Qishloqda ijtimoiy muammolarni hal etishni jadallashtirish, aholiga amaliy yordam berish hamda dehqonchilik va chorvachilik mahsulotlari yetishtirish hajmini koʻpaytirish maqsadida quyidagilarni amalga oshirishni zarur deb hisoblayman:

1. Qoraqalpogʻiston MSSR Vazirlar Kengashi, xalq deputatlari viloyat Sovetlari ijroiya qoʻmitalari, nohiya ijroiya qoʻmitalari, posyolka, qishloq va ovul Sovetlari, Oʻzbekiston SSR Qishloq xoʻjaligi vazirligi:

har bir xoʻjalik posyolka, qishloq, nohiya va viloyatda yangi tomorqa uchastkalariga yoki mavjud tomorqa uchastkalarini kengaytirishga muhtoj boʻlganlarni aniqlasin;

paxtazorlar qisqartirilishini nazarda tutib, 1991-yilda jamoa xoʻjaliklarining aʼzolari, davlat xoʻjaliklarining ishchilari va qishloqda yashovchi boshqa fuqarolarning tomorqa maydonlariga ehtiyojini qondirish uchun 108,5 ming yer jumladan Qoraqalpogʻiston MSSRda 16,0 ming gektar, Andijon viloyatida 8,7 ming gektar, Buxoro viloyatida 12,6 ming gektar, Jizzax viloyatida 3,1 ming gektar, Qashqadaryo viloyatida 9,8 ming gektar, Namangan viloyatida 7,6 ming gektar, Samarqand viloyatida 7,7 ming gektar, Surxondaryo viloyatida 13,0 ming gektar, Sirdaryo viloyatida 3,9 ming gektar, Toshkent viloyatida 8,2 ming gektar, Fargʻona viloyatida 14,6 ming gektar, Xorazm viloyatida 3,3 ming gektar yer ajratilsin.

Xalq deputatlari nohiya, posyolka, qishloq va ovul Sovetlari, jamoa xoʻjaliklari va davlat xoʻjaliklari rahbarlari 1991-yilning sentyabriga qadar ajratib beriladigan tomorqa uchastkalari rasmiylashtirilishini taʼminlasinlar.

2. Qoraqalpogʻiston MSSR Vazirlar Kengashi, viloyat, nohiya, qishloq va ovul Sovetlari:

1989-1990-yillarda ajratib berilgan barcha tomorqa yerlarini qayta roʻyxatga olsin, foydalanilmayotgan uchastkalarni tortib olib, muhtoj oilalarga bersin;

uy-joylar ijtimoiy-madaniy inshootlar va muhandislik yer osti inshootlari joylashtirilishini hisobga olib, bosh rejalar va namunali loyihalarga qatʼiyan muvofiq tarzda qurilsin.

3. Shaxsiy yordamchi xoʻjaliklari egalari uyushmasi (oʻrtoq S.N. Usmonov) aholiga yer uchastkalari ajratishga oid qarorlarni qabul qilish va roʻyobga chiqarishda ijtimoiy adolatga rioya etilishini qatʼiy nazorat ostiga olsin.

4. Ushbu Farmon bajarilishini nazorat qilish Vazirlar Mahkamasi Raisining birinchi oʻrinbosari oʻrtoq I.H. Joʻrabekov zimmasiga yuklansin.