|
Hujjat kuchini yo‘qotgan 22.02.2021
|
Hujjat 04.10.2001 sanasi holatiga
Amaldagi versiyaga o‘tish |
Oʻzbekiston Respublikasi Vazirlar Mahkamasining
qarori
“MEDIZ” QOʻSHMA KORXONASIDA BIR MARTA FOYDALANILADIGAN SHPRITSLAR ISHLAB CHIQARISHNI KENGAYTIRISH CHORA-TADBIRLARI TOʻGʻRISIDA
LexUZ sharhiMazkur qaror Oʻzbekiston Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.
Tibbiyot sanoatini yanada rivojlantirish va ichki bozorni mamlakatimizda ishlab chiqarilgan sifatli tibbiyot buyumlari bilan toʻldirish maqsadida Vazirlar Mahkamasi qaror qiladi:
1. Quyidagilar:
“Mediz” qoʻshma korxonasi muassislari tarkibiga 1,17 mln YEVRO miqdoridagi ulushga ega boʻlgan yangi xorijiy investor — “Rhagmarlan GmbN” (Germaniya) firmasi jalb qilinganligi;
“Mediz” qoʻshma korxonasi va “Rhagmatech Rharma Maschinen GmbN” (Germaniya) firmasi oʻrtasida bir marta foydalaniladigan shpritslar ishlab chiqarishga moʻljallangan umumiy qiymati 7,81 mln YEVRO boʻlgan texnologiya asbob-uskunalari yetkazib berish va ularni montaj qilish yuzasidan kontrakt tuzilganligi maʼlumot uchun qabul qilinsin.
2. Belgilab qoʻyilsinki, koʻrsatib oʻtilgan kontraktni mablagʻ bilan taʼminlash quyidagi tartibda:
1,17 mln YEVRO miqdoridagi kontrakt qiymatining 15 foizi “Rharmaplan GmbN” kompaniyasining “Mediz” qoʻshma korxonasi ustav fondiga qoʻshilgan ulushi hisobiga;
6,64 mln YEVRO miqdoridagi kontrakt qiymatining 85 foizi xorijiy bank mablagʻlarini “Germes” eksport-kredit agentligining sugʻurta qoplamasi ostida qayta moliyalash yoʻli bilan Oʻzbekiston Respublikasi Tashqi iqtisodiy faoliyat milliy bankining krediti hisobiga amalga oshiriladi.
3. Oʻzbekiston Respublikasi Tashqi iqtisodiy faoliyat milliy banki bir oy muddatda kredit bitimini tuzsin va kredit mablagʻlarining “Mediz” qoʻshma korxonasiga, marjani koʻpi bilan yiliga 0,5 foiz miqdorida belgilagan xolda, qayta moliyalanishini taʼminlasin.
4. “Mediz” qoʻshma korxonasi:
asosiy qarzni, foizlar, vositachilik haqi va kredit bitimi shartlariga koʻra xorijiy kreditga xizmat koʻrsatish boʻyicha boshqa xarajatlarning ishlab chiqarish faoliyati hisobiga ilovaga* muvofiq qoplanishini taʼminlasin;
* Ilova rus tilidagi matnda berilgan.
asbob-uskunalarning yetkazib berilishi, montaj qilinishi, sozlanishi-ishga tushirilishi va mutaxassislarning oʻqitilishi ustidan puxta nazorat tashkil etsin.
5. Oʻzbekiston Respublikasi Moliya vaziri Oʻzbekiston Respublikasi Tashqi iqtisodiy faoliyat milliy bankining “Vank Gesellshaft Berlin” xorijiy banki oldidagi toʻlov majburiyatlari boʻyicha, shuningdek “Mediz” qoʻshma korxonasining toʻlov majburiyatlari boʻyicha Tashqi iqtisodiy faoliyat milliy bankiga Oʻzbekiston Respublikasi Hukumati nomidan belgilangan tartibda kafolat berishga vakil qilinsin.
6. Oʻzbekiston Respublikasi Adliya vazirligi Oʻzbekiston Respublikasi Hukumatining kredit beruvchi xorijiy bank oldidagi kafolati yuzasidan banklararo bitimga ilovada belgilangan shakl boʻyicha yuridik xulosa bersin.
7. Loyihani amalga oshirishga yoʻnaltirilayotgan xarajatlarni kamaytirish va zavodning mahsulotni sotish narxlarini kamaytirish maqsadida “Mediz” qoʻshma korxonasi import qilayotgan texnologiya asbob-uskunalari, texnika hujjatlari, shuningdek bir marta foydalaniladigan shpritslar ishlab chiqarish boʻyicha qoʻshimcha quvvatlarini barpo etish doirasidagi bosh montaj va sozlash-ishga tushirishga oid ishlar boj toʻlovlaridan (bojxona rasmiylashtiruvi uchun yigʻimlardan tashqari) ozod etilsin.
Keyingi tahrirga qarang.
8. Oʻzbekiston Respublikasi Makroiqtisodiyot va statistika vazirligi, Moliya vazirligi mazkur loyihani Xorijiy investitsiyalar va kreditlar hisobiga 2001-yilda amalga oshiriladigan investitsiya loyihalarining aniq dasturiga kiritsin.
9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari R.S. Azimov va H.S. Karomatov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
2001-yil 4-oktabr,
399-son
