Tabiiy ofatdan jabrlangan aholiga, ijarachilarga va shaxsiy yordamchi xoʻjaliklarning egalariga moddiy yordam koʻrsatish maqsadida:

1. Oʻzbekiston SSR Moliya vazirligi va Oʻzbekiston SSR Davlat sugʻurta boshqaruvi yetkazilgan zarar miqdorini qonunda belgilangan tartibda aniqlasin va uni jabrlangan aholiga toʻlasin, bu ishga joylardagi moliya, sugʻurta hamda boshqa tegishli idoralarni jalb etsin. Kompensatsiyalar toʻlash bir oylik muddat ichida tugatilsin.

2. Qoraqalpogʻiston ASSR Vazirlar Kengashi, xalq deputatlari viloyat, rayon va shahar Sovetlarining ijroiya komitetlari, qishloq, posyolka va ovul Sovetlari barcha mavjud manbalar va imkoniyatlar hisobidan jabrlangan aholiga aniq-ravshan moddiy yordam koʻrsatishda bevosita qatnashsinlar.

3. Aholiga, ijarachilarga va shaxsiy yordamchi xoʻjaliklarning egalariga katta zarar yetganini eʼtiborga olib, Oʻzbekiston SSR Davlat sugʻurta boshqaruvi belgilanganidan tashqari, respublika va mahalliy budjetlardan har bir oilaga 300 soʻm miqdorida aniq bir maqsadga qaratilgan pul nafaqasi ajratilsin.

4. Oʻzbekiston SSR Prezidenti huzuridagi Vazirlar Mahkamasi (oʻrtoq I. H. Joʻrabekov) tabiiy ofat yakson qilgan va yuvib ketgan ekinlarni tiklash maqsadida zarur miqdorda oʻgʻit, urugʻlik, koʻchatlar va boshqa materiallarni aholiga hamda shaxsiy yordamchi xoʻjaliklarning egalariga sotish uchun izlab topsin.

5. Oʻzbekbirlashuv, Oʻzbekiston SSR Savdo vazirligi, Oʻzbekiston SSR Davlat kooperativ taʼminot komiteti va Oʻzbekiston SSR Qurilish sanoati materiallari vazirligi, Qoraqalpogʻiston ASSR Vazirlar Kengashi va viloyat ijroiya komitetlari aholiga hamda shaxsiy yordamchi xoʻjaliklarning egalariga tabiiy ofat natijasida vayron boʻlgan uylar va boshqa inshootlarni tiklash uchun zarur binokorlik materiallarini birinchi navbatda ajratish va sotishni taʼminlasinlar. Bir haftalik muddatda ana shu maqsadlarda bozor jamgʻarmalarini koʻpaytirish, bunga davlat jamgʻarmalarini qayta taqsimlash ham kiradi, toʻgʻrisidagi takliflar kiritilsin.

Respublika qurilish tashkilotlari uy-joy fondi va boshqa inshootlarni tiklashga zudlik bilan yordam bersinlar. Oʻzbekiston SSR Iqtisod komiteti va Oʻzbekiston SSR Moliya vazirligi ushbu qurilish tashkilotlarining shu yilgi reja-moliya koʻrsatgichlariga tegishli tuzatishlar kiritsinlar.

6. Oʻzbekiston SSR Sogʻliqni saqlash vazirligi yuqumli kasalliklarning oldini olish yuzasidan zarur tibbiy yordam koʻrsatish va profilaktika ishlarini tashkil etish uchun harakatchan guruhlar tuzib, ularni respublikaning tegishli mintaqalariga yuborsin.

7. Qoraqalpogʻiston ASSR Vazirlar Kengashi, viloyat ijroiya komitetlari, rayon ijroiya komitetlari, qishloq, posyolka va ovul Sovetlari mehnatga layoqatli barcha aholini tabiiy ofat oqibatlarini tugatish yuzasidan bir haftalik umumxalq hasharini oʻtkazish uchun jalb etishga doir keng tushuntirish ishlarini olib borsinlar.

8. Hukumat komissiyasi (oʻrtoq I.H. Joʻrabekov) Oʻzbekiston SSR vazirliklari va idoralarining, joylardagi sovet hamda xoʻjalik idoralarini tabiiy ofat oqibatlarini tugatish, ajratilayotgan barcha moddiy va boshqa resurslarini oʻz vaqtida taqsimlash hamda uni jabrlanganlarga yetkazib berishga doir amaliy ishlarni muvofiqlashtirsin.

9. Oʻzbekiston rahbariyati va hukumati respublikamizning butun aholisiga va birinchi navbatda jabrlanganlarga murojaat etib, respublikada tabiiy ofat zarar yetkazgan ishchilarning ahvolini yengillashtirish uchun barcha zarur choralar koʻrilishiga, hech kim yolgʻiz qolmasligiga, har bir kishiga eʼtibor berilishi va aniq yordam koʻrsatilishiga sizlarni toʻla-toʻkis ishontiradi.

Oʻzbekistonning mehnatkash xalqiga xos boʻlgan yuksak intizomni, odamlar jipsligi va oʻzaro yordamni, har bir kishiga rahm-shafqat va mehr-muruvvatni kuchaytirish hozirgi kunda har qachongidan koʻra koʻproq talab etiladi.