Mamlakatimizning janubiy chegaralari orqali yurtimizga suqilib kirmoqchi boʻlgan terrorchi-jangarilar guruhiga qarshi kurashda jasorat va matonat koʻrsatib, qahramonlarcha halok boʻlgan harbiy xizmatchilarning ota-onalariga, oilalariga, yoru birodarlariga hukumatimiz, butun xalqimiz nomidan yana bir bor chuqur taʼziya izhor etib, hamdardlik bildirib, ularga yordam koʻrsatish maqsadida Vazirlar Mahkamasi qaror qiladi:

1. Oʻzbekiston Respublikasi Mudofaa, Ichki ishlar, Moliya vazirliklari birgalikda Oʻzbekiston Respublikasi qonunchiligi va idoraviy meʼyoriy hujjatlarga muvofiq, halok boʻlgan harbiy xizmatchilarning oilalariga toʻlanishi lozim boʻlgan mablagʻlarni tezkorlik bilan yetkazib berishni taʼminlasin. Shuningdek, “Kafolat” sugʻurta kompaniyasi belgilangan tartibda sugʻurta toʻlovlarini amalga oshirsin.

2. Halok boʻlgan harbiy xizmatchilar oilalarining har biriga qoʻshimcha moddiy yordam tariqasida Vazirlar Mahkamasi zaxira fondidan bir million soʻm miqdorida moddiy yordam puli toʻlansin. Oʻzbekiston Respublikasi Moliya vazirligi ushbu yordam pulining toʻlanishini taʼminlasin.

3. Mahalliy hokimlik idoralari:

halok boʻlgan harbiy xizmatchilar oilalarining turmush sharoiti va ehtiyojidan kelib chiqib, mahalliy budjet mablagʻlari hisobidan zarur yordam choralarini koʻrsin;

halok boʻlgan harbiy xizmatchilarning nomlarini abadiylashtirish yuzasidan tegishli qarorlar qabul qilsin.