Iqtisodiyot real sektorining malakali mutaxassislarga boʻlgan ehtiyojlarini qondirish hamda umumtaʼlim va umumkasbiy fanlar chuqur oʻrganilgan holda menejerlar tayyorlashni tashkil etish maqsadida Vazirlar Mahkamasi qaror qiladi:

1. Xalqaro Vestminster universiteti va Oʻzbekiston Respublikasi Oliy va oʻrta maxsus taʼlim vazirligi Oʻrta maxsus, kasb-hunar taʼlimi markazining Toshkent shahridagi Xalqaro Vestminster universiteti huzurida ingliz tili chuqur oʻrganilgan holda aniq fanlar yoʻnalishi boʻyicha 360 oʻquvchi oʻrinli akademik litsey tashkil etish toʻgʻrisidagi taklifi qabul qilinsin.

2. Belgilansinki:

akademik litsey faoliyatiga tashkiliy va oʻquv-metodik rahbarlik Oʻrta maxsus, kasb-hunar taʼlim markazi tomonidan Toshkent shahridagi Xalqaro Vestminster universiteti bilan birgalikda amalga oshiriladi;

akademik litseyga oʻquvchilar belgilangan tartibda, Toshkent shahridagi Xalqaro Vestminster universitetining taʼlim yoʻnalishlari oʻziga xosligiga muvofiq oʻquv yiliga 150 nafar qabul qilinadi;

akademik litseyda oʻqitish davlat taʼlim standartlariga, oʻrta maxsus, kasb-hunar taʼlimining oʻquv rejalari va dasturlariga muvofiq amalga oshiriladi;

Toshkent shahridagi Xalqaro Vestminster universiteti akademik litseyda oʻqitishga universitetning yuqori malakali, tajribali mutaxassislari jalb etilishiga koʻmaklashadi.

3. Akademik litsey quyidagi manzilga joylashtirilsin: Toshkent shahri, Shahrisabz koʻchasi, 25.

Oʻzbekiston Respublikasi Oliy va oʻrta maxsus taʼlim vazirligi Davlat mulki qoʻmitasi bilan birgalikda yuqorida koʻrsatib oʻtilgan binoni oʻquv, sport va xoʻjalik maqsadidagi barcha tutash binolar va inshootlar bilan birgalikda Toshkent davlat texnika universiteti balansidan Toshkent shahridagi Xalqaro Vestminster universiteti balansiga belgilangan tartibda, bepul asosda bersin.

Toshkent shahridagi Xalqaro Vestminster universiteti Oʻrta maxsus, kasb-hunar taʼlim markazi bilan kelishgan holda akademik litsey binolari va inshootlari rekonstruksiya qilinishini taʼminlasin, akademik litsey 2009/2010 oʻquv yili boshlanishigacha ishga tushirilsin.

4. Belgilab qoʻyilsinki:

akademik litseyning binolari va inshootlarini rekonstruksiya qilish hamda uning bundan keyingi joriy taʼminoti Toshkent shahridagi Xalqaro Vestminster universitetining oʻz mablagʻlari, homiylarning mablagʻlari va qonunchilikda taqiqlanmagan boshqa manbalar hisobiga amalga oshiriladi;

akademik litseyning pedagoglari va maʼmuriy-boshqaruv xodimlari mehnatiga haq toʻlash, shuningdek uni zarur oʻquv-laboratoriya va sport anjomlari, kompyuter texnikasi va kutubxona fondi bilan jihozlash xarajatlari taʼlimga ajratiladigan budjet mablagʻlari doirasida Oʻzbekiston Respublikasi Davlat budjeti mablagʻlari hisobiga amalga oshiriladi.

5. Akademik litseyni oʻz vaqtida ishga tushirish maqsadida, istisno tariqasida, Toshkent shahridagi Xalqaro Vestminster universitetiga:

akademik litseyning binolari va inshootlarini rekonstruksiya qilish ishlarini loyihalashtirish bilan bir vaqtda amalga oshirishga;

loyihalashtirish va rekonstruksiya qilish ishlarini bajarishga bosh loyiha va qurilish tashkilotini ularning ish tajribasi mezonlaridan va zarur moddiy-texnika resurslari mavjudligidan kelib chiqqan holda, tanlov oʻtkazish yoʻli bilan belgilashga ruxsat berilsin.

6. Oʻzbekiston Respublikasi Davlat arxitektura va qurilish qoʻmitasi akademik litseyni rekonstruksiya qilish boʻyicha loyiha va qurilish ishlarini ekspert va texnik hujjatlar bilan taʼminlasin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari N.M. Xanov va R.S. Qosimov zimmasiga yuklansin.