Oʻzbekiston Respublikasi Prezidentining 2017-yil 14-martdagi PQ-2829-son “Oʻrta maxsus, kasb-hunar taʼlimi muassasalari faoliyatini yanada takomillashtirish chora-tadbirlari toʻgʻrisida”gi qaroriga muvofiq, Oʻzbekiston Respublikasi Oliy va oʻrta maxsus taʼlim vazirligi, Xalq taʼlimi vazirligi hamda Mehnat vazirligi qaror qiladi:

1. Oʻzbekiston Respublikasi Oliy va oʻrta maxsus taʼlim vazirligi, Xalq taʼlimi vazirligi hamda Mehnat vazirligining 2016-yil 19-oktabrdagi 5-2016, 12-mh, 34-q/q-son qarori (roʻyxat raqami 2834, 2016-yil 24-oktabr) (Oʻzbekiston Respublikasi qonun hujjatlari toʻplami, 2016-y., 43-son, 508-modda) bilan tasdiqlangan Oʻquv mashgʻulotlarini oʻtkazganlik uchun mehnatga soatbay haq toʻlash miqdorlarining izohi quyidagi mazmundagi 3¹-band bilan toʻldirilsin:

“3¹. Akademik litseylarga oʻqituvchilik faoliyatiga mehnatga soatbay haq toʻlash shartlarida jalb etiladigan oliy taʼlim muassasalarining professor-oʻqituvchilar tarkibi mehnatiga soatbay haq toʻlashda oliy taʼlim muassasalari talabalari bilan oʻquv mashgʻulotlari olib boruvchi shaxslar uchun nazarda tutilgan mehnatga soatbay haq toʻlash miqdorlari qoʻllaniladi.”.

2. Mazkur qaror Oʻzbekiston Respublikasi Moliya vazirligi bilan kelishilgan.

3. Mazkur qaror rasmiy eʼlon qilingan kundan eʼtiboran kuchga kiradi.