Oʻzbekiston Respublikasi Prezidentining “Butunjahon bankining Xalqaro rivojlantirish assotsiatsiyasi bilan moliyaviy hamkorlikda “Sogʻliqni saqlash tizimini takomillashtirish (Salomatlik-3)” loyihasini amalga oshirish chora-tadbirlari toʻgʻrisida” 2011-yil 7-sentabrdagi PQ-1614-son qarorini bajarish yuzasidan va sogʻliqni saqlash sohasida islohotlarni yanada chuqurlashtirish maqsadida Vazirlar Mahkamasi qaror qiladi:

1. Vazirlar Mahkamasining “Oʻzbekiston Respublikasi sogʻliqni saqlash muassasalarini moliyalashtirish va boshqaruv tizimini yanada takomillashtirish toʻgʻrisida” 2005-yil 28-sentabrdagi 217-son qaroriga muvofiq:

Samarqand, Sirdaryo, Fargʻona viloyatlari va Toshkent shahrining 25 ta tajriba shahar oilaviy poliklinikalarida bir nafar yashovchi hisobiga xarajatlar normatividan kelib chiqib moliyalashtirish mexanizmi joriy etilganligi;

tajriba shahar oilaviy poliklinikalarining budjeti 4,2 baravar, birkitilgan bir nafar yashovchi hisobiga xarajatlarning bazaviy normativi 4 baravar, aholini dori-darmonlar bilan taʼminlash xarajatlari 2,5 baravar koʻpaytirilganligi, shuningdek mintaqalarda aholining yosh va jins tarkibini va kasallanishni hisobga olgan holda budjet mablagʻlarining bir tekis taqsimlanishi taʼminlanganligi;

diagnostika va davolashning zamonaviy standartlarini joriy etish, shahar oilaviy poliklinikalarining moddiy-texnika bazasini va kadrlar salohiyatini mustahkamlash hisobiga aholiga tekin va sifatli tibbiy xizmatlar koʻrsatilishi yaxshilanganligi maʼlumot uchun qabul qilinsin.

2. Sogʻliqni saqlash muassasalarini moliyalashtirish tizimini isloh qilish borasida toʻplangan ijobiy tajribani hisobga olgan holda Oʻzbekiston Respublikasi Sogʻliqni saqlash vazirligi va Moliya vazirligining:

respublikaning qolgan 155 ta shahar oilaviy poliklinikalarini bir nafar yashovchi hisobiga xarajatlar normatividan kelib chiqib moliyalashtirish shartlariga: Toshkent shahrida, Samarqand va Fargʻona viloyatlarida — 2013-yildan boshlab, Qoraqalpogʻiston Respublikasida, Andijon, Namangan, Xorazm va Surxondaryo viloyatlarida — 2014-yildan boshlab, Buxoro, Jizzax, Navoiy, Qashqadaryo va Toshkent viloyatlarida 2015-yildan boshlab bosqichma-bosqich oʻtkazish;

Fargʻona viloyatining 15 ta tuman markaziy kasalxonalarini ikki turdagi kontraktlar tuzish asosida moliyalashtirish: 3 ta kasalxonada davolab yuborilgan bir nafar bemor hisobiga xizmatlar qiymati va hajmidan kelib chiqib hamda 12 ta kasalxonada — tasdiqlangan normativ koʻrsatkichlarga muvofiq xarajatlar smetasi boʻyicha haq toʻlash yuzasidan eksperiment oʻtkazish toʻgʻrisidagi takliflari maqullansin.

2013-yil 1-martdan boshlab Fargʻona viloyatining tuman markaziy kasalxonalarini viloyat moliya boshqarmasi, sogʻliqni saqlash boshqarmasi va tuman tibbiyot birlashmasi oʻrtasida kontraktlar tuzish asosida moliyalashtirish boʻyicha eksperiment amalga oshirilsin.

3. Oʻzbekiston Respublikasi Sogʻliqni saqlash vazirligi 2013-yil 1-martgacha boʻlgan muddatda Moliya vazirligi bilan birgalikda Fargʻona viloyatidagi tuman markaziy kasalxonalarini moliyalashtirish tartibi toʻgʻrisidagi Vaqtinchalik nizomni ishlab chiqsin va belgilangan tartibda tasdiqlasin, unda:

kasalxonaga joylashtirish va aholiga tibbiy yordam koʻrsatish tartibiga;

moliyalashtirishning rejadagi hajmini belgilashga;

tuman markaziy kasalxonalarining xarajatlarini qoplashga budjet mablagʻlari ajratish tartibiga alohida eʼtibor qaratilsin.

5. Oʻzbekiston Respublikasi Sogʻliqni saqlash vazirligining “Salomatlik-3” loyihasini amalga oshirish Markaziy byurosi huzurida uch shtat birligidan iborat moliyalashtirish islohotlari monitoringi boʻlimini tashkil etish, ularni Xalqaro rivojlantirish assotsiatsiyasi tomonidan beriladigan kredit mablagʻlari hisobiga taʼminlash toʻgʻrisidagi taklifiga rozilik berilsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.