Yaponiya Hukumati tomonidan Toshkent shahridagi Respublika shoshilinch tibbiy yordam koʻrsatish markazini zamonaviy tibbiyot asbob-uskunalari bilan jihozlash uchun 793 mln. Yaponiya yeni miqdorida va Oʻzbekiston Respublikasi vakillarining Yaponiyada taʼlim olishlarini tashkil etish uchun 383 mln. Yaponiya yeni miqdorida begʻaraz asosda ajratilgan mablagʻlardan samarali foydalanilishini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Bosh vazirining oʻrinbosari H.S. Karomatov har ikki loyiha boʻyicha Ayirboshlash notalarini Oʻzbekiston Respublikasi Hukumati nomidan imzolashga vakil qilinsin.

2. Quyidagilarga:

Oʻzbekiston Respublikasi Sogʻliqni saqlash vazirligi hamda Oliy va oʻrta maxsus taʼlim vazirligiga begʻaraz yordamni olish va tibbiyot asbob-uskunalarini yetkazib berish hamda respublika vakillarining taʼlim olishlari uchun ajratilayotgan mablagʻlardan maqsadli foydalanishga doir barcha tartibotlarni Yaponiya tomoni bilan kelishilgan muddatlarda rasmiylashtirish;

Oʻzbekiston Respublikasi Tashqi iqtisodiy faoliyat milliy bankiga Yaponiya Hukumatining yuqorida koʻrsatilgan grantlariga hisob-kitob xizmati koʻrsatish vazifasi yuklansin.

3. Oʻzbekiston Respublikasiga begʻaraz yordam doirasida kelayotgan asbob-uskunalar, texnika va xizmatlar boj toʻlovlaridan ozod qilinsin.

4. “Oʻzbekiston havo yoʻllari” milliy aviakompaniyasi va “Oʻzbekiston temir yoʻllari” davlat-aksiyadorlik kompaniyasi grant hisobiga kelayotgan tibbiyot asbob-uskunalarining yuklarning aeroportda va tovar bekatida saqlanishining butun davri mobaynida toʻxtovsiz ortilishi va tushirilishini hamda omborxonaga joylashtirilishini taʼminlasinlar.

5. Moliya vazirligi Yaponiya tomonining begʻaraz yordamga hisob-kitob xizmati koʻrsatganligi uchun vositachilik haqini toʻlashga mablagʻ ajratishini va Oʻzbekiston Respublikasi Sogʻliqni saqlash vazirligi hamda Oliy va oʻrta maxsus taʼlim vazirligining soʻmlardagi mablagʻlari konvertatsiya qilinishini nazarda tutsin.

6. Tashqi ishlar vazirligi Oʻzbekiston Respublikasi Sogʻliqni saqlash vazirligi va Oliy va oʻrta maxsus taʼlim vazirligining buyurtmanomalari boʻyicha mazkur loyihalarni amalga oshirishda qatnashayotgan xorijiy mutaxassislarga kirish vizalarining konsullik yigʻimlari undirilmasdan belgilangan tartibda rasmiylashtirilishini taʼminlasin.

7. Ichki ishlar vazirligi Oʻzbekiston Respublikasi Sogʻliqni saqlash vazirligi hamda Oliy va oʻrta maxsus taʼlim vazirligining buyurtmanomalari boʻyicha mazkur loyihalarning xorijiy mutaxassislariga koʻp martalik vizalar berilishi va ularning muddati uzaytirilishini, shuningdek vaqtinchalik roʻyxatdan oʻtkazish va vaqtincha roʻyxatdan oʻtkazish muddati uzaytirilishini, ularni davlat bojlari toʻlashdan ozod qilgan holda, taʼminlasin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari H.S. Karomatov zimmasiga yuklansin.