“Aholining sanitariya-epidemiologik osoyishtaligi toʻgʻrisida” va “Tadbirkorlik faoliyati sohasidagi ruxsat berish tartib-taomillari toʻgʻrisida”gi Oʻzbekiston Respublikasi qonunlariga muvofiq, shuningdek Oʻzbekiston Respublikasi sanitariya-epidemiologiya xizmati tizimida ruxsat etish xususiyatiga ega hujjatlarni berishni tartibga solish chora-tadbirlarini kuchaytirish va soddalashtirish maqsadida Vazirlar Mahkamasi qaror qiladi:

1. Quyidagilar:

Yangi maxsus kiritiladigan biologik aktiv moddalarni olib kirish va ishlab chiqarishga ruxsatnoma berish tartibi toʻgʻrisidagi Nizom 1-ilovaga* muvofiq;

Yangi oziq-ovqat qoʻshimchalarini olib kirish va ishlab chiqarishga ruxsatnomalar berish tartibi toʻgʻrisidagi Nizom 2-ilovaga*;

Yangi kimyoviy moddalar, biologik vositalar va materiallar, polimer va plastik massalar, parfyumeriya-kosmetika vositalarini olib kirish hamda ishlab chiqarishga ruxsatnomalar berish tartibi toʻgʻrisidagi Nizom 3-ilovaga* muvofiq tasdiqlansin.

2. Vazirlar Mahkamasining 2013-yil 15-avgustdagi 225-son qarori (Oʻzbekiston Respublikasi QT, 2013-y., 8-son, 55-modda) bilan tasdiqlangan Tadbirkorlik faoliyati sohasidagi ruxsat etish xususiyatiga ega hujjatlar roʻyxatiga 4-ilovaga muvofiq oʻzgartirishlar kiritilsin.

3. Oʻzbekiston Respublikasi Sogʻliqni saqlash vazirligi manfaatdor vazirliklar va idoralar bilan birgalikda:

oʻz idoraviy normativ-huquqiy hujjatlarini bir oy muddatda ushbu qarorga muvofiqlashtirsin;

ushbu qarorning maqsadlari, mazmuni va amaliy ahamiyati tadbirkorlik subyektlari orasida keng yoritilishiga doir tadbirlar tashkil etilishi va oʻtkazilishini taʼminlasin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.

1. “Ruxsat etish xususiyatiga ega hujjatning nomi (tartib-taomillar)” ustunining 159-pozitsiyasidagi “xulosa” soʻzi “ruxsatnoma” soʻzi bilan almashtirilsin.

2. 160-pozitsiyada:

a) “Ruxsat etish xususiyatiga ega hujjatning nomi (tartib-taomillar)” ustunidagi “yangi kimyoviy moddalar, biologik vositalar, materiallarni qoʻllash” soʻzlari “yangi kimyoviy moddalar, biologik vositalar va materiallarni olib kirish va ishlab chiqarish” soʻzlari bilan almashtirilsin;

b) “Sodir etilishi va (yoki) amalga oshirilishi uchun ruxsat etish xususiyatiga ega hujjat zarur boʻlgan xatti-harakat va (yoki) muayyan faoliyat” ustunidagi “Yangi kimyoviy moddalar, biologik vositalar, materiallarni qoʻllash” soʻzlari “Yangi kimyoviy moddalar, biologik vositalar va materiallarni olib kirish va ishlab chiqarish” soʻzlari bilan almashtirilsin.