulov hamda Oʻzbekiston Respublikasi mahalla va oilani qoʻllab-quvvatlash vaziri R.T. Mamatov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 17-sentabr,
585-son
Vazirlar Mahkamasining 2021-yil 17-sentabrdagi 585-son qaroriga ILOVA
Ota-onasi yoki ularning biridan ayrilgan muhtoj qizlar, boquvchisi yoʻq yolgʻiz ayollar oliy taʼlim olishini moddiy jihatdan qoʻllab-quvvatlash tartibi toʻgʻrisida
1. Ushbu Nizom ota-onasi yoki ularning biridan ayrilgan muhtoj qizlar, boquvchisi yoʻq yolgʻiz ayollar (keyingi oʻrinlarda — talabgorlar) oliy taʼlim olishini moddiy jihatdan qoʻllab-quvvatlash maqsadida bazaviy toʻlov-kontrakt miqdori tegishlicha Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari (keyingi oʻrinlarda — hokimliklar) hamda davlat oliy taʼlim muassasalari tomonidan toʻlab berilishi tartibini belgilaydi.
2. Mazkur Nizom qoidalari 2021/2022 oʻquv yilidan boshlab har oʻquv yilida tasdiqlangan qabul parametrlari doirasida bazaviy toʻlov-kontrakt asosida davlat oliy taʼlim muassasasi bakalavriatiga (kunduzgi, sirtqi, kechki taʼlim shaklidan qatʼi nazar) talabalikka tavsiya etilgan hamda 2 — 4-kurslarda tahsil olayotgan talabgorlarga nisbatan qoʻllaniladi.
3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 2021/2022 oʻquv yilidan boshlab har yili oʻzlarining hududlaridan oʻqishga kirgan 25 nafardan hamda 2 — 4-kurslarda tahsil olayotgan 75 nafar (har bir kursdan — 25 nafardan), jami 100 nafar xotin-qizlar uchun mahalliy budjetning qoʻshimcha manbalari hisobidan bazaviy toʻlov-kontrakt summasini toʻrt oʻquv yilining yakunlanishiga qadar toʻlab beradi.
Moliyaviy barqaror (budjetdan tashqari toʻlov-kontrakt mablagʻlari boʻyicha birlamchi xarajatlar qoplagandan soʻng qoldiq mablagʻlarga ega) davlat oliy taʼlim muassasalari tomonidan ularning kengashlari qaroriga muvofiq 50 nafargacha xotin-qizlar birinchi oʻquv yilida budjetdan tashqari mablagʻlari hisobidan bepul oʻqitib beriladi.
Bunda talabgorlarning ikkinchi va undan keyingi oʻquv yillari uchun oʻz hududlaridagi tijorat banklari tomonidan taʼlim kreditlari rasmiylashtiriladi. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari oʻz hududlaridagi talabgorlar uchun uchinchi shaxs kafilligini beradi hamda oʻqishni tamomlagandan soʻng ularni ish joyi bilan taʼminlaydi.
4. Ushbu Nizom qoidalari:
ikkinchi va undan keyingi oliy taʼlim olish uchun tanlovda ishtirok etgan talabgorlarga;
Oʻzbekiston Respublikasi hududida joylashgan xorijiy oliy taʼlim muassasalari yoki ularning filiallari, nodavlat taʼlim xizmatlari faoliyati bilan shugʻullanuvchi tadbirkorlik subyektlari hamda oliy harbiy taʼlim muassasalariga nisbatan tatbiq etilmaydi.
2-bob. Talabgorlarni aniqlash mezonlari va shartlari
5. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari hamda davlat oliy taʼlim muassasalari tomonidan bazaviy toʻlov-kontrakt miqdorini toʻlab berish maqsadida talabgorlarni tanlab olish quyidagi mezonlar asosida amalga oshiriladi:
6. Oʻzbekiston Respublikasi Vazirlar Mahkamasi huzuridagi Davlat test markazi tomonidan oʻtkazilgan test sinovi (kasbiy (ijodiy) imtihon, yozma imtihon) natijalariga koʻra davlat oliy taʼlim muassasalariga bazaviy toʻlov-kontrakt asosida qabul qilingan va 2 — 4-kurslarda tahsil olayotgan mazkur Nizomning 5-bandidagi mezonlarga mos keluvchi xotin-qizlar test natijalari eʼlon qilingan kundan boshlab ijtimoiy holati toʻgʻrisidagi maʼlumotnomani (hujjatni) har yili 10 kalendar kun ichida oliy taʼlim muassasasi qabul komissiyasiga taqdim etadi.
7. Talabgorlar oliy taʼlim muassasasi qabul komissiyasiga ijtimoiy holati toʻgʻrisida fuqarolik holati dalolatnomalarini yozish boʻlimi tomonidan berilgan quyidagi maʼlumotnomalarni taqdim etadi:
talabgorning tugʻilganlik haqidagi guvohnomasi nusxasi;
ota-onasi yoki ularning biri vafot etganligi toʻgʻrisida oʻlim guvohnomasi nusxasi (mazkur Nizom 5-bandining “a” kichik bandidagi holatda);
yolgʻiz ona ekanligini tasdiqlovchi maʼlumotnoma (mazkur Nizom 5-bandining “b” kichik bandidagi holatda).
8. Har bitta davlat oliy taʼlim muassasasi belgilangan mezonlar asosida talabgorlar roʻyxatini shakllantirib, ularning doimiy yashash joyi boʻyicha hokimliklarga yozma ravishda maʼlumotlarni yuboradi.
Bunda mazkur Nizomning 5-bandida keltirilgan mezonlardan biri asosida davlat oliy taʼlim muassasasiga oʻqishga tavsiya etilgan va tahsil olayotgan talabgorlar roʻyxati tahlil qilinib 5 kalendar kun mobaynida tegishliligi boʻyicha hokimliklarga bakalavriat taʼlim yoʻnalishlari va oʻquv yili uchun toʻlov-kontrakt miqdorlari aniq koʻrsatilgan holda davlat oliy taʼlim muassasalari tomonidan taqdim etiladi.
9. Hokimliklar doimiy yashash joyi boʻyicha barcha davlat oliy taʼlim muassasalari tomonidan taqdim etilgan talabgorlar roʻyxati belgilangan tartibda mazkur Nizomga 1-ilovaga muvofiq tarkibda tuzilgan Ota-onasi yoki ularning biridan ayrilgan muhtoj qizlar, boquvchisi yoʻq yolgʻiz ayollarning oliy taʼlim olishlarini moddiy jihatdan qoʻllab-quvvatlash komissiyasi (keyingi oʻrinlarda — Komissiya) tomonidan koʻrib chiqilib, tegishli bayonnoma rasmiylashtiriladi.
10. Komissiya 15 kalendar kunda (lekin har oʻquv yilida 15-sentabrdan kech boʻlmagan muddatda) bazaviy toʻlov-kontrakt summalari toʻlab berilishi belgilangan talabgorlar roʻyxatini hamda shartnomani imzolash boʻyicha xulosalarni tegishliligi boʻyicha davlat oliy taʼlim muassasalariga yozma ravishda kiritadi va belgilangan tartibda shartnomalarni rasmiylashtiradi.
Bunda Komissiya aʼzolari tomonidan talabgorlardan 100 nafarini tanlab olishda birinchi navbatda ularning ijtimoiy holati, ehtiyojmandligi, toʻplagan ballari, hududlardagi taʼlim yoʻnalishlari boʻyicha kadrlarga boʻlgan ehtiyoj hamda tahsil olayotgan bosqichlari inobatga olinadi.
11. Davlat oliy taʼlim muassasalari moliyaviy imkoniyatlaridan kelib chiqib, hokimliklar tomonidan koʻrib chiqilib, tavsiya etilmagan talabgorlar orasidan oʻzlarining kengashlari qarori bilan tanlab olingan 50 nafargacha boʻlgan xotin-qizlarni birinchi oʻquv yilida budjetdan tashqari toʻlov-kontrakt mablagʻlari hisobidan bepul oʻqitishni taʼminlaydi. Bunda birinchi navbatda toʻliqsiz oilada tarbiyalanayotgan, yaʼni otasi yoki onasi yoxud ularning ikkalasi ham vafot etgan muhtoj xotin-qizlarga eʼtibor qaratiladi.
12. Talabgorlarni tanlab olish va ularni moddiy jihatdan qoʻllab-quvvatlash mazkur Nizomga 2-ilovada keltirilgan sxema asosida amalga oshiriladi.
13. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari hamda davlat oliy taʼlim muassasalari tomonidan tanlab olingan talabgorlar joriy oʻquv yili davomida oliy taʼlim muassasasini yoki taʼlim yoʻnalishini oʻzgartirsa yoxud talabalar safidan chetlashtirilsa mazkur imtiyozdan mahrum boʻladilar.
2022/2023 oʻquv yilidan boshlab har yili 1-sentabrga qadar ikkinchi va undan keyingi oʻquv yillari uchun taʼlim krediti olishi zarur boʻlgan talabgorlar roʻyxatini;
2024/2025 oʻquv yilidan boshlab har yili 1-avgustga qadar oʻqishni tamomlagan va ish joyi bilan taʼminlash lozim boʻlgan talabgorlar roʻyxatini doimiy yashash hududi boʻyicha Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga yozma ravishda taqdim etadi.
15. Hokimliklar tanlab olingan talabgorlarning oʻqishi uchun zarur mablagʻlarning belgilangan toʻlov-kontrakt miqdorining kamida 25 foizini har yili 15-sentabrgacha yoki Oʻzbekiston Respublikasi taʼlim muassasalariga oʻqishga qabul qilish boʻyicha Davlat komissiyasi tomonidan belgilangan muddatlargacha, 50 foizini — 1-yanvargacha, 75 foizini — 1-aprelgacha va 100 foizini — 1-iyulgacha ular talabalikka tavsiya etilgan davlat oliy taʼlim muassasalarining tegishli shaxsiy gʻazna hisobvaraqlariga oʻtkazib beradi.
16. Ushbu Nizomni qoʻllashda yuzaga keladigan nizolar qonunchilik hujjatlarida belgilangan tartibda hal etiladi.
17. Mazkur Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.
Ota-onasi yoki ularning biridan ayrilgan muhtoj qizlar, boquvchisi yoʻq yolgʻiz ayollar oliy taʼlim olishini moddiy jihatdan qoʻllab-quvvatlash tartibi toʻgʻrisidagi nizomga 1-ILOVA
Ota-onasi yoki ularning biridan ayrilgan muhtoj qizlar, boquvchisi yoʻq yolgʻiz ayollar oliy taʼlim olishini moddiy jihatdan qoʻllab-quvvatlash komissiyasining namunaviy
Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari, Komissiya raisi
2.
Lavozimiga koʻra
—
Qoraqalpogʻiston Respublikasi Vazirlar Kengashi Raisining, viloyatlar va Toshkent shahar hokimining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari
3.
Lavozimiga koʻra
—
Qoraqalpogʻiston Respublikasi Vazirlar Kengashi Raisining, viloyatlar va Toshkent shahar hokimining oʻrinbosari — mahalla va oilani qoʻllab-quvvatlash boshqarmasi boshligʻi
4.
Lavozimiga koʻra
—
Qoraqalpogʻiston Respublikasi, viloyatlar va Toshkent shahridagi oliy taʼlim muassasasi rektori
5.
Lavozimiga koʻra
—
Qoraqalpogʻiston Respublikasi xalq taʼlimi vaziri, viloyatlar va Toshkent shahar xalq taʼlimi boshqarmasi boshligʻi
6.
Kelishuvga asosan
—
Qoraqalpogʻiston Respublikasi Joʻqorgʻi Kengesi, xalq deputatlari viloyatlar va Toshkent shahar Kengashlari deputati
7.
Kelishuvga asosan
—
fuqarolik jamiyati instituti (nodavlat notijorat tashkilotlari, fuqarolarning oʻzini-oʻzi boshqarish organlari, siyosiy partiya va harakatlar, ommaviy axborot vositalari, kasaba uyushmalari va boshqalar) vakili
8.
Lavozimiga koʻra
—
Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bosh yuristkonsulti
9.
Lavozimiga koʻra
—
Qoraqalpogʻiston Respublikasi Vazirlar Kengashi Raisining, viloyatlar va Toshkent shahar hokimining xotin-qizlar boʻyicha maslahatchisi — mahalla va oilani qoʻllab-quvvatlash boshqarmasi boshligʻining birinchi oʻrinbosari, Komissiya kotibi
Ota-onasi yoki ularning biridan ayrilgan muhtoj qizlar, boquvchisi yoʻq yolgʻiz ayollar oliy taʼlim olishini moddiy jihatdan qoʻllab-quvvatlash tartibi toʻgʻrisidagi nizomga 2-ILOVA
Ota-onasi yoki ularning biridan ayrilgan muhtoj qizlar, boquvchisi yoʻq yolgʻiz ayollar oliy taʼlim olishini moddiy jihatdan qoʻllab-quvvatlash tartibi
SXEMASI
Bosqichlar
Amalga oshirish mexanizmi
Subyekt
Bajarish muddati
1-bosqich
Oliy taʼlim muassasalariga qabul parametrlari doirasida budjet va toʻlov-kontrakt asosida oʻtish ballarini eʼlon qilish.
Oʻzbekiston Respublikasi taʼlim muassasalariga oʻqishga qabul qilish boʻyicha Davlat komissiyasi, Davlat test markazi
Davlat komissiyasi tomonidan tasdiqlangan kundan boshlab
2-bosqich
Belgilangan mezonlarga mos keluvchi xotin-qizlar tomonidan oliy taʼlim muassasalari qabul komissiyasiga moddiy qoʻllab-quvvatlash yuzasidan murojaat qilish.
Davlat oliy taʼlim muassasalari
Test natijalari eʼlon qilingan kundan boshlab 10 kalendar kun davomida
3-bosqich
Bazaviy toʻlov-kontrakt asosida qabul qilingan va 2 — 4-bosqichlarda tahsil olayotgan, belgilangan mezonlarga mos talabgorlar roʻyxatini shakllantirish, umumlashtirish, tegishliligiga qarab doimiy yashash joyi boʻyicha hokimliklarga taqsimlash va yozma ravishda yuborish.
Davlat oliy taʼlim muassasalari
5 kalendar kun mobaynida
4-bosqich
Oliy taʼlim muassasalaridan tushgan murojaatlarni umumlashtirish, Komissiya tomonidan koʻrib chiqish, tanlab olingan 100 nafar talabgorlar roʻyxatini shakllantirish, oliy taʼlim muassasalariga Komissiya xulosasi yuzasidan javob xatlarini yuborish, oliy taʼlim muassasalari bilan toʻlovlar yuzasidan shartnomalarni rasmiylashtirish.
Komissiya hamda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, davlat oliy taʼlim muassasalari
har yili 15-sentabrga qadar
5-bosqich
Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan koʻrib chiqilib tavsiya etilmagan talabgorlar orasidan oliy taʼlim muassasalari Kengashlari qarori bilan 50 nafargacha boʻlgan xotin-qizlarni tanlab olish.
Moliyaviy barqaror davlat oliy taʼlim muassasalari kengashlari
Barcha javob xatlari olingandan soʻng 5 kalendar kuni davomida
6-bosqich
Tanlovdan oʻta olmagan talabgorlarga murojaatlari natijasi yuzasidan xabar berish.
Davlat oliy taʼlim muassasalari
1 kalendar kun davomida
7-bosqich
Talabgorlarga ikkinchi va undan keyingi oʻquv yillarida Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari oʻz hududlaridagi tijorat banklari tomonidan beriladigan taʼlim kreditlarini rasmiylashtirish uchun uchinchi shaxs sifatida kafillik berish.
Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, tijorat banklari, davlat oliy taʼlim muassasalari
2022/2023 oʻquv yilidan boshlab har yili 1-sentabrga qadar
8-bosqich
Talabgorlar oʻqishni tamomlagandan soʻng ularni ish joyi bilan taʼminlash.
Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, davlat oliy taʼlim muassasalari
2024/2025 oʻquv yilidan boshlab har yili 1-avgustga qadar
