1.09.00.00.00 Tadbirkorlik va xoʻjalik faoliyati / 09.08.00.00 Asillik darajasi ishlari. Qimmatbaho metallar va toshlar]
[TSZ:
1.Iqtisodiyot / Sanoat]
Oʻzbekiston Respublikasi Vazirlar Mahkamasining
qarori
Zargarlik buyumlarini ishlab chiqarish, import qilish va ularning realizatsiyasi monitoringini amalga oshirish tartibi toʻgʻrisidagi nizomni tasdiqlash haqida
Oʻzbekiston Respublikasi Prezidentining “Oʻzbekiston Respublikasida zargarlik tarmogʻini jadal rivojlantirish chora-tadbirlari toʻgʻrisida” 2019-yil 18-maydagi PF-5721-son Farmoni ijrosini taʼminlash hamda respublikada zargarlik buyumlarini ishlab chiqarish va ularning realizatsiyasini tartibga solish maqsadida Vazirlar Mahkamasi qaror qiladi:
1. Zargarlik buyumlarini ishlab chiqarish, import qilish va ularning realizatsiyasi monitoringini amalga oshirish tartibi toʻgʻrisidagi nizom ilovaga muvofiq tasdiqlansin.
2. Oʻzbekiston Respublikasi Davlat soliq qoʻmitasi boshqa manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorov va Oʻzbekiston Respublikasi Davlat soliq qoʻmitasi raisi B.A. Musayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2019-yil 2-oktabr,
834-son
Vazirlar Mahkamasining 2019-yil 2-oktabrdagi 834-son qaroriga ILOVA
Zargarlik buyumlarini ishlab chiqarish, import qilish va ularning realizatsiyasi monitoringini amalga oshirish tartibi toʻgʻrisida
NIZOM
1-bob. Umumiy qoidalar
1. Ushbu Nizom zargarlik buyumlarini ishlab chiqarish, import qilish va ularning realizatsiyasi monitoringini amalga oshirish (keyingi oʻrinlarda monitoring qilish deb ataladi) tartibini belgilaydi.
2. Zargarlik buyumlarini ishlab chiqarish, import qilish va ularning realizatsiyasi monitoringi ushbu Nizomga ilovadagi sxemaga muvofiq amalga oshiriladi.
2-bob. Zargarlik buyumlarini ishlab chiqarish, import qilish va ularning realizatsiyasi boʻyicha maʼlumotlarni shakllantirish tartibi
3. Quyidagilar idoralararo axborot almashinuvi vositasi orqali:
a) Oʻzbekiston Respublikasi Markaziy banki qimmatbaho metallar sotib olgan tadbirkorlik subyektlari toʻgʻrisida;
b) Oʻzbekiston Respublikasi Moliya vazirligi huzuridagi Davlat asillik darajasini belgilash palatasi:
qimmatbaho metallar va qimmatbaho toshlardan zargarlik buyumlari ishlab chiqarishga litsenziya;
qimmatbaho metallar va qimmatbaho toshlar bilan ishlashga roʻyxatdan oʻtkazish guvohnomasini olgan tadbirkorlik subyektlari toʻgʻrisida;
v) Oʻzbekiston Respublikasi Davlat bojxona qoʻmitasi respublika hududiga olib kirilgan va “erkin muomalaga chiqarish (import)” bojxona rejimiga rasmiylashtirilgan zargarlik buyumlari (TIF TN pozitsiyasi 7113-7116), qimmatbaho metall va toshlar (TIF TN pozitsiyasi 7101-7112) toʻgʻrisida;
d) “Navoiy kon-metallurgiya kombinati” davlat korxonasi va “Olmaliq kon-metallurgiya kombinati” aksiyadorlik jamiyati qimmatbaho metallar sotib olgan tadbirkorlik subyektlari toʻgʻrisidagi maʼlumotlarni real vaqt rejimida Oʻzbekiston Respublikasi Davlat soliq qoʻmitasiga taqdim etib boradi.
4. Kelib tushgan hamda mavjud boshqa axborotlar asosida Davlat soliq qoʻmitasida zargarlik buyumlarini ishlab chiqarish, import va realizatsiya qilish faoliyati bilan shugʻullanadigan tadbirkorlik subyektlari toʻgʻrisida maʼlumotlar bazasi shakllantiriladi.
5. Davlat soliq qoʻmitasi tomonidan ushbu Nizomning 3-bandiga muvofiq shakllantirilgan maʼlumotlar tadbirkorlik subyektlarining davlat soliq xizmati organlariga topshirgan hisobotlari, shuningdek, qonun hujjatlariga muvofiq soliq toʻlovchilarning majburiyatlari paydo boʻlishi (tugatilishi) toʻgʻrisida maʼlumot taqdim etadigan tashkilotlardan olingan maʼlumotlar bilan solishtirish orqali kameral nazoratdan oʻtkaziladi.
tadbirkorlik subyektlari tomonidan davlat soliq xizmati organlariga taqdim etilgan soliq hisobotlarida realizatsiya qilingan mahsulotlar miqdori toʻgʻri koʻrsatilganligi;
b) zargarlik buyumlari importi amalga oshirilganda:
qimmatbaho metallar va qimmatbaho toshlar bilan ishlarni amalga oshirish va (yoki) zargarlik buyumlari va qimmatbaho metallar va qimmatbaho toshlardan yasalgan boshqa buyumlar bilan savdo qilish uchun guvohnomaning mavjudligi;
import qilingan zargarlik buyumlarining miqdori realizatsiya miqdoriga muvofiqligi;
zargarlik buyumlarining import va realizatsiya miqdorlarini tadbirkorlik subyektlari tomonidan davlat soliq xizmati organlariga taqdim etilgan soliq hisobotlaridagi koʻrsatkichlarga muvofiqligi;
v) zargarlik buyumlarini realizatsiya qilish boʻyicha:
zargarlik buyumlari va qimmatbaho metallar va qimmatbaho toshlardan yasalgan boshqa buyumlar bilan savdo qilish guvohnomasining mavjudligi;
sotib olingan va realizatsiya qilingan mahsulotlar summasining oʻzaro muvofiqligi;
hisobot davrida mahsulot realizatsiyasidan tushumlar miqdorining davlat soliq xizmati organlariga taqdim etilgan soliq hisobotlaridagi koʻrsatkichlarga muvofiqligi.
Qonun hujjatlariga muvofiq olingan maʼlumotlar asosida davlat soliq xizmati organlari vakolatlariga taalluqli boshqa masalalar ham tahlil qilinishi mumkin.
4-bob. Monitoring natijasi boʻyicha koʻriladigan choralar
6. Ushbu Nizomning 5-bandiga muvofiq oʻtkazilgan kameral nazorat natijasiga koʻra tafovutlar mavjudligi aniqlansa, soliq toʻlovchiga uning hisobotlariga tegishli tuzatishlar kiritish hamda kamchiliklarni bartaraf etish yuzasidan belgilangan tartibda talabnoma yuboriladi.
7. Kameral nazorat natijalari boʻyicha soliq toʻlovchi tomonidan taqdim etilgan axborotning ishonchliligini tasdiqlash lozim deb topilgan hollarda, belgilangan tartibda mavzuli ekspress-oʻrganish amalga oshiriladi.
8. Kameral nazorat va (yoki) mavzuli ekspress-oʻrganish, shuningdek, oʻtkazilgan tekshirishlar natijasiga koʻra tadbirkorlik subyektlari tomonidan asillik darajasini belgilash yoki tamgʻalashning belgilangan tartibini buzish, shuningdek, kirim qilinmagan zargarlik buyumlarini sotish holatlari aniqlangan taqdirda, qonun hujjatlarida belgilangan tartibda soliqlar va boshqa toʻlovlarni hisoblash va belgilangan tartibda javobgarlikka tortish choralari koʻriladi.
Tadbirkorlik subyektlarining faoliyatida jinoyat alomatlari mavjud deb topilgan hollarda, materiallar qonun hujjatlarida belgilangan tartibda huquqni muhofaza qiluvchi organlarga yuboriladi.
9. Zargarlik buyumlarini ishlab chiqarish, import qilish va ularning realizatsiyasi bilan shugʻullanadigan tadbirkorlik subyektlari faoliyatida Davlat soliq xizmati organlari tomonidan oʻtkaziladigan soliq nazorati tadbirlariga belgilangan tartibda mutaxassislar (ekspertlar) jalb etilishi mumkin.
5-bob. Yakunlovchi qoida
10. Mazkur Nizom talablarining buzilishida aybdor boʻlgan shaxslar qonun hujjatlarida belgilangan tartibda javob beradilar.
Oʻzbekiston Respublikasi Moliya vazirligi huzuridagi Davlat asillik darajasini belgilash palatasi
Qimmatbaho metallar va qimmatbaho toshlardan zargarlik buyumlari ishlab chiqarishga litsenziya, qimmatbaho metallar va qimmatbaho toshlar bilan ishlashga roʻyxatdan oʻtkazish guvohnomasini olgan tadbirkorlik subyektlari toʻgʻrisidagi maʼlumotlarni Oʻzbekiston Respublikasi Davlat soliq qoʻmitasiga taqdim etish.
Real vaqt rejimida
Oʻzbekiston Respublikasi Davlat bojxona qoʻmitasi
Respublika hududiga olib kirilgan va “erkin muomalaga chiqarish (import)” bojxona rejimiga rasmiylashtirilgan zargarlik buyumlari (TIF TN pozitsiyasi 7113-7116), qimmatbaho metall va toshlar (TIF TN pozitsiyasi 7101-7112) toʻgʻrisidagi maʼlumotlarni Oʻzbekiston Respublikasi Davlat soliq qoʻmitasiga taqdim etish.
Real vaqt rejimida
Oʻzbekiston Respublika tovar xom-ashyo birjasi
Birja savdolari orqali qimmatbaho metallarni sotib olgan tadbirkorlik subyektlari toʻgʻrisidagi maʼlumotlarni Oʻzbekiston Respublikasi Davlat soliq qoʻmitasiga taqdim etish.
Real vaqt rejimida
“Navoiy kon-metallurgiya kombinati” davlat korxonasi va “Olmaliq kon-metallurgiya kombinati” aksiyadorlik jamiyati
Qimmatbaho metallar sotib olgan tadbirkorlik subyektlari toʻgʻrisidagi maʼlumotlarni Oʻzbekiston Respublikasi Davlat soliq qoʻmitasiga taqdim etish.
Real vaqt rejimida
2-bosqich
Davlat soliq xizmati organlari
Zargarlik mahsulotlarini ishlab chiqarish, import qilish va ularni realizatsiya qilish faoliyati bilan shugʻullanadigan tadbirkorlik subyektlari toʻgʻrisida maʼlumotlar bazasini shakllantirish.
Dasturiy mahsulot orqali elektron shaklda
3-bosqich
Davlat soliq xizmati organlari
Shakllantirilgan maʼlumotlar asosida tadbirkorlik subyektlarining davlat soliq xizmati organlariga topshirgan hisobotlari, shuningdek, qonun hujjatlariga muvofiq soliq toʻlovchilarning majburiyatlari paydo boʻlishi (tugatilishi) toʻgʻrisida maʼlumot taqdim etadigan tashkilotlardan olingan maʼlumotlar bilan solishtirish orqali kameral nazoratdan oʻtkazish.
Har chorakda
4-bosqich
Davlat soliq xizmati organlari
Kameral nazorat natijalari boʻyicha soliq toʻlovchi tomonidan taqdim etilgan axborotning ishonchliligini tasdiqlash lozim deb topilgan hollarda, belgilangan tartibda mavzuli ekspress-oʻrganish amalga oshirish.
7 ish kuni
5-bosqich
Davlat soliq xizmati organlari
Kameral nazorat va (yoki) mavzuli ekspress-oʻrganish, shuningdek, oʻtkazilgan tekshirishlar natijasiga koʻra tadbirkorlik subyektlari tomonidan asillik darajasini belgilash yoki tamgʻalashning belgilangan tartibini buzish, shuningdek, kirim qilinmagan zargarlik buyumlarini sotish holatlari aniqlangan taqdirda, qonun hujjatlarida belgilangan tartibda soliqlar va boshqa toʻlovlarni hisoblash va oʻrnatilgan tartibda javobgarlikka tortish choralarini koʻrish.
Holatlar aniqlanganda
6-bosqich
Davlat soliq xizmati organlari
Kameral nazorat va (yoki) mavzuli ekspress-oʻrganish, shuningdek, oʻtkazilgan tekshirishlar natijasida tadbirkorlik subyektlari faoliyatida jinoyat alomatlari mavjud deb topilgan hollarda, materiallarni qonun hujjatlarida belgilangan tartibda huquqni muhofaza qiluvchi organlarga yuborish.
