PQ-3608-сон 16.03.2018. Samarqand viloyatini obodonlashtirish va farovonligini oshirish jamgʻarmasini tashkil etish chora-tadbirlari toʻgʻrisida

Hujjat 16.03.2018 sanasi holatiga
Amaldagi versiyaga o‘tish

Oʻzbekiston Respublikasi Prezidentining

Qarori

Samarqand viloyatini obodonlashtirish va farovonligini oshirish jamgʻarmasini tashkil etish chora-tadbirlari toʻgʻrisida

Arxitektura va qurilish normalariga muvofiq hududiy infratuzilmani yaxshilash, obodonlashtirish, obyektlarni qurish va rekonstruksiya qilish, Samarqand viloyatining ijtimoiy-iqtisodiy vazifalarini jadal surʼatlarda hal etish, aholi farovonligini yaxshilash, suv taʼminoti va kanalizatsiya muammolarini bartaraf etish, mahallalarning ichki yoʻllarini taʼmirlash, ijtimoiy obyektlarni qurish va moddiy-texnik bazasini mustahkamlash, ijtimoiy soxa xodimlari uchun xizmat uylarini qurish maqsadida:

1. Samarqand viloyati xokimligining Samarqand viloyati hokimligi huzurida yuridik shaxs tashkil etmasdan Samarkand viloyatini obodonlashtirish va farovonligini oshirish jamgʻarmasi (keyingi oʻrinlarda Jamgʻarma deb ataladi) tashkil etish toʻgʻrisidagi taklifi maʼqullansin.

2. Quyidagilar Jamgarma daromadlarini shakllantirish manbalari etib hisoblansin:

Samarqand viloyati hokimligi muassisligida tashkil etilgan tijorat tashkilotlarining ajratmalari;

davlat, chet el va halqaro tashkilotlar tomonidan ajratiladigan grantlar;

yuridik va jismoniy shaxslarning xomiylik hayriyalari;

halqaro moliyaviy institutlar va banklar tomonidan ajratiladigan kreditlar;

qonun hujjatlarida taqiqlanmagan boshqa manbalar.

3. Quyidagilar Jamgʻarma mablagʻlaridan foydalanishning asosiy yoʻnalishlari etib belgilansin:

Samarqand viloyatida muhandislik-kommunikatsiya infratuzilmasini yaxshilash, hududlarni obodonlashtirish, koʻkalamzorlashtirish va mahalliy ichki yoʻllarni taʼmirlash;

koʻp qavatli turar joylarning umumfoydalaniladigan qismini taʼmirlash, bolalar va sport maydonchalarini barpo etish;

Samarqand viloyatida keng qoʻlamli bunyodkorlik ishlarini amalga oshirishda davlat va jamoat ehtiyojlari uchun yer uchastkalarining olib qoʻyilishi munosabati bilan jismoniy va yuridik shaxslarga kompensatsiya toʻlash va ular uchun koʻp kvartirali uylarni qurish;

Keyingi tahrirga qarang.

kam taʼminlangan va yosh oilalarga imtiyozli kreditlar olishda boshlangʻich badalni qisman yoki toʻliq qoplab berish hamda maishiy texnika vositalariga boʻlgan birlamchi extiyojni qondirish;

mahalla fuqarolar yigʻinlari moddiy-texnika bazasini mustahkamlash, mahallalar hududida kutubxonalar tashkil etish hamda ularni badiiy va boshqa adabiyotlar bilan boyitish.

4. Belgilansinki, Samarqand viloyati hokimligining Jamgʻarmaga dastlabki badali Oʻzbekiston Respublikasi Tiklanish va taraqqiyot jamgʻarmasining Oʻzbekiston Respublikasi Tashqi iqtisodiy faoliyat milliy banki tomonidan qayta moliyalashtiriladigan, Samarqand viloyati hokimligiga 5 yil muddatga, 2 yil imtiyozli davrni hisobga olgan holda, foiz stavkasi yiliga 2,25 foizni tashkil qiladigan va qayta moliyalashtiradigan bankning yiliga 0,25 foiz miqdordagi marjasi hisobga olinib, komissiya yigʻimlari undirilmagan holda 50 mln. AQSH dollari miqdoridagi krediti hisobidan shakllantiriladi.

Keyingi tahrirga qarang.

5. Oʻzbekiston Respublikasi Tashqi iqtisodiy faoliyat milliy banki tomonidan kayta moliyalashtiriladigan Oʻzbekiston Respublikasi Tiklanish va tarakkiyot jamgʻarmasi kreditini qoplash prognoz jadvali ilovaga muvofiq tasdiqlansin.

Keyingi tahrirga qarang.

6. Belgilansinki:

Jamgʻarma mablagʻlaridan Oʻzbekiston Respublikasi Vazirlar Mahkamasi bilan kelishilgan holda, Samarqand viloyati xokimligi tomonidan tuziladigan manzilli roʻyxatlarga muvofiq foydalaniladi;

Samarqand viloyati hokimligi Oʻzbekiston Respublikasi Tiklanish va taraqqiyot jamgʻarmasi kreditidan maqsadli va samarali foydalanish, shuningdek, Jamgʻarmani oʻz vaqtida shakllantirish uchun masʼul boʻlgan ijro etuvchi organ hisoblanadi;

Oʻzbekiston Respublikasi Tiklanish va taraqqiyot jamgʻarmasining jalb qilinadigan kreditini qoplash va xizmat koʻrsatish bilan bogʻlik xarajatlar Samarqand viloyatining mahalliy budjeti qoʻshimcha manbalari hamda qonun hujjatlarida taqiqlanmagan boshqa manbalar hisobidan amalga oshiriladi.

Samarqand viloyati hokimligi, Oʻzbekiston Respublikasi Tiklanish va taraqqiyot jamgʻarmasi manfaatdor vazirlik va idoralar bilan birgalikda Jamgʻarmaga ajratilgan mablagʻlardan samarali foydalanish yuzasidan bir oy muddatda Vazirlar Mahkamasiga taklif kiritsin.

7. Oʻzbekiston Respublikasi Moliya vazirligi, Oʻzbekiston Respublikasi Tiklanish va taraqqiyot jamgʻarmasi, Samarqand viloyati hokimligi hamda boshqa manfaatdor vazirliklar va idoralar bilan birgalikda besh kun muddatda Jamgʻarma mablagʻlaridan foydalanish tartibi va Oʻzbekiston Respublikasi Tiklanish va taraqqiyot jamgʻarmasining jalb qilinadigan kreditini qoplashning uning aniq manbalarini koʻrsatgan holda mexanizmini nazarda tutuvchi nizom loyihasini belgilangan tartibda ishlab chiqsin va tasdiqlasin.

8. Oʻzbekiston Respublikasi Moliya vazirligi, Tashqi iktisodiy faoliyat milliy banki hamda Tiklanish va taraqqiyot jamgʻarmasi bilan birgalikda Jamgʻarmaga ajratilgan kreditdan maqsadli va samarali foydalanilishi, shuningdek, uning oʻz vaqtida qaytarilishi yuzasidan taʼsirchan monitoring oʻrnatsin.

Keyingi tahrirga qarang.

9. Oʻzbekiston Respublikasi Moliya vaziriga Oʻzbekiston Respublikasi Tiklanish va taraqqiyot jamgʻarmasining Tashqi iktisodiy faoliyat milliy banki tomonidan qayta moliyalashtiriladigan krediti boʻyicha Samarqand viloyati hokimligi majburiyatlariga doir Oʻzbekiston Respublikasi davlat kafolatini berish vakolati berilsin.

Keyingi tahrirga qarang.

10. Oʻzbekiston Respublikasi Bosh vazirining oʻrinbosari — moliya vaziri J.A. Qoʻchkorov Samarkand viloyati hokimligi bilan birgalikda ikki oy muddatda Jamgʻarmaning moliyaviy manbalarini kengaytirish yuzasidan takliflar ishlab chiqsin.

11. Oʻzbekiston Respublikasi Hisob palatasi (M.M. Ikramov) mazkur qarorning amaliy ijrosini alohida nazoratga olib, amalga oshirilayotgan ishlarning natijadorligi toʻgʻrisida har oy yakuni bilan Oʻzbekiston Respublikasi Prezidenti devoniga maʼlumot kiritib borilishini taʼminlasin.

12. Mazkur qarorning ijrosini nazorat kilish Oʻzbekiston Respublikasining Bosh vaziri A.N. Aripov va Samarqand viloyati hokimi T.I. Djurayev zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2018-yil 16-mart,

PQ-3608-son

Oʻzbekiston Respublikasi Prezidentining 2018-yil 16-martdagi PQ-3608-son qaroriga
ILOVA

Oʻzbekiston Respublikasi Tashki iqtisodiy faoliyat milliy banki tomonidan qayta moliyalashtiriladigan Oʻzbekiston Respublikasi Tiklanish va taraqqiyot jamgʻarmasi kreditini qoplash

PROGNOZ JADVALI

Kredit summasi	50 mln. AQSH dollari
Kredit muddati	5 yil, shu jumladan imtiyozli davr — 2 yil
Foiz stavkasi	yillik 2.25 % (shu jumladan, bank marjasi — 0.25 %)
			ming AQSH dollari
Qoplash davrlari	Oʻzlashtirish miqdori	Toʻlov summasi		Jami toʻlov miqdori*
Qoplash davrlari	Oʻzlashtirish miqdori	asosiy qarz	foizlar*	Jami toʻlov miqdori*
2018-yil I yarim yilligi	50 000.0	-	-	-
2018-yil II yarim yilligi	-	-	564,04	564,04
2019-yil I yarim yilligi	-	-	560,96	560,96
2019-yil II yarim yilligi	-	-	564,04	564,04
2020-yil I yarim yilligi	-	7 142,86	564,04	7 706,90
2020-yil II yarim yilligi	-	7 142,86	483,46	7 626,32
2021-yil I yarim yilligi	-	7 142,86	400,68	7 543,54
2021-yil II yarim yilligi	-	7 142,86	322,31	7 465,17
2022-yil I yarim yilligi	-	7 142,86	240,41	7 383,27
2022-yil II yarim yilligi	-	7 142,86	161,15	7 304,01
2023-yil I yarim yilligi	-	7 142,84	80,15	7 222,99
Jami	50 000,0	50 000,0	3 941,24	53 941,24

*kreditning haqiqatda olingan miqdori va sanasidan kelib chiqqan holda aniqlashtiriladi.

Keyingi tahrirga qarang.

(Qonun hujjatlari maʼlumotlari milliy bazasi, 16.03.2018-y., 07/20/3608/0857-son; Qonunchilik maʼlumotlari milliy bazasi, 22.09.2021-y., 07/21/5249/0898-son; 13.07.2022-y., 07/22/315/0621-son; 19.03.2025-y., 07/25/113/0253-son)