O‘zbekiston Respublikasi Prezidentining “O‘zbekistonda futbolni rivojlantirishga doir qo‘shimcha chora-tadbirlar to‘g‘risida” 2006-yil 1-maydagi PQ-338-son qarorini bajarish, shuningdek futbol klublari, O‘zbekiston Futbol federatsiyasi va uning hududiy bo‘linmalarining moddiy-texnika bazasini yanada mustahkamlash maqsadida Vazirlar Mahkamasi qaror qiladi:

1. Professional futbol klublari, O‘zbekiston Futbol federatsiyasi va uning hududiy bo‘linmalari 2009-yil 1-apreldan boshlab uch yil muddatga:

respublikada ishlab chiqarilmaydigan, stadionlarni rekonstruksiya qilish va futbol klublarining moddiy-texnika bazasini mustahkamlash uchun zarur bo‘lgan chetdan keltiriladigan jihozlar, asbob-uskunalar va materiallar uchun bojxona to‘lovlarini (bojxonada rasmiylashtirish uchun yig‘imlardan tashqari);

soliqlar va yig‘imlarning barcha turlarini (yagona ijtimoiy to‘lovdan tashqari) to‘lashdan ozod qilinsin, bo‘shab qoladigan mablag‘lar futbolni rivojlantirishga maqsadli yo‘naltirilsin.

2. O‘zbekiston Respublikasi Davlat soliq qo‘mitasi ko‘rsatib o‘tilgan imtiyozlar berilishi munosabati bilan bo‘shab qoladigan mablag‘lardan maqsadli foydalanilishi yuzasidan qat’iy nazoratni amalga oshirsin.

3. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S.Azimov va O‘zbekiston Respublikasi Bosh vazirining o‘rinbosari R.S. Qosimov zimmasiga yuklansin.