toggle_night_mode
Hujjat kuchini yo‘qotgan 21.12.2022
Hujjat 17.01.2020 sanasi holatiga
Amaldagi versiyaga o‘tish
Yer resurslari, geodeziya, kartografiya va davlat kadastri davlat qoʻmitasining
Qarori
Koʻchmas mulk boʻyicha kadastr muhandisining malaka shahodatnomasini berish tartibi toʻgʻrisidagi nizomni tasdiqlash haqida
[Oʻzbekiston Respublikasi Adliya vazirligi tomonidan 2020-yil 17-yanvarda roʻyxatdan oʻtkazildi, roʻyxat raqami 3211]
 LexUZ sharhi
Mazkur qaror Oʻzbekiston Respublikasi davlat soliq qoʻmitasi huzuridagi kadastr agentligi direktorining 2022-yil 6-dekabrdagi 14-2022-sonli ““Koʻchmas mulk boʻyicha kadastr muhandisining malaka shahodatnomasini berish tartibi toʻgʻrisidagi nizomni tasdiqlash haqida”gi qaror, shuningdek unga oʻzgartirish va qoʻshimchalarni oʻz kuchini yoʻqotgan deb topish toʻgʻrisida”gi buyrugʻiga (roʻyxat raqami 3211-2, 21.12.2022-y.) asosan oʻz kuchini yoʻqotgan.
Oʻzbekiston Respublikasi Prezidentining 2019-yil 5-apreldagi PQ-4270-son “Koʻchmas mulkka boʻlgan huquqlarni davlat roʻyxatidan oʻtkazish tizimini yanada takomillashtirish chora-tadbirlari toʻgʻrisida”gi qaroriga muvofiq Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi qaror qiladi:
1. Koʻchmas mulk boʻyicha kadastr muhandisining malaka shahodatnomasini berish tartibi toʻgʻrisidagi nizom ilovaga muvofiq tasdiqlansin.
2. Mazkur qaror rasmiy eʼlon qilingan kundan eʼtiboran kuchga kiradi.
Yer resurslari, geodeziya, kartografiya va davlat kadastri davlat qoʻmitasi raisi A. ABDULLAYEV
Toshkent sh.,
2019-yil 17-dekabr,
11-son
Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasining 2019-yil 17-dekabrdagi 11-son qaroriga
ILOVA
Koʻchmas mulk boʻyicha kadastr muhandisining malaka shahodatnomasini berish tartibi toʻgʻrisidagi
NIZOM
Mazkur Nizom Oʻzbekiston Respublikasi Prezidentining 2019-yil 5-apreldagi PQ-4270-son “Koʻchmas mulkka boʻlgan huquqlarni davlat roʻyxatidan oʻtkazish tizimini yanada takomillashtirish chora-tadbirlari toʻgʻrisida”gi qaroriga muvofiq koʻchmas mulk boʻyicha kadastr muhandisining malaka shahodatnomasini berish tartibini belgilaydi.

1-bob Umumiy qoidalar

1. Mazkur Nizomda quyidagi asosiy tushunchalardan foydalaniladi:
koʻchmas mulk boʻyicha kadastr muhandisi (bundan buyon matnda kadastr muhandisi deb yuritiladi) — rieltorlik tashkiloti bilan tuziladigan mehnat shartnomasi asosida faoliyat yurituvchi va kadastr muhandisi malaka shahodatnomasiga ega jismoniy shaxs;
talabgor — kadastr muhandisi malaka shahodatnomasini olishga talabgor boʻlgan jismoniy shaxs;
malaka imtihoni — kadastr muhandisiga quyilgan talablarga talabgorning mos kelishini tekshirishga yoʻnaltirilgan, malaka imtihoni komissiyasi tomonidan oʻtkaziladigan imtihon;
malaka shahodatnomasi — malaka imtihonini muvaffaqiyatli topshirgan talabgorning malakasini tasdiqlovchi hujjat;
2. Malaka shahodatnomasi Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi (bundan buyon matnda Qoʻmita deb yuritiladi) tomonidan bepul beriladi.
Keyingi tahrirga qarang.
3. Kadastr munosabatlari sohasida kasbiy qayta tayyorgarlik dasturi boʻyicha tayyorlash Qoʻmita huzuridagi Davlat kadastrlari, geodeziya va kartografiya milliy markazi (bundan buyon matnda Markaz deb yuritiladi) tomonidan amalga oshiriladi.
Keyingi tahrirga qarang.
4. Geodeziya va yer kadastri boʻyicha oliy maʼlumotga ega yoki kadastr munosabatlari sohasida kasbiy qayta tayyorgarlik dasturi boʻyicha taʼlim olgan talabgorlar malaka imtihonini topshirishga qoʻyiladilar.
Bunda, talabgor geodeziya va yer kadastri boʻyicha oliy maʼlumotga egaligidan yoki kadastr munosabatlari sohasida kasbiy qayta tayyorgarlik dasturi boʻyicha taʼlim olganligidan qati nazar, geodeziya va yer kadastri boʻyicha kamida bir yil ish stajiga ega boʻlishi lozim.
5. Kadastr muhandisi Toshkent viloyati va Toshkent shahri hududida faoliyat yuritadi. Bunda, kadastr muhandisi oʻz faoliyatini amalga oshirish uchun rieltorlik tashkiloti bilan mehnat shartnomasi tuzadi.
6. Kadastr muhandisi Toshkent viloyati va Toshkent shahri hududida shartnoma asosida quyidagi kadastr xizmatlarini koʻrsatadi:
koʻchmas mulk obyektlarini xatlovdan oʻtkazish (birlamchi kadastr hisobi bundan mustasno);
koʻchmas mulk obyektlarining qavatma-qavat rejalarini tuzish;
koʻchmas mulk obyektlari texnik rejalarini rasmiylashtirish;
koʻchmas mulk obyektlarini texnik hisobga qoʻyish.

2-bob. Malaka imtihonini topshirish tartibi

7. Malaka imtihonini oʻtkazish uchun Qoʻmita raisining qarori bilan besh kishidan kam boʻlmagan tarkibda Malaka imtihoni komissiyasi tashkil qilinadi.
Qoʻmita raisi Malaka imtihoni komissiyasi raisi hisoblanadi.
Malaka imtihoni komissiyasi tarkibi Qoʻmitaning masʼul xodimlari va Markazning masʼul vakillari orasidan shakllantiriladi.
Keyingi tahrirga qarang.
8. Malaka imtihoni komissiyasi tarkibi har bir malaka imtihoni uchun alohida tuziladi va doimiy hisoblanmaydi.
9. Malaka imtihoni komissiyasi qarorlari bayonnoma bilan rasmiylashtiriladi va komissiya raisi tomonidan tasdiqlanadi hamda komissiyaning barcha aʼzolari tomonidan imzolanadi.
10. Talabgor malaka imtihonini topshirish uchun Qoʻmitaga quyidagi hujjatlarni taqdim etadi:
a) mazkur Nizomning 1-ilovasiga muvofiq shakldagi ariza;
b) talabgorning pasport nusxasi;
v) oliy maʼlumot toʻgʻrisidagi diplom nusxasi yoki xorijiy davlatda oliy taʼlim olganlik toʻgʻrisidagi hujjatni tan olish haqidagi guvohnoma nusxasi yoxud kadastr munosabatlari sohasida kasbiy qayta tayyorgarlik dasturi boʻyicha taʼlim olganligini tasdiqlovchi hujjat nusxasi);
g) mehnat daftarchasi (mehnat stajini tasdiqlovchi “Elektron mehnat daftarchasi tizimi”dan koʻchirma) (oʻrindoshlik boʻyicha mehnat staji mavjud boʻlgan taqdirda bu haqda mehnat daftarchasiga yozuv kiritilgan boʻlishi lozim);
d) 3,5 x 4,5 sm oʻlchamli toʻrt dona rangli fotosurat.
Talabgordan mazkur bandda nazarda tutilmagan hujjatlarni talab qilishga yoʻl qoʻyilmaydi.
Keyingi tahrirga qarang.
11. Talabgor taqdim etgan hujjatlar toʻliq va ulardagi maʼlumotlar toʻgʻri boʻlishi zarur.
12. Mazkur Nizomning 10-bandida koʻrsatilgan hujjatlar talabgor tomonidan Qoʻmitaga shaxsan, pochta yoki elektron aloqa vositalari orqali topshiriladi.
Keyingi tahrirga qarang.
13. Qoʻmita ariza tushgan kundan boshlab uch ish kuni ichida talabgorga malaka imtihonini topshirishga ruxsat berish yoki rad etish haqida qaror qabul qiladi.
Keyingi tahrirga qarang.
14. Qoʻmita quyidagi asoslarga koʻra malaka imtihonini topshirishga ruxsat berishni rad etadi:
talabgor mazkur Nizomning 4-bandi talablariga javob bermaganda;
talabgor taqdim qilgan hujjatlar toʻliq boʻlmaganda yoki bila turib notoʻgʻri maʼlumotlar taqdim qilgani aniqlanganda;
talabgor mazkur Nizomning 10-bandida nazarda tutilgan hujjatlarni taqdim etishdan bosh tortganda.
Boshqa asoslarga koʻra malaka imtihonini topshirishni rad etishga yoʻl qoʻyilmaydi.
Keyingi tahrirga qarang.
15. Talabgorning malaka imtihonini topshirishi rad etilgan taqdirda Qoʻmita tomonidan tegishli qaror qabul qilinadi va talabgor rad etish sabablari koʻrsatilgan holda, qabul qilingan qaror haqida uch ish kuni ichida yozma yoki elektron shaklda xabardor qilinadi.
Keyingi tahrirga qarang.
16. Malaka imtihonini topshirishga ruxsat berish rad etilgan talabgor rad etishga sabab boʻlgan kamchiliklarni bartaraf etgandan keyingina qayta ariza berishi mumkin.
17. Talabgorning malaka imtihonini topshirishiga ruxsat berish haqida qaror qabul qilinganida talabgor malaka imtihonini topshirishga ruxsat berilgan shaxslar roʻyxatiga kiritiladi va roʻyxat malaka imtihoni boshlanishidan oldin Malaka imtihoni komissiyasiga topshiriladi.
18. Malaka imtihoniga qoʻyilgan talabgor malaka imtihonini oʻtkazish sanasi, vaqti va joyi haqida imtihon oʻtkaziladigan kundan kamida oʻn kun oldin mobil telefoni (mavjud boʻlganda), pochta yoki elektron aloqa vositasi orqali xabardor qilinadi.
19. Malaka imtihoniga qoʻyilgan talabgorlar roʻyxati hamda malaka imtihonini oʻtkazish toʻgʻrisidagi maʼlumot uni oʻtkazish haqidagi qaror qabul qilingan kundan boshlab ikki kundan kechiktirmay Qoʻmita va Markazning rasmiy veb-saytiga joylashtiriladi.
Keyingi tahrirga qarang.
20. Malaka imtihoni guruhlar shakllanishiga qarab, lekin ikki oyda kamida bir marotaba oʻtkazilishi lozim.
21. Malaka imtihoni komissiyasi tarkibi, ish reglamenti, shuningdek test savollari Qoʻmita raisi tomonidan tasdiqlanadi.
Keyingi tahrirga qarang.
22. Malaka imtihonini topshirishda talabgorlar pasport yoki shaxsini tasdiqlovchi boshqa hujjatni taqdim etadi.
Keyingi tahrirga qarang.
23. Talabgor pasporti yoki shaxsini tasdiqlovchi boshqa hujjatni taqdim qilmaganda yoxud malaka imtihoniga kechikkan taqdirda imtihonga qoʻyilmaydi va malaka imtihoniga kelmagan hisoblanadi.
Keyingi tahrirga qarang.
24. Malaka imtihoniga kechikkan talabgor navbatdagi malaka imtihonidagi talabgorlar roʻyxatiga kiritiladi va bu haqda mobil telefoni, pochta yoki elektron aloqa vositasi orqali uch ish kunidan kechiktirmay xabardor qilinadi.
25. Agarda talabgor tegishli tarzda xabardor qilinganidan keyin ikki marotaba malaka imtihonini topshirish uchun kelmasa, taqdim etilgan hujjatlar talabgorga qaytariladi. Bunday hollarda, talabgor malaka imtihonidan oʻtish uchun qaytadan ariza bilan murojaat qilishi lozim.
26. Malaka imtihoni test sinovi usulida, kompyuter texnikasidan foydalangan holda, talabgorning tanloviga koʻra oʻzbek yoki rus tilida oʻtkaziladi.
27. Malaka imtihonining shaffofligi va xolisligini taʼminlash maqsadida uni oʻtkazish jarayoni uzluksiz ravishda ovozli videoyozuvga tushiriladi.
28. Test savollari va ularning javoblari Oʻzbekiston Respublikasi Davlat aktivlarini boshqarish agentligining takliflarini hisobga olgan holda kadastr munosabatlari sohasida kasbiy qayta tayyorgarlik dasturi asosida Markaz tomonidan ishlab chiqiladi.
Keyingi tahrirga qarang.
29. Test savollarini tayyorlash jarayonida foydalanilgan mavzular Qoʻmita va Markaz rasmiy veb-saytiga joylashtiriladi.
Keyingi tahrirga qarang.
Test savollari qonun hujjatlariga kiritilgan oʻzgartirish va qoʻshimchalarni hisobga olgan holda yangilab boriladi.
Keyingi tahrirga qarang.
30. Test sinovi geodeziya va yer kadastri yoʻnalishi boʻyicha 75 ta savoldan iborat boʻladi.
Talabgorga malaka imtihonini topshirish uchun bir soat vaqt taqdim etiladi.
31. Test sinovlari oʻtkaziladigan xonaga jadval, kitob, uyali telefon, kompyuter, kalkulyator, telekommunikatsiya vositalari va shpargalkalar olib kirish, boshqa talabgorlar bilan suhbatlashish taqiqlanadi.
Ushbu talablarni buzgan talabgorlar test sinovlari oʻtkaziladigan xonadan chiqarib yuboriladi va malaka imtihonidan oʻtmagan hisoblanadi.
32. Malaka imtihoni oʻtkazilgan kundan boshlab uch kun ichida Malaka imtihoni komissiyasining test sinovi natijalari qayd etilgan bayonnomasi rasmiylashtiriladi va komissiya raisi tomonidan tasdiqlanadi.
33. Malaka imtihoni natijalari hamda Malaka imtihoni komissiyasining bayonnomasi Markazning masʼul xodimida saqlanishi lozim.
Keyingi tahrirga qarang.
34. Malaka imtihoni natijalari Malaka imtihoni komissiyasining bayonnomasi rasmiylashtirilgan kunning oʻzida eʼlon qilinadi.
35. Talabgorning toʻgʻri javoblar boʻyicha yakuniy natijasi 70 foiz va undan yuqori koʻrsatkichni tashkil qilgan boʻlsa, u malaka imtihonini muvaffaqiyatli topshirgan hisoblanadi.
36. Toʻgʻri javoblar boʻyicha yakuniy natijasi 70 foizdan past boʻlgan talabgor malaka imtihonidan oʻtmagan hisoblanadi.
37. Malaka imtihonidan oʻtmagan talabgorlar uni navbatdagi malaka imtihonida takroran topshirish huquqiga ega, biroq shu kunning oʻzida qayta topshirishga yoʻl qoʻyilmaydi.
38. Malaka imtihonini muvaffaqiyatli topshirgan talabgorlarga malaka shahodatnomasi beriladi.
3-bob. Apellatsiyani koʻrib chiqish tartibi
39. Malaka imtihonidan oʻtmagan talabgor imtihon oʻtkazilgan kundan boshlab oʻn kun ichida Qoʻmitaga apellatsiya berish huquqiga ega. Apellatsiya yozma yoki elektron aloqa vositalari orqali taqdim etilishi lozim.
Keyingi tahrirga qarang.
40. Qoʻmita bir haftalik muddatda apellatsiyani koʻrib chiqadi va talabgorga qabul qilingan qaror haqida u qabul qilingan kunda yozma ravishda xabar beradi.
Keyingi tahrirga qarang.
41. Apellatsiyani koʻrib chiqish natijalari boʻyicha Qoʻmita tomonidan quyidagi qarorlardan biri qabul qilinadi:
Keyingi tahrirga qarang.
apellatsiyani qanoatlantirish va talabgorni malaka imtihonini muvaffaqiyatli topshirgan deb hisoblash toʻgʻrisida;
malaka imtihoni natijalarini oʻzgarishsiz qoldirish va apellatsiyani qanoatlantirishni rad etish toʻgʻrisida.
42. Malaka imtihoni natijalarini oʻzgarishsiz qoldirish va apellatsiyani qanoatlantirishni rad etish toʻgʻrisidagi qaror apellatsiyada koʻrsatilgan asoslar oʻz tasdigʻini topmagan hollarda qabul qilinadi.
43. Qoʻmitaning qaroridan norozi boʻlgan talabgorlar qonun hujjatlarida belgilangan tartibda sudga murojaat qilishlari mumkin.
Keyingi tahrirga qarang.
4-bob. Malaka shahodatnomasini rasmiylashtirish va berish
44. Malaka shahodatnomasi talabgorning fotosurati yopishtirilgan maxsus blankada mazkur Nizomning 2-ilovasiga muvofiq shaklda rasmiylashtiriladi va Toshkent shahar va Toshkent viloyatining barcha hududlarida amal qiladi.
45. Malaka shahodatnomasining blankalari qatʼiy hisobda turadigan hujjatlar hisoblanadi va Qoʻmita buyurtmasiga asosan “Davlat belgisi” davlat ishlab chiqarish birlashmasida tayyorlanadi.
Keyingi tahrirga qarang.
46. Malaka shahodatnomasi Qoʻmita tomonidan Malaka imtihoni komissiyasining bayonnomasi olinganidan boshlab besh kun ichida rasmiylashtiriladi va Kadastr muhandislari reyestriga imzo qoʻyilgan holda talabgorga beriladi.
Keyingi tahrirga qarang.
47. Agar talabgor malaka shahodatnomasini u rasmiylashtirilgan kundan boshlab uch oy ichida olishga kelmasa yoki uni olishdan yozma ravishda bosh tortsa, Qoʻmita mazkur shahodatnomani bekor qilish toʻgʻrisida qaror qabul qilishga haqli.
Keyingi tahrirga qarang.
5-bob. Malaka shahodatnomasini qayta rasmiylashtirish va dublikatini berish
Keyingi tahrirga qarang.
48. Kadastr muhandisining familiyasi yoki ismi yohud otasining ismi oʻzgargan taqdirda, u tegishli oʻzgartirishlarni tasdiqlovchi hujjatlar berilgan sanadan boshlab bir oy ichida Qoʻmitaga mazkur Nizomning 1-ilovasiga muvofiq shaklda ariza bilan murojaat qiladi.
Keyingi tahrirga qarang.
Bunda, arizaga qayta rasmiylashtirilishi lozim boʻlgan malaka shahodatnomasining asl nusxasi bilan birga tegishli oʻzgarishlarni tasdiqlovchi hujjatlarning nusxalari ilova qilinadi.
49. Malaka shahodatnomasining qayta rasmiylashtirilishi kadastr muhandisi tomonidan ariza berilgan paytdan boshlab besh kun ichida amalga oshiriladi.
50. Yangi blankada qayta rasmiylashtirilayotgan malaka shahodatnomasining raqami qayd qilinadi. Ilgari berilgan malaka shahodatnomasi blankasi Qoʻmitada qoldiriladi va qonun hujjatlarida belgilangan tartibda yoʻq qilinadi.
Keyingi tahrirga qarang.
51. Kadastr muhandisining arizasiga koʻra, yoʻqotilgan yoki yaroqsiz holga keltirilgan malaka shahodatnomasi oʻrniga Qoʻmita tomonidan uning dublikati beriladi.
Keyingi tahrirga qarang.
52. Malaka shahodatnomasi dublikatida uning avvalgi qayd etilgan raqami yoziladi va yangi blankaning yuqoridagi oʻng burchagiga “Dublikat” yozuvi koʻrsatilgan boʻlishi kerak.
Keyingi tahrirga qarang.
53. Yaroqsiz holga kelgan malaka shahodatnomasi Qoʻmitaga qaytariladi va qonun hujjatlarida belgilangan tartibda yoʻq qilinadi.
Keyingi tahrirga qarang.
6-bob. Malaka shahodatnomasi amal qilishini tugatish va uni bekor qilish
54. Malaka shahodatnomasining amal qilishini tugatish va uni bekor qilish Qoʻmitaning tegishli qaroriga asosan amalga oshiriladi.
Keyingi tahrirga qarang.
55. Quyidagilar malaka shahodatnomasi amal qilishini tugatish uchun asos boʻladi:
kadastr muhandisining arizasi;
kadastr muhandisi faoliyatini amalga oshirishda qonun hujjatlari va mazkur Nizom talablarini qastdan buzish;
Keyingi tahrirga qarang.
koʻchmas mulk obyektlarini xatlovdan oʻtkazish (birlamchi kadastr hujjatlari bundan mustasno), ularning qavatma-qavat rejalarini tuzish, texnik rejalarni rasmiylashtirish, shuningdek ularni texnik hisobga qoʻyish ishlarini amalga oshirishda qastdan notoʻgʻri xulosa (maʼlumot) berish;
fuqaroni belgilangan tartibda muomalaga layoqatsiz yoki muomalaga layoqati cheklangan deb eʼtirof etish toʻgʻrisidagi sud qarori.
56. Malaka shahodatnomasining amal qilishi uni tugatish toʻgʻrisidagi qaror qabul qilingan sanadan boshlab tugatiladi.
57. Malaka shahodatnomasi quyidagi hollarda bekor qilinadi:
Qoʻmitaning malaka shahodatnomasini berish toʻgʻrisidagi qarori noqonuniy ekanligi aniqlanganda;
Keyingi tahrirga qarang.
malaka shahodatnomasi soxta hujjatlardan foydalangan holda olinganligi fakti aniqlanganda.
58. Malaka shahodatnomasini bekor qilish toʻgʻrisidagi qaror malaka shahodatnomasi berilgan sanadan boshlab amal qiladi.
59. Qonun hujjatlari talablarini buzgani uchun malaka shahodatnomasi bekor qilingan yoki malaka shahodatnomasining amal qilishi tugatilgan kadastr muhandisiga, u bekor qilingan yoki amal qilishi tugatilgan sanadan boshlab bir yil mobaynida takroran malaka shahodatnomasi berilmaydi.
Keyingi tahrirga qarang.
60. Malaka shahodatnomasi amal qilishini tugatish yoki malaka shahodatnomasini bekor qilish toʻgʻrisidagi qaror Qoʻmitaning rasmiy veb-saytida eʼlon qilinadi.
Keyingi tahrirga qarang.
61. Malaka shahodatnomasi amal qilishini tugatish yoki malaka shahodatnomasini bekor qilish toʻgʻrisidagi qaror qabul qilingan kunning oʻzida tegishli kadastr muhandisi va rieltorlik tashkilotiga uning nusxasi yuboriladi.
62. Kadastr muhandisi malaka shahodatnomasini bekor qilish yoki uning amal qilishini tugatish toʻgʻrisidagi qarorni olgan kundan boshlab oʻn kun ichida oʻzining shahodatnomasini qonun hujjatlarida belgilangan tartibda yoʻq qilish uchun Qoʻmitaga qaytarishi lozim.
Keyingi tahrirga qarang.
63. Malaka shahodatnomasini bekor qilish yoki uning amal qilishini tugatish toʻgʻrisidagi qaror ustidan qonun hujjatlarida belgilangan tartibda sudga shikoyat qilinishi mumkin.
Keyingi tahrirga qarang.
7-bob. Kadastr muhandislari reyestri
64. Qoʻmita tomonidan Kadastr muhandislari reyestri yuritiladi va unda kadastr muhandislarining quyidagi maʼlumotlari qayd etiladi:
Keyingi tahrirga qarang.
kadastr muhandisining familiyasi, ismi, otasining ismi;
malaka shahodatnomasi raqami, berilgan sana;
malaka shahodatnomasi olingan sana;
malaka imtihonida qayd etilgan natija;
malaka shahodatnomasini bekor qilish yoki amal qilishini tugatish, qayta rasmiylashtirish va dublikatini berish haqidagi maʼlumotlar.
Keyingi tahrirga qarang.
65. Kadastr muhandislari reyestri elektron shaklda yuritiladi.
Kadastr muhandislari reyestrining shakli Qoʻmita raisi tomonidan tasdiqlanadi.
Keyingi tahrirga qarang.
66. Kadastr muhandislari reyestriga kiritilgan maʼlumotlardan ochiq foydalanilishi mumkin.
Kadastr muhandislari reyestri Qoʻmitaning rasmiy veb-saytiga joylashtiriladi.
Keyingi tahrirga qarang.
8-bob. Yakuniy qoidalar
67. Mazkur Nizomni bajarish jarayonida kelib chiqadigan nizolar qonun hujjatlariga muvofiq hal etiladi.
Keyingi tahrirga qarang.
68. Mazkur Nizom talablari buzilishida aybdor boʻlgan shaxslar qonun hujjatlarida belgilangan tartibda javobgar boʻladi.
Keyingi tahrirga qarang.
69. Ushbu Nizom Oʻzbekiston Respublikasi Davlat aktivlarini boshqarish agentligi va Savdo-sanoat palatasi bilan kelishilgan.

Davlat aktivlarini boshqarish agentligi direktori S.Bekenov

2019-yil 13-dekabr,
Savdo-sanoat palatasi raisi A. Ikramov
2019-yil 16-dekabr,

Koʻchmas mulk boʻyicha kadastr muhandisining malaka shahodatnomasini berish tartibi toʻgʻrisidagi nizomga

1-ILOVA

Oʻzbekiston Respublikasi Yer resurslari, geodeziya, kartografiya va davlat
kadastri davlat qoʻmitasi huzuridagi Davlat kadastrlari, geodeziya

va kartografiya milliy markaziga

______________________________________________________________________________________
(yashash manzili)

___________________________________________________________________________da yashovchi

_________________________________________________________________________________ dan
(ariza beruvchi F.I.O)

_____________________________________________________________________________________
(aloqa telefoni)

_____________________________________________________________________________________
(elektron manzili)

ARIZA

Menga koʻchmas mulk boʻyicha kadastr muhandisi malaka shahodatnomasini olish uchun malaka imtihonini topshirishga/dublikatini berishga/qayta rasmiylashtirishga* ruxsat berishingizni soʻrayman.

Arizaga quyidagilar ilova qilinadi:

1. _________________________________________________________
2. _________________________________________________________
3. _________________________________________________________
4. _________________________________________________________
5. _________________________________________________________

__

20___ yil “____” __________

Shaxsiy imzo __________________
*Izoh: arizaning turidan kelib chiqib kerakli soʻzlarning tagiga chizing.
Keyingi tahrirga qarang.

Koʻchmas mulk boʻyicha kadastr muhandisining malaka shahodatnomasini berish tartibi toʻgʻrisidagi nizomga

2-ILOVA


N A M U N A


Oʻzbekiston Respublikasining
Davlat gerbi tasviri

Oʻzbekiston Respublikasi Yer resurslari, geodeziya, kartografiya
va davlat kadastri davlat qoʻmitasi

KADASTR MUHANDISINING MALAKA ShAHODATNOMASI

____________-son


Rasm
uchun joy


20__yil “___” ___________

____Koʻchmas mulk boʻyicha kadastr muhandisi malaka shahodatnomasi Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi tomonidan

__________________________________________________________________________________________ ga
(kadastr muhandisi malaka shahodatnomasini olgan shaxsning F.I.O.)

____________________________________________________________________________________________
(jismoniy shaxsning shaxsiy identifikatsiya raqami)

____ Malaka imtihon komissiyasining 20__ yil “__”_______dagi qaroriga asosan kadastr muhandisi malaka shahodatnomasi berildi.

_________________________________________ _____________________M.Oʻ.
_GʻGʻGʻ(vakolatli shaxsning F.I.O.)_GʻGʻGʻGʻGʻGʻGʻGʻ_____ (imzo)

Keyingi tahrirga qarang.
(Qonun hujjatlari maʼlumotlari milliy bazasi, 17.01.2020-y., 10/20/3211/0065-son; Qonunchilik maʼlumotlari milliy bazasi, 28.07.2021-y., 10/21/3313/0724-son; 09.09.2022-y., 10/22/3211-1/0811-son)