O‘zbekiston Respublikasi Prezidentining “O‘zbekiston Respublikasi O‘rmon qo‘mitasini O‘zbekiston Respublikasi Qishloq va suv xo‘jaligi vazirligi huzuridagi O‘rmon xo‘jaligi bosh boshqarmasiga aylantirish to‘g‘risida” 2000-yil 7-fevraldagi PF–2536-son Farmonini amalga oshirish maqsadida Vazirlar Mahkamasi qaror qiladi:

1. Belgilab qo‘yilsinki, O‘zbekiston Respublikasi Qishloq va suv xo‘jaligi vazirligi huzuridagi O‘rmon xo‘jaligi bosh boshqarmasi respublika o‘rmon xo‘jaligini davlat tomonidan boshqarish organi funksiyalarini amalga oshiradi, o‘rmonlarning saqlanishi, qayta barpo etilishi, muhofaza qilishini hamda o‘rmon fondi yerlaridan samarali foydalanilishi uchun javob beradi, respublika boshqa idoralarining foydalanilmaydigan yerlarda tabiatni muhofaza etuvchi va dalalarni ihota qiluvchi daraxtzorlar barpo etish hamda ulardan foydalanish bo‘yicha faoliyatini tashkil etadi va muvofiqlashtirib boradi.

2. Belgilab qo‘yilsinki, O‘rmon xo‘jaligi bosh boshqarmasi markaziy apparati hamda Qoraqalpog‘iston Respublikasi o‘rmon xo‘jaligi boshqarmasi faoliyatini mablag‘ bilan ta’minlash ularga qarashli korxonalar ajratmalari hisobiga amalga oshiriladi.

3. Belgilansinki, O‘zbekiston Respublikasi Qishloq va suv xo‘jaligi vazirligi huzuridagi O‘rmon xo‘jaligi bosh boshqarmasi boshlig‘i lavozimiga ko‘ra vazir o‘rinbosari hisoblanadi va Vazirlar Mahkamasining qarori bilan lavozimga tayinlanadi.

O‘zbekiston Respublikasi Qishloq va suv xo‘jaligi vazirligi huzuridagi O‘rmon xo‘jaligi bosh boshqarmasiga boshliqning ikki nafar o‘rinbosari, shu jumladan bir nafar birinchi o‘rinbosari bo‘lishiga ruxsat etilsin, ular lavozimga Vazirlar Mahkamasi bilan kelishgan holda O‘zbekiston Respublikasi Qishloq va suv xo‘jaligi vaziri tomonidan tayinlanadilar.

Qoraqalpog‘iston Respublikasi o‘rmon xo‘jaligi boshqarmasi boshlig‘i Qoraqalpog‘iston Respublikasi Vazirlar Kengashi bilan kelishgan holda O‘zbekiston Respublikasi Qishloq va suv xo‘jaligi vazirligi tomonidan lavozimga tayinlanadi.

4. O‘zbekiston Respublikasi Qishloq va suv xo‘jaligi vazirligi huzuridagi O‘rmon xo‘jaligi bosh boshqarmasi:

bir oy muddatda Qoraqalpog‘iston Respublikasi O‘rmon xo‘jaligi hamda viloyatlar o‘rmon xo‘jaligi boshqarmalari to‘g‘risidagi namunaviy nizomni qayta ko‘rib chiqsin va tasdiqlasin;

O‘zbekiston Respublikasi Davlat mulki qo‘mitasi bilan birgalikda Moddiy texnika ta’minoti bo‘yicha respublika o‘rmon xo‘jaligi ishlab chiqarish birlashmasini belgilangan tartibda xo‘jalik hisobidagi firmaga aylantirish masalasini bir oy muddatda ko‘rib chiqsin.

5. O‘zbekiston Respublikasi Vazirlar Mahkamasining 1991-yil 17-iyuldagi 192-son qarori o‘z kuchini yo‘qotgan deb hisoblansin.

6. O‘zbekiston Respublikasi Qishloq va suv xo‘jaligi vazirligi, Adliya vazirligi hamda Davlat tabiatni muhofaza qilish qo‘mitasi bilan birgilikda qonun hujjatlariga ushbu qarordan kelib chiqadigan o‘zgartirishlar va qo‘shimchalar kiritish to‘g‘risida 15 kun muddatda takliflar kiritsin.

7. Mazkur qarorning bajaralishini nazorat qilish O‘zbekiston Respublikasi Bosh vazirining o‘rinbosari B.M. Olimjonov zimmasiga yuklansin.