Oʻzbekiston Respublikasi Prezidentining “Ish haqi, pensiyalar, nafaqalar va stipendiyalarning miqdorlarini oshirish toʻgʻrisida” 1995-yil 7-fevraldagi Farmonini bajarish yuzasidan Vazirlar Mahkamasi qaror qiladi:

1. 1995-yil 1-martdan boshlab mehnatga haq toʻlashning Yagona tarif setkasiga boshlangʻich razryadning oyiga 300 soʻm miqdoridagi tarif stavkasi asos qilib olinsin va Yangi tarif koeffitsiyentlari ilovaga muvofiq tasdiqlansin. Yangi tarif koeffitsiyentlarini qoʻllash budjetdan mablagʻ bilan taʼminlanadigan muassasalar, tashkilotlar va korxonalar uchun majburiy hisoblanadi.

2. Ijtimoiy taʼminot vazirligi ikki kun mobaynida pensiya va nafaqalarni 1995-yil 1-martdan boshlab qayta hisoblash tartibini tasdiqlasin va ijtimoiy taʼminot mahalliy organlariga yuborsin. Bunda 1995-yil 1-martdan keyin pensiya tayinlashda ularni tegishlicha oʻrtacha 350 soʻmga oshirish hisoblashning amaldagi normalari va tarkibi qoʻllanilsin.

3. Ish haqi miqdorini oshirishni taʼminlash maqsadida xoʻjalik hisobidagi korxonalar va tashkilotlar uchun ish haqi miqdorini mahsulot, ishlar, xizmatlar hajmining oʻsishiga koʻra tartibga solish maqsadida qabul qilingan ish haqining baza fondi qonun hujjatlari bilan belgilangan amaldagi qoʻshimcha toʻlovlar va ustamalarga tuzatishlar kiritilgan holda bir ishlovchiga oyiga oʻrtacha 350 soʻmga oshirilsin.

4. Vazirliklar, idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, budjetdan mablagʻ bilan taʼminlanadigan tashkilotlar va muassasalar Oʻzbekiston Respublikasi Prezidentining shu yil 7-fevraldagi Farmonidan kelib chiqqan holda pensiyalar, nafaqalar, stipendiyalar va xodimlarning lavozim maoshlari miqdorlari oʻz vaqtida qayta hisoblab chiqilishini taʼminlasinlar.

5. 1995-yil 1-martdan boshlab quyidagilar oʻz kuchini quyidagilar oʻz kuchini yoʻqotgan deb hisoblansin:

Oʻzbekiston Respublikasi Vazirlar Mahkamasining 1992-yil 26-dekabrdagi 590-son qarori 2-bandining boshlangʻich razryadni eng kam ish haqi miqdoriga tenglashtirishga oid qismi;

Oʻzbekiston Respublikasi Vazirlar Mahkamasining 1994-yil 24-iyundagi 319-son qarori bilan tasdiqlangan Bolalikdan nogironlarga nafaqalar tayinlash va toʻlash tartibi toʻgʻrisidagi Nizomning 2-bandi, Pensiya tayinlash uchun zarur boʻlgan ish stajiga ega boʻlmagan qariyalarga va mehnatga layoqatsiz fuqarolarga nafaqalar tayinlash va toʻlash tartibi toʻgʻrisidagi Nizomning 7 va 10-bandlari.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.S. Hamidov zimmasiga yuklansin.