Narxlarning erkinlashtirilishi munosabati bilan aholi jamgʻarmalarining oʻz qiymatini yoʻqotishdan muhofaza qilish va aholi pul mablagʻlarini qoʻshimcha ravishda jalb etish maqsadida Vazirlar Mahkamasi qaror qiladi:

1. Aholining Oʻzbekiston davlat-tijorat jamgʻarmalar banki muassasalarida saqlanayotgan omonatlari boʻyicha foiz stavkalari quyidagi miqdorlarda oshirilsin:

— yoʻqlab olinadigan omonatlar boʻyicha — 2 foizdan 3 foizgacha;

— saqlanish muddati belgilangan quyidagi muddatli omonatlar boʻyicha:

1 yildan 3 yilgacha — 5 foizdan 7 foizgacha;

3 yildan 5 yilgacha —7 foizdan 10 foizgacha;

5 yildan koʻp boʻlganda — 9 foizdan 15 foizgacha.

Shu bilan bir vaqtda:

yoshlar—mukofot omonatlariga — 5 foizdan 7 foizgacha;

maqsadli bolalar va toʻplanadigan omonatlarga — 9 foizdan 15 foizgacha oshirilsin.

2. Aholining omonatlari boʻyicha foiz stavkalarini oshirishning asosiy manbalari etib aholi omonatlarining Oʻzbekiston davlat banki va tijorat banklaridagi kredit resurslar sifatida joylashtirilishi hisobiga paydo boʻladigan jamgʻarmalar banki muassasalarining daromadlari hisoblansin.

3. Yangi foiz stavkalarini joriy etish Oʻzbekiston jamgʻarmalar banki muassasalarida saqlanayotgan omonatlarga 1992-yilning 1-yanvaridan boshlab amalga oshirilsin.