|
Hujjat kuchini yo‘qotgan 22.02.2021
|
Oʻzbekiston Respublikasi Vazirlar Mahkamasining
qarori
SANʼATShUNOSLIK ILMIY-TADQIQOT INSTITUTI FAOLIYATINI YaNADA RIVOJLANTIRISh TOʻGʻRISIDA
LexUZ sharhiMazkur qaror Oʻzbekiston Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.
Sanʼatshunoslik ilmiy-tadqiqot institutining izlanishlar yoʻnalishlari Fanlar akademiyasi ijtimoiy-gumanitar ilmiy muassasalarida olib borilayotgan tadqiqotlar bilan uzviy bogʻliqligini hisobga olib, institutda olib borilayotgan fundamental tadqiqotlarni yuqori darajada tashkil qilish va samarali boshqarish, olib borilayotgan tadqiqotlarning jamiyat ijtimoiy hayotidagi ahamiyatini oshirish hamda institutning moddiy-texnika bazasini rivojlantirish maqsadida Vazirlar Mahkamasi qaror qiladi:
1. Oʻzbekiston Respublikasi Fanlar akademiyasining Oʻzbekiston Badiiy akademiyasi tarkibidagi Sanʼatshunoslik ilmiy-tadqiqot institutini Oʻzbekiston Respublikasi Fanlar akademiyasi tarkibiga oʻtkazish toʻgʻrisidagi taklifi maʼqullansin.
2. Oʻzbekiston Respublikasi Moliya vazirligi 2010-yilda Sanʼatshunoslik ilmiy-tadqiqot instituti binosini kapital taʼmirlash va uning moddiy-texnika bazasini mustahkamlash boʻyicha ishlarni moliyalashtirishni nazarda tutsin.
3. Oʻzbekiston Respublikasi Fanlar akademiyasi Adliya vazirligi hamda boshqa manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.
4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S.Qosimov zimmasiga yuklansin.
Oʻzbekiston Respublikasi Bosh vaziri Sh. MIRZIYOYEV
Toshkent sh.,
2009-yil 19-may,
141-son
