PQ-5077-сон 15.04.2021. Jamoat xavfsizligini taʼminlash sohasida professional kadrlarni tayyorlash tizimini yanada takomillashtirish chora-tadbirlari toʻgʻrisida

Hujjat 16.04.2021 sanasi holatiga
Amaldagi versiyaga o‘tish

Oʻzbekiston Respublikasi Prezidentining

Qarori

Jamoat xavfsizligini taʼminlash sohasida professional kadrlarni tayyorlash tizimini yanada takomillashtirish chora-tadbirlari toʻgʻrisida

Mamlakatimizning tinchligi va osoyishtaligiga boʻlgan har qanday tahdidlarning oldini olish va jinoyatchilikka qarshi kurashish sohasida yuqori malakali mutaxassislarni tayyorlash tizimini ilgʻor xalqaro standartlar asosida takomillashtirish, shuningdek, zamon talablaridan kelib chiqib, huquqni muhofaza qiluvchi organlar va Qurolli Kuchlarning kadrlar salohiyatini oshirish maqsadida:

1. Milliy gvardiya Harbiy-texnik instituti Oʻzbekiston Respublikasi Jamoat xavfsizligi universiteti etib (keyingi oʻrinlarda — Universitet) qayta tashkil etilsin.

Universitet quyidagi sohalar uchun malakali kadrlarni maqsadli tayyorlashni amalga oshiruvchi bazaviy oliy harbiy taʼlim va ilmiy-tadqiqot muassasasi etib belgilansin:

Ichki ishlar vazirligi va Milliy gvardiya uchun — jamoat xavfsizligini taʼminlash sohasining tegishincha jamoat tartibini saqlash, yoʻl harakati xavfsizligi va pasport tizimi talablarini amalga oshirish yoʻnalishlarida;

Qurolli Kuchlar va boshqa huquqni muhofaza qiluvchi organlar uchun — harbiy diplomatiya, yurisprudensiya va iqtisodiyot hamda muhandislik-texnik, tarbiyaviy-psixologik va qoʻmondonlik-taktik faoliyat sohasida;

oʻz qoʻriqlash tuzilmalariga ega boʻlgan davlat va xoʻjalik boshqaruvi organlari uchun — qoʻriqlash faoliyatini tashkil etish va amalga oshirish sohasining barcha yoʻnalishlarida.

2. Quyidagilar Universitetning asosiy vazifalari va faoliyat yoʻnalishlari etib belgilansin:

jamoat xavfsizligini taʼminlash boʻyicha faoliyatni samarali tashkil etishga qodir boʻlgan malakali mutaxassislarni tegishli ixtisoslik va huquqshunoslik yoʻnalishlari boʻyicha chuqurlashtirilgan holda oʻqitish hamda ularni jangovar va jismoniy tayyorgarlikdan oʻtkazish orqali maqsadli tayyorlash;

Qurolli Kuchlar va huquqni muhofaza qiluvchi organlar uchun kadrlarni maʼnaviy-axloqiy tarbiyalashning samarali tizimini joriy etish, ularda huquqiy madaniyatni shakllantirish hamda vatanparvarlik va yuksak odob-axloq sifatlarini kamol toptirish orqali chuqurlashtirilgan holda tayyorlash;

Keyingi tahrirga qarang.

oʻquv jarayonini oʻqitishning zamonaviy shakl va uslublari, pedagogik va axborot texnologiyalarini qoʻllagan holda nazariya va amaliyot uzviyligini taʼminlash orqali tashkil etish;

oliy malakali ilmiy-pedagogik kadrlarni tayyorlash, jamoat xavfsizligini taʼminlashning eng dolzarb muammolari boʻyicha kompleks ilmiy tadqiqotlarni, shu jumladan mahalliy va xalqaro grantlarni jalb etgan holda, oʻtkazish;

oʻquv jarayoniga xorijiy mamlakatlarning nufuzli taʼlim va ilmiy-tadqiqot muassasalarining malakali mutaxassislarini jalb etish, shuningdek, qoʻshma ilmiy tadqiqotlarni oʻtkazish va pedagogik tajriba almashish sohasida doimiy xalqaro hamkorlikni amalga oshirish.

3. 2021/2022 oʻquv yilidan boshlab, Universitetda professional kadrlarni tayyorlash jarayoniga bakalavriat va magistraturani oʻz ichiga oluvchi ikki bosqichli oliy taʼlim tizimi joriy etilsin.

Belgilab qoʻyilsinki:

Universitetda bakalavriat dasturi boʻyicha oʻqitish jarayoni taʼlimning kunduzgi va sirtqi shakllarida tashkil etilib, bitiruvchilarga oliy taʼlimning birinchi bosqichini tamomlaganligini tasdiqlovchi diplom beriladi;

Keyingi tahrirga qarang.

Universitetda magistratura dasturi boʻyicha oʻqitish jarayoni bir yillik oʻqish muddati bilan amaliy faoliyatga yoʻnaltirilgan holda tashkil etilib, bitiruvchilarga oliy taʼlimning ikkinchi bosqichini tamomlaganligini tasdiqlovchi diplom beriladi;

Keyingi tahrirga qarang.

Universitetning sirtqi taʼlim shakli kamida uch yillik harbiy xizmat (xizmat) stajiga ega boʻlgan Milliy gvardiyaning amaldagi harbiy xizmatchilari (xodimlari) uchun nazarda tutilib, unda oʻqish muddati oliy maʼlumotga ega boʻlmagan shaxslar uchun toʻrt yilni, oliy maʼlumotga ega boʻlgan shaxslar uchun toʻlov-kontrakt asosida uch yilni tashkil etadi;

Keyingi tahrirga qarang.

Universitetning yillik qabul kvotasi bakalavriatning kunduzgi taʼlim shakliga 300 nafargacha kursantlarni, sirtqi taʼlim shakliga 100 nafargacha tinglovchilarni tashkil etadi;

Keyingi tahrirga qarang.

Universitet magistraturasini tamomlaganlik toʻgʻrisidagi diplom harbiy xizmat (xizmat)ni oʻtashda Qurolli Kuchlar Akademiyasining ikki yillik magistratura dasturini, Ichki ishlar vazirligi Akademiyasining ikkinchi darajadagi magistraturasini, shuningdek, xorijiy mamlakatlar harbiy akademiyalarini tamomlaganlik toʻgʻrisidagi diplomlarga tenglashtiriladi;

Keyingi tahrirga qarang.

Universitetning sirtqi taʼlim shakliga Oʻzbekiston Respublikasi Prezidenti huzuridagi Xavfsizlik kengashi apparati tomonidan har yili belgilanadigan qoʻshimcha kvota boʻyicha boshqa huquqni muhofaza qiluvchi organlar va Qurolli Kuchlarda kamida uch yillik harbiy xizmat (xizmat) stajiga ega boʻlgan harbiy xizmatchilar (xodimlar) toʻlov-kontrakt asosida oʻqishga qabul qilinishi mumkin.

Keyingi tahrirga qarang.

Quyidagilarga:

Milliy gvardiya qoʻmondoni R.M. Joʻrayevga — Universitetda ikki bosqichli oliy taʼlim tizimini sifatli joriy etish, shu jumladan oʻquv jarayonini eng zamonaviy pedagogik va axborot texnologiyalari asosida tashkil qilish, professor-oʻqituvchilar tarkibining ilmiy-pedagogik salohiyatini tubdan oshirish;

ichki ishlar vazirining oʻrinbosari A.I. Ikramovga — ichki ishlar organlari jamoat xavfsizligini taʼminlovchi boʻlinmalari bilan Universitet oʻrtasida oʻzaro hamkorlikning uygʻun mexanizmlarini joriy etish, taʼlim oluvchilarning faoliyat sohasi boʻyicha samarali stajirovka oʻtashini taʼminlash yuzasidan shaxsiy masʼuliyat yuklansin.

Milliy gvardiya (R.M. Joʻrayev) Oliy va oʻrta maxsus taʼlim vazirligi (A.X. Toshkulov) bilan birgalikda:

bir oy muddatda mazkur qaror talablarini inobatga olgan holda Universitetga oʻqishga qabul qilish tartibini hamda ochiq va xolisona tanlov mezonlarini nazarda tutuvchi Hukumat qarori loyihasini Vazirlar Mahkamasiga kiritsin;

2021/2022 oʻquv yilidan boshlab Universitetda joriy etilayotgan taʼlim tizimiga muvofiq oʻqitishni yoʻlga qoʻyish boʻyicha kompleks tashkiliy choralarni koʻrsin.

4. Universitetning Vasiylik kengashi 1-ilovaga muvofiq tarkibda tashkil etilsin.

Belgilansinki, Vasiylik kengashi Universitetning quyidagi ustuvor yoʻnalishlar boʻyicha rivojlanishiga koʻmaklashadi:

taʼlim oluvchilarning amaliyot oʻtashini tashkil etish hamda bitiruvchilarni ishga joylashtirish boʻyicha Qurolli Kuchlar va huquqni muhofaza qiluvchi organlar bilan samarali hamkorlikni amalga oshirish;

oliy taʼlimning rivojlanishiga koʻmaklashadigan dasturlar va istiqbolli tashabbuslarni qoʻllab-quvvatlash, ilmiy ishlanmalarni amaliyotga samarali tatbiq etish;

taʼlim va ilm-fan sohasida oliy harbiy va ixtisoslashtirilgan, shu jumladan xorijiy taʼlim muassasalari bilan maqsadli uzviy hamkorlikni yoʻlga qoʻyish va rivojlantirish;

Universitetga moliyaviy va tashkiliy yordam berish, uning faoliyatini taʼminlash va rivojlantirish uchun budjetdan tashqari mablagʻlarni, mahalliy va xalqaro grantlarni jalb qilish.

Vasiylik kengashining barcha aʼzolariga oʻz vakolatlari doirasida Universitetni rivojlantirish va samarali faoliyat koʻrsatishi uchun koʻmaklashish boʻyicha shaxsiy masʼuliyat yuklansin.

5. Shunday tartib oʻrnatilsinki, unga muvofiq:

Universitetga oʻqishga qabul qilish tanlov asosida, Qurolli Kuchlar va huquqni muhofaza qiluvchi organlarning ehtiyojini hisobga olgan holda har yili belgilanadigan kvotalar doirasida amalga oshirilib, taʼlim oluvchilarga oʻrnatilgan tartibda stipendiya (pul taʼminoti) toʻlanadi va moddiy taʼminot belgilanadi;

Universitet kursantlarini kelgusida harbiy xizmat (xizmat) oʻtash uchun idoralararo taqsimlash taʼlim yoʻnalishlariga muvofiq bitiruv bosqichida amalga oshiriladi;

Universitet bitiruv bosqichidagi kursantlarning faoliyat sohasi boʻyicha stajirovkasi oʻqishni tamomlagandan soʻng harbiy xizmat (xizmat) oʻtash uchun yuborilishi nazarda tutilgan boʻlinmalarda tashkil etiladi;

Qurolli Kuchlar va huquqni muhofaza qiluvchi organlarning harbiy xizmatchilari (xodimlari) mehnatga soatbay haq toʻlash shartlari asosida mutaxassislik fanlari boʻyicha Universitetda oʻquv mashgʻulotlarini oʻtkazish huquqiga ega;

Universitet tomonidan Milliy gvardiya akademik litseylarining oʻquv-metodik jarayoni muvofiqlashtiriladi hamda ularga tizimli amaliy va axborot-resurs yordami koʻrsatiladi;

Universitetga oʻqishga kiruvchi abituriyentlarning antropometrik parametrlari Qurolli Kuchlar va huquqni muhofaza qiluvchi organlarga harbiy xizmat (xizmat)ga qabul qilish talablariga muvofiq tartibda tanlangan mutaxassislikka qarab belgilanadi;

Universitetning ilmiy va professor-oʻqituvchilar tarkibi lavozimlariga tegishli sohada kamida besh yillik ilmiy, pedagogik yoki amaliy ish tajribasiga ega shaxslar harbiy xizmatchilar lavozimlari hisobidan tayinlanishi mumkin;

Universitetning xizmatchilar uchun belgilangan professor-oʻqituvchilar tarkibi lavozimlariga tayinlanadigan pedagog xodimlar bilan shartnomalar bir yil muddatga tuziladi.

6. Milliy gvardiya va Ichki ishlar vazirligining quyidagi takliflari maʼqullansin:

Universitetga kunduzgi taʼlim shaklining bakalavriat va magistratura dasturlari boʻyicha umumiy asoslarda yurisprudensiya, psixologiya va iqtisodiyot sohalarida kadrlarni talabalar tarkibiga kiritgan holda tayyorlash huquqini berish;

Keyingi tahrirga qarang.

umumiy asoslarda kadrlar tayyorlashni toʻlov-kontrakt asosida amalga oshirish va bitiruvchilarga “zaxiradagi ofitser” harbiy unvoni va tegishli mutaxassislik boʻyicha diplom berish.

7. Oʻzbekiston Respublikasi Jamoat xavfsizligi universitetida taʼlim yoʻnalishlari (mutaxassisliklari) roʻyxati 2-ilovaga muvofiq tasdiqlansin.

Belgilansinki, mazkur taʼlim yoʻnalishlari (mutaxassisliklari) 2021/2022 oʻquv yilidan boshlab joriy etiladi.

8. Quyidagi huquqlar berilsin:

a) Milliy gvardiya qoʻmondoniga:

Universitet kursantlari (talabalari) va tinglovchilarini oʻqishdan chetlashtirish va ularni oʻqishga tiklash tartibini belgilash;

Vasiylik kengashi bilan kelishilgan holda Universitetda taʼlim yoʻnalishlari (mutaxassisliklari) roʻyxatiga oʻzgartirishlar kiritish, shuningdek, kadrlarga boʻlgan ehtiyojdan kelib chiqib, yangi istiqbolli yoʻnalishlar (mutaxassisliklar)ni kiritish;

b) Universitet boshligʻiga:

toʻlov-kontrakt asosidagi oʻqitish mablagʻlari hisobidan Universitetning iqtidorli kursant va talabalariga qoʻshimcha individual stipendiyalar tayinlash;

oʻquv jarayoniga yuqori ilmiy-pedagogik mahoratga ega boʻlgan, birinchi navbatda, ilgʻor xorijiy taʼlim muassasalarining mutaxassislarini soatbay va uzoq muddatli ishlash shartlarida shartnoma asosida jalb etish va mehnat bozori konyunkturasini inobatga olgan holda ularning mehnatiga haq toʻlash miqdorini belgilash;

yetakchi xorijiy taʼlim va ilmiy-tadqiqot muassasalari bilan qoʻshma taʼlim dasturlarini amalga oshirish, shuningdek, kadrlarni tayyorlash va ularning malakasini oshirish sohasida oʻzaro hamkorlik boʻyicha toʻgʻridan-toʻgʻri memorandum va bitimlarni tuzish;

xalqaro hamkorlik va ikki tomonlama shartnomalar doirasida xorijiy davlatlarning harbiy xizmatchilarini tayyorlash, qayta tayyorlash va ularning malakasini oshirishni belgilangan tartibda tashkil etish;

professor-oʻqituvchilar tarkibining amaliy stajirovka oʻtash joyi va idorasini mustaqil belgilash.

Keyingi tahrirga qarang.

9. Belgilab qoʻyilsinki:

Universitetda amaldagi oʻquv dasturlari boʻyicha oʻqitish ular muqaddam oʻrnatilgan tartibda yakunlanguniga qadar saqlanib qoladi;

Universitetda toʻlov-kontrakt asosida oʻqitish qiymati har yili Vasiylik kengashi tomonidan belgilanadi;

Universitetda toʻlov-kontrakt asosida oʻqitish, mol-mulkning ijarasi, pullik kurslarni tashkil etish va boshqa xizmatlarni koʻrsatishdan tushgan mablagʻlar uning budjetdan tashqari hisobraqamiga tushadi va ushbu mablagʻlarning 50 foizdan kam boʻlmagan qismi oʻquv jarayoniga shartnoma asosida malakali mutaxassislarni jalb qilish, xalqaro miqyosdagi tadbirlarni tashkil etish, shuningdek, shaxsiy tarkibni har oylik moddiy ragʻbatlantirishga yoʻnaltiriladi;

Keyingi tahrirga qarang.

Universitetning xizmatchilar hisoblangan boshqaruv va professor-oʻqituvchilar tarkibidagi xodimlariga avvalgi ish joyi boʻyicha berilgan martaba darajalari uchun belgilangan ustama haqlari (mavjud boʻlsa) saqlanib qoladi;

Universitetning xizmatchilar hisoblangan boshqaruv, ilmiy va professor-oʻqituvchilar tarkibidagi lavozimlariga tegishincha Vazirlar Mahkamasining 2008-yil 1-avgustdagi “Respublika oliy taʼlim muassasalari xodimlari mehnatiga haq toʻlashning takomillashtirilgan tizimini tasdiqlash toʻgʻrisida”gi 164-son va 2009-yil 18-avgustdagi “Ilmiy xodimlar mehnatini yanada ragʻbatlantirish chora-tadbirlari toʻgʻrisida”gi 233-son qarorlari bilan belgilangan mehnatga haq toʻlashning bazaviy lavozim maoshlari qoʻllaniladi.

10. Tashqi ishlar vazirligi (A.X. Kamilov), Mutaxassislarni xorijda tayyorlash va vatandoshlar bilan muloqot qilish boʻyicha “El-yurt umidi” jamgʻarmasi (A.Sh. Bekmurodov), Universitetga:

muntazam ravishda ilmiy va professor-oʻqituvchilar tarkibining yetakchi xorijiy taʼlim muassasalarida malaka oshirishini, shu jumladan iqtidorli harbiy xizmatchilarni magistratura va doktoranturaga oʻqishga yuborishni tashkil etish, shuningdek, oʻquv jarayoniga ularning yuqori malakali mutaxassislarini keng jalb etish;

yetakchi xorijiy taʼlim, ilmiy-tadqiqot va axborot-tahliliy muassasalar bilan oʻzaro xalqaro hamkorlik toʻgʻrisidagi memorandum va bitimlarni tayyorlash hamda tuzish;

Universitetning buyurtmalariga koʻra, mazkur qaror doirasida jalb etiladigan Universitet professor-oʻqituvchilar tarkibidagi xorijiy fuqarolarga, shuningdek, ularning oila aʼzolariga konsullik va boshqa yigʻimlarni undirmasdan kirish vizalarini rasmiylashtirishga koʻmaklashsin.

11. Bandlik va mehnat munosabatlari vazirligi (N.B. Xusanov) Universitetning buyurtmalariga koʻra, Oʻzbekiston Respublikasiga xorijiy mutaxassislarni jalb etishga ruxsatnomani berish (uzaytirish)ni, shuningdek, mazkur qarorni amalga oshirish doirasida jalb etiladigan xorijiy fuqarolarga Oʻzbekiston Respublikasi hududida mehnat faoliyati bilan shugʻullanish huquqini beruvchi tasdiqnomalar berish (uzaytirish)ni taʼminlasin.

Ichki ishlar vazirligi (N.S. Turaxodjayev) Universitetning buyurtmalariga koʻra, mazkur qaror doirasida jalb etiladigan xorijiy fuqarolarga koʻp martalik vizalar berilishini va muddati uzaytirilishini, shuningdek, ularning yashash joyi boʻyicha vaqtincha roʻyxatga olinishini va muddati uzaytirilishini oʻrnatilgan tartibda taʼminlasin.

12. Milliy gvardiya (R.M. Joʻrayev) Oliy va oʻrta maxsus taʼlim vazirligi (A.X. Toshkulov) hamda boshqa manfaatdor vazirlik va idoralar bilan birgalikda:

bir oy muddatda Universitetda maqsadli situatsion-immitatsion poligonlarni tashkil etishni nazarda tutuvchi Hukumat qarori loyihasini Vazirlar Mahkamasiga kiritsin;

uch oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

13. Moliya vazirligi (T.A. Ishmetov) Milliy gvardiyaning asoslantirilgan buyurtmalariga asosan 2022-yil 1-yanvardan boshlab:

mazkur qarorni inobatga olgan holda Davlat budjeti xarajatlari parametrida Universitetni saqlab turish uchun zarur ajratmalar;

tuziladigan shartnomalar asosida Universitetning oʻquv jarayoniga malakali xorijiy mutaxassislarni jalb etish uchun pul mablagʻlari ajratilishini nazarda tutsin.

14. Mazkur qaror ijrosini samarali tashkil etishga masʼul va shaxsiy javobgar etib Milliy gvardiya qoʻmondoni R.M. Joʻrayev belgilansin.

Mazkur qaror ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasi Prezidenti huzuridagi Xavfsizlik kengashi kotibi V.V. Maxmudov zimmasiga yuklansin.

Amalga oshirilayotgan chora-tadbirlar natijadorligi yuzasidan 2021-yil 1-iyul va 2022-yil 1-yanvargacha Oʻzbekiston Respublikasi Prezidentiga axborot berilsin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2021-yil 15-aprel,

PQ-5077-son

Oʻzbekiston Respublikasi Prezidentining 2021-yil 15-apreldagi PQ-5077-son qaroriga
1-ILOVA

Oʻzbekiston Respublikasi Jamoat xavfsizligi universitetining Vasiylik kengashi

TARKIBI

V.V. Maxmudov	—	Oʻzbekiston Respublikasi Prezidenti huzuridagi Xavfsizlik kengashi kotibi, Vasiylik kengashi raisi
D.B. Kadirov	—	Oʻzbekiston Respublikasi Prezidentining huquqni muhofaza qiluvchi va nazorat organlari faoliyatini muvofiqlashtirish masalalari boʻyicha maslahatchisi oʻrinbosari, Vasiylik kengashi raisi oʻrinbosari
R.M. Joʻrayev	—	Milliy gvardiya qoʻmondoni
P.R. Bobojonov	—	ichki ishlar vaziri
K.F. Kamilov	—	Oliy sud raisi
N.T. Yoʻldoshev	—	Bosh prokuror
A.A. Azizov	—	Davlat xavfsizlik xizmati raisi
B.N. Kurbanov	—	mudofaa vaziri
R.K. Davletov	—	adliya vaziri
A.X. Toshkulov	—	oliy va oʻrta maxsus taʼlim vaziri
A.X. Kamilov	—	tashqi ishlar vaziri
Lavozimi boʻyicha	—	Jamoat xavfsizligi universiteti boshligʻi

Izoh: Vasiylik kengashi aʼzolari boshqa ishga oʻtganda uning tarkibiga mazkur lavozimlarga yangidan tayinlangan yoki tegishli vazifalarni bajarish yuklatilgan shaxslar kiritiladi.

Keyingi tahrirga qarang.

Oʻzbekiston Respublikasi Prezidentining 2021-yil 15-apreldagi PQ-5077-son qaroriga
2-ILOVA

Oʻzbekiston Respublikasi Jamoat xavfsizligi universitetidagi taʼlim mutaxassisliklari (yoʻnalishlari)

ROʻYXATI

T/r	Mutaxassislik (yoʻnalish) nomi	Beriladigan malaka	Taʼlim shakli	Oʻqish muddati
I. Bakalavriat
1.	Maxsus vazifalarni bajarish qoʻshinlarining qoʻmondonlik-taktik faoliyati	sohalar boʻyicha menejer	kunduzgi	4 yil
2.	Xizmat faoliyatini tarbiyaviy-psixologik taʼminlash	psixolog	kunduzgi	4 yil
3.	Xavfsizlikni huquqiy taʼminlash	yurist	kunduzgi	4 yil
4.	Xalqaro harbiy hamkorlikni huquqiy taʼminlash	yurist	kunduzgi	4 yil
5.	Iqtisodiy xavfsizlik	iqtisodchi	kunduzgi	4 yil
6.	Aniqlash va qoʻriqlash tizimlardan foydalanish boʻyicha qoʻmondonlik-muhandislik faoliyati	muhandis	kunduzgi	4 yil
7.	Qoʻriqlash boʻlinmalarining qoʻmondonlik-taktik faoliyati	yurist	kunduzgi	3 yil
8.	Yoʻl patrul xizmatining qoʻmondonlik-taktik faoliyati	yurist	kunduzgi	3 yil
9.	Patrul-post xizmatining qoʻmondonlik-taktik faoliyati	yurist	kunduzgi	3 yil
10.	Pasport tizimini huquqiy taʼminlash	yurist	kunduzgi	3 yil
11.	Xavfsizlikni huquqiy taʼminlash	yurist	sirtqi	4 yil/3 yil*
12.	Xizmat faoliyatini tarbiyaviy-psixologik taʼminlash	psixolog	sirtqi	4 yil/3 yil*
13.	Yurisprudensiya**	yurist	kunduzgi	4 yil
14.	Psixologiya**	psixolog	kunduzgi	4 yil
15.	Iqtisodiyot**	iqtisodchi	kunduzgi	4 yil
II. Magistratura
16.	Jamoat xavfsizligini tezkor-taktik taʼminlashning qoʻmondonlik-shtab faoliyati	sohalar boʻyicha menejer	kunduzgi	1 yil
17.	Tarbiyaviy-psixologik taʼminlashning qoʻmondonlik-shtab faoliyati	psixolog	kunduzgi	1 yil
18.	Qoʻriqlash faoliyatini taʼminlashning qoʻmondonlik-muhandislik faoliyati	elektrotexnik komplekslar va tizimlar muhandisi	kunduzgi	1 yil
19.	Jamoat xavfsizligini huquqiy taʼminlash	yurist	kunduzgi	1 yil
20.	Iqtisodiy xavfsizlik	iqtisodchi	kunduzgi	1 yil
21.	Yurisprudensiya**	yurist	kunduzgi	1 yil
22.	Psixologiya**	psixolog	kunduzgi	1 yil
23.	Iqtisodiyot**	iqtisodchi	kunduzgi	1 yil

* oliy maʼlumotga ega boʻlmaganlar uchun — 4 yil, oliy maʼlumotga ega boʻlganlar uchun 3 yil.

** kadrlarni umumfuqaroviy asosda tayyorlash.

Keyingi tahrirga qarang.

(Qonun hujjatlari maʼlumotlari milliy bazasi, 16.04.2021-y., 07/21/5077/0348-son; Qonunchilik maʼlumotlari milliy bazasi, 12.05.2022-y., 07/22/241/0408-son; 04.09.2026-y., 07/26/302/0885-son; 07.09.2026-y., 07/26/303/0895-son)