|
Hujjat kuchini yo‘qotgan 22.02.2021
|
Oʻzbekiston Respublikasi Vazirlar Mahkamasining
qarori
Respublikada ot sportining markaziy bazasini yanada rivojlantirish chora-tadbirlari toʻgʻrisida
LexUZ sharhiMazkur qaror Oʻzbekiston Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.
Respublikada ot sportini yanada ommalashtirish hamda Toshkent shahridagi markaziy ippodromni modernizatsiyalash maqsadida Vazirlar Mahkamasi qaror qiladi:
1. Oʻzbekiston Respublikasi Madaniyat va sport ishlari vazirligi, Oʻzbekiston ot sporti federatsiyasi va Toshkent shahar hokimligining “Markaziy ippodrom” ochiq aksiyadorlik jamiyati ippodrom kompleksini, uni 2012-yilning uchinchi choragida foydalanishga topshirgan holda rekonstruksiya qilish toʻgʻrisidagi taklifiga rozilik berilsin.
2. Oʻzbekiston Respublikasi Madaniyat va sport ishlari vazirligi loyihalashtirish yuzasidan texnik topshiriqni belgilangan tartibda tasdiqlasin.
3. “Markaziy ippodrom” ochiq aksiyadorlik jamiyati ippodrom kompleksini loyihalashtirish va qurish boʻyicha:
“Markaziy ippodrom” ochiq aksiyadorlik jamiyati — buyurtmachi;
“Nomdor Dizayn Servis” masʼuliyati cheklangan jamiyat — bosh loyihalashtirish tashkiloti;
“Global Stroy Invest” masʼuliyati cheklangan jamiyat —– bosh pudrat tashkiloti etib belgilanganligi maʼlumot uchun qabul qilinsin.
4. Obyektning loyiha-smeta hujjatlarini (ish loyihasini) bir bosqichli tartibda ishlab chiqishga, shuningdek obyektda qurilish-montaj ishlarini 2011-yil 20-dekabrgacha loyihalashtirish bilan bir paytda olib borishga, istisno tariqasida, ruxsat berilsin.
5. Oʻzbekiston Respublikasi Iqtisodiyot vazirligi va Moliya vazirligi 2012-yilgi Investitsiya dasturini shakllantirishda “Markaziy ippodrom” ochiq aksiyadorlik jamiyati obyektlarini qurish va rekonstruksiya qilishga aksiyalarning qoʻshimcha emissiyasidan tushadigan mablagʻlar hisobiga kapital qoʻyilmalar limitlarini nazarda tutsinlar.
6. Oʻzbekiston Respublikasi Davlat arxitektura va qurilish qoʻmitasi belgilangan tartibda loyiha-smeta hujjatlarining ekspertizadan oʻtkazilishini taʼminlasin hamda qurilish-montaj ishlarini amalga oshirishning sifati ustidan nazorat oʻrnatsin.
7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N. Aripov zimmasiga yuklansin.
Oʻzbekiston Respublikasining Bosh vaziri Sh. MIRZIYOYEV
Toshkent sh.,
2011-yil 29-noyabr,
313-son
