Oʻzbekiston Respublikasining Havo kodeksiga va Oʻzbekiston Respublikasi Vazirlar Mahkamasining 2009-yil 29-oktabrdagi 289-son qarori bilan tasdiqlangan Havo kemalarining xalqaro parvozlari uchun Oʻzbekiston Respublikasi fuqaro aviatsiyasi aeroportlarini (aerodromlari) ochish tartibi toʻgʻrisidagi nizomga muvofiq Vazirlar Mahkamasi qaror qiladi:

1. Oʻzbekiston Respublikasi Parvozlar xavfsizligini nazorat qilish davlat inspeksiyasining Toshkent, Nukus va Samarqand shaharlari aeroportlarini xalqaro parvozlar uchun ochish toʻgʻrisidagi taklifi qabul qilinsin.

2. “Oʻzbekiston havo yoʻllari” milliy aviakompaniyasi Oʻzbekiston Respublikasi Parvozlar xavfsizligini nazorat qilish davlat inspeksiyasi bilan birgalikda Toshkent, Nukus va Samarqand shaharlari aeroportlarining maqomi boʻyicha maʼlumotlar tayyorlanishini va xalqaro aeronavigatsiya axboroti toʻplamlarida eʼlon qilinishini tashkil etsin.

3. Oʻzbekiston Respublikasi Davlat xavfsizlik xizmati, Davlat bojxona qoʻmitasi, Sogʻliqni saqlash vazirligi, Qishloq va suv xoʻjaligi vazirligi, Tashqi ishlar vazirligi Toshkent, Nukus va Samarqand shaharlari aeroportlarining oʻtkazish punktlarida chegara, bojxona, sanitariya va veterinariya nazoratini, shuningdek, viza taʼminotini qonun hujjatlarida belgilangan tartibda amalga oshirsin.

4. “Oʻzbekiston havo yoʻllari” milliy aviakompaniyasi Oʻzbekiston Respublikasi Milliy xavfsizlik xizmati, Davlat bojxona qoʻmitasi, Sogʻliqni saqlash vazirligi, Qishloq va suv xoʻjaligi vazirligi, Tashqi ishlar vazirligining tegishli boʻlinmalarini Toshkent, Nukus va Samarqand shaharlari aeroportlarining oʻtkazish punktlarida chegara, bojxona, sanitariya va veterinariya nazoratini, shuningdek, viza taʼminotini samarali amalga oshirish uchun zarur xizmat xonalari, aloqa vositalari, asbob-uskunalar va maxsus texnika bilan begʻaraz asosda taʼminlasin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.I. Zakirov zimmasiga yuklansin.