Birjadan tashqari ichki valyuta bozorida valyuta almashtirish operatsiyalari hajmini yanada kengaytirish maqsadida Vazirlar Mahkamasi qaror qiladi:

1.Oʻzbekiston Respublikasi Markaziy bankining xorijiy valyuta bilan operatsiyalarni oʻtkazish boʻyicha bosh litsenziyalarga ega boʻlgan vakolatli banklarga oʻzlarining almashtirish punktlari orqali naqd xorijiy valyutani erkin sotib olish va sotish operatsiyalarini amalga oshirish huquqini berish toʻgʻrisidagi taklifiga rozilik berilsin.

2.Quyidagilar:

Oʻzbekiston Respublikasi Vazirlar Mahkamasining “Valyuta bozorini yanada erkinlashtirish va valyuta almashtirish operatsiyalarini kengaytirishga doir chora-tadbirlar toʻgʻrisida” 2000-yil 30-iyundagi 250-son qarori 2-bandining ikkinchi xatboshi;

Oʻzbekiston Respublikasi Vazirlar Mahkamasining “Oʻzbekiston Respublikasi Hukumatining qarorlariga oʻzgartirishlar kiritish toʻgʻrisida” 2000-yil 5-dekabrdagi 467-son qaroriga 1-ilova oʻz kuchini yoʻqotgan deb hisoblansin.

3.Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S.Azimov va Oʻzbekiston Respublikasi Markaziy bankining raisi F.M.Mullajonov zimmasiga yuklansin.