Respublikada teri xomashyosidan samarali foydalanish, teripoyabzal sanoati korxonalarining xalq isteʼmoli mollari ishlab chiqarishini koʻpaytirish, shuningdek bu xomashyoning Oʻzbekistondan tashqariga nazoratsiz tashib ketilishining oldini olish maqsadida:

1. “Oʻzbekyengilsanoat” davlat uyushmasi va “Oʻztayyorlovsavdo” uyushmasi bir oy muddat ichida korxonalar va tashkilotlar, jamoa xoʻjaliklari, ijarachilar, dehqon xoʻjaliklari va yakka tartibda tayyorlovchilar bilan teri xomashyosini xarid qilish, shuningdek unga birlamchi ishlov berish hamda saqlash uchun omborxonalar va boshqa binolardan foydalanish toʻgʻrisidagi shartnomalarni belgilangan tartibda qaytadan tuzishni tashkil qilsinlar.

2. “Oʻzbekyengilsanoat” davlat uyushmasi Oʻzbekiston Respublikasining Markaziy banki, Moliya vazirligi, boshqa manfaatdor vazirliklari va idoralari bilan birgalikda tayyorlanadigan teri xomashyosi uchun hisob-kitob qilish tartibini oʻn kun muddat ichida ishlab chiqsin, bunda moddiy jihatdan ragʻbatlantirish chora-tadbirlari, shu jumladan aholiga xalq isteʼmol mollarini topshirilgan xomashyo hajmiga qarab sotish koʻzda tutilsin.

3. Oʻzbekiston Respublikasining Adliya vazirligi bir oy muddatda Oʻzbekiston Respublikasining qonun hujjatlariga mazkur Farmondan kelib chiqadigan oʻzgartishlarni kiritish toʻgʻrisida takliflar tayyorlasin.

4. Ushbu Farmonning bajarilishini nazorat qilish Oʻzbekiston Respublikasi Vazirlar Mahkamasining zimmasiga yuklansin.