Isteʼmol mollari va xizmatlarning narxlari oʻsib borayotgan sharoitda Oʻzbekiston Respublikasining aholisini ijtimoiy muhofaza qilish maqsadida:

1. 1993-yilning 1-noyabridan boshlab Oʻzbekiston Respublikasining hududida:

ish haqining eng oz miqdori oyiga 16.200 soʻm qilib belgilanib, ish haqi oʻrtacha 1,2 baravar oshirilsin;

fuqarolarning soliq olinmaydigan daromadlarining eng past darajasi oyiga 16.200 soʻm miqdorida belgilansin;

mehnat pensiyasining eng oz miqdori oyiga 17.550 soʻm qilib belgilansin, hozirgi vaqtda amalda boʻlgan barcha turdagi pensiyalarning miqdorlari oʻrta hisobda 1,2 baravar oshirilsin.

2. Oliy oʻquv yurtlari talabalarining, texnikumlar va hunar-texnika bilim yurtlari oʻquvchilarining stipendiyalari 1,2 baravar koʻpaytirilsin, shu bilan birga talabalarning oshxonalari va bufetlarida tushlik ovqatlarning qiymatidan 50 foizli chegirmalar saqlab qolinsin.

3. Budjetdan pul bilan taʼminlanadigan vazirliklar va idoralar, Qoraqalpogʻiston Respublikasining Vazirlar Kengashi, viloyatlar hamda Toshkent shahar hokimlari, tashkilotlar va muassasalar ushbu Farmonda belgilangan eng oz ish haqi miqdoriga asoslanib, mehnatga haq toʻlash boʻyicha yagona tarif setkasi razryadlariga muvofiq xodimlarning mansab okladlari oʻz vaqtida qaytadan hisoblab chiqilishini taʼminlasinlar.

4. Oʻzbekiston Respublikasining Ijtimoiy taʼminot vazirligi mazkur Farmonga muvofiq pensiyalarning miqdorlari qaytadan hisoblab chiqilishini taʼminlasin.

5. Oʻzbekiston Respublikasining Moliya vazirligi budjetdan taʼminlanadigan muassasalar va tashkilotlar xodimlarining ish haqini, pensiyalar va stipendiyalarni oshirish bilan bogʻliq sarf-xarajatlarni pul bilan taʼminlash manbalarini aniqlasin.

6. Mulkchilik shakllaridan qatʼi nazar, xoʻjalik hisobidagi korxonalar va tashkilotlarga mazkur Farmonga muvofiq daromad manbalarini qidirib topishiga qarab, daromad manbalari vaqtincha yetishmay qolgan taqdirda esa bank muassasalari aniq maqsadni koʻzlab beradigan kreditlar hisobidan mehnat haqini oshirish tavsiya qilinsin.

7. Ushbu Farmon bajarilishini nazorat qilish Oʻzbekiston Respublikasining Vazirlar Mahkamasi zimmasiga yuklatilsin.