Import operatsiyalarini boshqarish tizimini takomillashtirish, bu operatsiyalarni amalga oshirish chogʻida shartnoma va moliya intizomini mustahkamlash maqsadida:

1. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, Makroiqtisodiyot va statistika vazirligi hamda Moliya vazirligining Oʻzbekiston Respublikasida 1998-yil 1-martdan boshlab tovarlar (ishlar va xizmatlar)ni import qilishni tariflar bilan boshqarish va import bitimlari tuzish hamda ularning ijrosini nazorat qilish tartibini yengillashtirishga doir chora-tadbirlar tizimini joriy etish toʻgʻrisidagi taklifi qabul qilinsin.

2. Oʻzbekiston Respublikasi vakolatli banklari va bojxona organlarida yuridik va jismoniy shaxslarning import bitimlarini hisobga olish va ular ijrosini nazorat qilishning amaldagi tartibi saqlab qolinsin.

5. Belgilab qoʻyilsinki, faqat Oʻzbekiston Respublikasi Moliya vazirligi va vakolatli banklargina xalqaro hisob-kitoblarni amalga oshirish chogʻida import bitimlari haqini toʻlash boʻyicha kafolat majburiyati berishga haqlidir.

Oʻzbekiston Respublikasi vazirliklari, idoralari, mahalliy hokimiyat organlariga import qilinayotgan tovarlar uchun haq toʻlash boʻyicha xorijiy hamkorlariga kafolatlar berish yoki oʻzga majburiyatlarni olish taqiqlansin.

Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, Moliya vazirligi, Davlat Bojxona qoʻmitasi, vakolatli banklar import bitimlari haqini toʻlash boʻyicha hisob-kitoblarning belgilangan tartibiga qatʼiy rioya qilsinlar.

6. Oʻzbekiston Respublikasi Vazirlar Mahkamasi ichki isteʼmol bozorini himoya qilishni taʼminlash manfaatlarini koʻzda tutib, bir hafta muddatda:

chetdan keltiriladigan aksiz soligʻi olinadigan tovarlar roʻyxatini, aksiz soligʻi stavkalari va import boj toʻlovlari roʻyxatini;

jismoniy shaxslar aksiz soligʻi toʻlamay olib kelishi mumkin boʻlgan tovarlar meʼyorini qayta koʻrib chiqsin.

7. Oʻzbekiston Respublikasi Prezidentining “Tovarlar (ishlar, xizmatlar) eksportini ragʻbatlantirishga doir qoʻshimcha chora-tadbirlar toʻgʻrisida” 1997-yil 10-oktabrdagi PF-1871-sonli Farmoniga 3-ilova 1998-yil 1-martdan oʻz kuchini yoʻqotgan deb hisoblansin.

8. Oʻzbekiston Respublikasi Vazirlar Mahkamasi ushbu Farmonni bajarish yuzasidan bir hafta muddatda qaror qabul qilsin.