|
Hujjat 31.10.2016 sanasi holatiga
Amaldagi versiyaga o‘tish |
Oʻzbekiston Respublikasi Vazirlar Mahkamasining
qarori
Davlat veterinariya xizmati tizimini yanada takomillashtirish chora-tadbirlari toʻgʻrisida
“Veterinariya toʻgʻrisida”gi Oʻzbekiston Respublikasi Qonuni hamda Oʻzbekiston Respublikasi Prezidentining “2016 — 2020-yillarda qishloq xoʻjaligini yanada isloh qilish va rivojlantirish chora-tadbirlari toʻgʻrisida” 2015-yil 29-dekabrdagi PQ–2460-son qarori ijrosini taʼminlash maqsadida Vazirlar Mahkamasi qaror qiladi:
1. Oʻzbekiston Respublikasi Qishloq va suv xoʻjaligi vazirligi, Iqtisodiyot vazirligi va Moliya vazirligining davlat veterinariya xizmati tizimi tashkilotlarining mavjud xodimlari sonini muvofiqlashtirish hisobiga Oʻzbekiston Respublikasi Qishloq va suv xoʻjaligi vazirligi huzuridagi Davlat veterinariya bosh boshqarmasining markaziy apparati tuzilmasini kengaytirish toʻgʻrisidagi taklifi maʼqullansin.
Keyingi tahrirga qarang.
2. Quyidagilar:
Oʻzbekiston Respublikasi Qishloq va suv xoʻjaligi vazirligi huzuridagi Davlat veterinariya bosh boshqarmasining tashkiliy va markaziy apparati tuzilmalari 1 va 2-ilovalarga muvofiq;
Keyingi tahrirga qarang.
Oʻzbekiston Respublikasi Qishloq va suv xoʻjaligi vazirligi huzuridagi Davlat veterinariya bosh boshqarmasi toʻgʻrisidagi nizom 3-ilovaga muvofiq;
Keyingi tahrirga qarang.
Hayvonlar va odamlarning sogʻligʻi uchun xavf tugʻdiradigan va bunda hayvonlar, kelib chiqishi hayvonotga mansub mahsulotlar va xomashyolar olib qoʻyiladigan hamda yoʻq qilib tashlanadigan hayvonlarning kasalliklari roʻyxati 4-ilovaga muvofiq;
Profilaktika, tashxis qoʻyish va tugatish tadbirlari Oʻzbekiston Respublikasi Davlat budjeti mablagʻlari hisobidan amalga oshiriladigan hayvonlarning oʻta xavfli yuqumli kasalliklari roʻyxati 5-ilovaga muvofiq tasdiqlansin.
3. Oʻzbekiston Respublikasi Qishloq va suv xoʻjaligi vaziriga zarur hollarda Davlat veterinariya bosh boshqarmasining markaziy apparati tuzilmasiga xodimlarning umumiy cheklangan soni doirasida belgilangan tartibda oʻzgartirishlar kiritish huquqi berilsin.
Keyingi tahrirga qarang.
4. Oʻzbekiston Respublikasi Qishloq va suv xoʻjaligi vazirligiga:
bir oy muddatda Oʻzbekiston Respublikasi Qishloq va suv xoʻjaligi vazirligi huzuridagi Davlat veterinariya bosh boshqarmasining 1-ilovaga muvofiq tashkiliy tuzilmasiga kiruvchi tashkilotlarning ustavi (nizomi) va tuzilmalari tasdiqlanishini hamda davlat roʻyxatidan oʻtkazilishini taʼminlasin;
Keyingi tahrirga qarang.
uch oy muddatda veterinariya faoliyati sohasiga oid ruxsat berish tartib-taomillaridan oʻtish tartibi toʻgʻrisidagi nizomlarni tasdiqlash uchun Vazirlar Mahkamasiga kiritsin.
5. Vazirlar Mahkamasining 1995-yil 20-apreldagi 119–F-son farmoyishi oʻz kuchini yoʻqotgan deb hisoblansin.
6. Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.
7. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.
Oʻzbekiston Respublikasining Bosh vaziri Sh. MIRZIYOYEV
Toshkent sh.,
2016-yil 25-oktabr,
361-son
Vazirlar Mahkamasining 2016-yil 25-oktabrdagi 361-son qaroriga
1-ILOVA
1-ILOVA
Oʻzbekiston Respublikasi Qishloq va suv xoʻjaligi vazirligi huzuridagi Davlat veterinariya bosh boshqarmasining
TAShKILIY TUZILMASI
Keyingi tahrirga qarang.
Vazirlar Mahkamasining 2016-yil 25-oktabrdagi 361-son qaroriga
2-ILOVA
2-ILOVA
Oʻzbekiston Respublikasi Qishloq va suv xoʻjaligi vazirligi huzuridagi Davlat veterinariya bosh boshqarmasi markaziy apparatining
TUZILMASI
Keyingi tahrirga qarang.
Vazirlar Mahkamasining 2016-yil 25-oktabrdagi 361-son qaroriga
3-ILOVA
3-ILOVA
Oʻzbekiston Respublikasi Qishloq va suv xoʻjaligi vazirligi huzuridagi Davlat veterinariya bosh boshqarmasi toʻgʻrisida
NIZOM
1-bob. Umumiy qoidalar
1. Ushbu Nizom Oʻzbekiston Respublikasi Qishloq va suv xoʻjaligi vazirligi huzuridagi Davlat veterinariya bosh boshqarmasining (keyingi oʻrinlarda Davlat veterinariya bosh boshqarmasi deb yuritiladi) vazifalari, funksiyalari, huquqlari va javobgarligi hamda uning faoliyatini tashkil etish tartibini belgilaydi.
2. Davlat veterinariya bosh boshqarmasi Oʻzbekiston Respublikasi Qishloq va suv xoʻjaligi vazirligiga, uning hududiy boshqarmalari Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga, tumanlar va shaharlar davlat veterinariya boʻlimlari tumanlar va shaharlar hokimliklariga hamda tegishli ravishda yuqori turuvchi davlat veterinariya organlariga boʻysunadi.
3. Davlat veterinariya bosh boshqarmasi tizimiga bosh boshqarmaning markaziy apparati, Epizootiyaga qarshi kurashish respublika ekspeditsiyasi, Hayvonlarning oqsil kasalligiga qarshi kurashish otryadi, Davlat chegarasidagi va transportdagi davlat veterinariya nazorati boshqarmasi, Respublika davlat veterinariya laboratoriyasi, Hayvonlarning oʻta xavfli kasalliklari davlat veterinariya laboratoriyasi, Parranda kasalliklari davlat veterinariya laboratoriyasi, Veterinariya dori vositalari va ozuqabop qoʻshimchalarning sifat nazorati davlat laboratoriyasi, Qoraqalpogʻiston Respublikasi, viloyatlar va Toshkent shahar davlat veterinariya boshqarmalari va laboratoriyalari hamda tumanlar va shaharlar davlat veterinariya boʻlimlari va laboratoriyalari kiradi (keyingi oʻrinlarda davlat veterinariya organlari va muassasalari deb yuritiladi).
4. Davlat veterinariya xizmati Davlat veterinariya bosh boshqarmasi, Qoraqalpogʻiston Respublikasi, viloyatlar va Toshkent shahar davlat veterinariya boshqarmalari, davlat chegarasidagi va transportdagi davlat veterinariya nazorati boshqarmasi, tumanlar va shaharlar davlat veterinariya boʻlimlari, ilmiy-tadqiqot institutlari, laboratoriyalar, tashxis qoʻyish markazlari, veterinariya shifoxonalari, hayvonlarning kasalligiga qarshi kurashish ekspeditsiyalari va otryadlari, veterinariya uchastkalari, bozorlardagi veterinariya-sanitariya ekspertiza laboratoriyalari va boshqa muassasalardan (keyingi oʻrinlarda davlat veterinariya xizmati deb yuritiladi) iborat.
5. Davlat veterinariya bosh boshqarmasi oʻz faoliyatida Oʻzbekiston Respublikasining Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, Oʻzbekiston Respublikasi Qishloq va suv xoʻjaligi vazirligining buyruqlariga, shuningdek mazkur Nizomga amal qiladi.
6. Davlat veterinariya bosh boshqarmasi, davlat veterinariya organlari hamda muassasalarini moddiy-texnik taʼminlash Oʻzbekiston Respublikasi Davlat budjeti mablagʻlari, pulli xizmatlar koʻrsatishdan tushgan mablagʻlar va qonun hujjatlarida taqiqlanmagan boshqa mablagʻlar hisobidan amalga oshiriladi.
Davlat veterinariya xizmati xodimlari mehnatiga haq toʻlash Oʻzbekiston Respublikasi Davlat budjeti mablagʻlari va budjetdan tashqari mablagʻlar hisobidan amalga oshiriladi.
7. Davlat veterinariya bosh boshqarmasi oʻz faoliyatini boshqa davlat organlari, mahalliy ijro etuvchi hokimiyat organlari hamda boshqa tashkilotlar bilan oʻzaro hamkorlikda amalga oshiradi.
8. Veterinariya, veterinariya-sanitariya qoidalari va normalarini buzganlik uchun undirilgan maʼmuriy jarima mablagʻlari Davlat veterinariya bosh boshqarmasining maxsus hisob raqamiga tushadi.
9. Davlat veterinariya bosh boshqarmasi, uning davlat veterinariya organlari hamda muassasalari yuridik shaxs hisoblanadi, oʻz mustaqil balansiga, banklarda milliy va chet el valyutasidagi hisob raqamlariga, Oʻzbekiston Respublikasining Davlat gerbi tasviri tushirilgan va oʻz nomi yozilgan muhrga hamda veterinariya ramziga egadir.
2-bob. Davlat veterinariya bosh boshqarmasining vazifalari va funksiyalari
10. Quyidagilar Davlat veterinariya bosh boshqarmasining asosiy vazifalari hisoblanadi:
veterinariya sohasini tartibga solish va rivojlantirishga oid tadbirlarni ishlab chiqish hamda amalga oshirish;
veterinariya sohasida kadrlarni tayyorlash va ularning malakasini oshirish;
respublikada veterinar osoyishtalikni taʼminlash va epizootik holat yuzasidan monitoringni amalga oshirish;
veterinariya sohasiga oid faoliyat yuzasidan davlat veterinariya nazoratini amalga oshirish;
veterinariya sohasida xalqaro hamkorlikni amalga oshirishda ishtirok etish va uni rivojlantirish.
11. Davlat veterinariya bosh boshqarmasi oʻziga yuklangan vazifalarni bajarish uchun quyidagi funksiyalarni amalga oshiradi:
a) veterinariya sohasini tartibga solish va rivojlantirishga oid tadbirlarni ishlab chiqish hamda amalga oshirish boʻyicha:
veterinariya toʻgʻrisidagi qonunlar hamda boshqa normativ-huquqiy hujjatlar loyihalarini ishlab chiqadi;
veterinariya, veterinariya-sanitariya qoidalari va normalarini ishlab chiqadi hamda tasdiqlaydi;
veterinariya faoliyatini amalga oshirish uchun litsenziya beradi;
davlat veterinariya xizmati nazorati ostidagi tovarlarni Oʻzbekiston Respublikasiga olib kirilishi va Oʻzbekiston Respublikasidan olib chiqilishiga, shuningdek Oʻzbekiston Respublikasi hududi orqali tranzitiga belgilangan tartibda ruxsatnoma beradi;
mahalliy va import qilinadigan veterinariya dori vositalari hamda ozuqabop qoʻshimchalarni roʻyxatdan oʻtkazishni va ularga roʻyxatdan oʻtkazilganlik guvohnomasi berishni amalga oshiradi;
veterinariya sohasidagi davlat dasturlarini ishlab chiqadi hamda ularning amalga oshirilishini taʼminlaydi;
davlat va xoʻjalik boshqaruvi organlari, mahalliy ijro etuvchi hokimiyat organlari va boshqa tashkilotlarda veterinariya sohasiga oid ishlarni muvofiqlashtiradi hamda ularni yaxshilashga doir tavsiyalar ishlab chiqadi;
davlat, idoraviy va ishlab chiqarishdagi veterinariya xizmatlariga, shuningdek xususiy veterinariya faoliyatiga uslubiy yordam koʻrsatadi;
veterinariya sohasidagi faoliyatni bevosita amalga oshiruvchi hamda tadbirlar va dasturlarni roʻyobga chiqarishda ishtirok etuvchi organlar va muassasalarning oʻzaro hamkorligini muvofiqlashtiradi;
davlat veterinariya organlari hamda muassasalariga tegishli boʻlgan asosiy vositalar (asbob-uskunalar, jihozlar, avtotransport vositalari, shu jumladan maxsus avtotransportlar) hisobini yuritadi;
davlat veterinariya organlari hamda muassasalariga tegishli boʻlgan avtotransport vositalaridan samarali foydalanish ishlarini tashkil etadi hamda ularni foydalanish muddati va texnik holatidan kelib chiqib belgilangan tartibda hisobdan chiqaradi;
davlat veterinariya xizmatining moddiy-texnika bazasini rivojlantirish boʻyicha takliflar tayyorlaydi;
sogʻliqni saqlash organlari, ichki ishlar organlarining karantin tadbirlarini taʼminlash boʻlinmalari va boshqa organlar bilan birgalikda hayvonlar va odamlar uchun xavfli boʻlgan yuqumli kasalliklar oʻchoqlarini tugatadi, shuningdek oʻzaro axborot almashinuvini amalga oshiradi;
veterinariya sohasidagi ilmiy tadqiqotlarni rivojlantirishga koʻmaklashadi;
b) veterinariya sohasida kadrlarni tayyorlash va ularning malakasini oshirish boʻyicha:
veterinariya sohasidagi kadrlarni tayyorlash va ularning malakasini oshirishni amalga oshiruvchi taʼlim yoʻnalishlarini akkreditatsiya qilishda, ularning pedagog va ilmiy xodimlarini attestatsiyadan oʻtkazishda ishtirok etadi;
oliy taʼlim muassasalarining veterinariya yoʻnalishidagi fakultetlariga dekan lavozimiga kadrlarni tanlashda ishtirok etadi;
zamonaviy talablar hamda davlat va jamiyat qurilishi sohasidagi demokratlashtirish jarayonlarini hisobga olgan holda veterinariya sohasida kadrlar malakasini oshirishni tashkil etadi;
kadrlar ishini yuritish, veterinariya mutaxassislarini tayyorlash va ularning malakasini oshirish tizimini takomillashtirish boʻyicha takliflar ishlab chiqadi;
davlat veterinariya organlari va muassasalarning rahbarlik lavozimlariga kadrlar zaxirasini shakllantiradi va ularni stajirovkadan oʻtkazish ishlarini tashkil etadi;
qonun hujjatlarida belgilangan tartibda davlat veterinariya organlari va muassasalarining rahbarlari va mutaxassislarining kasbiy tayyorgarligi va malakasi boʻyicha egallab turgan lavozimiga munosibligi yuzasidan ularni attestatsiyadan oʻtkazadi;
davlat veterinariya organlari va muassasalarining boshliqlari lavozimlariga nomzod kadrlar nomenklaturasini yuritadi;
v) respublikada veterinar osoyishtalikni taʼminlash va epizootik holat yuzasidan monitoringni amalga oshirish boʻyicha:
respublika hududida paydo boʻlish xavfi boʻlgan hayvonlar kasalliklarini tahlil qilish, ularni oldini olish va tugatishga doir dasturlarni ishlab chiqadi;
kelib chiqishi hayvonotga mansub mahsulot va xomashyolarni veterinariya, veterinariya-sanitariya ekspertizasidan oʻtkazish tartiblarini belgilaydi;
davlat veterinariya organlari hamda muassasalari tomonidan taqdim etiladigan hisobotlar shakllarini va muddatlarini belgilaydi;
odamlar va hayvonlar uchun umumiy boʻlgan kasalliklardan aholi sogʻligʻini muhofaza qilishda boshqa davlat organlari bilan hamkorlik qiladi;
chet el va chegaradosh davlatlardagi hamda respublika hududidagi epizootik holatdan kelib chiqib, epizootiyaga qarshi profilaktika tadbirlarini belgilaydi;
davlat va xoʻjalik boshqaruvi organlari bilan birgalikda epizootiyaga qarshi tadbirlarning bajarilishini taʼminlaydi;
ichki ishlar organlarining karantin tadbirlarini taʼminlash boʻlinmalari bilan birgalikda epizootik osoyishtalikni taʼminlashga doir tadbirlarni tashkil etadi;
kasalliklarning kelib chiqishi va hayvonlarning nobud boʻlishi sabablarini tahlil qiladi, ularning oldini olish boʻyicha tavsiyalar ishlab chiqadi;
hayvonlar yuqumli kasalliklarining oldini olish va ularni tugatishga doir chora-tadbirlarni amalga oshiradi;
chet el ilgʻor tajribalari va ilm-fan yutuqlarini oʻrganadi, maʼlumotlarni umumlashtiradi hamda davlat veterinariya xizmati tizimini yanada rivojlantirish chora-tadbirlarini ishlab chiqadi;
hayvonlar kasalliklariga tashxis qoʻyish ishlarida eng zamonaviy va tezkor usullarni joriy etish boʻyicha tegishli chora-tadbirlarni ishlab chiqadi va ularning bajarilishini taʼminlaydi;
belgilangan tartibda veterinariya dori vositalari va boshqa moddiy-texnika resurslarining zaxirasini yaratadi;
Oʻzbekiston Respublikasi Vazirlar Mahkamasi tomonidan tasdiqlangan roʻyxat boʻyicha hayvonlarning oʻta xavfli yuqumli kasalliklari boʻyicha profilaktika, tashxis qoʻyish va tugatish tadbirlarini amalga oshirish uchun zarur boʻlgan veterinariya dori vositalarini hamda moddiy-texnika vositalarini belgilangan tartibda xarid qiladi va markazlashtirilgan holda taqsimlaydi;
epizootik holat yuzasidan monitoring olib boradi;
g) veterinariya sohasiga oid faoliyat yuzasidan davlat veterinariya nazoratini amalga oshirish boʻyicha:
Oʻzbekiston Respublikasi hududini hayvonlarning yuqumli kasalliklarini qoʻzgʻatuvchilar olib kirilishidan muhofaza qilish, shuningdek hayvonlar, kelib chiqishi hayvonotga mansub mahsulot va xomashyo, veterinariya dori vositalari, ozuqalar va ozuqabop qoʻshimchalarni tayyorlash, olib oʻtish (tashish), eksport va import qilish boʻyicha davlat veterinariya nazoratini amalga oshiradi;
davlat veterinariya xizmati nazorati ostidagi tovarlarning Oʻzbekiston Respublikasiga olib kirilishi, Oʻzbekiston Respublikasidan olib chiqilishiga, shuningdek, Oʻzbekiston Respublikasi hududi orqali tranziti uchun rasmiylashtiriladigan veterinariya hujjatlari berilishini nazorat qiladi;
hayvonotga mansub mahsulotlar va xomashyolarni veterinariya, veterinariya-sanitariya qoidalari va normalariga muvofiq ishlab chiqarilishi boʻyicha davlat veterinariya nazoratini amalga oshiradi;
xususiy veterinariya faoliyatini amalga oshirish uchun tadbirkorlik subyektlariga belgilangan tartibda berilgan litsenziya talablari va shartlarining bajarilishi yuzasidan davlat veterinariya nazoratini amalga oshiradi;
davlat va idoraviy veterinariya xizmatlari, ichki ishlar organlarining karantin tadbirlarini taʼminlash boʻlinmalarining veterinariya sohasiga oid faoliyatini belgilangan tartibda muvofiqlashtiradi va nazorat qiladi;
hayvonlar kasalliklariga tashxis qoʻyish, ularni davolash va oldini olish tadbirlari bajarilishi yuzasidan nazoratni amalga oshiradi;
xoʻjalik yurituvchi subyektlarda, shu jumladan yakka tartibdagi tadbirkorlarning veterinariya sohasiga oid faoliyati yuzasidan belgilangan tartibda tekshiruvlar oʻtkazadi;
hayvonlarning egalari tomonidan, shuningdek kelib chiqishi hayvonotga mansub mahsulot va xomashyoni qayta ishlash, saqlash hamda ularning savdosi bilan shugʻullanuvchi tashkilotlar tomonidan veterinariya toʻgʻrisidagi qonun hujjatlari ijro etilishi yuzasidan nazoratni amalga oshiradi;
veterinariya sohasiga oid faoliyat yuzasidan belgilangan tartibda boshqa nazorat ishlarini amalga oshiradi;
d) veterinariya sohasida xalqaro hamkorlikni amalga oshirishda ishtirok etish va rivojlantirish boʻyicha:
veterinariya sohasida chet davlatlar bilan xalqaro hamkorlikni amalga oshirishda ishtirok etadi hamda xalqaro tashkilotlarda Oʻzbekiston Respublikasining manfaatlarini ifodalaydi;
veterinariya sohasida chet davlatlar tajribalarini oʻrganadi hamda xalqaro-huquqiy normalarni Oʻzbekiston Respublikasi qonunchiligiga implementatsiya qilish boʻyicha takliflar tayyorlaydi;
chet davlatlarning veterinariya xizmatlari bilan veterinariya sohasida axborotlar almashinuvini amalga oshiradi va veterinariya sertifikatlari namunalarini belgilangan tartibda kelishadi;
xalqaro va chet davlatlarning nodavlat notijorat tashkilotlari hamda ularning vakolatxonalari va filiallari tomonidan veterinariya sohasiga oid tadbirlarning belgilangan tartibda oʻtkazilishini tashkil etadi;
veterinariya sohasiga oid xalqaro shartnomalarni ishlab chiqishda va ularning ijrosini taʼminlashda ishtirok etadi.
12. Davlat veterinariya bosh boshqarmasi belgilangan tartibda oʻziga yuklangan boshqa funksiyalarni ham bajaradi.
13. Davlat veterinariya bosh boshqarmasi oʻziga yuklangan vazifa va funksiyalarni bevosita, shuningdek davlat veterinariya organlari va muassasalari orqali amalga oshiradi.
3-bob. Davlat veterinariya bosh boshqarmasining huquqlari va javobgarligi
14. Davlat veterinariya bosh boshqarmasi oʻziga yuklangan vazifalar va funksiyalarni bajarish uchun quyidagi huquqlarga ega:
davlat boshqaruvi organlari, mahalliy ijro etuvchi hokimiyat organlari, huquqni muhofaza qilish va nazorat tuzilmalaridan hamda boshqa tashkilotlardan, shuningdek ularning mansabdor shaxslaridan ularning vakolatiga kiruvchi masalalar yuzasidan hujjatlarni, statistika va boshqa maʼlumotlarni, tahliliy materiallarni, xulosalar va boshqa axborotlarni soʻraydi va oladi;
yuridik va jismoniy shaxslardan hayvonlarning yuqumli kasalliklari tarqalishining oldini olishni hamda ularning tugatilishini taʼminlovchi chora-tadbirlar oʻtkazilishini, shuningdek epizootik holatni aniqlash uchun zarur boʻlgan axborot taqdim etilishini talab qiladi;
hayvonlarning va odamlarning sogʻligʻi uchun xavf tugʻdiradigan hayvonlar kasalligi aniqlangan taqdirda, hayvonlarni soʻyishga yoki yoʻq qilib tashlashga, kelib chiqishi hayvonotga mansub mahsulot va xomashyoni zararsizlantirishga (yuqumsizlantirishga), qayta ishlashga yoki utilizatsiya qilishga taalluqli, yuridik va jismoniy shaxslar tomonidan bajarilishi majburiy boʻlgan talablarni belgilaydi;
davlat veterinariya organlari va muassasalarining ustavi (nizomi)ni hamda tuzilmalarini ishlab chiqadi va tasdiqlaydi;
respublika hududida biologik xavfsizlikni taʼminlash maqsadida veterinariya dori vositalarini ishlab chiqarish sharoitlarini oʻrganish boʻyicha Davlat veterinariya bosh boshqarmasi huzurida markaziy rejim komissiyasini tashkil etadi va uning faoliyat yuritishini taʼminlaydi;
veterinariya dori vositalari va ozuqabop qoʻshimchalarni roʻyxatdan oʻtkazilganlik guvohnomasini olish uchun taqdim etilgan hujjatlar va ularning sinov natijalarini hamda veterinariya sohasiga oid tayyorlanadigan qoʻllanmalar, tavsiyanomalar va yoʻriqnomalarni oʻrganish, shuningdek ishlab chiqilgan veterinariya, veterinariya-sanitariya qoidalari va normalarini koʻrib chiqish boʻyicha Davlat veterinariya bosh boshqarmasi huzurida ilmiy-texnik kengash ishini tashkil etadi va uning faoliyat yuritishini taʼminlaydi;
yuridik va jismoniy shaxslarga pulli veterinariya xizmatlari koʻrsatish tartibi, xizmat turlari va tariflarini ishlab chiqadi hamda belgilangan tartibda tasdiqlaydi;
favqulodda holatlar vujudga kelganda epizootiyaga qarshi zarur choralar belgilash va veterinariya, veterinariya-sanitariya tadbirlarini oʻtkazish maqsadida ilmiy-tadqiqot va oliy taʼlim muassasalarining veterinariya yoʻnalishidagi olimlari, davlat veterinariya organlari va muassasalarining mutaxassislaridan iborat maxsus ishchi guruhlar tashkil etishi mumkin;
veterinariya sohasiga oid xizmat koʻrsatish va ishlab chiqarish, shuningdek yordamchi xoʻjaliklar faoliyatini tashkil etish yuzasidan takliflar tayyorlaydi.
15. Davlat veterinariya bosh boshqarmasi qonun hujjatlari talablariga rioya qilinishi va oʻziga yuklangan vazifalarning samarali bajarilishi uchun javob beradi.
16. Davlat veterinariya inspektorlari quyidagi vakolatlarga ega:
davlat va xoʻjalik boshqaruvi organlariga, yuridik va jismoniy shaxslarga zarur veterinariya, veterinariya-sanitariya tadbirlari va epizootiyaga qarshi tadbirlar oʻtkazish toʻgʻrisida bajarilishi majburiy boʻlgan koʻrsatmalar beradi;
hayvonlar va odamlarning sogʻligʻi uchun xavf tugʻdiradigan kasalliklarga chalingan hayvonlar aniqlangan hollarda, ushbu hayvonlarni soʻyish yoki yoʻq qilib tashlash toʻgʻrisida, shuningdek isteʼmolga yaroqsiz deb topilgan, kelib chiqishi hayvonotga mansub mahsulot va xomashyoni yoʻq qilib tashlash, qayta ishlash yoki ushbu mahsulot va xomashyodan oʻzgacha tarzda foydalanish haqida yuridik va jismoniy shaxslar tomonidan bajarilishi majburiy boʻlgan koʻrsatmalar beradi;
davlat veterinariya xizmati nazoratidagi obyektlarga moneliksiz kiradi va veterinariya toʻgʻrisidagi qonun hujjatlarining aniqlangan buzilishlarini bartaraf etish toʻgʻrisida bajarilishi majburiy boʻlgan koʻrsatmalar beradi;
temir yoʻl vagonlari, kemalar, samolyotlar va boshqa transport vositalari holatining veterinariya, veterinariya-sanitariya qoidalari va normalariga nomuvofiqligi aniqlangan taqdirda ulardan foydalanishni taqiqlaydi;
veterinariya, veterinariya-sanitariya qoidalari va normalarining buzilishlari aniqlangan taqdirda chorvachilik obyektlaridan, goʻsht va sut sanoati korxonalaridan, kelib chiqishi hayvonotga mansub mahsulot va xomashyoni qayta ishlovchi hamda saqlovchi korxonalardan foydalanishni taqiqlaydi;
veterinariya, veterinariya-sanitariya qoidalari va normalarining buzilishlari aniqlangan taqdirda chorvachilik fermalarida, kelib chiqishi hayvonotga mansub mahsulot va xomashyoni qayta ishlovchi hamda saqlovchi korxonalarda yangi qurilgan, tiklangan va rekonstruksiya qilingan obyektlarni ishga tushirishni toʻxtatib turadi;
chegaraoldi tumanlarda, qoʻshni davlatlarda yuzaga kelgan epizootik holat toʻgʻrisida tegishli organlar va tashkilotlarni xabardor qiladi, tegishli veterinariya tadbirlarini amalga oshiradi hamda zarur tavsiyalar beradi;
veterinariya dori vositalari, ozuqabop qoʻshimchalar ishlab chiqarilishini hamda ulardan chorvachilikda va veterinariyada foydalanilishini nazorat qiladi, ularning hayvonlar sogʻligʻiga va kelib chiqishi hayvonotga mansub mahsulot hamda xomashyo sifatiga taʼsirini baholaydi;
hayvonlarning yuqumli kasalliklari oʻchoqlari aniqlangan taqdirda tegishli hududlarni nobop punktlar deb eʼlon qilish va ularda cheklovchi tadbirlar (karantin) joriy etish toʻgʻrisida, shuningdek hayvonlarning yuqumli kasalliklari oʻchoqlari tugatilgandan keyin cheklovchi tadbirlarni (karantinni) bekor qilish haqida tegishli davlat organlariga taqdimnoma kiritadi;
veterinariya toʻgʻrisidagi qonun hujjatlari talablarini buzganlik uchun mansabdor shaxslarga va boshqa shaxslarga nisbatan belgilangan tartibda maʼmuriy jazo choralarini koʻradi.
Bosh davlat veterinariya inspektorlari, ularning oʻrinbosarlari va davlat veterinariya inspektorlari qonun hujjatlariga muvofiq boshqa vakolatlarni ham amalga oshirishi mumkin.
4-bob. Davlat veterinariya bosh boshqarmasi faoliyatini tashkil etish
17. Davlat veterinariya bosh boshqarmasiga Oʻzbekiston Respublikasi Qishloq va suv xoʻjaligi vaziri tomonidan tayinlanadigan boshliq rahbarlik qiladi.
18. Quyidagi lavozimlarda oliy maʼlumotga ega veterinariya mutaxassislari faoliyat yuritadi:
Davlat veterinariya bosh boshqarmasining boshligʻi va uning birinchi oʻrinbosari, shoʻba mudiri hamda mutaxassislari;
Respublika davlat veterinariya laboratoriyalari, ekspeditsiyalari, otryadlarining boshliqlari (direktorlari) va ularning oʻrinbosarlari, boʻlim boshliqlari (mudirlari) va mutaxassislari;
Davlat chegarasidagi va transportdagi davlat veterinariya nazorati boshqarmasi boshligʻi va uning oʻrinbosari, mutaxassislari, davlat chegara veterinariya punktlarining rahbarlari va mutaxassislari;
Qoraqalpogʻiston Respublikasi, viloyatlar va Toshkent shahar davlat veterinariya boshqarmalari va ularning oʻrinbosarlari, boʻlim boshliqlari va mutaxassislari, tuman va shahar davlat veterinariya boʻlimi boshliqlari va ularning oʻrinbosarlari hamda mutaxassislari;
Qoraqalpogʻiston Respublikasi, viloyatlar va Toshkent shahar davlat veterinariya laboratoriyalari direktorlari va ularning oʻrinbosarlari, boʻlim boshliqlari (mudirlari) va mutaxassislari, tuman va shahar davlat veterinariya laboratoriyalari direktorlari, bozorlardagi veterinariya-sanitariya ekspertiza laboratoriyasi mudirlari, boʻlim boshliqlari va mutaxassislari.
19. Davlat veterinariya bosh boshqarmasining boshligʻi — Oʻzbekiston Respublikasining Bosh davlat veterinariya inspektori, uning birinchi oʻrinbosari Oʻzbekiston Respublikasi Bosh davlat veterinariya inspektorining oʻrinbosari, Qoraqalpogʻiston Respublikasi, viloyatlar va Toshkent shahar davlat veterinariya boshqarmalari boshliqlari Qoraqalpogʻiston Respublikasi, viloyatlar va Toshkent shahar bosh davlat veterinariya inspektorlari, ularning oʻrinbosarlari esa tegishli ravishda Qoraqalpogʻiston Respublikasi, viloyatlar va Toshkent shahar bosh davlat veterinariya inspektorlarining oʻrinbosarlari hisoblanadilar.
20. Davlat veterinariya bosh boshqarmasining veterinariya mutaxassislari oʻz vakolatlari doirasida davlat veterinariya inspektorlari hisoblanadilar.
21. Davlat chegarasidagi va transportdagi davlat veterinariya nazorati boshqarmasi boshligʻi davlat chegarasidagi va transportdagi bosh davlat veterinariya inspektori, uning oʻrinbosarlari esa davlat chegarasidagi va transportdagi bosh davlat veterinariya inspektorining oʻrinbosarlari hisoblanadilar.
22. Davlat veterinariya bosh boshqarmasi boshligʻining uning tomonidan lavozimga tayinlanadigan va lavozimdan ozod qilinadigan ikki nafar oʻrinbosarlari, shu jumladan bir nafar birinchi oʻrinbosari boʻladi.
23. Hayvonlarning yuqumli kasalliklari oʻchoqlari aniqlangan taqdirda tegishli nobop punktlarda cheklovchi tadbirlarni (karantinni) amalga oshirish davomida jamoat tartibini saqlash va cheklovchi tadbirlarni (karantinni) toʻliq va sifatli oʻtkazishni taʼminlashda hamda epizootiyaga qarshi tadbirlarni amalga oshirishda davlat veterinariya xizmatiga koʻmaklashish mahalliy ijro etuvchi hokimiyat organlari, ichki ishlar organlarining karantin tadbirlarini taʼminlash boʻlinmalari, fuqarolarning oʻzini oʻzi boshqarish organlari, nodavlat notijorat tashkilotlari va fuqarolar tomonidan amalga oshiriladi.
24. Boshliq:
yakkaboshchilik asosida Davlat veterinariya bosh boshqarmasi faoliyatiga umumiy rahbarlikni amalga oshiradi hamda Davlat veterinariya bosh boshqarmasiga yuklangan vazifalar va funksiyalar bajarilishi uchun shaxsan javob beradi;
oʻzining oʻrinbosarlari vakolatlarini belgilaydi;
Davlat veterinariya bosh boshqarmasi markaziy apparati xodimlarini lavozimga tayinlaydi, vazifalarini taqsimlaydi va lavozimidan ozod qiladi;
Qoraqalpogʻiston Respublikasi, viloyatlar va Toshkent shahar davlat veterinariya boshqarmalari boshliqlarini, tegishli ravishda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan kelishgan holda, lavozimga tayinlaydi va lavozimdan ozod qiladi;
Respublika davlat veterinariya laboratoriyalari, ekspeditsiyalari, otryadlari, shuningdek davlat chegarasidagi va transportdagi davlat veterinariya nazorati boshqarmasi, davlat chegara veterinariya punktlarining rahbarlarini lavozimga tayinlaydi va lavozimdan ozod qiladi;
Davlat veterinariya bosh boshqarmasining markaziy apparati tuzilmasiga xodimlarning umumiy cheklangan soni doirasida oʻzgartirish kiritish toʻgʻrisida Oʻzbekiston Respublikasi Qishloq va suv xoʻjaligi vazirligiga taklif kiritadi;
Davlat veterinariya bosh boshqarmasi markaziy apparatining shtat jadvalini tasdiqlaydi;
Davlat veterinariya bosh boshqarmasining markaziy apparati, Epizootiyaga qarshi kurashish respublika ekspeditsiyasi, Hayvonlarning oqsil kasalligiga qarshi kurashish otryadi, Davlat chegarasidagi va transportdagi davlat veterinariya nazorati boshqarmasi, Respublika davlat veterinariya laboratoriyasi, Hayvonlarning oʻta xavfli kasalliklari davlat veterinariya laboratoriyasi, Parranda kasalliklari davlat veterinariya laboratoriyasi va Veterinariya dori vositalari va ozuqabop qoʻshimchalarning sifat nazorati davlat laboratoriyasining xarajatlar smetasini tasdiqlaydi;
Davlat veterinariya bosh boshqarmasi markaziy apparati xodimlari, davlat veterinariya organlari va muassasalari bajarishi majburiy boʻlgan koʻrsatmalar beradi;
Davlat veterinariya xizmatlarining xodimlarini ragʻbatlantirish va intizomiy javobgarlikka tortish masalalarini hal etadi, Davlat veterinariya bosh boshqarmasi tizimining alohida oʻrnak koʻrsatgan xodimlarini faxriy unvonlar berishga va Oʻzbekiston Respublikasining davlat mukofotlari bilan taqdirlashga belgilangan tartibda taqdim etadi;
Davlat veterinariya bosh boshqarmasi nomenklaturasidagi lavozimlarga kadrlarni tanlaydi;
Oʻzbekiston Respublikasi Prezidentining farmonlari, qarorlari va farmoyishlarida, Oʻzbekiston Respublikasi Vazirlar Mahkamasining qarorlari va farmoyishlarida, Oʻzbekiston Respublikasi Qishloq va suv xoʻjaligi vazirligining buyruqlarida belgilangan vazifalarni amalga oshirish boʻyicha ijro intizomini mustahkamlash, ularning oʻz vaqtida va sifatli amalga oshirilishini taʼminlash uchun Davlat veterinariya bosh boshqarmasi rahbarlari va xodimlarining shaxsiy masʼuliyatini oshiradi.
Boshqa davlatlar hududida hayvonlarning oʻta xavfli yuqumli kasalliklari, hayvonlarning kelib chiqish sabablari nomaʼlum boʻlgan yalpi kasalliklari va hayvonlarning ilgari qayd etilmagan yuqumli kasalliklari paydo boʻlgan taqdirda davlat veterinariya xizmati nazoratidagi tovarlarni olib oʻtishga taqiq, cheklov joriy etish hamda ularni olib oʻtishni tiklash toʻgʻrisidagi qaror Oʻzbekiston Respublikasi Bosh davlat veterinariya inspektori tomonidan qabul qilinadi.
Keyingi tahrirga qarang.
Vazirlar Mahkamasining 2016-yil 25-oktabrdagi 361-son qaroriga
4-ILOVA
4-ILOVA
Hayvonlar va odamlarning sogʻligʻi uchun xavf tugʻdiradigan va bunda hayvonlar, kelib chiqishi hayvonotga mansub mahsulotlar va xomashyolar olib qoʻyiladigan hamda yoʻq qilib tashlanadigan hayvonlarning kasalliklari
ROʻYXATI
|
Kasalliklar roʻyxati | ||
|
1. Bir necha hayvonot turi uchun umumiy boʻlgan kasalliklar | ||
|
1. |
1. |
Kuydirgi |
|
2. |
2. |
Quturish |
|
3. |
3. |
Tulyaremiya |
|
4. |
4. |
Listerioz |
|
5. |
5. |
Ku-bezgagi |
|
2. Qoramollarning kasalliklari | ||
|
6. |
1. |
Oʻlat |
|
7. |
2. |
Poʻkaksimon ensefalopatiya |
|
8. |
3. |
Kontagioz plyevropnevmoniya |
|
9. |
4. |
Emfizematoz karbunkul (qorason) |
|
3. Qoʻy va echkilarning kasalliklari | ||
|
10. |
1. |
Kataral isitma |
|
11. |
2. |
Rift isitma |
|
12. |
3. |
Pustullyoz stomatit |
|
13. |
4. |
Bradzot enterotoksemiya |
|
14. |
5. |
Skrepi kasalligi |
|
4. Ot, tuya va eshaklarning kasalliklari | ||
|
15. |
1. |
Otlarning Afrika oʻlati |
|
16. |
2. |
Otlar oʻlati |
|
17. |
3. |
Otlar kontagioz plyevropnevmoniyasi |
|
18. |
4. |
Tuyalar chechagi |
|
19. |
5. |
Manqa |
|
20. |
6. |
Yuqumli anemiya (INAN) |
|
21. |
7. |
Ensefalomiyelit |
|
22. |
8. |
Tuyalar oʻlati |
|
5. Choʻchqalarning kasalliklari | ||
|
23. |
1. |
Afrika oʻlati |
|
24. |
2. |
Enzootik ensefalomiyelit (Teshen) |
|
25. |
3. |
Trixinellyoz |
|
6. Parrandalarning kasalliklari | ||
|
26. |
1. |
Yuqori patogenli gripp |
|
27. |
2. |
Ornitoz (psitakoz) |
|
28. |
3. |
Nyukasl kasalligi |
|
7. Moʻynali hayvonlar, quyonlar va mayda uy hayvonlarining kasalliklari | ||
|
29. |
1. |
Norkalarning Aleut kasalligi |
|
30. |
2. |
Norkalarning virusli enteriti |
|
31. |
3. |
Quyonlarning miksomatozi |
|
8. Asalarilarning kasalliklari | ||
|
32. |
1. |
Amerikacha chirish |
|
33. |
2. |
Yevropacha chirish |
|
34. |
3. |
Akarapidoz |
|
9. Oʻzbekiston Respublikasi hududida ilgari roʻyxatga olinmagan barcha turdagi hayvonlarning xavfli kasalliklari | ||
|
| ||
|
| ||
Izoh: olib qoʻyilgan hayvonlar, kelib chiqishi hayvonotga mansub mahsulotlar va xomashyolarda aniqlangan kasalliklarning turidan kelib chiqib, ularga qarshi kurashish yoʻriqnomasiga muvofiq belgilangan tartibda yoʻq qilinadi.
Vazirlar Mahkamasining 2016-yil 25-oktabrdagi 361-son qaroriga
5-ILOVA
5-ILOVA
Profilaktika, tashxis qoʻyish va tugatish tadbirlari Oʻzbekiston Respublikasi Davlat budjeti mablagʻlari hisobidan amalga oshiriladigan hayvonlarning oʻta xavfli yuqumli kasalliklari
ROʻYXATI
|
T/r |
Kasalliklar roʻyxati | |
|
1. Bir necha hayvonot turi uchun umumiy boʻlgan kasalliklar | ||
|
1. |
1. |
Oqsil |
|
2. |
2. |
Brutsellyoz |
|
3. |
3. |
Auyeski |
|
4. |
4. |
Leptospiroz |
|
5. |
5. |
Kuydirgi |
|
6. |
6. |
Quturish |
|
7. |
7. |
Listerioz |
|
8. |
8. |
Sil |
|
9. |
9. |
Ku-bezgagi |
|
2. Qoramollarning kasalliklari | ||
|
10. |
1. |
Oʻlat |
|
11. |
2. |
Emfizematoz karbunkul (qorason) |
|
3. Qoʻy va echkilarning kasalliklari | ||
|
12. |
1. |
Chechak |
|
13. |
2. |
Bradzot enterotoksemiya |
|
14. |
3. |
Oʻlat |
|
15. |
4. |
Skrepi |
|
4. Choʻchqalarning kasalliklari | ||
|
16. |
1. |
Afrika oʻlati |
|
5. Ot va tuyalarning kasalliklari | ||
|
17. |
1. |
Manqa |
|
18. |
2. |
Yuqumli anemiya (INAN) |
|
19. |
3. |
Gripp (inflyuensa) |
|
20. |
4. |
Tuyalar oʻlati |
|
21. |
5. |
Otlarning Afrika oʻlati |
|
6. Parrandalarning kasalliklari | ||
|
22. |
1. |
Nyukasl kasalligi |
|
23. |
2. |
Chechak |
|
24. |
3. |
Yuqumli laringotraxeit |
|
25. |
4. |
Ornitoz (psitakoz) |
|
26. |
5. |
Yuqori patogenli gripp |
|
27. |
6. |
Mareka |
|
7. Moʻynali hayvonlar, quyonlar va mayda uy hayvonlarining kasalliklari | ||
|
28. |
1. |
Quyonlarning gemorragik kasalligi |
|
29. |
2. |
Sestodozlar |
|
30. |
3. |
Quyonlar miksomatozi |
|
31. |
4. |
Quyonlar oʻlati |
|
8. Oʻzbekiston Respublikasi hududida ilgari roʻyxatga olinmagan barcha turdagi hayvonlarning xavfli kasalliklari | ||
Keyingi tahrirga qarang.
(Oʻzbekiston Respublikasi qonun hujjatlari toʻplami, 2016-y., 43-son, 503-modda; 2017-y., 33-son, 857-modda; Qonun hujjatlari maʼlumotlari milliy bazasi, 28.06.2019-y., 09/19/532/3344-son)
