Oʻzbekiston Respublikasi Prezidentining “Angren” maxsus industrial zonasini barpo etish toʻgʻrisida” 2012-yil 13-apreldagi PF-4436-son Farmonining 10-bandini bajarish yuzasidan Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga qoʻshimchalar kiritilsin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov zimmasiga yuklansin.

1. Vazirlar Mahkamasining 2003-yil 26-avgustdagi 368-son qarori (Oʻzbekiston Respublikasi QT, 2003-y., 8-son, 78-modda) bilan tasdiqlangan Past rentabelli, zarar koʻrib ishlayotgan, iqtisodiy nochor davlat korxonalarini, past likvidli obyektlarni investor tomonidan investitsiya majburiyatlari qabul qilinishi sharti bilan investorlarga tanlov asosda bepul berish toʻgʻrisidagi Nizomda:

a) 4-bandga “qabul qilinadi” soʻzlaridan keyin “(obyekt “Angren” maxsus industrial zonasining Maʼmuriy kengashi tomonidan “Angren” maxsus industrial zonasi qatnashchilariga nolga teng xarid qiymati boʻyicha sotilishi hollari bundan mustasno)” soʻzlari qoʻshilsin;

b) 5-bandga quyidagi mazmundagi xat boshi qoʻshilsin:

“Investor tomonidan investitsiya majburiyatlari qabul qilinishi sharti bilan tanlov asosida nolga teng xarid qiymati boʻyicha sotiladigan obyektlar roʻyxati “Angren” maxsus industrial zonasining Maʼmuriy kengashi tomonidan ham tasdiqlanishi mumkin”;

v) 8-bandga “Davlat mulkini xorijiy investorlarga sotish boʻyicha tender savdolari oʻtkazuvchi Davlat komissiyasi” soʻzlaridan keyin “va “Angren” maxsus industrial zonasining Maʼmuriy kengashi” soʻzlari qoʻshilsin.

2. Vazirlar Mahkamasining “Toshkent viloyatida yuridik va jismoniy shaxslarga yer uchastkalari berish tartibini yanada takomillashtirish va ulardan maqsadli foydalanish chora-tadbirlari toʻgʻrisida” 2009-yil 20-yanvardagi 16-son qarorining 3-bandi birinchi xat boshiga quyidagi mazmundagi jumla qoʻshilsin: “Angren” maxsus industrial zonasida loyihalarni amalga oshiruvchi investorlar uchun yer uchastkalari ajratish “Angren” maxsus industrial zonasining Maʼmuriy kengashi qarorlari boʻyicha Toshkent viloyati hokimligi tomonidan amalga oshiriladi”.

3. Vazirlar Mahkamasining 2009-yil 18-fevraldagi 45-son qarori bilan tasdiqlangan Yer toʻgʻrisidagi qonunlarga, shaharsozlik normalari va qoidalariga muvofiq Toshkent viloyatida yuridik va jismoniy shaxslarga yer uchastkalari berish amaliyotini oʻrganish boʻyicha komissiya tomonidan Toshkent viloyatida yer uchastkalari berish toʻgʻrisida qarorlar qabul qilinishi tartibi toʻgʻrisidagi Nizomning 1-bandiga quyidagi mazmundagi xat boshi qoʻshilsin:

“Ushbu Nizomning amal qilishi “Angren” maxsus industrial zonasi tarkibiga kiritilgan yer uchastkalarini berishga tatbiq etilmaydi”.

4. Vazirlar Mahkamasining 2011-yil 25-maydagi 146-son qarori (Oʻzbekiston Respublikasi QT, 2011-y., 5-son, 40-modda) bilan tasdiqlangan Shaharsozlik faoliyatini amalga oshirish hamda qishloq xoʻjaligiga oid boʻlmagan boshqa ehtiyojlar uchun yer uchastkalari berish tartibi toʻgʻrisidagi Nizomning I boʻlimiga quyidagi mazmundagi 111-band qoʻshilsin:

“11¹. “Angren” maxsus industrial zonasida loyihalarni amalga oshiruvchi investorlar uchun yer uchastkalarini ajratish “Angren” maxsus industrial zonasi Maʼmuriy kengashining qarorlari boʻyicha Toshkent viloyati hokimligi tomonidan amalga oshiriladi”.

5. Vazirlar Mahkamasining 2011-yil 25-maydagi 147-son qarori (Oʻzbekiston Respublikasi QT, 2011-y., 5-son, 41-modda) bilan tasdiqlangan Tadbirkorlik faoliyatini amalga oshirish uchun yuridik va jismoniy shaxslarga tanlov asosida doimiy foydalanish uchun va uzoq muddatli ijaraga yer uchastkalari berish tartibi toʻgʻrisidagi Nizomning 1-bandiga quyidagi mazmundagi xat boshi qoʻshilsin:

“Ushbu Nizomning amal qilishi “Angren” maxsus industrial zonasi tarkibiga kiritilgan yer uchastkalarini berishga tatbiq etilmaydi”.