V.P.Chkalov nomidagi Toshkent aviatsiya ishlab chiqarish birlashmasida ishlab chiqarishni boshqarishni takomillashtirish, bozor munosabatlari tizimini joriy etish maqsadida Vazirlar Mahkamasi qaror qiladi:

1. Oʻzbekiston Respublikasi Davlat mulki qoʻmitasi, V.P.Chkalov nomidagi Toshkent aviatsiya ishlab chiqarish birlashmasi, Tashqi iqtisodiy aloqalar vazirligi va Tashqi iqtisodiy faoliyat milliy bankining V.P.Chkalov nomidagi Toshkent aviatsiya ishlab chiqarish birlashmasini davlat-aksionerlik jamiyatiga aylantirish toʻgʻrisidagi taklifi qabul qilinsin.

2. “V.P.Chkalov nomidagi Toshkent aviatsiya ishlab chiqarish birlashmasi” davlat-aksionerlik jamiyati aksiyalari paketlari quyidagi ulushlarda taqsimlanishiga rozilik berilsin:

51 foizi — davlat ulushi;

15 foizi — mehnat jamoasi ulushi;

10 foizi — Tashqi iqtisodiy aloqalar vazirligining xoʻjalik hisobidagi boʻlinmalari ulushi;

10 foizi — Tashqi iqtisodiy faoliyat milliy banki ulushi;

14 foizi — yuridik shaxslarga, shu jumladan, xorijiy yuridik shaxslarga erkin sotiladigan ulush.

3. Belgilab qoʻyilsinki, “V.P.Chkalov nomidagi Toshkent aviatsiya ishlab chiqarish birlashmasi” davlat-aksionerlik jamiyati:

yuridik shaxs hisoblanadi hamda ochiq turdagi davlat-aksionerlik jamiyati shaklida taʼsis etiladi;

V.P.Chkalov nomidagi Toshkent aviatsiya ishlab chiqarish birlashmasining davlat mulki, Tashqi iqtisodiy aloqalar vazirligining xoʻjalik hisobidagi boʻlinmalari, Tashqi iqtisodiy faoliyat milliy bankining va boshqa aksionerlarning pul mablagʻlari hisobiga 3,43 mlrd. soʻm miqdoridagi dastlabki ustav jamgʻarmasini shakllantiradi;

oʻz faoliyatini Oʻzbekiston Respublikasining amaldagi qonun hujjatlari, jamiyatning taʼsis shartnomasi va ustavi asosida amalga oshiradi;

ilgari V.P.Chkalov nomidagi Toshkent aviatsiya ishlab chiqarish birlashmasi tomonidan tuzilgan barcha shartnomalar va qabul qilingan majburiyatlar boʻyicha javob beradi;

Oʻzbekiston Respublikasi Vazirlar Mahkamasiga hisob beradi.

4. Quyidagilar “V.P.Chkalov nomidagi Toshkent aviatsiya ishlab chiqarish birlashmasi” davlat-aksionerlik jamiyatining asosiy vazifalari va faoliyati yoʻnalishlari etib belgilansin:

raqobatga bardoshli aviatsiya texnikasi va boshqa texnika yaratish va ishlab chiqarish, xalq isteʼmol tovarlari ishlab chiqarishni va ularning turlarini kengaytirish;

sotish bozorlarini va eksportga mahsulot yetkazib berishni kengaytirishga oid marketing tadqiqotlari oʻtkazish;

innovatsiya faoliyatini amalga oshirish, moliya-sanoat guruhlari hamda ishlab chiqarish samaradorligini oshirishni taʼminlovchi kooperatsiyaning boshqa shakllarini barpo etish;

investitsiyalarni keng jalb etish, yetakchi xorijiy firmalar va kompaniyalar bilan birgalikda aviatsiya texnikasi ishlab chiqaradigan va sotadigan qoʻshma ishlab chiqarishlar tashkil etish, shu jumladan, lizing asosida.

5. “V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyatining boshqaruv organlari tashkiliy tuzilmasiga, ijroiya apparati tuzilmasiga, asosiy ishlab chiqarish sexlarining ilovaga muvofiq namunaviy tuzilmasiga 1, 2 va 3-ilovalarga muvofiq rozilik berilsin.

Belgilansinki, “V.P.Chkalov nomidagi Toshkent aviatsiya ishlab chiqarish birlashmasi” davlat-aksionerlik jamiyati Direktorlar kengashi raisi, Direktorlar kengashi aʼzolari (funksional direktorlar va mintaqaviy boʻlinmalar direktorlari) aksionerlar umumiy yigʻilishi (konferensiyasi)da saylanadilar hamda Oʻzbekiston Respublikasi Vazirlar Mahkamasi tomonidan lavozimga tasdiqlanadilar.

V.P.Chkalov nomidagi Toshkent aviatsiya ishlab chiqarish birlashmasi maʼmuriy xodimlari sonini qisqartirishga, ishlab chiqarishni boshqarishning ortiqcha tarkibiy boʻgʻinlarini tugatishga oid olib borilayotgan tayyorgarlik tadbirlari maʼqullansin.

6. Oʻzbekiston Respublikasi Davlat mulki qoʻmitasi:

bir hafta muddatda V.P.Chkalov nomidagi Toshkent aviatsiya ishlab chiqarish birlashmasini aksionerlik jamiyatiga aylantirishning reja-jadvalini ishlab chiqsin va belgilangan tartibda taqdim etsin;

“V.P.Chkalov nomidagi Toshkent aviatsiya ishlab chiqarish birlashmasi” davlat-aksionerlik jamiyatiga aksiyalarning davlat ulushini boshqarish huquqini bersin;

aksiyalarni hamda davlatga tegishli aksiyalar boʻyicha dividendlardan tushayotgan mablagʻlarni ishlab chiqarishni rivojlantirish uchun 3 yil davomida davlat-aksionerlik jamiyati hisobiga oʻtkazish huquqini bersin;

mehnat jamoasining aksionerlik ulushida aksiyalarning 5 foizini tekin berishni nazarda tutsin.

8. Oʻzbekiston Respublikasi Moliya vazirligi, Davlat mulki qoʻmitasi, “V.P.Chkalov nomidagi Toshkent aviatsiya ishlab chiqarish birlashmasi” davlat-aksionerlik jamiyati, Kommunal xizmat koʻrsatish vazirligi, Toshkent, Fargʻona, Andijon shaharlari va Toshkent viloyati hokimliklari bilan birgalikda bir oy muddatda “V.I.Chkalov nomidagi Toshkent aviatsiya ishlab chiqarish birlashmasi” davlat-aksionerlik jamiyati balansidan:

uy-joy-kommunal boshqarmasi obyektlarini va bolalar maktabgacha tarbiya muassasalarini Kommunal xizmat koʻrsatish vazirligi va Toshkent, Fargʻona va Andijon shaharlari hokimliklari balansiga berish;

yordamchi xoʻjalik (“Pomir” agrofirmasi)ni Toshkent viloyati hokimligi balansiga berish masalasini koʻrib chiqsinlar hamda balansdan balansga oʻtkazish tartibi va muddatlarini belgilasinlar.

9. Oʻzbekiston Respublikasi Davlat mulki qoʻmitasi, Adliya vazirligi “V.P.Chkalov nomidagi Toshkent aviatsiya ishlab chiqarish birlashmasi” davlat-aksionerlik jamiyatining ishlab chiqilgan Taʼsis shartnomasi va Ustavi loyihalari boʻyicha xulosalarni bir hafta muddatda Vazirlar Mahkamasiga taqdim etsinlar.

10. Oʻzbekiston Respublikasi Davlat mulki qoʻmitasi, V.P.Chkalov nomidagi Toshkent aviatsiya ishlab chiqarish birlashmasi, Tashqi iqtisodiy faoliyat milliy banki, Tashqi iqtisodiy aloqalar vazirligi ikki hafta muddatda V.P.Chkalov nomidagi Toshkent aviatsiya ishlab chiqarish birlashmasini ochiq turdagi davlat-aksionerlik jamiyatiga aylantirish boʻyicha taʼsis konferensiyasini tayyorlasinlar va oʻtkazsinlar.

11. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ. T. Sultonov zimmasiga yuklansin.