Oʻzbekiston Respublikasi Soliq kodeksi (Oʻzbekiston Respublikasi qonun hujjatlari toʻplami, 2007-y., 52 (II)-son), Oʻzbekiston Respublikasi “Davlat soliq xizmati toʻgʻrisida”gi Qonunining 7-moddasi (Oʻzbekiston Respublikasi Oliy Majlisi Axborotnomasi, 1997-y., 9-son, 232-modda) va Oʻzbekiston Respublikasi “Davlat bojxona xizmati toʻgʻrisida”gi Qonunining 6 va 7-moddalariga (Oʻzbekiston Respublikasi Oliy Majlisi Axborotnomasi, 1997-y., 9-son, 230-modda) muvofiq Oʻzbekiston Respublikasi Moliya vazirligi, Iqtisodiyot vazirligi, Davlat soliq qoʻmitasi va Davlat bojxona qoʻmitasi qaror qiladilar:

1. Oʻzbekiston Respublikasi Moliya vazirligi, Iqtisodiyot vazirligi, Davlat soliq qoʻmitasi va Davlat bojxona qoʻmitasining 2007-yil 27-apreldagi 47, 21, 2007-29, 01-02/8-11-sonli “Ishlab chiqarishni modernizatsiyalash, texnik va texnologik qayta jihozlashni amalga oshiruvchi xoʻjalik yurituvchi subyektlar tomonidan imtiyozlarni qoʻllash tartibi toʻgʻrisidagi nizomni tasdiqlash haqida”gi qaroriga (roʻyxat raqami 1688, 2007-yil 11-iyun) (Oʻzbekiston Respublikasi qonun hujjatlari toʻplami, 2007-y., 24-son, 254-modda) ilovaga muvofiq oʻzgartirish va qoʻshimchalar kiritilsin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

1. Qarorda:

a) nomi quyidagi tahrirda bayon etilsin:

“Ishlab chiqarishni modernizatsiyalash, texnik va texnologik qayta jihozlash, ishlab chiqarishni yangi qurilish shaklida kengaytirish, ishlab chiqarish ehtiyojlari uchun foydalaniladigan binolar va inshootlarni rekonstruksiya qilishni amalga oshiruvchi xoʻjalik yurituvchi subyektlar tomonidan imtiyozlarni qoʻllash tartibi toʻgʻrisidagi nizomni tasdiqlash haqida”.

b) 1-band quyidagi tahrirda bayon etilsin:

“1. Ishlab chiqarishni modernizatsiyalash, texnik va texnologik qayta jihozlash, ishlab chiqarishni yangi qurilish shaklida kengaytirish, ishlab chiqarish ehtiyojlari uchun foydalaniladigan binolar va inshootlarni rekonstruksiya qilishni amalga oshiruvchi xoʻjalik yurituvchi subyektlar tomonidan imtiyozlarni qoʻllash tartibi toʻgʻrisidagi nizom ilovaga muvofiq tasdiqlansin”.

2. Nizomda:

a) nomi quyidagi tahrirda bayon etilsin:

“Ishlab chiqarishni modernizatsiyalash, texnik va texnologik qayta jihozlash, ishlab chiqarishni yangi qurilish shaklida kengaytirish, ishlab chiqarish ehtiyojlari uchun foydalaniladigan binolar va inshootlarni rekonstruksiya qilishni amalga oshiruvchi xoʻjalik yurituvchi subyektlar tomonidan imtiyozlarni qoʻllash tartibi toʻgʻrisida nizom”;

b) muqaddima quyidagi tahrirda bayon etilsin:

“Mazkur Nizom Oʻzbekiston Respublikasi Soliq kodeksi va Oʻzbekiston Respublikasi Prezidentining 2007-yil 14-martdagi PF-3860-sonli “Ishlab chiqarishni modernizatsiyalash, texnik va texnologik qayta jihozlashni ragʻbatlantirishga oid qoʻshimcha chora-tadbirlar toʻgʻrisida”gi Farmoniga muvofiq, ishlab chiqarishni modernizatsiyalash, texnik va texnologik qayta jihozlash, ishlab chiqarishni yangi qurilish shaklida kengaytirish, ishlab chiqarish ehtiyojlari uchun foydalaniladigan binolar va inshootlarni rekonstruksiya qilishni amalga oshiruvchi xoʻjalik yurituvchi subyektlar tomonidan imtiyozlarni qoʻllash tartibini belgilaydi”;

v) 1-band quyidagi mazmundagi xatboshlari bilan toʻldirilsin:

“ishlab chiqarish ehtiyojlari uchun foydalaniladigan binolar va inshootlarni rekonstruksiya qilish — ishlab chiqarishni takomillashtirish va uning texnik-iqtisodiy koʻrsatkichlarini oshirish bilan bogʻliq boʻlgan hamda ishlab chiqarish quvvatlarini oshirish, mahsulot (ishlar, xizmatlar) sifatini yaxshilash va nomenklaturasini oʻzgartirish maqsadlarida rekonstruksiya qilish loyihasi boʻyicha amalga oshiriladigan tovarlarni ishlab chiqarish, ishlarni bajarish yoki xizmatlarni koʻrsatish ehtiyojlari uchun foydalaniladigan mavjud binolar va inshootlarni qayta qurish;

ishlab chiqarishni yangi qurilish shaklida kengaytirish — mahsulot ishlab chiqarish, ish bajarish va xizmat koʻrsatish jarayonida foydalanish maqsadida yangi bino va inshootlarning qurilishi”;

g) 2-bandning birinchi xatboshisi quyidagi tahrirda bayon etilsin:

“Yangi texnologik jihozni sotib oluvchi, ishlab chiqarishni modernizatsiyalash, texnik va texnologik qayta jihozlash, ishlab chiqarishni yangi qurilish shaklida kengaytirish, ishlab chiqarish ehtiyojlari uchun foydalaniladigan binolar va inshootlarni rekonstruksiya qilishni amalga oshiruvchi xoʻjalik yurituvchi subyektlarga yuridik shaxslardan olinadigan foyda soligʻi, yagona soliq toʻlovi va mol-mulk soligʻi boʻyicha imtiyozlar ushbu Nizomda belgilangan tartibda taqdim etiladi”;

d) 3-band quyidagi tahrirda bayon etilsin:

“3. Lizing obyektini qoʻshimcha lizingga berishda, ushbu Nizomda belgilangan yuridik shaxslardan olinadigan foyda soligʻi, yagona soliq toʻlovi va mol-mulk soligʻi boʻyicha imtiyozlar qoʻshimcha lizingni oluvchiga taalluqli boʻladi. Bu holda lizing obyektini qoʻshimcha lizingga beruvchi lizing oluvchiga yuridik shaxslardan olinadigan foyda soligʻi, yagona soliq toʻlovi va mol-mulk soligʻi boʻyicha nazarda tutilgan imtiyozlar tatbiq etilmaydi”;

e) 4-bandda:

birinchi xatboshisi quyidagi tahrirda bayon etilsin:

“Soliq imtiyozlari (mol-mulk soligʻi boʻyicha imtiyozlar bundan mustasno) yangi jihoz ishlab chiqarishga joriy etilgan yoki oʻz ishlab chiqarishini modernizatsiyalash, texnik va texnologik qayta jihozlash, ishlab chiqarishni yangi qurilish shaklida kengaytirish, ishlab chiqarish ehtiyojlari uchun foydalaniladigan binolar va inshootlarni rekonstruksiya qilish amalga oshirilgan navbatdagi soliq davridan boshlab qoʻllaniladi”;

quyidagi mazmundagi ikkinchi xatboshi bilan toʻldirilsin:

“Yuridik shaxslardan olinadigan foyda soligʻi va yagona soliq toʻlovi boʻyicha imtiyozlar foyda (tushum) qaysi faoliyat turidan olingan boʻlishidan qatʼi nazar, soliq solinadigan foydaning (soliq solinadigan bazaning) barcha summasiga nisbatan tatbiq etiladi”;

ikkinchi va uchinchi xatboshilari uchinchi va toʻrtinchi xatboshilari deb hisoblansin;

toʻrtinchi xatboshidagi “daromad soligʻi” degan soʻzlar “yuridik shaxslardan olinadigan foyda soligʻi” degan soʻzlar bilan almashtirilsin;

j) 5-band oʻz kuchini yoʻqotgan deb hisoblansin;

z) birinchi paragrafning nomi quyidagi tahrirda bayon qilinsin:

“§1. Yuridik shaxslardan olinadigan foyda soligʻi boʻyicha imtiyozlar”;

i) 6-band quyidagi tahrirda bayon etilsin:

“6. Yuridik shaxslarning soliq solinadigan foydasi ishlab chiqarishni modernizatsiyalashga, texnik va texnologik jihatdan qayta jihozlashga, yangi texnologik jihoz xarid qilishga, ishlab chiqarishni yangi qurilish shaklida kengaytirishga, ishlab chiqarish ehtiyojlari uchun foydalaniladigan binolar va inshootlarni rekonstruksiya qilishga, ushbu maqsadlar uchun berilgan kreditlarni qaytarishga, lizing obyekti qiymatining oʻrnini qoplashga yoʻnaltiriladigan mablagʻlar summasiga, tegishli soliq davrida hisoblangan amortizatsiyani chegirib tashlagan holda, biroq soliq solinadigan foydaning 30 foizidan koʻp boʻlmagan miqdorda kamaytiriladi”;

k) quyidagi mazmundagi 6¹-band bilan toʻldirilsin:

“6¹. Yuridik shaxslardan olinadigan foyda soligʻi boʻyicha imtiyoz tovarlar (ishlar, xizmatlar) ishlab chiqarishni amalga oshiruvchi soliq toʻlovchilar tomonidan qoʻllaniladi”;

l) 7-bandda “bazasidan” degan soʻz “foydasidan” degan soʻz bilan almashtirilsin;

m) 9-band quyidagi tahrirda bayon etilsin:

“9. Soliq solinadigan foydani ushbu Nizomning 6-bandida koʻrsatilgan maqsadlarga yoʻnaltiriladigan mablagʻlar summasiga kamaytirish xarajatlar amalga oshirilgan soliq davridan eʼtiboran, yangi texnologik jihoz boʻyicha esa u foydalanishga topshirilgan paytdan eʼtiboran besh yil ichida amalga oshiriladi. Agar joriy soliq davrida yuqorida taʼkidlab oʻtilgan maqsadlar uchun yoʻnaltiriladigan mablagʻlar summasi soliq solinadigan foydaning 30 foizidan oshsa, qolgan summa kelgusi soliq davrlarida oʻrnatilgan muddatda chegirilib borishi mumkin.

Bunda, soliq solish foydasining kamaytirilishi har hisobot (soliq) davrida oʻsib boruvchi yakun bilan amalga oshiriladi”;

n) 10-band quyidagi tahrirda bayon etilsin:

“10. Agar hisobot (soliq) davrida hisoblangan amortizatsiya summasi ishlab chiqarishni modernizatsiyalash, texnik va texnologik qayta jihozlashga, ushbu maqsadlar uchun berilgan kreditlarni qaytarishga va lizing obyekti qiymatining oʻrnini qoplashga yoʻnaltirilgan mablagʻlar summasidan oshsa, ushbu hisobot (soliq) davrida yuridik shaxslardan olinadigan foyda soligʻi boʻyicha soliq solish foydasining kamaytirilishi amalga oshirilmaydi”;

o) 21-bandda “foyda soligʻi” degan soʻzlar “yuridik shaxslardan olinadigan foyda soligʻi” degan soʻzlar bilan almashtirilsin.