Oʻzbekiston Respublikasi Konstitutsiyasining 90-moddasiga ushbu tuzatish davlat boshqaruvining demokratik prinsiplarini, sotsial-iqtisodiy, ijtimoiy-siyosiy oʻzgarishlarni amalga oshirishda Oliy Majlisning roli va ahamiyatini mustahkamlash borasida mamlakatimizda kechayotgan jarayonlarni, shuningdek rivojlangan demokratik mamlakatlarning koʻpchiligida qabul qilingan davlat qurilishi amaliyotini hisobga olgan holda kiritilmoqda.

Oʻzbekiston Respublikasi Konstitutsiyasiga tuzatish toʻgʻrisidagi mazkur Qonun Oʻzbekiston Respublikasi Prezidentining 2010-yil 12-noyabrda Oliy Majlis palatalarining qoʻshma majlisidagi “Mamlakatimizda demokratik islohotlarni yanada chuqurlashtirish va fuqarolik jamiyatini rivojlantirish konsepsiyasi” mavzuidagi maʼruzasida belgilangan vazifalar nuqtai nazaridan davlat boshqaruvi va jamiyat qurilishi sohasidagi demokratik oʻzgarishlarning mantiqiy davomidir.

1-modda. 1992-yil 8-dekabrda oʻn ikkinchi chaqiriq Oʻzbekiston Respublikasi Oliy Kengashining oʻn birinchi sessiyasida qabul qilingan Oʻzbekiston Respublikasining Konstitutsiyasi (Oʻzbekiston Respublikasi Oliy Kengashining Axborotnomasi, 1993-yil, № 1, 4-modda; 1994-yil, № 1, 5-modda; Oʻzbekiston Respublikasi Oliy Majlisining Axborotnomasi, 2003-yil, № 3-4, 27-modda; Oʻzbekiston Respublikasi Oliy Majlisi palatalarining Axborotnomasi, 2007-yil, № 4, 162-modda; 2008-yil, № 12, 637-modda; 2011-yil, № 4, 100-modda) 90-moddasining ikkinchi qismidagi “yetti yil” degan soʻzlar “besh yil” degan soʻzlar bilan almashtirilsin.

2-modda. Oʻzbekiston Respublikasi Konstitutsiyasiga tuzatish toʻgʻrisidagi mazkur Qonun u kuchga kirganidan soʻng saylanadigan Oʻzbekiston Respublikasi Prezidentiga nisbatan qoʻllaniladi.

3-modda. Ushbu Qonun rasmiy eʼlon qilingan kundan eʼtiboran kuchga kiradi.