Musiqa-raqs sanʼatini rivojlantirishni davlat yoʻli bilan qoʻllab-quvvatlash maqsadida, shuningdek Oʻzbekiston konsert ijodiy jamoalarining istaklarini eʼtiborga olib:

1. “Turkiston” saroyi va “Bahor” komplekslari, Oʻzbekiston Respublikasi Madaniyat ishlari vazirligining ijodiy konsert tashkilotlari negizida “Oʻzbeknavo” gastrol-konsert birlashmasi tashkil qilinsin.

2. Belgilab qoʻyilsinki, “Oʻzbeknavo” gastrol-konsert birlashmasi Qoraqalpogʻiston Respublikasi va viloyatlarda hududiy boʻlimlarga ega boʻlgan mustaqil ijodiy-ishlab chiqarish kompleksi hisoblanib, u mulkchilik shakllaridan va qaysi idoraga qarashli ekanligidan qatʼi nazar, filarmoniya, estrada, raqs, folklor va boshqa ijodiy jamoalarni birlashtiradi.

“Oʻzbeknavo” birlashmasining faoliyatiga badiiy-uslubiy rahbarlikni Oʻzbekiston Respublikasining Madaniyat ishlari vazirligi amalga oshiradi.

3. “Oʻzbeknavo” gastrol-konsert birlashmasining asosiy vazifalari quyidagilardan iborat:

Oʻzbekiston xalqlarining milliy mumtoz va zamonaviy musiqa hamda raqs sanʼatining eng yaxshi yutuqlarini rivojlantirish, asrash va targʻib qilish;

iqtisodiy va ijtimoiy rivojlanishining istiqbolli rejalarini, maqsadli, kompleks, madaniy, ilmiy-texnikaviy, iqtisodiy va ijtimoiy dasturlarni ishlab chiqib, amalga oshirish;

xorijiy firmalar oʻzaro manfaatli tashqi iqtisodiy aloqalarning, madaniy, savdo-iqtisodiy va ilmiy-texnikaviy hamkorlikning yangi shakllarini rivojlantirish;

gastrol-konsert faoliyatini muvofiqlashtirish hamda ijodiy jamoalar va alohida ijrochilar tomonidan aholiga madaniy xizmat koʻrsatishni takomillashtirish.

4. Gastrol-konsert birlashmasi, uning korxonalari va tashkilotlari davlat budjetiga oʻtkaziladigan davlat soliqlarini toʻlashdan 3 yil muddatga ozod qilinsin.

Belgilab qoʻyilsinki, imtiyozli soliq olinishi munosabati bilan boʻshaydigan mablagʻlardan musiqa-raqs sanʼatini yanada rivojlantirishga, uning moddiy-texnika bazasini mustahkamlashga aniq maqsadni koʻzlab foydalaniladi.

5. Oʻzbekiston Respublikasi Adliya vazirligi bir hafta muddatda Oʻzbekiston Respublikasining amaldagi qonun hujjatlariga zarur oʻzgartishlar kiritish toʻgʻrisidagi takliflarni ishlab chiqsin.

6. Oʻzbekiston Respublikasining Vazirlar Mahkamasi bir hafta muddat ichida “Oʻzbeknavo” gastrol-konsert birlashmasining faoliyatini tashkil etish masalalari yuzasidan qaror qabul qilsin.