“Notariat toʻgʻrisida”gi Oʻzbekiston Respublikasi Qonunining 19-moddasiga muvofiq va oʻz kasb majburiyatlarini bajarishda notariuslarning javobgarligini oshirish maqsadida Vazirlar Mahkamasi qaror qiladi:

1. Notarius tomonidan oʻz kasb majburiyatlari buzilishi oqibatida yetkazilgan zararni qoplash tartibi toʻgʻrisidagi Nizom 1-ilovaga muvofiq tasdiqlansin.

2. Vazirlar Mahkamasining “Sudlar va adliya organlarini rivojlantirish jamgʻarmasini tashkil etish toʻgʻrisida” 2003-yil 18-martdagi 147-son qaroriga (Oʻzbekiston Respublikasi QT, 2003-y., 3-son, 26-modda) 2-ilovaga muvofiq oʻzgartirish va qoʻshimchalar kiritilsin.

3. Mazkur qarorning bajarilishini nazorat qilish Oʻzbekiston Respublikasi Adliya vaziri R.A. Muhitdinov zimmasiga yuklansin.

1. Ushbu Nizom “Notariat toʻgʻrisida”gi Oʻzbekiston Respublikasi Qonunining 19-moddasiga muvofiq notarius tomonidan oʻz kasb majburiyatlari buzilishi oqibatida yuridik va jismoniy shaxslarga yetkazilgan zararning (keyingi oʻrinlarda “zarar” deb ataladi) davlat tomonidan qoplanishi tartibini belgilaydi.

2. Zarar davlat tomonidan keyinchalik notariusga toʻlangan qoplash miqdorida aksincha talab (regress) qoʻyilgan holda Sudlar va adliya organlarini rivojlantirish jamgʻarmasi (keyingi oʻrinlarda “Jamgʻarma” deb ataladi) mablagʻlari hisobiga qoplanadi.

3. Yuridik va jismoniy shaxs oʻziga yetkazilgan zarar qoplanishi huquqiga ega.

Sudning zararni qoplash toʻgʻrisida qonuniy kuchga kirgan qarori zarar qoplanishi uchun asos hisoblanadi.

4. Jamgʻarmadan mablagʻ ajratish uchun Qoraqalpogʻiston Respublikasi Adliya vazirligi, viloyat yoki Toshkent shahar adliya boshqarmasi (keyingi oʻrinlarda “adliya boshqarmasi” deb ataladi) sudning zararni qoplash toʻgʻrisida qonuniy kuchga kirgan qarori adliya boshqarmasiga tushgandan keyin ikki kun muddatda Jamgʻarmaning Ijro etuvchi direksiyasiga sudning qarorini ilova qilgan holda tegishli buyurtmanomani kiritadi.

5. Jamgʻarmaning Ijro etuvchi direksiyasi buyurtmanoma tushgan kundan boshlab ikki kun mobaynida buyurtmanomada koʻrsatilgan mablagʻlarni adliya boshqarmasining shaxsiy gʻaznachilik hisob raqamiga oʻtkazadi.

Mablagʻlar shaxsiy gʻaznachilik hisob raqamiga tushgan kundan boshlab bir kun mobaynida adliya boshqarmasi ushbu mablagʻlarni zararni qoplash uchun yuridik va jismoniy shaxslarning tegishli bank hisob raqamlariga oʻtkazadi.

6. Sudning zararni qoplash toʻgʻrisida qonuniy kuchga kirgan qarori asosida adliya boshqarmasi tomonidan notariusni intizomiy javobgarlikka tortish toʻgʻrisidagi masala hal qilinishi kerak.

7. Adliya boshqarmasi tomonidan qoplangan summa keyinchalik aksincha talab (regress) tartibida notariusdan undirib olinishi kerak.

Notarius adliya boshqarmasi tomonidan zararni qoplash uchun yuridik va jismoniy shaxslarga oʻtkazilgan mablagʻlarning toʻliq summasini qoplaydi.

8. Yuridik va jismoniy shaxsga zarar qoplangandan soʻng ikki kundan kechikmay adliya boshqarmasi notariusga toʻlangan qoplash miqdorida aksincha talab (regress) bilan murojaat qiladi.

Notarius oʻzi tomonidan yuridik va jismoniy shaxsga yetkazilgan zarar summasini adliya boshqarmasiga belgilangan tartibda ixtiyoriy ravishda qoplash huquqiga ega.

Notarius tomonidan zararni qoplash adliya boshqarmasining shaxsiy gʻaznachilik hisob raqamiga pul mablagʻlari kiritish yoʻli bilan amalga oshiriladi.

Zararning notarius tomonidan boshqa shaklda qoplanishiga yoʻl qoʻyilmaydi.

9. Oʻzbekiston Respublikasining Mehnat kodeksi 207-moddasiga muvofiq notariusdan oʻrtacha oylik ish haqidan ortiq boʻlmagan yetkazilgan zarar summasini undirish adliya boshqarmasi rahbarining yetkazilgan zararni notariusdan undirish toʻgʻrisidagi buyrugʻiga binoan amalga oshiriladi. Buyruq adliya boshqarmasi tomonidan yuridik va jismoniy shaxsga zarar qoplangan kundan boshlab bir oydan kechikmay qabul qilinishi mumkin.

Agar notariusdan undirilishi kerak boʻlgan yetkazilgan zarar summasi uning oʻrtacha oylik ish haqidan ortiq boʻlsa yoki adliya boshqarmasi tomonidan yuridik va jismoniy shaxsga zarar qoplangan kundan soʻng bir oylik muddat tamom boʻlsa, undirish sud tartibida amalga oshiriladi.

10. Sudning toʻlangan qoplash miqdorida yetkazilgan zararni notariusdan undirish toʻgʻrisidagi qarori belgilangan tartibda ijro etilishi kerak.

11. Zararni qoplash hisobiga notariusdan adliya boshqarmasining shaxsiy gʻaznachilik hisob raqamiga tushgan mablagʻ ikki kundan kechikmay Jamgʻarmaning shaxsiy gʻaznachilik hisob raqamiga yuboriladi.

Notarius tomonidan oʻz kasb majburiyatlari buzilishi oqibatida yetkazilgan zararni qoplash sxemasi ushbu Nizomga ilovada keltirilgan.

12. Yuridik va jismoniy shaxslarga zararni qoplash toʻgʻrisidagi ishlar sudlarda koʻrib chiqilishi munosabati bilan adliya boshqarmasi tomonidan sarflangan xarajatlar ham ushbu Nizomga muvofiq aksincha talab (regress) tartibida notariusdan undirilishi kerak.

13. Notarius bilan mehnat shartnomasining toʻxtatilishi uni zarar va tegishli xarajatlarni qoplash majburiyatidan ozod qilmaydi.

14. Sudning notarius tomonidan oʻz kasb majburiyatlari buzilishi oqibatida yetkazilgan zararni qoplash toʻgʻrisidagi qarori majburiy ijro etilgan hollarda ham zarar qonun hujjatlarida belgilangan tartibda Jamgʻarma mablagʻlari hisobiga qoplanishi kerak.

15. Ushbu Nizomni buzishda aybdor boʻlgan shaxslar qonun hujjatlariga muvofiq javob beradi.

1. 3-bandga quyidagi mazmundagi oltinchi xatboshi qoʻshilsin:

“notarius tomonidan oʻz kasb majburiyatlari buzilishi oqibatida yetkazilgan zararni qoplashga va tegishli xarajatlarga”;

oltinchi xatboshi yettinchi xatboshi deb hisoblansin.

2. Sudlar va adliya organlarini rivojlantirish jamgʻarmasi toʻgʻrisidagi Nizomning (1-ilova) 4-bandi oʻn uchinchi xatboshi quyidagi mazmundagi oʻn uchinchi—oʻn beshinchi xatboshilar bilan almashtirilsin:

“Jamgʻarma mablagʻlari:

mablagʻlarni Oʻzbekiston Respublikasi Oliy sudi orqali ajratish yoʻli bilan Sud qonunchiligini demokratlashtirish va liberallashtirish hamda sud tizimi mustaqilligini taʼminlash boʻyicha tadqiqot markazi faoliyatini moliyalashtirishga;

notarius tomonidan oʻz kasb majburiyatlari buzilishi oqibatida yetkazilgan zararni va u bilan bogʻliq xarajatlarni qoplashga yoʻnaltiriladi. Notarius tomonidan oʻz kasb majburiyatlari buzilishi oqibatida yetkazilgan zararni va u bilan bogʻliq xarajatlarni qoplash maqsadida Jamgʻarma mablagʻlaridan foydalanish tartibi Oʻzbekiston Respublikasi Vazirlar Mahkamasi tomonidan belgilanadi”;

oʻn toʻrtinchi va oʻn beshinchi xatboshilar tegishli ravishda oʻn oltinchi va oʻn yettinchi xatboshilar deb hisoblansin.